MARK 14 - Tupuri Bible

Jar wo de kiɗ tawgi ma baa Yeso

¹ Naw raw gwaʼ ge ɓog maga few Pag wo de few hoole ma bay defõõren joŋe. Waŋre ma siɗ jag ne Baa wo de jar ma ndar wer wããre Baa raw wo kiɗ faage ma baa Yeso go freŋ doo jarn wo, maga saara mo iin go.

² Werga á hay wo riŋ kããra ga : saara mo baan wur fewn maga jar mo hoo ge wo ciŋ de wããre wa.

Wãy po kaa trusa ne Yeso ti

³ Yeso wo Betani liŋ ni Simoŋ je cíi no, á hay gesiŋ re hoole mokay, wãy po raw kalge le de klobo doo go de bagge de trusa maga yee solay pur debaŋ, diŋ bii trusa maga de joŋge de koo po à ɗen ga nar. Á raw mbug jag klobon go, raw kaa trusan ne Yeso ti.

⁴ Jar po yoo jar maga hay wo ni, ɓil ɓaara raw sõõ ge, á raw wo wii kããra ga : Á ɓlag trusa sen go de koɗ n a gahãyla?

⁵ À hay nen maga à de yeen go daŋ solay kis kis swaʼa ma hãge ne jar coo wo. Á raw wo caa wer wãyn de hãã debaŋ.

⁶ Ama Yeso raw wãã ɓen ga : Men we wãyn go eŋ ɗa la. Nday gay coo ɓe le la? Fen maga á joŋ ti ɓi mokay de el debaŋ.

⁷ Werga nday joŋ ge yaŋ mbay de jar coo wo see ɓay la tum tum, nday da we ga nday joŋ ra de el no, nday mbay ma joŋ ge. Ama ma ɓi, nday daʼ me ge see ɓay la tum gà.

⁸ Wãyn joŋ diŋ fen maga egre ɓe de kããge ti ɓe, á kaa trusa me se ma ʼwũy mege ma ɓoʼ me ɓi tuu.

⁹ Kidolgi ndi riŋ nday, ti ngel maga á sii gi Wããre ma de Cõõren go ti tamsir mo krub ɓuy kay, re maga wãy sen joŋ see ɓi mokay, á siɗn gi go ni ma ɗig ti ti ɓe.

Judas go mbaŋ ma hã Yeso go ne waŋren wo doo

¹⁰ Jobo boŋ yoo jar ma wer ɓe ma hwal ti ɓog wo, à ɗen ga Judas Iskariyode, raw woge see waŋre jar ma siɗ jagn wo ga se da ga se hã Yeso go ne hara.

¹¹ Á raw wo laa wããre sen go ɓil feh debaŋ, raw wo wiigi ɓe ga saara hã solay ne hẽn lay. Wersen Judas raw tĩĩ wer kiɗ faage ma hã Yeso go ne hara so.

Yeso wo de re hoole few Pag de jar ma wer ɓen wo

¹² Ti tĩĩgi wer naw few hoole ma bay defõõren, wur naw maga à ngaɗ sããre wo ma rege ti few Pagn mono, jar ma wer Yeson raw wo wiigi ɓe ga : Ndo da ga wùr mo joŋ rege ti few Pagn la gen ɓa?

¹³ Blam sen Yeso raw laa jar ma wer ɓen wo wo ɓog day wii ra ga : See we wo ɓi leege, nday wo yaŋ yiŋgi de jobo de hoole bii ti. Ni nday maŋ we blam ɓe,

¹⁴ ti ngel maga á wo kalge ni mono, riŋ we je tiŋ ga : Waŋ de wiigi ga ngel maga se re hoole few Pag de jar se ma wersen wo ni genla?

¹⁵ Ni á kaŋ nen ɓay yaŋ ti tiŋ ma ciŋ ti kẽẽ kluu de fẽẽre lagge wo go de ʼwũygi ɓuy. Ni nday mo joŋ we fẽẽre regen ne naa ni so.

¹⁶ Jar ma wer Yeson raw wo raw ge ɓi leegen so, wo wo daʼ fẽẽren ɓuy doo ga Yeso hay riŋ ra ti ɓe nono, á raw wo joŋ rege few Pagn ni so.

¹⁷ Wur wo go coŋ ge mokay, Yeso raw wo nduugi de jar ma wer ɓe ma hwal ti ɓog wo.

¹⁸ Á wo wo lagge jag regen mokay, Yeso raw riŋ rage ga : Kidolgi ndi riŋ we, jobo yoo ɓay, nday jar maga nday de rege ɓiŋ ɓi lam, kaŋ ge taw ɓi yaŋ go.

¹⁹ Jar ma wer ɓen raw wo lawge debaŋ, raw wo wiɗgi ɓe go boŋ boŋ ɓuy. Je la ga : Bay diŋ ndi wa ga? Bay diŋ ɓi wa ga?

²⁰ Yeso raw fer wããre ne hara ga : Diŋ jobo boŋ yoo ɓay jar se ma hwal ti ɓog no, je maga wùr de her hoole nen nee ɓi gosoŋge de ɓi degaʼ mono.

²¹ Kidolgi, Wel je táabay wo ge go huugi doo wããre maga à yer ne go ti ɓe nono. Ama re yaŋ ti je maga kaŋ ge taw Wel je táabay go mokay an no. De el ɓen je sen de hay biŋ go gà nà ɗawa.

Hoole ma bay ɗage

²² De maga á lag wo rege mono, Yeso raw maŋ hoole doo ɓe, raw joŋ suseʼ wo ne Baa ti ɓe, raw car nen ɓe go, raw hãge ɓe ne hara, raw riŋ rage ga : Far we ne, á mokay diŋ hõõgese ɓi.

²³ Blam sen á raw maŋ wehãn de yii ɓili, raw joŋ suseʼ ne Baa, raw hãge ɓe ne hara, á raw wo joge ɓe ɓuy.

²⁴ Á raw riŋ rage ga : Á mokay diŋ cíi ɓi, ma kaŋ nen jar ti barge maga Baa fer bagge ɓe de jar téebeere wo mono, á kaa ge go ti re jar ngaɓa.

²⁵ Kidolgi ndi riŋ nday, ndi jo ge yiin gà so has, hãã ndi wo jo yii ma defayn go ti twaywaŋ mani Baan mono.

²⁶ Á raw wo ʼwaa siŋ few no, blam sen saara raw wo rawge ti húulì maga koore Olifiye wo ti ɓe mono.

Yeso ga Piyer kaŋ kiŋ yaŋ ga se ko se gà

²⁷ Yeso raw riŋ jar ma wer ɓen wo ga : Nday men me ge yaŋ go ɓuy, werga á go de yerge ga : Ndi ii gi je koɗ sããren wo go, sããren dus gi wo ɓil yaŋ go boŋ boŋ ɓuy lay.

²⁸ Ama ndi wo we ferge go bir gi no, ndi raw ge wo pel ɓay Galile.

²⁹ Piyer raw riŋgi ɓe ga : Hay bà ga jar lan men mo wo we go ɓuy layblaʼ, ma ɓi, ndi men mo go gà.

³⁰ Yeso raw fer wããre ne hẽn ga : Kidolgi ndi riŋ mo, de suŋ ma waran mo kaʼ tuu, taŋgu maga kag wo dog roo ma de ɓog mokay, ndo kaŋ kiŋ yaŋ ɓaale swaʼ ga ndo ko me gà.

³¹ Ama Piyer raw ferge wãã ge ɓe go de cõõre tigriŋ pa ga : Riŋ bà ga à id naa go de kããra layblaʼ, ndi kaŋ kiŋ ga ndi ko mo gà gà hase. Jar ma wer ɓe ma lan ɓuy wãã wo doosen no lay.

Yeso de tosge Getsemane

³² Blam sen á raw wo nduugi ti ngel maga à ɗen ga Getsemane, Yeso raw riŋ jar ma wer ɓen wo ga : Lag we lam taʼ, ndi wo tosge ɗa.

³³ Á raw hoo Piyer, Jag wo de Jaŋ wer ɓe. Hẽẽne raw tĩĩ wer joŋ ge ɓe, se law see ɓe debaŋ lay.

³⁴ Á raw riŋ rage ga : Jiili ɓi go de caage hãã de woge ʼwar mege go, lag we lam taʼ no, lag we tenen.

³⁵ Á raw yaʼ ge wo go see ɓaara hãã ɗawa, raw leʼ monɗra tosge ga : Hayga á joŋ no, da ga bon sen mo daʼ me wa ɗa la.

³⁶ Á raw wãã ge ga : Oh Baba, ndo de kããge ma joŋ fẽẽren ɓuy, yaʼ bon sen mokay wo go see ɓi hãã ɗa la. De sen ɓuy, joŋ diŋ re maga ndi de dage ɓe mo wa, ama joŋ diŋ doo ga ndo da nono.

³⁷ Blam sen á raw ferge le see jar ma wer ɓe ma swaʼn wo, wo daʼ rage ti naa, á raw ɗe Piyer ga : Simoŋ, ndo leʼ naa pa? Ndo bay de kããge ma iggi tenen smagga wa yawla?

³⁸ Lag we go de pũygi, tos we maga nday mo leɗ go nen re ma jãɗ we ge wa. Ɓil je tabay da ga se yãã mbe jage, ama hõõgese ɓe go de gayre debaŋ.

³⁹ Á raw ferge blam tigriŋ pa, raw tosge doo ma taŋgun no pa.

⁴⁰ Blam sen á raw ferge le see jar ma wer ɓen wo, nduu daʼ rage ti naa pa, werga nen ɓaara de joŋ naa debaŋ. Wããre maga á mo fer wo ne hẽn no kay draʼ bay nen ɓaara wa.

⁴¹ Á wo le ferge ma de swaʼ mokay, á raw riŋ rage ga : Leɗ we mbay naa patala so? Ig mbay see ɓay so? Sen kãã we. Ngel a we go. Ko we nen ɓay, á go de hã Wel je táabayn ne jar ma de ɓlaggen wo doo so.

⁴² Hoo we go ciŋ, naa see. Ko we nen ɓay, bloo ma kaŋ taw ɓin yaŋ go la mbaŋ.

À baa Yeso

⁴³ Yeso de wãã reen ɗa, Judas je ma yoo jar ma wer ɓe ma hwal ti ɓogn raw age. Jar wer ɓe ngaɓa debaŋ de moslamre wo de grawre doo, laa ra le diŋ waŋre jar ma siɗ jagn wo, jar ma ndar wer wããre Baa wo de jar kluuri jar Jwif wo.

⁴⁴ Judas je kaŋ taw Yeson la, raw kaŋ nen ɓaara ti re maga se wo ge joŋ ge ɓe mono á ga : Bloo maga ndi wo ge ɓoʼ doo ne hẽn soole mono, ni á diŋ je maga nday da ga nday baa ne mo so no. Ni nday baa we ne tuu, ɗawn we de ele.

⁴⁵ Judas wo age mokay, raw yaʼ ge see Yeso, raw ɗe Yeso ga : Waŋ, raw ɓoʼ doo ne hẽn soole.

⁴⁶ Te jar lan raw wo laa doo ne hẽn ti lay, á raw wo baa ge ɓe.

⁴⁷ Ama jobo yoo jar ma ti ngel nin wo, raw naa moslam ɓe go, caa wejõõ je kluu ma siɗ jag no, caa sug ɓe go.

⁴⁸ Yeso raw riŋ jar ma age bagge ɓen wo ga : Nday a baa mege de moslamre de grawre doo ga ndi diŋ je leɗ faage no le la?

⁴⁹ Ndi hay yaŋ wo ge ɓiŋ ɓay ɓi tiŋ Baa ti naw tum ɓuy hadge, nday baa me gà. Ama ma waran a go ma leʼ ge go ti jag wããre Baa maga à yer ne go mono.

⁵⁰ Blam sen jar ma wer ɓen raw wo men ge ɓe go, daŋ wo de ɗeere ɓuy.

⁵¹ Wejõõ po raw maŋ blam Yeso le, de saʼ godoŋ wer ɓe tawa. Jar ma baapo yaŋ wo yoo jar ni, raw wo hooge de ɓe ga saara baa ne,

⁵² á raw men godoŋ wo go ne hara doo ni, raw daŋ ge glog koɗe.

Yeso pel jar kluuri ma cag ren wo

⁵³ Á raw wo age de Yeso pel je kluu ma siɗ jag no, waŋre jar ma siɗ jagn wo de jar kluuri jar Jwifn wo de jar ma ndar wer wããre Baa ɓuy wo de tayge ni.

⁵⁴ Piyer raw maŋ blam Yeso le hãã meʼ meʼ, raw kalge liŋ ni je kluu ma siɗ jag no, raw hayge yoo jar gor jagjiŋ ɓen wo, bor wùu.

⁵⁵ Waŋre jar ma siɗ jagn wo de jar kluuri ma cag wããre wo ɓuy kiɗ wo faage ma baw Yeso de wããre ma ʼwarge ɓe go. Ama á laa wo daʼ faage wããre po ti ɓe gà.

⁵⁶ Wersen jar debaŋ raw wo car wããre ma bay ngar ne Yeso see, de sen ɓuy jag ɓaara bay tayge boŋ wa pa.

⁵⁷ Jar po yoo ɓaara raw wo pud gi ciŋ, car wããre ne hẽn see ga :

⁵⁸ Wùr laa ga á wãã ga se mbug gi tiŋ Baa maga jar téebeere boo wo mo kaʼ ge go, síilí swaʼ se fer ge boo ma tigriŋ, boo ge sen diŋ jar téebeere wo gà so.

⁵⁹ Ama hay bà wããre sen mokay pa, jag ɓaara bay de tayge ti ɓe wa pa.

⁶⁰ Je kluu ma siɗ jagn raw urgi go ciŋ pel jar ɓuy, raw wii Yeso ga : Ɓa ndo fer wããre go ni gà has ge? Jar sen wãã wo ti ɓo mo deŋ nà gahãy ɓa?

⁶¹ Ama Yeso laa wãã re gà hase. Je kluu ma siɗ jagn fer wiigi ɓe tigriŋ pa ga : Ɓa ndo mbo diŋ Mesi mbo ge? Ndo diŋ Wel Baa ma bay ɗag ga jar togoɗ ne mbe mo yawla?

⁶² Yeso raw fer wããre ga : ãã, ndi diŋ se mbi, day nday ko ge Wel je táabay yaŋ go de hayle nen ti ɓaŋ war Baa ma de egre daŋge ɓuyn yeʼe, day nday kon ge yaŋ le ferge ciŋ ti swaare cwaa ge gesiŋ caw pa.

⁶³ Wersen je kluu ma siɗ jagn raw ngar õõbe ɓen go, raw wiigi ga : Naa bay de sãy wii jar ti wããre wa so hase.

⁶⁴ Nday laa we. Á ɗar Baa, nday ɗig gahãy? Á wo ɓuy raw wo wãã ge ga wããren baw ne, á nen ʼwar ge go.

⁶⁵ Blam wããre sen jar po yoo ɓaara raw wo tĩĩ wer tuf sããre ne Yeso ti, raw wo kuu nen ɓe, raw wo srogge ɓe de doo, riŋ wo ga : Wãã ne wùr ɗa so, wose de joŋ moge mo deŋ ne? Jar gor jagjiŋ je kluu raw wo baa Yeso, raw wo mbarge ɓe de doo haw.

Piyer ga se ko Yeso gà

⁶⁶ Piyer hay de hayle gesiŋ ɓi feele ni je kluu no, maygebe je kluu ma siɗ jagn raw nduugi.

⁶⁷ Á raw ko Piyer bor wùu yeʼe, raw sur gi ɓe debaŋ, raw riŋgi ɓe ga : Ɓa ndo hay le wer Yeso, bloo je Nasaredn la lay ga?

⁶⁸ Piyer raw kaŋ kiŋ ga : Ndi ko gà ndi bay de laa wer re maga ndo de wãã ge ɓe mo deŋ wa ɓuy yaw. Blam sen á raw kalge wo go jagjiŋ siigi. Kag ma taŋgu raw rage.

⁶⁹ Ama maygeben raw koge ɓe, raw wii jar maga wo ti ngel ni ga : Bloon mo yeʼ see ɓay hay yoo ɓaara lay.

⁷⁰ Piyer raw kaŋ kiŋ ga se ko gà pa. Wo iggi blam sen meʼ ẽ, jar maga hay wo ni raw wo riŋ Piyer pa ga : Kidolgi ndo hay we le yoo ɓaara, werga ndo de see ɓo, ndo diŋ je Galile lay.

⁷¹ Blam sen Piyer raw haʼ ge go jag ciŋ kloŋ ga : Ndi ko bloo se ga ndo wãã ti ɓe mokay gà.

⁷² Ni tuuseŋ kag ma de ɓogn raw raage. Piyer raw ɗig ti wããre maga Yeso hay riŋ ga : Taŋgu maga kag wo dog roo ma de ɓog mokay, ndo kaŋ kiŋ yaŋ ti ɓi ɓaale swaʼa ga ndo ko me gà mono. Blam sen á raw cagge go de roo waa.