MARK 10 - Tupuri Bible

Yeso had jar ga bus naare wa

¹ Yeso raw urgi le ni, kal rawge ɓi sir Jude, raw cegaɗge go faale Jurdẽẽ. Jar fer le tayge see ɓe ni ngaɓa debaŋ pa. Á raw tĩĩ wer had rage doo ga se joŋ tum no mono.

² Jar po yoo Farisiyẽẽ raw wo yaʼge see ɓe maga saara mo baan de wããre. Á raw wo wiigi ɓe ga : Wããre Baa yaŋ mbe de hã faage ga jobo mo bus wãy ɓe go ge?

³ Yeso raw fer wããre ne hara doo kay ga : Moyis hay hã we diŋ wããre ma hon ne?

⁴ Á raw wo riŋgi ɓe ga : Moyis hay hã faage ga wosela leʼ we go bus wãy ɓe no, á mo hã kefder ne hẽn doo maga kaŋ nen jar go ga se busn we go, ni á mo bus mbe go so.

⁵ Blam sen Yeso raw fer wããre ne hara ga : Moyis yer wããre sen we doosen, wer maga nday bay yãã jag wa has mono.

⁶ Ama le ti tĩĩ gi wern, de maga Baa joŋ fẽẽren le mo ɓuy, á de yerge ga : Baa joŋ je twar wo de wãy.

⁷ Diŋ wersen, je twar men ge pan ɓe wo go de man ɓe ma woge hayge de wãy ɓe,

⁸ á wo ɓog ɓuy raw wo kolge go diŋ hõõgese po boŋ. Á bay wo go sar sar ɓog wa so, ama á kol wo go boŋ.

⁹ Wersen fen maga Baa tayn we go boŋ no, je tabay mo blaw ɓil ɓe go wa so.

¹⁰ Á wo wo le ferge liŋ mokay, jar ma wer Yeson fer wo wiigi ɓe ti wããre sen pa.

¹¹ Á raw riŋ rage ga : Hayga jobo bus wãy ɓe we go, fer we da ma tigriŋ no, ni á joŋ wãy ɓe ma taŋgun de ɓlagge, de ngaɓge doo ga á men wãy ɓen go, raw lengãɗge de ma tigriŋ nono.

¹² Hayga wãy men war ɓe we go, raw we da ma tigriŋ no, ni á joŋ war ɓe ma taŋgun de ɓlagge, de ngaɓge doo ga á men war ɓen go raw lengãɗge de ma tigriŋ lay.

Yeso kaŋ bosaʼ ne weere kleere wo ti

¹³ Jar raw wo age de kamliiri wo pel Yeso ga á mo kaŋ bosaʼ ne hara ti, ama jar ma wer Yeson raw wo ruu rage.

¹⁴ Yeso wo koge doosen mokay, ɓil ɓe raw sõõge, á raw riŋ jar ma wer ɓen wo ga : Men weere kleere wo le age see ɓi, dig ra we wa, werga wo ge lagge ti twaywaŋ mani Baan diŋ jar maga wo doo saara no mono.

¹⁵ Kidolgi ndi riŋ nday, je maga yãã re twaywaŋ mani Baan we doo weklee no gà no, á kãã ma woge ni gà hase.

¹⁶ Blam sen, á raw hoo kamliirin wo doo ɓe, raw kaŋ doo ɓe ne hara ti boŋ boŋ ɓuy, raw kaŋ bosaʼ ne hara ti.

Je ma de horog debaŋ a see Yeso

¹⁷ Yeso kal rawge, jobo raw age le de ɗee, raw laa kõyõgre gesiŋ pel ɓe, raw wiigi ɓe ga : Waŋ ma de ele, ndi mo joŋ diŋ mayse maga ndi kol yaŋ go tenen caw tum ne?

¹⁸ Yeso raw riŋgi ɓe ga : Wer may ga ndo ɗe me ga je de el ne? Je tabay po bay de el wa, say diŋ Baa boŋ.

¹⁹ Ndo yaŋ de koge, jag liŋgi ga : ii húulí wa, lengãɗ de wãy jobo wa, joŋ freŋ wa, caa wããre ne jobo se wa, joŋ jobo de ɓlagge wa, hoo sug ti pan ɓo wo de man ɓo.

²⁰ Bloon raw fer wããre ga : Waŋ ɓi no, sen mo deŋ ɓuy, ndi go de joŋge doo ga á de wããge nono, le ti klee ɓi ɓaa.

²¹ Yeso raw koge ɓe nen ɓe de ele, raw riŋgi ɓe ga : Fen po yaŋ go de gwaʼ ge see ɓo boŋ. See, yeɗ fẽẽre ɓon wo go ɓuy, hã solay ɓe go ne jar coo wo, ni ndo wo ge yaŋ daʼ horog ɓon wo ciŋ, see le maŋ blam ɓi.

²² Ama bloon wo laa wããre sen mokay, á raw caa jiili go debaŋ, kal rawge, werga á de horog debaŋ.

²³ Yeso raw ko jar ma wer ɓe maga wo de lagge ɓiŋ ɓe mono, raw riŋ rage ga : Á gaali debaŋ maga jar ma de horog debaŋ wo wo laage ti twaywaŋ mani Baa no.

²⁴ Jar ma wer ɓen raw wo ngrisgi wer wããre se no. Ama Yeso raw riŋ rage pa ga : Nday weere ɓin wo, á de gaali debaŋ ma kalge ti twaywaŋ mani Baan mbe.

²⁵ Ama manyoŋyoŋ kal go ti rum paʼdal gus de daŋ maga je horog wo kalge ti twaywaŋ mani Baan mono.

²⁶ Jar ma wer ɓen fer wo go ngelge ti wããre sen daŋge pa so yaw, raw wo wii kããra ga : Ama hayga á yaŋ doosen no kay, wose kãã ma daŋge yaŋ go ne?

²⁷ Yeso raw ko rage, raw wii rage ga : Fen maga joŋ doo jar téebeere wo gà, Baa kãã ma joŋge ɓe, werga mopo bay ẽgge ɓe joŋge wa.

²⁸ Blam sen Piyer raw riŋgi ɓe ga : Coʼ sug ɓo, wùr men fẽẽre wùrn wo we go ɓuy, wur maŋ blam ɓo we.

²⁹ Yeso raw fer wããre ga : Kidolgi ndi riŋ nday, hayga jobo men tiŋ ɓe we go, noga weregeman ɓe wo, mayregeman ɓe wo, man ɓe, pan ɓe, weere ɓe wo, payre ɓe wo wer ɓi, wer Wããre ɓi ma de Cõõren lay no,

³⁰ je sen daʼ ge yaŋ de daŋ sen ɓaale kis nen naw maga á patala ni mono, tiŋri, weregemanbe, mayregemabe, de maabe, weere de payre wo, daʼ bon lay, day kol ge yaŋ tenen caw tum ti wur naw ma blam tawn pa.

³¹ Ama jar debaŋ maga wo patala diŋ jar ma pel wo, kol ge wo yaŋ go diŋ jar ma blam wo, jar debaŋ maga wo patala diŋ jar ma blam tawn wo, kol ge wo yaŋ diŋ jar ma pel tawn wo.

Yeso fer wiigi go ti húulí ɓe wo de kalge ɓe go ciŋ tigriŋ pa

³² Á hay wo ti faage ma woge Jerusalem. Yeso de kalge seege pel jar ma wer ɓen wo, werga hẽẽne de caa jar ma wer ɓen wo, jar maga wo de maŋ blam ɓaaran mo ɓuy, hẽẽne de caa rage lay. Yeso raw hoo jar ma wer ɓe ma hwal ti ɓog wo see ɓe tigriŋ pa, raw tĩĩ wer riŋ rage ti re maga joŋ ge se yaŋ gus mono.

³³ Á raw riŋ rage ga : Coʼ we sug ɓay, naa de ɗii gi wo Jerusalem, day à hã ge Wel je táabay yaŋ go ne waŋre jar siɗ jagn wo de jar ma ndar wer wããre Baa wo doo, maga á mo cag wo wããre ɓe ga ʼwar ne go, hãn ge wo yaŋ go ne jar maga bay wo ti jag Baa wa doo.

³⁴ Jar sen feg ge wo yaŋ ti ɓe, tuf gi wo sããre yaŋ ne hẽn ti, jwagn ge wo yaŋ de mbreŋ, ʼwarn ge wo yaŋ go lay. Síilí wo sii gi blam húulí ɓen swaʼa, á fer ge mbe go birgi pa ane.

Jag wo de Jaŋ wii wo Yeso

³⁵ Blam sen, Jag wo de Jaŋ, weere mani Sebeden wo, raw wo age see Yeso, raw wo wiigi ɓe ga : Waŋ wùr no, ɓil wùr da ga ndo mo joŋ fen maga wùr wii mo ti ɓe ne wùri.

³⁶ Yeso raw wii rage ga : Nday da ga ndi mo joŋ mayse we ne?

³⁷ Á raw wo fer wããre ne hẽn ga : Ti ngel maga ndo wo we hayge ti waŋ ɓo ma de togoɗgen no, ni ndo mo hã faage ne wùr maga wùr mo lag ɓiŋ ɓo, je la boŋ ti ɓaŋ war ɓo, je ma lan boŋ ti ɓaŋ gùr ɓo lay.

³⁸ Ama Yeso raw riŋ rage ga : Nday bay de ko fen maga nday wiin mo wa. Nday kãã mbay yaŋ ma jo bon maga ndi de woge joge ɓe mono noga nday kãã mbay yaŋ ma joŋ batem maga à day woge joŋ batem ɓi de ɓe mo lay yawla?

³⁹ Á raw wo fer wããre ne hẽn ga : Wùr kãã mbe yaŋ. Yeso raw wii rage ga : Á mbe cwãy ga nday jo mbay bon maga ndi de woge joge ɓe mono, nday joŋ mbay batem maga à day woge joŋ ndi de ɓe mono yaŋ lay.

⁴⁰ Ama ma lagge maga nday lag ti ɓaŋ war ɓi, noga ti ɓaŋ gùr ɓi mono, wãã sen bay diŋ ndi wa, ngel sen diŋ ma jar maga Baa kneʼ go ne hara mono.

⁴¹ Jar ma hwaln wo wo laa wããre sen mokay, ɓil ɓaara raw sõõ ge ne Jag wo de Jaŋ ti.

⁴² Wersen Yeso raw ɗe rage le see ɓe ɓuy, raw riŋ rage ga : Nday yaŋ de koge ga jar maga á ko ra doo waŋre jar wo no mono, yaŋ wo wãã re jar ɓaaran wo, jar kluurin yaŋ wo kaŋ nen ɓaara ga saara de wãã re ɓaaran lay.

⁴³ Ama sen mokay mo joŋ yoo ɓay doosen no wa. Hayga jobo da we ga se mo hay je kluu ɓay no, á mo kol diŋ wejõõ ɓay,

⁴⁴ Hayga jobo da we yoo ɓay ga se mo hay je kluu ma pel kããran no, á mo kol diŋ gebee ɓay ɓuy.

⁴⁵ Wersen, Wel je táabay a bay ma ɓoɗ jar joŋ peele ne hẽn wa, ama á a ma joŋ peele ne jare, ma hã tenen ɓen go huugi ma coo jar le go debaŋ jag gebeere daʼ see ɓaara.

Yeso caa nen je rẽw go ko ge

⁴⁶ Á kal wo nduugi ɓi leege Jeriko. De maga Yeso de jar ma wer ɓen wo de ngaɓa de ngaɓa jar tigriŋ wo ni pur debaŋ fer wo le go laa ge, je rẽw po à ɗen ga Bartime, je Time, hay de hayle ti jeŋ faage, roo fẽẽre ni.

⁴⁷ De maga á wo laage ga á diŋ Yeso ma Nasared mono, á raw tĩĩ wer ngar jag ga : Yeso, wel Dafid no, ko decoo ɓi ɗa la.

⁴⁸ Jar debaŋ raw wo ruugi ɓe, raw wo riŋgi ɓe ga : Hay go baʼa, ama se raw yaʼ wer ngar jag debaŋ daŋge pa yaw ga : Wel Dafid no, ko decoo ɓi ɗa la.

⁴⁹ Yeso raw ooge, kal wãã ge ga : Ɗen we le me. Á raw wo ɗe je rẽwn le, raw wo riŋgi ɓe ga : Ɗaw mbo jiili ɓo so, ur go ciŋ, á yaŋ ɗe ndo.

⁵⁰ Doo kay nono á raw laa õõbe ɓen go, raw yoo ɗee ɓiŋ Yeso.

⁵¹ Yeso raw wiigi ɓe ga : Ndo da ga ndi mo joŋ mayse mo so ne? Je rẽwn raw fer wããre ne hẽn ga : Waŋ ɓi no, fer caa nen ɓi go koge ɗa la.

⁵² Yeso raw riŋgi ɓe ga : See mbo so, hãge ɓil ɓo ne Baa caa nen ɓo we go. Nen bloo raw caage go tuuseŋ, á raw maŋ blam Yeso seege ti faage.