WÃÃRE MA DE CÕÕRE MAGA LUG YER NE MONO 19 - Tupuri Bible

Yeso wo de Sake

¹ Blam sen Yeso raw kalge ɓi leege Jeriko mokay, á raw cegaɗ ɓi leegen wo go.

² Jobo yaŋ ni à ɗen ga Sake waŋ jar yãɗ targen wo, á de horog debaŋ debaŋ.

³ Á kiɗ ga se mo ko Yeso ga á diŋ wo la, day á godogray, nen ɓe laa day ge ko ge ɓe ga doo ngaɓa no.

⁴ Á raw ur ɗee wo pel ti faage maga Yeso hee ge wo ni mono, raw ɗii gi ciŋ ti gwarga ko Yeso.

⁵ Yeso wo a ge ti ngel sen ni mokay, á raw maŋ nen ɓe ciŋ, raw riŋ Sake ga : Ɗii le go gesiŋ deparday, ndi de wo ge ni ɓo wara.

⁶ Sake raw ɗii gi le go deparday raw yãã waare ɓe go ɓil feh lay.

⁷ Jar maga kon wo mo ɓuy, raw wo ngrum jag yoo kããra ga : Bloo se deŋ wo hay ge liŋ ni je joŋ ɓlagge mokay ẽẽ pa ɓa?

⁸ Sake raw urgi go ciŋ, raw ɗe Yeso ga : Waŋkluu, coʼ sug ɓo, ndi ɓes ɓil horog ɓin go degaʼa, ndi hã go boŋ ne jar coo wo, hayga ndi hay yãã solay jobo we de joŋge nen no, ndi hã ne hẽn wer ɓe ni doo sen no ɓaale naa.

⁹ Yeso raw riŋgi ɓe ga : Jar ma ɓi tiŋ se ma kaʼ la je yãã rage go á we wara ni ɓaara, werga bloo sen la diŋ moo Abraham lay mono.

¹⁰ Werga wel je tabay á kiɗ gi, á yãã ge go diŋ jar maga hay yeɗ wo go, tob wo Baa go mono.

Jagjõõ ma de ngaɓ ge de boo biŋni

¹¹ Yeso raw wãã jagjõõ ma tigriŋ ne jar maga wo de coʼ sug wããre sen wo mono, werga á hay wo ɓiŋ Jerusalem mbaŋ, á hay ɗig wo ɓaaran ga twaywaŋ mani Baa hay á go nà de sen ni tuu.

¹² Yeso raw riŋ rage ga : Wel biŋni po, ti wer waŋ, kal rawge wo go ɓi sir po hãã, maga waŋ ma wãã re waŋren wo ɓuy mo kol se go waŋ, ni se mo fer le hay ge waŋ blam sen kway.

¹³ Taŋgu maga á de rawge mokay, á raw ɗe weere jõõre ɓe wo le hwale, raw hã solay boo ne hara boŋ boŋ ɓuy, raw riŋ rage ga : joŋ we trere de solay mokay hãã go ti wur maga ndi wo le ferge.

¹⁴ Ama jar ma ɓi sir ɓen raw wo caa hee de ɓe, á raw wo laa jar soole wo wo wer ɓe tuu ga saara da bloo sen mokay waŋ saara gà.

¹⁵ Á raw kol ge ɓe mbe go waŋ de sen ɓuy, á raw ferge le ɓi sir ɓen so. Á raw ɗe weere jõõre ɓe maga se hay hã solay ne hara la, ma ko fen maga á daɗ wo wer ɓe ni mono.

¹⁶ Ma taŋgun kal yaʼ ge le raw ɗe ge ɓe ga : Waŋ, solay maga ndo hay hãn me boŋ, ndi daʼ wer ni hwale.

¹⁷ Waŋ raw riŋgi ɓe ga : de woore, wejõõ ma de ele, ndo joŋ re ma de deele de fen ma meʼ mokay no, ndi kaŋ mo yaŋ waŋ wãã re sir taʼ taʼ hwale.

¹⁸ Ma de ɓogn raw yaʼ ge le lay, raw ɗe ge ɓe ga : Waŋ, solay maga ndo hay hãn me boŋ, ndi daʼ wer ɓe ni dwee.

¹⁹ Waŋ raw riŋ je sen lay ga : ma ɓon ndi hay mo waŋ wãã re sir taʼ taʼ dwee lay.

²⁰ Je ma lan raw yaʼ ge le lay, raw ɗe ge ɓe ga : Waŋ, solay ɓon mokay no, ndi hay yoŋ ne de kuu gi ɓi õõbe.

²¹ Ndi joŋ hẽẽne doo ɓo, werga ndo diŋ jobo ma de hãã debaŋ, ndo horge fẽẽre maga bay wo ɓo wa mbo tuu tuu, ndo wer fẽẽre maga ndo joɗ ra diŋ ndo ga lay mono.

²² Waŋ raw riŋgi ɓe ga : wejõõ ma de ɓlagge, ndi cag wããre ɓon diŋ de wããre ɓon mbe tuu. Ndo de koge ga ndi diŋ je ma de hãã, ndi horge fẽẽre maga bay wo ɓi wa tuu tuu, ndi wer fẽẽre maga ndi joɗ ra diŋ ndi ga lay.

²³ Day wer may ga ndo ɓoʼ solay ɓin ne ndi ɓi baŋke nen maga ndi de wo le fer ge ndi de daʼn de bii werga la?

²⁴ Blam sen á raw riŋ jar maga wo see ɓaara ni ga : yãã we solay ma doo ɓen go, hãn go ne je maga ɓen hwal mono. [

²⁵ Á raw wo ɗe ge ɓe ga : Waŋ, á de solay doo hwal pa mo pa la.]

²⁶ Yeso raw fer wããre ne hara ga : ndi riŋ nday, je maga ɓe yaŋ no, á hã ne hẽn ni daŋge, je maga ɓe bay wa has no, hayba ma doo ɓe ma meʼ á yãã sen go pa.

²⁷ Ama ma jar hee ɓi maga bay wo da ge ga ndi mo hay waŋ saara wa mono, á we le de ɓaara me la, id ra we go pel ɓi la.

Yeso kal ɓi leege Jerusalem

²⁸ Blam maga Yeso taw wããren go mokay, á kal rawge wo pel ɓaara ma woge Jerusalem.

²⁹ Á wo a ge mbaŋ se Betfaje wo de Betani, mbaŋ se húulì maga koore Olif wo ti ɓe mono, á raw laa jar ma wer ɓen wo wo pel ɓoge,

³⁰ raw riŋ rage ga : See we wo ɓi leege ma pel ɓay no, nday wo we day ge no, nday wo yaŋ daʼ wel gerhẽẽ de saʼ ge, jobo bay de ɗii gi faale ɓe ti boŋ wa ɗa, ni nday pogn we le, á we le de ɓe la.

³¹ Hayga jobo wii we we ga : Nday pogn le la no, ni nday riŋ we ga : Waŋkluu de sãy ɓe ti.

³² Á raw wo raw ge, wo wo daʼ ren ɓuy doo ga Yeso hay riŋ ra nono.

³³ Á wo wo pog wel gerhẽẽn mokay, jar gerhẽẽn raw wo riŋ rage ga : Nday pog wel gerhẽẽ le ɓa?

³⁴ Á raw wo ferge ne hara ga : Waŋkluu de sãy ɓe ti.

³⁵ Blam sen á raw wo age de wel gerhẽẽ ne Yeso, raw wo lag õõbe ɓaara ma kluurin wo ne hẽn ti, maŋ wo Yeso ti ɓe.

³⁶ Á wo ur see le mokay, jar raw wo blar õõbe ɓaara ma kluurin wo ti faage.

³⁷ Á wo day ge se Jerusalem mbaŋ, nen ti faage maga ɗii le ti húulì maga koore Olif wo ti ɓe, ngaɓa jar ma wer ɓen wo ɓuy raw wo joŋ fruygi debaŋ, raw wo togoɗ Baa de gẽẽge kloŋ ti fen mbuɗgi maga á ko ra wo mono.

³⁸ Á raw wo wãã ge ga : Baa mo woo Waŋ maga de a ge ti jag Waŋkluu mo caw no. Daga Baa mo lag jar pel ɓe jam, naa mo togoɗ diŋ se lay.

³⁹ Farisiyẽẽ ma yoo ngaɓan wo ni raw wo ɗe Yeso ga : Waŋ, riŋ jar ɓo ma wer ɓon wo ga á mo hem wo go baʼa.

⁴⁰ Yeso raw fer wããre ga : Ndi de riŋ nday, hayga á hem wo we go baʼ no, húulì ngar ge wo jage.

Yeso ra ti jar Jerusalem wo

⁴¹ Yeso wo a ge see ɓi leege mbaŋ mokay, á raw koge ɓe mokay, á raw rage ti jarn wo

⁴² ga : Nday de see ɓay, nday hay nen ko ge ga wur sen mo kaʼ wara la diŋ wur ma hã jam ne nday. Day á laa ko ge doo ɓay ga : nday kãã ma ko ge ɓe ge ga so.

⁴³ Werga naw po joŋ yaŋ wurpo maga jar hee ɓay yiŋ gi wo ti ɓay yaŋ go de fẽẽre dur gi ma de egre wo, yãɗ wo jag ywaalen wo yaŋ go doo ɓay ɓuy, gig gi wo yaŋ go ne nday ti ɓuy lay.

⁴⁴ Á taw ge wo nday go de jar ɓay wo ɓuy, men ge wo húulì ne nday de jag ge ti kẽẽ la boŋ ga hase, werga nday laa ko wur maga Baa hay a kay we ge de ɓe gà mono.

Yeso ɓi tiŋ Baa

⁴⁵ Yeso raw kalge ɓi tiŋ Baa, raw nii jar trere maga á wo yeɗ fẽẽre doo kããran wo go,

⁴⁶ raw riŋ rage ga : á go de yerge ga : Tiŋ ɓin joŋ ge diŋ tiŋ ma tos ge, ama ma ɓay nday raw kol ge ɓe go diŋ tiŋ ma yoŋ jar freŋ wo le la?

⁴⁷ Yeso had jar ɓi tiŋ Baa tum, waŋre ma siɗ jag wo de jar ma ndar wer wããre Baa wo, de waŋre jar wo ɓuy, raw wo kiɗ gi ga saara ʼwar Yeso go.

⁴⁸ Ama á laa wo daʼ faage sen ga : werga jar ɓuy hay wo coʼ sug wããre ɓen de el debaŋ.