WÃÃRE MA DE CÕÕRE MAGA LUG YER NE MONO 18 - Tupuri Bible

Jagjõõ ma de ngaɓ ge de wãy dwur wo de je cag wããre jar no

¹ Blam sen Yeso raw wãã jagjõõ po ne hara, ma kaŋ nen ɓaara ga á mo tos wo tum tum, mo gay wo doo tos ge wa hase.

² Á raw riŋ rage ga : Je cag wããre jar po hay yaŋ ɓi leege po, bay joŋ hẽẽne doo Baa wa, bay hoo sug ti jobo wa lay.

³ Wãy dwur po ɓi leege sen ni, a wiɗ gi ɓe tum lay ga : Blaw wùr go de je hee ɓin ɗa la, blaw wùr go de je hee ɓin ɗa la.

⁴ Ig debaŋ je cag wããren laa day ge ga : blam sen á raw wãã ge de ɓil ɓe ga : ndi bay mbi joŋ hẽẽne doo Baa wa, ndi bay hoo sug ti jobo mbi wa layblaʼ,

⁵ ama gayre maga wãy dwur se deŋ de gay mege mokay, ndi cag wããre ɓen go ne hẽne, hayga ndi joŋ we no ga no, á men a ge gay mege gà.

⁶ Yeso raw wãã ge tigriŋ pa ga : Coʼ we sug ɓay laa wããre maga je se ma cag wããre de ɓlaggen wãã mokay no.

⁷ Day jar maga Baa horge ra go ma ɓe, ga wo de rage pel ɓe de ceeg, de suŋ ɓuy mokay, á a kay rage gusi, yõõ ti le gà.

⁸ Ndi de riŋ we ge ga : á blaw ge re ɓaaran go ne hara deparday, day wel je táabayn wo le ferge wurpo la, á á mbe yaŋ daʼ jar de hã ɓil ɓaara ne Baa ti tamsir la yawla?

Jagjõõ ma de ngaɓ ge de Farisiyẽẽ wo de je yãɗ targe

⁹ Yeso wãã jagjõõ sen mokay ne jar po maga ɗig wo ga saara diŋ jar ma joŋ re de deele nen Baa, raw wo mbuɗ foo jar lan wo mono.

¹⁰ Jar po wo ɓog wo wo tos ge ɓi tiŋ Baa, boŋ diŋ Farisiyẽẽ, ma lan diŋ je yãɗ targe lay.

¹¹ Farisiyẽẽ raw oo ge go sara deŋ, kal tosge de ɓil ɓe ga : O Baa, ndi joŋ suseʼ mo ti maga ndi bay doo jar lan wo ne wa, ndi bay doo jar freŋ wo wa, bay doo jar ma de ɓlagge wo wa, bay doo jar lengãɗ ge de naare jar wo no wa mono. Ndi de joŋ suseʼ mo ti maga ndi bay doo je yãɗ targe se deŋ no wa mono.

¹² Naw renam ndi hẽẽ bii nen ɓe ɓaale ɓoge, ndi yaŋ hã ma de hwal fẽẽre ɓi maga ndi daɗ ra mo ɓuy mo lay.

¹³ Ama ma je yãɗ targen raw oo ge wo go hãã ɗawa, maŋ nen ɓe go ciŋ draʼ ga ɓuy, raw ɗaw doo jag jiili ɓe ga : O Baa ko decoo ɓi, je se de ɓlaggen ɗa la.

¹⁴ Yeso raw ga : Ndi riŋ we ga bloo sen raw ferge wo liŋ ni ɓe mokay, Baa raw kee ge ɓe nen ɓe je de deele, ama laa kee Farisiyẽẽ jag gà. Werga wosela ɓuy maga yaŋ ra ɗúu see ɓe ciŋ no, Baa fer ti ɓe go gesiŋ yaw, day je maga fer ti see ɓe we go gesiŋ mo lay no, Baa maŋ ti ɓe go ciŋ lay.

Yeso tos ti weere kleere wo ga Baa mo woo ra

¹⁵ Jar raw age de weere kleere ma klõyre wo ne Yeso ga á mo kaŋ bosaʼ ne hara ti. Day jar ma wer Yeson wo wo ko rage mokay, raw wo ruu rage.

¹⁶ Ama Yeso raw ɗe weere kleeren wo le see ɓe, raw wãã ge ga : Men we weere kleeren wo le age see ɓi. Dig ra we wa, werga jar maga wo ge wo lagge ti twaywaŋ mani Baan diŋ jar maga wo doo saara no mono.

¹⁷ Kidolgi ndi riŋ we ga je maga yãã twaywaŋ mani Baan we doo we klee no ga no, kãã ge ma kalge ni gà hase.

Je ma de horog debaŋ no

¹⁸ Waŋ jar Jwif po raw wii Yeso ga : Waŋ ma de el no, ndi mo joŋ may ma kol ge tenen caw tum ɓa?

¹⁹ Yeso raw riŋgi ɓe ga : Wer may ga ndo ɗe me ga ndi de el ne? Je tabay po bay de el wa, say diŋ Baa boŋ.

²⁰ Ndo yaŋ de ko jag liŋgi ga : Lengãɗ de wãy jobo wa, ii húulí wa, joŋ freŋ wa, caa wããre ne jobo se wa, hoo sug ti pan ɓo wo de man ɓo.

²¹ Bloon raw fer wããre ne hẽn ga : Ndi yaŋ joŋge doo ga á de wãã gen no le ti klee ɓi ɓaa.

²² Blam maga Yeso wo laa wããre sen mokay, á raw riŋgi ɓe ga : Fen po yaŋ go de gwaʼ ge see ɓo boŋ. See, yeɗ fẽẽre ɓon wo go ɓuy, hã solay ɓe go ne jar coo wo, ni ndo wo ge yaŋ daʼ horog ɓon wo ciŋ, see le maŋ blam ɓi.

²³ Bloon wo laa wããre sen mokay, á raw hrag se go tulus, werga á diŋ je horog debaŋ.

²⁴ Yeso wo koge ɓe go de hrag see mokay, kal wãã ge ga : á gaali debaŋ maga jar ma de horog debaŋ laa wo ti twaywaŋ mani Baa no!

²⁵ Á go gus debaŋ maga manyoŋyoŋ kal go ti rum paʼdal de daŋ maga je horog debaŋn kal ti twaywaŋ mani Baa mono.

²⁶ Jar maga hay wo laa wããre sen, raw wo riŋgi ɓe ga : Hayga á yaŋ doo sen no kay, ni wose kãã yaŋ ma da' pẽẽge la?

²⁷ Yeso raw riŋ rage ga : Re maga joŋ doo jar téebeere wo ga : Baa kãã ma joŋ ge ɓe.

²⁸ Blam sen Piyer raw ga : Coʼ sug ɓo, wùr men fẽẽre wùrn wo we go ɓuy ma maŋ blam ɓo.

²⁹ Yeso raw riŋ rage ga : Kidolgi ndi riŋ nday, hayga jobo men tiŋ ɓe go, noga wãy ɓe, hẽẽre ɓe wo, kawre ɓe, weere ɓe wo we go wer twaywaŋ mani Baan no,

³⁰ je sen daʼ ge yaŋ debaŋ daŋge nen naw maga naa nen ɓe patala mono, day nen wur ma peln wo mono, se daʼ ge tenen maga taw gà yaŋ pa.

Yeso fer dog wããre húulí ɓe pa

³¹ Yeso raw hoo jar ma wer ɓe ma hwal ti ɓogn wo see ɓe, raw riŋ rage ga : Coʼ we sug ɓay, naa de ɗii gi wo Jerusalem, re maga jar siɗ wããre ma jag Baa hay yern wo go ti wel je táabay mo ɓuy mo wo wo go baa jage.

³² À wo ge go hãge ɓe ne jar maga bay wo ti jag Baa wa doo, day á feg ge wo yaŋ ti ɓe, ɗarn ge wo yaŋ, tuf gi wo sããre yaŋ ne hẽn ti lay.

³³ Á jwag ne wo yaŋ de mbreŋ, ʼwarn ne wo yaŋ go lay. Day blam sen síilí swaʼa, á fer ge mbe go bir gi pa ane.

³⁴ Ama jar ma wer Yeso laa wo laa wer wããre sen ga hase, werga wããre sen wãã kuɗum nen ɓaara, saara laa ko ge ga Yeso wãã mokay ti may la gà.

Yeso caa nen je rẽw go

³⁵ Yeso wo day ge ɓiŋ Jeriko mbaŋ mokay, paga je rẽw po yaŋ ti jeŋ faage wiɗ fẽẽre ni.

³⁶ Á wo laa fũy gi ngaɓan wo le seege mokay, á raw wiigi ga sen diŋ ẽẽ ɓa.

³⁷ Á raw wo riŋ gi ɓe ga á diŋ Yeso ma Nasared de seege ti faage la.

³⁸ Á raw ɗe ɗúu ga : Yeso wel Dafid no, ko decoo ɓi ɗa la.

³⁹ Jar ma peln raw wo ruu gi ɓe, raw wo riŋ gi ɓe ga : hay go baʼa, ama á raw yaʼ wer ngar jag de egre pa yaw ga : wel Dafid no, ko decoo ɓi ɗa la.

⁴⁰ Yeso raw oo ge, raw wãã ge ga : Wo le baa ge ɓe le me. Á raw baa ge ɓe le, je rẽw wo le yaʼ ge mbaŋ mokay, Yeso raw riŋgi ɓe ga :

⁴¹ Ndo da ga ndi mo joŋ may mo la? Je rẽwn kal wãã ge ga : Waŋ, fer caa nen ɓi go ko ge ɗa la.

⁴² Yeso raw riŋgi ɓe ga : Ko so. Hãge see ɓo ne Baan caa nen ɓo we go.

⁴³ Ni tuuseŋ nen ɓe raw caa ge go ko ge pah, á raw maŋ blam Yeso togoɗ Baa caw. Ngaɓan ɓuy wo wo ko sen mokay, á raw wo togoɗ Baa lay.