Kalge ɓil kefder seno
kefder se ma de yer wããre joŋre ɓaaran ɓil diŋ kefder ma de ɓog maga Lug yer ne mono. Lug yer ɓil kefder ma taŋgun diŋ wããre maga Yeso wãɗ ra de maga á hay tenen ti tamsir la caw ɗa mono.
Tĩĩ wer wur maga Yeso huu go, fer le go kal ge ciŋ tenen caw ɓe maga a yoo jar ma wer ɓen wo blam sen mo caw, de coo ge sara, a bay go ko ge ɓe blam sen de hõõgese tinoo poɗag poɗag caw doo ma taŋgun no wa so. Wersen joŋre jar peele Yeso tĩĩ wer le diŋ wur sen so. De wur sen mokay, gwaʼ yoo jar ma wer Yeson wo kay rage ti joŋre sen mo caw diŋ Nenterse ɓen lay so. Wããre sen diŋ wããre ma coɓ jar de egre debaŋ. Á ko maga jar ma wer Krisn tĩĩ wer tayge taɗ taɗ ɓi sir jar jwif go ɓi kefder sen la ni ɓuy. Doo jar ma wer Kris maga tĩĩ wer tayge Jerusalem no hãʼ no. De maga tĩĩ wer ɓi sir jar maga bay wo jar jwif wa, doo sir Antiyos, Korente wo de Filippi no mo lay. Á ko raŋ ge maga Pol je maga Kris maŋn go ma woge siɗ wããre ɓen go ne jar raŋ ɓi sir genla genla go ni ɓuy. Á ko lan diŋ re maga tĩĩ wer leɗ ge ti holaŋ jar se maga tĩĩ wo wer tayge le wer Kris taŋgu, de ɗeŋ maga Nenterse Baa tum de kaŋ nen ɓaara ni ma fer ge kneʼ re se ma ti holaŋ ɓaaran wo mo ɓuy ni pa.
Yoo kluuri wããre maga je yer kefder sen la yer ram, naa maŋ ma kluu boŋ yoo ɓaara. Ma kluu sen diŋ maga Lug yer kefder sen diŋ maga siɗ wããre sen go nen naw tum tum. Lug yer maga saara ti ma kluuri (16.10-40), diŋ ma wãã ge ti raŋ ge maga saara ɓi sir Trowas, saara raw Filippi, blam sen saara raw Jerusalem, ga a wo la, á baa Pol mono (20.5—21.18). Lan diŋ maga saara Sesare lag, saara kal raw ge Rom, ga Pol wo la ti daŋgay ni tiʼ gor kiŋgi ɓog ma cag re ɓen go mono (28.27, 28).
Wããre se maga Lug yer ra ti joŋre maga jar maga Kris hoo ra go ma lagge siɗ wããre ɓen go ne jar mo ɓuy ma kluuri ɓe wer swaʼa.
1) Wããre ma taŋgun de wãã ge diŋ ti maga jar ma wer Kris tĩĩ wo wer tayge taŋgu diŋ Jerusalem blam maga Yeso raw ciŋ mono (1.1—8.3).
2) ma de ɓog ɓen diŋ ti maga jar ma wer Kris duɗ wo go siɗ Wããre ma de Cõõre mani Kris go ɓi sir jar jwif wo krub so mono (8.4—12.25).
3) ma de swaʼ ɓen mokay diŋ maga á dus wo go siɗ ge ɓe go ɓi sir ma jag maarog wo ɓuy hãã wo go Rom ɓi leege ma kluu ɓuy no.
Wããre maga á go de siɗ rage yoo jar genla genla mo deŋ ɓuy no, á siɗ nà diŋ te wããre jar maga Yeso hoo ra go lagge siɗ wããre ɓen ne jar, hay wo siɗ ge ɓe go ne jar wo mono. Á hay wo siɗ gi ɓe mono, bag wo wããre ne jare, ruɗ wo jar kaŋ nen ɓaara ti re. Siɗ wo wããre Yeso ne wer jar ɓuy, ne jar jwif wo, ne jar maga bay wo jar jwif wa mo lay. Siɗ wo diŋ wããre Yeso po ma tigriŋ sara gà. Siɗ wo diŋ wããre Yeso se boŋ ga ɓi sir Palestin, ɗiggi jar ma Yeson wo le de ɗiggi ti ɓe, ti wããre ɓe maga á wãɗ ra, de joŋre ɓe maga á joŋ ra mono.
Re se ma de yerge ɓil kefder joŋre jar peele Yeso wo mo deŋ ɓuy diŋ ma bul faage go ne jar ma de yãã wããre Kris maga wo nen wur ma debalan la, hãã wo tum maga á mo sii wo wããre Kris go ne jar ma ti tamsir wo la krub ɓuy, hãã go jag sir taw ge leŋ leŋ ɓuy.
