JOŊRE 9 - Tupuri Bible

Sol fer we men ɓlagge ɓen go

¹ Ama Sol mbe tum ɓil de sõõ ge, joŋ bon jar ma wer Waŋkluu wo, id ra lay. Á raw woge se je kluu ma siɗ jag no,

² raw wiigi ɓe ga á mo hã faage ne se ma woge ɓi tiŋ tos ge ma Damas wo, maga se daʼ jar ma de yãã ge wer Waŋkluu we, hay bà werpiiri de naare ɓuy, se hoo ra le, se a de ɓaara Jerusalem.

³ Á raw maŋ faage ma woge Damasn so, day de maga á wo nduu gi see ɓi leegen mbaŋ mokay, ngel raw sag ge le ciŋ tuu, kal yiŋ ti ɓe go cwẽẽ.

⁴ Á raw leʼ ge gesiŋ, kal laa gẽẽge po le ciŋ ɗe ge ɓe ga : Sol, Sol, ndo joŋ bon ɓi le la?

⁵ Sol raw wiigi ɓe ga : Á diŋ ndo wola, Waŋkluu? Gẽẽge sen raw ferge le ne hẽn ga : Á diŋ ndi Yeso maga ndo de joŋ bon ɓi mono.

⁶ Ama fer ur gi go ciŋ, kal ɓi leege no, á riŋ mo yaŋ ti fen maga ndo mo joŋ ne mono.

⁷ Jar maga hay wo wer Sol mbaara de lagge de hẽẽne seɗem lagge, laa mbaara gẽẽge no, ama laa wo ko jobo deŋ gà.

⁸ Sol kal ur gi le go ciŋ, bul nen ɓe go, nen ɓe laa ko ge ga has, á raw baa doo ɓe, raw de ɓe Damas.

⁹ Síilí swaʼ nen ɓe bay ko ge wa, bay re mopo wa, bay jo bii wa lay.

¹⁰ Je ma wer Yeso po yaŋ Damas ni, à ɗen ga Ananiyas. Waŋkluu raw naa nen se ɓe ne hẽn nen lwaʼ ge, kal ɗe ge ɓe ga : Ananiyas. Á raw yiŋ jag ga : Ndi yaŋ la Waŋkluu.

¹¹ Waŋkluu raw riŋgi ɓe ga : See deparday ti faage ma de Deele no, wo liŋ ni Juda, wii je Tarse maga à ɗen ga Sol mono. Á yaŋ wo tos ge ni,

¹² á yaŋ lwaʼ ge ga jobo, à ɗen ga Ananiyas, kal le tiŋma, kaŋ doo ne se ti, maga nen se mo fer go caa ge tigriŋ.

¹³ Ananiyas raw fer wããre ne hẽn ga : Waŋkluu, jar debaŋ yaŋ wo wãã ge ti bloo sen mokay no, á riŋ wo ndi de wããre ɓlagge maga á joŋ jar mani ɓon ma Jerusalem wo de ɓe mono.

¹⁴ Day á mo yeʼ la, waŋre jar siɗ jag wo de hã egre hẽn maga á mo bag jar maga wo de ɗe ɗúu ɓo mo ɓuy no.

¹⁵ Ama Waŋkluu raw riŋgi ɓe ga : See mbo, ndi maŋ bloo sen go, ndi koln ge diŋ je ma woge fer wããre go ti ɓi pel wer jar maga bay wo ti jag Baa wa, pel waŋren wo, go pel jar Israyel wo lay.

¹⁶ Ndi de see ɓi ndi kaŋ nen ɓe yaŋ ti joŋge bon maga á jon ge ti wããre ɓi mo ɓuy no.

¹⁷ Ananiyas kal rawge so, á raw kalge tiŋma, kal kaŋ doo ne Sol ti, kal ɗe ge ɓe ga : Hẽn ɓi Sol, Yeso Waŋkluu, je maga naa nen se ɓe le mo nen le ti faage maga ndo a le ni mo, ɓoʼ me le maga nen ɓo mo fer go caa ge tigriŋ, ndo mo baa ɓil go de Nenterse ma bay ɗag lay.

¹⁸ Deparday tuu, mopo raw leʼ ge le go nen Sol doo ɓlog koo nono, nen ɓe raw go caa ge tuu, á raw urgi go ciŋ, á raw joŋ batem ɓe go.

¹⁹ Blam sen á raw re hoole, egre ɓe raw ferge le lay. Sol raw ig gi se jar ma wer Yeso ma ɓi leege Damasn ni naw rabe.

Sol sii wããre ɓi leege Damas

²⁰ Deparday tuu, á raw ɓoʼ ɗee sii wããre ɓi tiŋ tosge wo ga Yeso diŋ Wel Baa.

²¹ Jar maga wo de coʼ sug wããre ɓen mo ɓuy raw wo ngel ge, raw wo riŋ gi ga : Ɓa mo yeʼ bay diŋ bloo maga de joŋ bon jar Jerusalem maga wo de maŋ ge wer Yeso mo wa ge? A á mo yeʼ ma bag rage, ma woge de ɓaara ne waŋre ma siɗ jag wo ga?

²² Ama ma Sol mbe sii ɓen diŋ wããre ɓen de egre deŋ koɗe, jar Jwif maga wo ɓi leege Damas ni, ngar wããre maga á mo fer wo ne hẽn no kay bay nen ɓaara wa, werga á de ɓoɗ wer Yeso go ne hara ga á diŋ Mesi mono.

²³ Naw wo nà ge blam sen mbag jar Jwif raw wo tay jag ɓaara ga saara mo ii Sol go.

²⁴ Ama á raw riŋ Sol go de wããre sen pel bole. Á raw wo lagge gor jagjiŋ de suŋ de cege ɓuy ga saara mo iin go.

²⁵ Wersen jar ma wer Sol raw wo maŋ ge ɓe de suŋ raw wo kal ge wo go de ɓe ti cõõ kor ma ɓaŋla no, raw wo sir gi ɓe wo go ɓi kerge gesiŋ so.

Sol fer le Jerusalem

²⁶ Sol wo nduu gi Jerusalem mokay, á raw kiɗ faage ga se tay de jar ma wer Yeso ma lan wo, ama hẽẽne raw joŋ rage ɓuy, werga á bay wo de ɗig gi ti ɓe ga á kol we go je ma wer Yeso cwãy wa.

²⁷ Barnabas raw bagge ɓe were, kal rawge de ɓe see jar peele Yeso wo. Á raw riŋ rage ga Sol yiŋ le de Waŋkluu ti faage, Waŋkluu wãã re ne hẽn lay, á raw sii wããre go ti Yeso de egre debaŋ ne jar Damas wo lay.

²⁸ De sen ni, Sol raw wo tayge wer kããra raŋ ge Jerusalem, sii wããre go de ɗúu Waŋkluu de egre debaŋ lay.

²⁹ Á siɗ wããre ne jar Jwif maga wãɗ wo diŋ jag Grege, faa wo de kããra debaŋ, ama jar sen raw wo kiɗ gi ga saara mo ii Sol go.

³⁰ Ama hẽẽre ɓen raw wo laa ge ɓe, á raw wo kaŋ Sol wo go Sesare, raw wo ɓoʼ ge ɓe Tarse.

³¹ Wersen Tayge jar ma wer Kris ma ɓi sir Jude wo ɓuy, de ma Galile, de Samari ɓuy, jam raw joŋge yoo ɓaara, hã wo egre ne see ɓaara, hoo wo sug ti Waŋkluu tum tum lay, Nenterse ma bay ɗag raw kay rage, á raw wo yaʼ wer ciŋ ni debaŋ lay.

Piyer pẽẽ Ene go de ɗúu Yeso

³² Piyer kal go raŋ sir wo, ti wurpo, á raw woge ni jar ma de yãã wããre Yeson wo ɓi sir Lida.

³³ Á raw daʼ jobo ni, à ɗen ga Ene, go de hrag grúm, de suuli ti preŋ tiʼ joŋ kiŋgi de ɓe nenmaʼa.

³⁴ Piyer raw ɗe ge ɓe ga : Ene, Yeso Kris pẽẽ mo we go, ur go ciŋ, ʼwũy fen suuli ɓon de see ɓo. Ene raw urgi ciŋ deparday tuu.

³⁵ Jar ma ɓi leege Lida wo ni ɓuy, de ma Saroŋ ɓuy kon wo, á raw wo fer ge coo ge wer Waŋkluu.

Piyer bir Dorkas go

³⁶ Wãy po yaŋ ɓi leege Jope, à ɗen ga Tabita, á de hã ɓil ɓe ne Baa. (Ɗúu ɓe de jag Greg ga Dorkas, wer ɓe ga manmeene.) Á joŋ jar de el tum tum, kay jar coo wo.

³⁷ Á raw leʼ cegè de ngar ngel sen ni, kal huu gi go. Á raw yog ge ɓe go, á kal maŋ ge ɓe wo go ɓi tiŋ ma ciŋ ti kẽẽ no.

³⁸ Jar ma wer Yeso ma ɓi leege Jope raw wo laa ge ga Piyer yaŋ Lida ma ɓiŋ Jope mbaŋ no, á raw wo laa jar po wo se ɓe ɓog ga á mo wo wo riŋ gi ɓe ga : Wùr kam mo, ɗee le ni wùr deparday ɗa.

³⁹ Piyer kal rawge wer ɓaara deparday tuu, de maga á wo day ge ni mokay, á raw wo raw ge de ɓe wo ɓi tiŋ ma ciŋ no, naare dwur wo ɓuy raw wo yaɗ ge se ɓe de roo, kaŋ wo nen ɓe ti õõbe maga Dorkas hay joŋ rage mono.

⁴⁰ Piyer raw ga : jar mo laa go siigi ɓuy, á kal laa kõyõgre gesiŋ, raw tos ge. Blam sen á raw mbuɗ nen ɓe ne húulín ti, raw wãã ge ga : Tabita, ur go ciŋ. Á raw bul nen ɓe go, á wo ko Piyer mokay, á raw hayge go tiwere.

⁴¹ Piyer raw maŋ doo ɓe, kayn le ur gi ciŋ. Á raw ɗe jar ma de yãã wããre Yeson wo le, de naare dwurn wo, kal oo ge ɓe go nen ɓaara tenen deŋe.

⁴² Á raw laa wããre sen wo go ɓi sir Jope ɓuy, jar debaŋ raw wo hã ɓil ɓaara ne Kris Waŋkluu lay.

⁴³ Piyer raw hayge ni je joŋ joŋre hõõge po Jope ni, à ɗen ga Simoŋ, nà ni wolaŋ.