JOŊRE 8 - Tupuri Bible

¹ Sol de tay jag de jar ii Etiyẽn wo lay. Le ti wur sen tuu, á tĩĩ wer joŋ bon Tayge jar ma wer Kris ma Jerusalem wo tuu. Jar ma de yãã wããre Yeson wo ɓuy raw wo dus gi go ɓi sir Jude wo ɓuy, go Samari, gwaʼ ni diŋ jar peele Yeso wo tawa.

Sol joŋ bon Tayge jar ma wer Kris wo

² Jar maga see wo ti faage Baa ti ngel ɓe, tee wo Etiyẽn, ra wo ne debaŋ lay.

³ Sol raw hã ɓil ɓe ga se taw Tayge jar ma wer Krisn wo go, á raw kiɗ jar ma de yãã wããre Yeson wo liŋ ni ɓaara wo, horge ra, werpiiri wo de naare ɓuy lag ra ti daŋgay.

Filip wo sii Wããre ma de Cõõren ne jar Samari wo

⁴ Jar maga dus wo go la, raw wo raŋ sir wo siɗ Wããre ma de Cõõren go ne jare.

⁵ Filip raw raw ɓen Samari, raw sii wããre Mesi ne jar ma ɓi leegen wo.

⁶ Ngaɓa jar ma de tay tin wo ɓuy lag wo coʼ sug wããre maga Filip de wãã ge ɓe mono, wo de ko fẽẽre mbuɗgin wo de nen ɓaara lay.

⁷ Sõõre hay wo ti jar cege wo, raw wo laa ge go de ngar jag kloŋ kloŋ. Jar grúmri wo de jar leŋre wo debaŋ ɗoɓ wo go de el lay.

⁸ Ɓil jar ma ɓi leegen ɓuy raw joŋge go feh debaŋ.

⁹ Jobo yaŋ ɓi leegen ni, à ɗen ga Simoŋ, á diŋ je sogway, jar Samarin wo ɓuy joŋ wo hẽẽne doo ɓe, werga á wãɗ de se ɓe ga se diŋ bloo.

¹⁰ Weere kleere wo de jar kluuri wo ɓuy yãã wo jag ɓe, wãɗ wo ga : Bloo sen mo yeʼ diŋ egre Baa, à ɗen ga egre ma kluu no.

¹¹ Á wo ɓuy hoo wo sug ti ɓe, werga á ig joŋ hẽẽne ɓaara de wããre sogway ɓen debaŋ.

¹² De maga á yãã wo Wããre ma de Cõõren maga Filip siin go ti twaywaŋ mani Baan wo de ɗúu Yeso Kris mokay, Filip raw joŋ batem ɓaara go, werpiiri wo de naare ɓuy.

¹³ Simoŋ de se ɓe yãã re Kris lay, Filip raw joŋ batem ɓe go lay, á raw hayge ɓiŋ Filip mbaŋ, raw ngrisgi de maga á ko fẽẽre ma joŋ hẽẽnen wo de fẽẽre mbuɗgi maga Filip de joŋ rage mono.

¹⁴ Jar peele Yeson wo le Jerusalem kal wo laage ga jar Samari yãã wo wããre Baa we mokay, á raw wo laa Piyer wo de Jaŋ wo see ɓaara.

¹⁵ De maga Piyer wo de Jaŋ wo wo day ge Samari mokay, á raw wo tos ge ti jar ma de yãã wããre Yeson wo, ga á mo daʼ wo Nenterse ma bay ɗag,

¹⁶ werga Nenterse ma bay ɗag hay bay de á ge ti jobo yoo ɓaara wa ɗa, werga á hay joŋ batem ɓaara diŋ ti ɗúu Waŋkluu Yeso tawa.

¹⁷ Wersen Piyer wo de Jaŋ raw wo kaŋ doo ɓaara ne hara ti so, á raw wo daʼ Nenterse ma bay ɗag.

¹⁸ De maga Simoŋ wo ko ge ga jar ma de yãã wããre Baa daʼ wo Nenterse ma bay ɗag diŋ de ngar ngel maga jar peele Yeson kaŋ wo doo ne hara ti mokay, á raw hã solay ne Piyer wo de Jaŋ,

¹⁹ raw riŋ rage ga : Hã we egre sen mokay me lay, maga ndi kaŋ doo we ne jobo ti, je sen mo daʼ Nenterse ma bay ɗag lay.

²⁰ Piyer raw fer wããre ne hẽn ga : Bas go de solay ɓon ɓuy, werga ndo ɗig ɓon ga ndo yee fen maga Baa hãn ne jar de koɗ de solay mono.

²¹ Nen mo ma ɓo, noga egre ɓo po bay ti joŋre se taʼn la wa so hase, werga jiili ɓo bay go de el ti ngel ɓe pel Baa wa.

²² Wersen men ɗiggi ɓo se kayn go, tos Waŋkluu ga hayga á da we, á mo men ɗig re ɓlagge ɓo se maga ndo ɗign mokay go mo ti.

²³ Werga ndi ko ɓil ɓo go de baa ge de re ma de ɓlagge glag de hãã debaŋ, ɓlaggen go de kol mo ge gebee ɓe lay.

²⁴ Simoŋ raw riŋ Piyer wo de Jaŋ ga : Tos we Waŋkluu me ti diŋ nday, re maga nday wããn go mokay mo a le ti ɓi wa.

²⁵ Blam maga jar peele Yeson joŋ wo sedewa go ti Waŋkluu de faage siɗi wããre mono, á raw wo ferge Jerusalem. Ti faage ferge ɓaara mono, á raw wo siɗ Wããre ma de Cõõren go ɓi sir ma kleere ma ti prog Samari wo ni ngaɓa debaŋ.

Filip wo de je kluu po maga a le Etiyopi

²⁶ Je peele Waŋkluu raw riŋ Filip ga : Ur go ciŋ, see wo nen ɓaŋ ni wãyban ɗeger, ti faage maga ɗii le Jerusalem, kal rawge Gasa, faage sen ti puuli.

²⁷ Filip raw urgi go ciŋ, kal rawge, de maga á de seege mo caw, nen ɓe raw leʼ ge ne jobo ti caw, diŋ je Etiyopi, bay ɓay, á diŋ je kluu ma wãã re horogre mani wãy maga diŋ waŋ jar Etiyopi wo mono, a ɗe wãy ga Kaŋdas. Á hay a goŋ Baa Jerusalem,

²⁸ á raw ferge mbe liŋ so, de hayle ɓi puspus yeʼe, de jaŋ kefder maga Esay je ndar nen wããre Baa go yern mono.

²⁹ Nenterse ma bay ɗag raw riŋ Filip ga : See deparday, wo oo ge ɓiŋ puspus mbaŋ.

³⁰ Filip raw ur ɗee deparday wo se puspus no, wo laa sug je Etiyopin de jaŋ kefder maga Esay je ndar nen wããre Baa go yern mono. Filip raw wiigi ɓe ga : Ndo yaŋ mbo laa wer wããre maga ndo de jaŋ ge ɓe mo yeʼ no?

³¹ Bloon raw ga : Hayga jobo bay siɗ wer ɓe me wa lay, ndi kãã ma laa wer ɓe laa ge la? Á raw ɗe Filip ga á mo ɗii le hay ge se se ɓe puspus no.

³² Wããre maga á hay jaŋ ge ɓe diŋ maga wãã ga : Á doo mansam maga a de wo ge de ɓe ngaʼ ge gon no, Á doo wesam maga oo mbe pel je ma caa fũy ɓe baʼbaʼ deŋ no, A bul jag ɓe go gà.

³³ Á fer wo ti ɓe go gesiŋ, á laa wo cag wããre ɓen ti ngel ɓe gà. Wer mani ɓen caa go has, wããre wãã ti ɓe ga so. Werga á men wo ne tenen ti tamsir la caw ga so mono.

³⁴ Bloo se maga bay ɓay la raw wii Filip ga : Ndi kam mo kam ge, sii wer ɓe me ɗa ɓa, je ndar nen wããre Baa go wãã mo hãʼ ti wo ɓa, ti se ɓe de se ɓe yawla, noga ti je tigriŋ?

³⁵ Filip raw bul jag go, raw tĩĩ wer wãã wããren ne hẽn diŋ de fen maga á hay jaŋ ge ɓe mono, kal sii Wããre ma de Cõõre maga wãã go ti Yeso ne hẽne.

³⁶ Mbaara de seege pel so, á wo wo day ge ti ngel po, daʼ wo bii ni, bloo je kluu sen la raw riŋ Filip ga : Bii yaŋ la pa lay, fen maga dig me ga yog me go de bii wa diŋ may pa ɓa? [

³⁷ Filip raw riŋgi ɓe ga : Hayga ndo yãã Kris we de ɓil ɓo ɓuy no, ni ndo nen maga a yog mo go. Bloo raw fer wããre ga : Ndi yãã wããre Yeso Kris we ga á diŋ Wel Baa.]

³⁸ Á raw oo puspus no, Filip wo de bloon ɗii wo go gesiŋ, laa wo nen bii ɓog ɓuy, Filip raw joŋ batem ɓe.

³⁹ De maga á ɗii wo le go ciŋ mokay, Nenterse Waŋkluu raw maŋ Filip wo go, nen bloon bay ko Filip yeʼ wa so, de sen ɓuy á raw mbe maŋ faage ɓen go de fug ɓil feh so.

⁴⁰ Filip wo ko se ɓe wo go Asod lay, blam sen á raw raŋ ɓi leege wo debaŋ siɗ Wããre ma de Cõõren go genla genla ɓuy, hãã wo go Sesare lay.