JOŊRE 7 - Tupuri Bible

Etiyẽn de bag wer wããre ne jar Israyel wo

¹ Je kluu jar siɗ jag raw wii jag Etiyẽn ga : Á mbe doosen no cwãy ge?

² Etiyẽn raw fer wããre ga : Coʼ we sug ɓay, nday hẽẽre ɓin wo de nday pããre ɓin wo. Baa ma de wooren naa nen se ɓe ne moo naa Abraham, de maga á hay Mesopotami ɗa, taŋgu maga á wo ge hay ge ge go Karan.

³ Á raw riŋgi ɓe ga : Men sir ɓon go, men kawre ɓo wo go, see wo ɓi sir maga ndi kaŋ ge nen ɓo wo ni mono.

⁴ Abraham raw men sir jar Kalden wo go, kal ur gi wo go Karan. Blam sen pan Abraham raw huu gi go, Baa raw yaʼ Abraham wo go ɓi sir maga nday patala ni mono.

⁵ Baa hã ngel ne hẽn ni ga taʼ la diŋ ɓe lay bag la, hã gà. Haybà ngel ma nen kaŋ ɓaale boŋ draʼ layblaʼ, hã ne hẽn gà. Ama Baa raw baa barge de ɓe ga se hã ge sir sen ne hẽne, blam sen weere ɓe wo wo yaŋ daʼ ge ɓe pa. De sen ɓuy, le ti wur sen wel Abraham hay bay wa pa.

⁶ Baa raw riŋgi ɓe ga : Wer mani ɓon la wo ge wo yaŋ go lagge ɓi sir jar dehãy, kol ge wo yaŋ gebeere, á joŋ bon ɓaara yaŋ kiŋgi kis kis naa.

⁷ Baa raw wãã ge ga : Ndi joŋ ge bon wer jar se maga joŋ ge wo gebeere ɓaara yaŋ, blam sen á men ge wo sir sen yaŋ go, fer ge wo yaŋ goŋ mege ti ngel se ma taʼ la no.

⁸ Blam sen Baa raw taw wããre barge ɓaara de kẽẽ go ne Abraham ga caa ge ɓĩĩni mokay diŋ fen ma kaŋ nen go ga jag saara tay we de kẽẽ. Diŋ wersen Abraham raw caa ɓĩĩni wel ɓe Isag wur síilí ma de nenmaʼ blam biŋgi ɓe, Isag raw caa ɓĩĩni Jakob doosen no lay, Jakob raw caa ɓĩĩni weere ɓe ma hwal ti ɓogn wo no lay, moore naa wo no.

⁹ Ɓil hẽẽre Josef raw wo sõõ ge ne Josef ti, á raw wo yee ge ɓe wo go Ejipte gebee, ama Baa raw ɗaw ge ɓe wo doo ɓe ni,

¹⁰ yãɗn go jag bon maga daɗn mo ɓuy. Á raw woo Josef, raw hã ti hẽn ga á mo hay de ko re nen Farawoŋ waŋ Ejipte. Ti wurpo, waŋ sen la raw hay Josef waŋ ma wãã re sir Ejipte, hay ne wãã re tiŋ waŋ no.

¹¹ Koŋne raw leʼ ge go ɓi sir Ejipte ɓuy, go ɓi sir Kanan ɓuy lay, jar joŋ bon debaŋ, moore naa laa wo daʼ mo rege meʼ ga hase.

¹² De maga Jakob wo laa ge ga coore yaŋ Ejipte mokay, á raw laa moore naa wo wo taŋgu.

¹³ Ma de ɓog ɓen á wo wo mokay, Josef raw ɓoʼ wer se ɓe ne hara, waŋ Ejipte raw laa ge lay ga á diŋ kawre Josef wo.

¹⁴ Blam sen Josef raw laa jar wo baa pan ɓe le de kawre naa ma lan wo ɓuy, á wo ɓuy doo renam ti dwee.

¹⁵ Jakob kal rawge Ejipte so, á raw huu gi wo go ni, moore naa ma lan huɗ wo go ni lay.

¹⁶ Á raw age de húulí ɓaara Sikem, á raw lag rage ɓi tuu húulí maga Abraham hay yeen doo weere mani Hemor wo de solay mono.

¹⁷ Naw maga Baa taw wããre ɓe maga se hay wãã ne Abraham wo kos ge go mokay, jar naa raw wo jaw ge le Ejipte ngaɓa debaŋ debaŋ.

¹⁸ Blam sen jobo maapo bay de ko Josef wa, raw kol ge waŋ Ejipte.

¹⁹ Waŋ sen jãɗ jar naan wo debaŋ, joŋ bon moore naa wo ga á mo ɓoɗ wo weere ɓaara wo wo go huɗ gi.

²⁰ Moyis raw biŋ gi ti kal se no, biŋ de woore debaŋ, de woore nen Baa lay, á joŋ few doo pan ɓe wo de man ɓe swaʼa.

²¹ De maga á wo go ɓoʼ ge ɓe mokay, may ma waŋ Ejipte raw maŋ ge ɓe, raw g ẽẽ ge ɓe doo mbarga ɓen no.

²² Wersen Moyis raw had wer ko ge re maga jar Ejipte wo de ko ge ɓe mo ɓuy go, á raw kol ge diŋ je ma de egre ti wããre wo de joŋre ɓuy.

²³ De maga Moyis wo joŋ kiŋgi go doo naa, ɓil ɓe raw da ge ga se wo se hẽẽre se jar Israyel wo.

²⁴ Á raw daʼ je Ejipte po mbar kaw ɓe, á raw kay ti je maga á de mbar ge ɓe lam, á raw saʼ hee ɓe, raw ʼwar je Ejipten go.

²⁵ Á hay ɗig ɓen ga hẽẽre se jar Israyel ko wo yaŋ ga Baa de ɓoʼ se ge ma yãã saara go yawla. Ama hẽẽre ɓen laa wo ko sen gà.

²⁶ Toŋ ɓe pa, Moyis raw daʼ jar Israyel wo leʼ kããra ɓog lagge, á kal ga se tay jag ɓaara, á raw riŋ rage ga : Ɓa nday diŋ hẽẽre kããra pa lay, nday mbar kããra le la?

²⁷ Je maga de mbar kan ɓen la, raw srog Moyisi, kal riŋ gi ɓe ga : Wose oo mo waŋ wùr ma cag re wùr la?

²⁸ Ndo da ga ndo ii me go doo ga ndo ii je Ejipten go suun no?

²⁹ De maga Moyis wo laa wããre sen mokay, á raw daŋ ge wo go ɓi sir Madiyaŋ, wo ni á raw biŋ weere ɓoge.

³⁰ De maga kiŋgi ma doo naa wo go maŋ jag mokay, je peele Baa raw naa nen se ɓe ne Moyis nen wùu, wùu sen de yãã lir kaʼ ɓil puuli, ɓiŋ húulì maga à ɗen ga Sinay mbaŋe.

³¹ Moyis raw ngrisgi ko mo sen mokay no, á wo yaʼ ge se mo sen mbaŋ ko ge ɓe mokay, á raw laa sug gẽẽge Baa Waŋkluu le riŋ gi ɓe ga :

³² Ndi diŋ Baa maga moore ɓo goŋ wo mono, Baa maga Abraham, Isag, Jakob goŋ wo mono, hẽẽne raw joŋge ɓe, se Moyis raw daɗ ge ɓe, ko á laa maŋ nen ɓe go ciŋ draʼ gà.

³³ Baa Waŋkluu raw riŋgi ɓe so ga : Ndar taarag ɓon wo go, werga ngel maga ndo de oo le ni mo deŋ diŋ sir ma bay ɗage.

³⁴ Ndi ko bon jar ɓi maga wo le Ejipte we, ndi laa ndumgi ɓaaran wo we, day ndi ɗii le ma woge yãã rage go. Patala, see le, ndi ɓoʼ mo Ejipte.

³⁵ Á diŋ Moyis se maga jar Israyel hay tob wo go ga : Wose oo mo waŋ wùr ma cag re wùr la? Baa raw ɓoʼ ge ɓe wo de egre je peele maga naa nen se ɓe ne hẽn nen wùu yoo lir ga á diŋ waŋ ɓaara, diŋ je yãã rage go lay.

³⁶ Diŋ Moyis se ga jar Israyel wo le Ejipte, se cegaɗ le go de ɓaara de re ma joŋ hẽẽne wo de fẽẽre mbuɗgi le ɓi sir Ejipte ni, nen Maarog ma Desẽẽ no, ti puuli, ɓuy kiŋgi doo naa mono.

³⁷ Diŋ Moyis se maga riŋ jar Israyel wo pa ga : Baa ɓoʼ ge je wãɗ wããre ma jag ɓe go yaŋ le doosen no, joŋ ge ti wer mani ɓayn mono.

³⁸ De maga jar Israyel hay wo go de tay ti ti puuli, hay hay ti holaŋ pããre naa wo de je peele Baa maga wãã re ne hẽn ti húulì Sinay diŋ Moyis sen pa. Á raw yãã wããre ma kol jar go tenen tum tiʼ le ne naa.

³⁹ Moore naa laa wo yãã jag ɓe ga, á raw wo tob ge ɓe wo go, raw wo mbuɗ nen ɗiggi ɓaara diŋ ti Ejipte.

⁴⁰ Á raw wo riŋ Aaron ga : Ndo mo joŋ Baa maga see yaŋ wo pel wùr ne wùri, werga wùr bay de ko re maga joŋ Moyis je maga wùr hay le Ejipte, á raw hoo wùr le go mo wa.

⁴¹ Á raw wo too wedày, kal wo raw ge siɗ jag ne sõõ se no, fruy wo ti fen maga á toon wo de doo ɓaara.

⁴² Baa raw mbuɗ faale ne hara, raw men rage goŋ gér ma ciŋ wo, doo maga jar ndar nen wããre Baa go hay siɗ wo go ga : Nday jar Israyel, Horogre maga nday siɗ jag de ɓaara ti puuli kiŋgi doo naa mokay, Nday hay bay hã rage diŋ me wa yawla?

⁴³ Nday hay le de hoo õõbe ma bag mburyug ne baa ɓay Molog ti, Nday maŋ te baa ɓay Refaŋ le ti pa, Sõõre ɓay se maga nday joŋ ra ma goŋ ge mono. Wersen ndi yaʼ we ge wo go ɓi sir ma hãã daŋ Babilon so yaw.

⁴⁴ Wel tiŋ maga wããre bargen de ɓoʼ ge ɓil ɓe hay we de ɗaw ge doo moore naa wo, á hay de joŋge doo ga Baa hay kaŋ nen Moyis ti ɓen no, á hay riŋ Moyis ga á mo joŋ doo ga á kon no kay no.

⁴⁵ Á raw yaʼ tiŋ sen le ne moore naa ma blam ɓaaran wo le lay, á raw wo maŋ ge ɓe le ti ɓaara de maga Joswe hay pel ɓaara mono, á raw wo yãã sir jar maga Baa nii ra go ne hara pel de ɓe ti, á raw gwaʼ ge pa, hãã wo go biŋ Dafidi.

⁴⁶ Je sen la, Baa raw woo ge ɓe, á raw wii faage ga se boo tiŋ ne Baa maga Jakob goŋ ne mono.

⁴⁷ De sen ɓuy, wo boo tiŋ sen ne hẽn diŋ Salomoŋ kway.

⁴⁸ Ama Baa maga le go ciŋ hãã kaa ma hay ge ɓi tiŋ maga jar téebeere boon wo ga, werga je ndar nen wããre Baa go hay wãã ti ɓe ga :

⁴⁹ Waŋkluu wãã ga : ngel ma ciŋ diŋ paale ɓi, Tamsirn diŋ ma kaŋ ɓaale ɓi lay. Nday kãã ma boo ge me diŋ tiŋ mayla? Ngel po bay de caa ge taʼ ga sen ma ig gi ɓi wa.

⁵⁰ Joŋ fẽẽren wo mo deŋ ɓuy diŋ ndi.

⁵¹ Nday jar se ti graŋ no, nday jar se ga jiili ɓay wo de sug ɓay ɓuy wo go de jeb ge, bay laa ɗúu maga Baa de ɗe we ge mo wa. Nday ẽg Nenterse ma bay ɗag tum tum, nday bay yãã jag ɓe wa, doo ga moore ɓay hay joŋ wo le no pa.

⁵² Yoo jar ndar nen wããre Baa go wo mo deŋ ɓuy, maga moore ɓay joŋ wo bon sen ga bay wa. Á id wo jar maga Baa hay laa ra le sii wããre Je ma de deelen go, diŋ je se maga nday kaŋ taw ɓe go, nday kal ii gi ɓe go mono.

⁵³ Nday diŋ jar maga Baa bag wããre ɓen le ne nday diŋ ne jar peele ɓen wo jag no, nday laa day ge yãã wããre sen ga pa.

À ii Etiyẽn go

⁵⁴ Jar ɓoɗ ti wããren wo wo laa wããre sen mokay, ɓil ɓaara raw sõõ ge ne Etiyẽn ti, so wo saŋ ɓaara ti ɓe de waŋ.

⁵⁵ Ama Etiyẽn go de baa ɓil de Nenterse ma bay ɗage, á raw maŋ nen ɓe ciŋ, raw ko woore Baa le sag ge, ko Yeso de oo le ti ɓaŋ war Baa deŋ lay.

⁵⁶ Á raw riŋ rage ga : Coʼ we sug ɓay, ndi ko ngel ma ciŋ bul go me nene, ndi raw ko Wel je táabay de oo le ti ɓaŋ war Baa deŋe.

⁵⁷ Á raw wo ngar jag kloŋ kloŋ, kuɓ wo sug ɓaara go, hoo wo ɗeere le ne hẽn ti degaʼ ɓuy,

⁵⁸ kogn wo wo go jag leege no, raw wo ɓoɗ ge ɓe de húulì, ʼwarn wo go. Jar maga kon wo raw wo lag õõbe ɓaaran ɓiŋ bloo po à ɗen ga Sol.

⁵⁹ De maga á wo de ɓoɗ ge ɓe de húulì mokay, Etiyẽn raw tos ge ga : Yeso Waŋkluu no, yãã nenterse ɓi wo doo ɓo.

⁶⁰ Blam sen á raw jel ti ɓe gesiŋ, raw ngar jag kloŋ ga : Waŋkluu kee ɓlagge maga á joŋ wo mokay ne hara ti wa. Blam sen á raw huu gi go.