JOŊRE 6 - Tupuri Bible

À hoo jar renam ma kay jar peele Yeson wo

¹ Ti wur sen ngaɓa jar ma wer Yeson raw wo yaʼge ciŋ ni puri, jar Jwif maga wãɗ wo ɓaaran diŋ jag Greg raw wo grúm jag ti jar Jwif maga wo ɓi leege ni mono, ga naare dwur saaran bay wo daɗ rege ti ngel ɓe ti naw tum wa.

² Jar peele Yeso ma hwal ti ɓogn raw wo tay ti jar ma wer Yeso ma lan wo ɓuy, kal wo riŋ rage ga : Wùr men sii gi wããre Baa go taʼa, wùr raw ɓes ge go diŋ fẽẽre rege mono, sen bay de el wa.

³ Diŋ wersen nday hẽẽre wùrn wo no, hoo we jar maga ɗúu ɓaara go de rage jag jar ɓuy, jar maga wo go de baa ɓil de Nenterse ma bay ɗag wo de ko re lay mono, hoo we renam, ni wùr laa ra joŋ joŋre se no.

⁴ Ama ma wùr, wùr lag tum diŋ tos ge wo de siɗgi wããren go sagsage.

⁵ Tay ge jarn ɓuy raw wo yãã wããre se no, á raw wo hoo jar so, baa wo Etiyẽn je ma de hã ɓil ne Kris de egre, de baa ɓil go de Nenterse ma bay ɗag lay, ma lan wo diŋ Filip, Prokor, Nikanor, Timoŋ, Parmena, de Nikola je Antiyos maga hay kol go yãã ge diŋ tos ge jar Jwif.

⁶ Á raw wo rawge de ɓaara ɓiŋ jar peele Yeso wo so, jar peele raw wo tosge ti ɓaara, kaŋ wo doo ne hara ti.

⁷ Blam sen wããre Baa raw dus gi go genla genla ɓuy, ngaɓa jar ma wer Yeson raw wo tayge Jerusalem ni pur debaŋ, jar ma siɗ jag wo debaŋ hã wo see ɓaara ne Kris lay.

À baa Etiyẽn

⁸ Baa raw hã egre ne Etiyẽn debaŋ ma joŋ fẽẽre mbuɗgi wo de fẽẽre ma ngris jar debaŋ.

⁹ Wer joŋre sen mokay, jar po raw wo giŋ Etiyẽn, diŋ jar ma ɓi tiŋ tos ge maga à ɗen ga Tiŋ Tosge ma gebeere maga a bud ra gom. Diŋ jar Jwif maga a wo le ɓi sir Siren, Aleksaŋdri wo de Silisi, de ma ɓi sir Asi wo, á raw wo ɓoʼ ɗee faa kããra de Etiyẽne.

¹⁰ Ama á laa wo baw Etiyẽn ga, werga Etiyẽn wãã ɓen go diŋ de ko ge re maga Nenterse ma bay ɗag hãn ne hẽne mono.

¹¹ Á raw wo poɗ werpiiri po wo de solay maga á mo riŋ wo ga : Wùr laa sug la, á de ɗar Moyis wo de Baa.

¹² Á raw wo ur wùu wããren ne jar ɓil so, jar ma ndar wer wããre Baa wo ɓuy, raw wo yaʼge se Etiyẽn, raw wo yoʼ ge de ɓe, raw wo raw ge de ɓe pel jar kluuri ma ɓoɗ ti wããren wo.

¹³ Á raw wo hoo jar car geteʼ wo le lay, jar sen raw wo wãã ge go ga : Bloo sen mo deŋ bay men ɗar tiŋ Baa wa lay, bay men ɗar jag liŋgi wa lay.

¹⁴ Wùr daʼn wãã ge ga Yeso ma Nasared mbug gi tiŋ Baa yaŋ go, coo hadge maga Moyis had naa de ɓe go sara lay.

¹⁵ Ngaɓa jar maga wo ɓil tiŋman ni mo ɓuy raw wo lag nen ne Etiyẽn ti ɗeŋres, á raw wo ko nen ɓe, nen ɓe raw maŋ nen je peele Baa.