JOŊRE 5 - Tupuri Bible

Ananiyas wo de wãy ɓe Safira

¹ Jobo yaŋ, à ɗen ga Ananiyas, wãy ɓen à ɗen ga Safira lay, tay wo jag de wãy ɓe ti pay ɓaara po, á raw wo yee ge ɓe go.

² Á raw caa ɓil solay no, men ma la ma ɓe ti see ɓe tawa, kal rawge hã ma lan ne jar peele Yeso wo lay. Wãy ɓen de ko re sen doosen no lay.

³ Piyer raw ɗe ge ɓe so ga : Ananiyas, Manhúulí baa ɓil ɓo go baa ge no, maga ndo mo jãã Nenterse ma bay ɗag ndo mo yoŋ go se solay pay ɓo maga ndo yeen go mokay ma ɓo ti see ɓo ɓa?

⁴ Taŋgu maga ndo hay bay de yee ngel sen go wa ɗa, ngel sen hay diŋ ɓo. Day blam maga ndo wo yee ge ɓe go pa mo, solay ɓen diŋ ɓo pa. Day wer may ga ndo fer ɗig re ma kay mokay ɓil ɓo ma joŋ joŋre ma doo kay no ne? Day ndo caa geteʼ bay diŋ ne jar téebeere wo wa, ama ndo, ndo caa geteʼ diŋ ne Baa.

⁵ Ananiyas wo laa wããre se kayn mokay, raw leʼ ge gesiŋ tuu, kal huu gi go. Jar maga hay wo coʼ sug wããre sen mo ɓuy hẽẽne raw joŋ rage debaŋ debaŋ.

⁶ Weere ma jõõre raw wo hoo ge le ciŋ, kuu wo húulí ɓe, maŋ wo ne, raw wo teege ɓe go.

⁷ Wo ig gi blam sen smagga : wãy ɓe raw kalge le tiŋma bay ko re ma joŋ war ɓe no.

⁸ Piyer raw riŋgi ɓe ga : Sii me ɗa ɓa, mokay diŋ ɓuy ɓuy solay ɓay maga nday yee pay ɓayn mbe go mono? Wãy raw yiŋ jag hẽn ga : ãã, mokay diŋ se mbe.

⁹ Blam sen Piyer raw riŋgi ɓe ga : Nday tay jag ɓay go ɓog ɓuy ɗig re se kayn jãã Nenterse ma bay ɗag Waŋkluu so ga yawla? Coʼ sug, ɓaale jar maga hay wo le tee war ɓo ra wo le see ɓo jag tiŋ le seege mono, á a wo yaŋ maŋ mo go doosen no lay.

¹⁰ Piyer ɓoʼ jag wããren go no kay tuu, wãyn raw leʼ ge gesiŋ, raw huu gi go, weere ma jõõre wo wo laa ge le la daʼ wo go de húulí yaw, á raw wo maŋ ge ɓe, raw wo teege ɓe ɓiŋ war ɓe.

¹¹ Tayge jar ma wer Krisn wo de jar maga hay wo coʼ sug wããren mo ɓuy hẽẽne raw joŋ rage debaŋ debaŋ.

Jar peele Yeso joŋ wo fẽẽre mbuɗgi debaŋ

¹² Jar peele Yeso joŋ wo fẽẽre ma kaŋ nen jar ti fẽẽre mbuɗgi wo yoo jar debaŋ, jar ma de yãã wããre Yeson wo ɓuy hay wo de tayge wer taale mani Salomoŋ no. Ɗiggi ɓaara hay de tayge ɓuy boŋ.

¹³ Jobo boŋ draʼ laa coɓ nen ɓe ma woge see ɓaara ga, de sen ɓuy jar mbe de kee rage debaŋ.

¹⁴ Werpiiri wo, naare wo ngaɓa debaŋ raw wo yãã wããre Waŋkluu, raw wo tayge see kẽẽ ni.

¹⁵ Jar raw ɓoʼ ɗee horge jar cegè wo le ti faage genla genla, ɓoɗ wo maapo ti fen suuli koore, ma la wo ti hiigi, maga Piyer hee we le, nenceere ɓe mo hee ne hara ti.

¹⁶ Jar ma ɓi sir ma ɓiŋ Jerusalem wo ni raw wo hoo ɗeere le, a wo de jar cegè ɓaaran wo, jar maga sõõre wo de joŋ bon ɓaara, ɓuy jar sen pẽɗ wo go.

A joŋ bon jar peele Yeso wo debaŋ

¹⁷ Blam sen je kluu ma siɗ jagn wo de jar ma wer ɓen wo, diŋ Sadusiyẽẽ wo, ɓil ɓaara raw sõõge ne jar peele Yeson wo ti.

¹⁸ Á raw wo hoo jar peele Yeso wo, laa wo ra ti daŋgay.

¹⁹ Wo day ge de suŋ, je peele Waŋkluu raw bul jag tiŋ maga á wo ti daŋgay ɓil ɓe go, raw laa jar peele Yeson wo le go, kal riŋ rage ga :

²⁰ See we, wo we lagge ɓi tiŋ Baa, siɗ we wããre ma defay maga kol jar go tenen wurpo go ne jar ɓuy.

²¹ Jar peele Yeson raw wo yãã re se no, de jag toŋ mbuh tuu, á raw wo had jar ɓi tiŋ Baa. Je kluu jar siɗ jag wo de jar ma wer ɓen ɓuy, raw wo tay ti de jar kluuri jar Jwifn wo, jar ɓoɗ ti wããren wo. Blam sen á raw wo laa jar wo ɗe jar peele Yeson wo le ɓi tiŋ maga á wo ni mono.

²² De maga jar gor jag tiŋ Baa wo wo a ge ɓi tiŋ maga á wo ti daŋgay ni, á daʼ ra wo ni ga, á raw wo fer ge se jar ɓoɗ ti wããren wo, kal wo fer wããre sen hara.

²³ Á raw wo riŋ rage ga : Wùr daʼ mbe jag tiŋ de tẽg ge de ele, jar gor jag ɓen mbaara de lagge ti ngel ɓaaran de el lag lay, day wùr wo bul jag tiŋ go mokay, wùr daʼ jobo ni boŋ gà.

²⁴ De maga waŋ ma gor jag tiŋ Baa wo de waŋre ma siɗ jagn wo wo laa wããre sen mokay, ngar wããre maga saara mo ɗig ti jar peele Yeson wo no kay bay nen ɓaara wa so. Á raw wo wii kããra ga : Ɓa re sen joŋ ge mokay joŋ ge ɓa?

²⁵ Blam sen jobo raw age riŋ rage ga : Coʼ we sug ɓay, jar maga nday hay laa ra suu ti daŋgay la, wo wo gom lag had jar ɓi tiŋ Baa no.

²⁶ Waŋ jar gor jag tiŋ Baa kal rawge ɗe jar ɓen wo, raw wo hoo jar peele Yeson wo le, ama á laa wo joŋ rage de waŋ ga, raw wo joŋ hẽẽne jar ga day la a ɓoɗ saara go de húulì.

²⁷ Blam maga a wo wo a ge de ɓaara mokay, á raw wo raw ge de ɓaara pel jar ɓoɗ ti wããren wo de je kluu jar siɗ jag no, kal wo wiɗ jag ɓaara

²⁸ ga : Wùr bay de ruu nday suu debaŋ ga had we jar de wããre bloo se kayn wa so wa yawla? Day nday joŋ mokay joŋ ge ne? Nday dus hadge ɓay sen mokay go ɓi sir Jerusalem ɓuy pa, nday daga nday ɓoʼ dugwaare húulí ɓen ne wùr ti yawla?

²⁹ Piyer de jar peele Yeso ma lan raw wo fer wããre ne hara ga : joŋ bà joŋ ge ne, wùr yãã jag Baa daŋ jar téebeere wo.

³⁰ Yeso maga nday ʼwarn go de ɓal ge ciŋ ti koo mono, Baa Pan moore naa fer bir gi ɓe go.

³¹ Baa raw hayge ɓe go ciŋ nen ti ɓaŋ war ɓe, ga á mo hay Waŋ, mo hay Je Yãã Jar go, mo hã faage ne weere Israyel wo ga á mo fer wo coo ɗiggi ɓaara ma de ɓlaggen de deele tigriŋ, maga se mo men dig re ɓlagge ɓaaran go ne hara ti.

³² Wùr diŋ jar joŋ sedewa se kay no, wùr siin go diŋ de Nenterse ɓe maga á hãn ne jar maga wo de yãã jag ɓe mono.

³³ De maga jar ɓoɗ faare wããren wo wo laa wããre sen mokay, ɓil ɓaara raw sõõ ge debaŋ, á raw wo ga saara mo id jar peele Yeson wo go.

³⁴ Ama Farisiyẽẽ po yaŋ yoo ɓaara ni boŋ, à ɗen ga Gamaliyel, á diŋ je kluu ma pel jar had jar de wããre Baa lay, jar hoo sug ti ɓe debaŋ lay, á raw urgi go ciŋ yoo jar ɓoɗ faare wããren wo, kal wiigi ga laa jar peele Yeson wo le go siigi meʼ ɗa.

³⁵ Blam sen á raw riŋ jar ma de tay tin wo ga : Nday jar Israyel no, joŋ we see ɓay de el ti re maga nday da joŋ jar se lagn wo de ɓe mono.

³⁶ Naw bay go de rawge debaŋ wa ɗa, Tewdas hay naa nen se ɓe we le la ga se diŋ bloo, jar go ɓaale kis kis naa taʼ, raw wo tayge wer ɓe, á raw ii gi ɓe go, jar ma wer ɓen dus wo go, joŋre ɓen taw go lay.

³⁷ Blam ɓe pa, de ngar ngel maga á hay kee jar la mono, Juda je Galilen raw naa nen se ɓe pa, á tay jar wer ɓe ngaɓa debaŋ, ama á raw ii gi ɓe go, jar ma de tayge wer ɓe ngaɓan dus wo go lay.

³⁸ Patala ndi riŋ nday, joŋ we jar ma lag wo de re po wa hase, men ra we, á mo see wo, hay ga wããre sen, noga joŋre sen a we le de ɓe diŋ jar téebeere wo no, ni á taw mbe yaŋ go de se ɓe tuu.

³⁹ Ama hayga á a we le cwãy diŋ ni Baa no, nday kãã ma taw ge ɓe go gà. Joŋ we see ɓay de ele, naa we nen see ɓay go diŋ jar dur Baa wa. Jar ɓoɗ ti wããren wo ɓuy raw wo yãã jag Gamaliyele.

⁴⁰ Á kal wo ɗe jar peele Yeson wo le tigriŋ, raw wo jwag rage, raw wo ruu rage ga á mo siɗ wo wããre Yeso wa so hase. Blam sen á raw wo laa rage.

⁴¹ Jar peele Yeson wo wo le go laage siigi mokay, ɓil ɓaara raw joŋge go feh ti maga a joŋ bon saara, a ɗar saara wer ɗúu Yeso mono.

⁴² Ti naw tum, á bay wo men had jar go wa, had wo jar ɓi tiŋ Baa, had wo jar liŋ ni ɓaara wo lay, siɗ wo Wããre ma de Cõõren ga wãã ti Yeso go ne jare, Yeso je maga diŋ Mesi mono.