JOŊRE 3 - Tupuri Bible

Je grúm kol go seege de ele

¹ Piyer wo de Jaŋ raw wo tos ge ɓi tiŋ Baa de wur maga fǐiri ma de law wo go de kos age liŋ.

² Jobo maga biŋ le go grúm ɓil man ɓe ɓaa, yaŋ de hayle jag tiŋ Baa ni, a ɗe jag tiŋ sen ga : Jag tiŋ ma de Woore, á farn le go ni maga á mo wiɗ fẽẽre doo jar maga laa wo wo ɓi tiŋ Baa mono.

³ De maga bloo sen wo ko Piyer wo de gee Jaŋ laa ge wo ɓi tiŋ Baa mokay, á raw wii rage ga á mo hã wo mopo ne se.

⁴ Piyer wo de Jaŋ raw wo laa nen ne hẽn ti ɗeŋres, Piyer raw wiigi ɓe ga : Ko wùri.

⁵ Á raw ko rage de kaŋ ɗiggi ga se daʼ mopo yaŋ doo ɓaara.

⁶ Piyer raw riŋgi ɓe ga : Solay bay doo ɓi wa, ama fen ma doo ɓin ndi hã sen mo de ɗúu Yeso ma Nasared. Ur go ciŋ. See.

⁷ Á raw maŋ ge ɓe go ciŋ de doo war ɓe, raw oo ge ɓe go ti deele, ɓaale ɓe wo de nen hm ɓaale ɓe raw wo daʼ egre seŋ.

⁸ Á raw ooge go deele tuu, raw seege, raw kalge wer ɓaara ɓi tiŋ Baa, raw tĩĩ wer yorge, togoɗ Baa.

⁹ Jar ɓuy kon seege togoɗ Baa caw.

¹⁰ Nen ɓaara raw caa ge ti ɓe ga paga á la diŋ je maga seɓaa wiɗ fẽẽre de hayle jag tiŋ Baa maga à ɗen ga jag tiŋ ma de wooren lam yeʼ no. Hẽẽne raw joŋ rage, á raw wo ngel ge doo fen maga joŋ mono.

Piyer sii wããre wer taale mani Salomoŋ no

¹¹ De maga bloon bay go de yaʼ ge se Piyer wo de Jaŋ wa ɗa, jar raw ɗee ge le se kẽẽ hir ɓuy, tay wo le wer taale maga à ɗen ga : Taale mani Salomoŋ mono. Re sen raw ngel rage debaŋ.

¹² Piyer wo ko ge doosen mokay, á raw fer wããre ne jarn wo ga : Nday jar ni Israyel no, re sen ngel nday le la? Nday laa nen ɓay ne wùr ti doo ga wùr kol bloo sen go seege diŋ de egre wùr, noga de hãge se wùr no le ɓa?

¹³ Baa maga Abraham, Isag, Jakob, wo de moore naa goŋ wo mono, á ra ɗúu Yeso wejõõ ɓe maga nday hãn go ne Pilad mono. Pilad hay ɗig de ɓil ɓe ga se ɓoʼ ne go, nday raw hig jiili ɓay ti ɓe ga á mo ɓoʼn go wa.

¹⁴ Nday hig jiili ɓay ti je ma Baa no, Je ma de deele no, nday raw kaŋ ɗiggi ɓay diŋ ti je maga sen diŋ je id jar ga hã sen go ne nday.

¹⁵ Nday raw ii Waŋ ma kol jar tenen go, Baa raw bir gi ɓe le go, wùr diŋ jar joŋ sedewa go ti ɓe.

¹⁶ Wer hãge se wùr ne hẽn, ɗúu ɓe raw kol bloo sen go de egre, bloo se ga nday de ko ge ɓe mono nday ko we cwãy lay ga wer hãge se ɓe ne Yeso Kris, á daʼ se ɓe we nen ɓay ɓuy.

¹⁷ Patala nday hẽẽre ɓi no, ndi de koge ga nday hay joŋ doosen nday hay ko ga ko ge, doo ga jar kluuri ɓay hay joŋ wo le no lay.

¹⁸ Ama Baa raw joŋge go diŋ fen maga á hay go de wãã ge ɓe taŋgu, á raw hãge ɓe ne jar siɗ wããre ma jag ɓen wo go jag, ga Mesi joŋ ge bon yaŋ.

¹⁹ Wersen ɓoɗ we jag go, fer we coo ɗiggi ɓay ma de ɓlaggen de deele tigriŋ, fer we le se Baa, maga á mo men ɗig re ɓlagge ɓayn wo go we ti.

²⁰ Ni Waŋkluu a yaŋ woo ngel ne nday ti, ti wur maga á wo ge ɓoʼ Mesi maga á hay ngaɓn le go ɓaa ne nday mono, diŋ Yeso sen so.

²¹ Ma patala Yeso Kris mo hay wo ciŋ ni yeʼe, hãã fẽẽren mo fer wo go joŋ ge defay ɓuy ɗa pa, doo maga Baa hay wããn go, hãn go ne jar siɗ wããre ma jag ɓen wo le go jag ɓaaɓaa nono.

²² Moyis hay wãã we ga : Baa Waŋkluu naa ge nen je siɗ wããre ma jag ɓe go yaŋ ge le yoo hẽẽre ɓayn wo doo ndi no lay, ni nday yãã we jag ɓe, ti fẽẽre maga á riŋ we ge ti ɓaara mo ɓuy no.

²³ Wosela ɓuy maga yãã jag je siɗ wããre ma jag Baa se kay we ga no, ni nday mo nii je sen wo go, á mo tawn go.

²⁴ Jar maga wo diŋ jar ma ndar nen wããre Baa go wo le ɓuy, tĩĩ wer le se Samyel, hãã go se kããre ɓe maga sen kol wo blam ɓe mo ɓuy, hay wo sii gi go diŋ ti naw maga naa patala nen ɓe mo lag no.

²⁵ Nday diŋ weere jar ndar nen wããre Baa go wo de weere jar maga Baa hay baa barge le de pããre ɓay wo, ti maga á raw riŋ Abraham ga : Ndi woo ge wer jar ma ti tamsir wo la ɓuy yaŋ de wer mani ɓo no.

²⁶ Diŋ wersen Baa raw ɓoʼ wejõõ ɓen le taŋgu diŋ ne nday, maga á mo woo we, mo fer coo ɗiggi ɓay ma de ɓlaggen de deele tigriŋ, nday mo men joŋ ɓlagge go.