JOŊRE 28 - Tupuri Bible

Pol ti kaali Malte

¹ Wùr wo yãã ge go jag biin mokay, wùr raw koge ga paga á diŋ kaali maga à ɗen ga Malte mono.

² Jar ma ti kaali sen wo ni, raw wo joŋ wùr de el debaŋ, Baa raw cwaa ge, ngel raw joŋ ceere lay, á raw wo ngal wùu ne wùri, yãã wo waare wùr go ɓil feh debaŋ lay.

³ Pol raw hoo sug hããre ma lagge ti wùu, cwe raw kalge le go doo wùu no, raw kaa ge ne Pol doo.

⁴ Jar ma ti kaalin wo ni wo wo ko ge ga cwe kaa Pol we doo mokay, á raw wo wãã ge ga : Kidolgi bloon mo yeʼ diŋ je ma doo de yeege cwãy, á yãã le go jag bii la defay, de sen ɓuy Baa je cag re de deelen laa mbe men ge ɓe hayge tenen ga pa.

⁵ Pol raw jwed cwe nen wùu, cwen joŋ mopo se ɓe meʼ ga hase.

⁶ Jar ma ti kaalin raw wo gor ge ga doo ɓe wùu yaŋ ɗa layblaʼ, noga á leʼ yaŋ go de húulí tuu layblaʼ la, á ig wo gor ge ɓe debaŋ, raw wo ko ge ga mopo bay de joŋge ɓe meʼ wa mokay, á raw wo coo ɗiggi, raw wo wãã ge ga Pol diŋ Baa.

⁷ Ɓiŋ ngel sen ni mbaŋ, pay ma waŋ kaalin yaŋ ni, a ɗe waŋ sen ga Publiyus. Á raw yãã waare wùr de ele, joŋ wùr de el naw swaʼa.

⁸ Pan Publiyus hay de cege debaŋ, see ɓe leɗ wùu, mbiiri swaa ne lay. Pol raw kalge tos ge ti ɓe, kaŋ doo ne hẽn ti, pẽẽ ne go.

⁹ Blam sen jar cegè ma ti kaalin wo ni ɓuy raw wo le a ge, pẽɗ wo go de el lay.

¹⁰ Á hoo wo sug ti wùr debaŋ, hã wo fẽẽre maga sãy ɓaara ti wùr ne wùr debaŋ de maga wùr ɗii ɓi daagen raw ge mono.

Pol de woge Rom

¹¹ Fewn wo go taw ge mokay, wùr kal rawge de daage ma Aleksaŋdri maga hay joŋ few ti ceere go ti kaali ni mono, daage maga à ɗen ga Baa ma Gèere wo mono.

¹² Wùr raw day ge ɓi leege maga à ɗen ga Sirakus, wùr raw joŋ naw ni swaʼa.

¹³ Le ni, wùr raw maŋ jeŋ biin ga wùr mo day Regjiyo. Toŋ ɓe leege ma nen ɓaŋ ni wãyban raw urgi le, hãã wùr wo day ge Pusol naw ɓoge.

¹⁴ Wùr wo daʼ hẽẽre wùr ma de yãã wããre Kris wo ɓi leege sen ni, á raw wo wii wùr ga wùr mo lag se saara ni naw renam ɗa. Blam sen wùr raw day ge Rom.

¹⁵ Hẽẽre wùrn wo wo laa ge ga wùr a we mokay no, á raw wo hoo ge le yiŋ gi de wùr ɓi lumo ma Apiyus, ɓi tiŋ ma swaʼ ma lag waaren wo no. Pol wo ko rage no kay, á raw joŋ suseʼ ne Baa, jiili ɓe raw coɓ ge lay.

¹⁶ Wùr wo day ge Rom mokay, á raw ɓoʼ Pol go ɓi tiŋ ma tigriŋ sara, ɓoʼ soode po gor ge ɓe boŋ.

Pol de sii wããre ne jar Rom wo

¹⁷ Naw swaʼ blam sen Pol raw ɗe jar kluuri jar Jwif wo le se ɓe. Á wo wo tayge le se ɓe mokay, á raw riŋ rage ga : Nday hẽẽre ɓi no, ndi bay de joŋ kawre naa wo de ɓlagge wa hase, bay ti hadge moore naan wo wa lay, de sen ɓuy, á raw wo baa mege le Jerusalem, baŋ wo ndi, hã wo ndi go ne jar Rom wo doo.

¹⁸ Á raw wo wii jag ɓi, kal wo wãã ge ga saara mo ɓoʼ me, werga á daʼ wo re maga saara ʼwar me go ti ɓe gà.

¹⁹ Jar Jwif wo wo hoo ge le ciŋ de wããre sen doosen no mokay, ndi raw ga ndi wo de re ɓin pel Sesar, ama re maga ndi joŋ kawre ɓi wo de ɓlagge de ɓe bay nen ɓi wa hase.

²⁰ Wersen ndi ɗe we le ga ndi mo ko we, ndi mo wãã re de ɓay lay, werga á baa me le, diŋ wer gor ge Je Yãã Jar maga jar Israyel wo de gor ge ɓe mono.

²¹ Á raw wo riŋ gi ɓe ga : Wùr bay de daʼ leeder po le Jude ti ngel ɓo wa, jobo boŋ yoo hẽẽre naa po wo, bay de a ge de wããre ɓo lam taʼ la wa lay.

²² Ama wùr laa diŋ jag ɓo ti re maga ndo de ɗig gi ɓe ti wããre car ge ɓil jag Baa se kay no, werga wùr de koge ga genla genla ɓuy, jar bay de da wããre car ge ɓil jag Baa sen mokay wa.

²³ Á raw wo ngaɓ naw po boŋ de Pole. Saara raw wo age ngaɓa debaŋ daʼ ge ɓe ɓi tiŋ maga á ni mono. Pol raw tĩĩ wer ɓoɗ wer wããre ne hara de jag toŋ hãã go de law, joŋ sedewa ne hara ti twaywaŋ mani Baa no, car nen ɓaara go ga á mo daʼ wo wer wããre maga Moyis wo de jar ndar nen wããre ma jag Baa go hay wãɗ wo ti Yeso mono.

²⁴ Jar po wo yoo ɓaara raw wo yãã wããre maga Pol wãã ne mono, jar po laa wo day ge ga lay.

²⁵ Jag ɓaara laa tayge ga, á raw wo mber ge, á wo de mber ge mokay, Pol raw riŋ rage pa ga : Wããre maga Nenterse ma bay ɗagn kal ne Esay je siɗ wããre ma jag ɓen go ga á wãã le go ne moore ɓay wo le ɓaa, á wãã diŋ ti cwãy ɓe.

²⁶ Á raw riŋ Esay ga : See wo riŋ wer jar se lagn wo ga : Nday coʼ mbay sug wããren de ele, ama nday laa wer ɓe go pah ga, Kon mbay de nen ɓay de ele, ama nday daʼ wer ɓe go cwãy gà.

²⁷ Werga ɗiggi ɓay jar se lagn kol wo go de kaŋ tiŋriŋ, Nday jeb sug ɓay go, Kuɓ nen ɓay go, maga nen ɓay mo kon wa, Sug ɓay mo laan wa, Ɗiggi ɓay mo daɗ wer re wa lay, Nday mo fer le ɓiŋ ɓi wa, day la ndi fer kneʼ ɗiggi ɓay ma de ɓlaggen de deele tigriŋ.

²⁸ Pol fer riŋ rage tigriŋ ga : Ko we go cwãy so ga Baa raw we de wããre Je Yãã Jar gon ne jar maga bay wo jar Jwif wa mono, á laa wo wããre ɓen yaŋ lay. [

²⁹ Blam wããre sen, jar Jwif raw wo mber ge faa kããra wo ti faage tiʼ debaŋ.]

³⁰ Pol raw kiŋ gi ɓi tiŋ maga á kal ɓil ɓe ɓoge, yãɗ jar maga a wo ko ge ɓe de el lay.

³¹ Á siɗ wããre ne jar ti twaywaŋ mani Baa no, had jar de wããre Yeso Kris Waŋkluun go de budgi doo ga ɓil da nono, jobo bay dig gi ɓe wa has lay.