JOŊRE 27 - Tupuri Bible

A ɓoʼ Pol wo go Rom

¹ Blam sen á raw hã faage ne wùr ga wùr mo raw Itali, á raw hã Pol wo de jar daŋgay maapo wo ne waŋ soode mani waŋ ma kluu wo doo, à ɗen ga Juliyus.

² Wùr raw ɗii gi ɓi daage ma Adramid, daage sen de wo ge go ɓi sir Asi. Wùr kal rawge, Aristarke, je Masedwan ma Tesalonig hay yaŋ wer wùr ni lay.

³ Toŋ ɓe, wùr raw day ge Sidoŋ, Juliyus raw joŋ Pol de ele, men Pol wo ge se jar ɓen wo, ga á mo wo yãɗ fẽẽre maga jar ɓen da wo ga saara hã ne hẽn mono.

⁴ Wùr raw hoo ge le ni, wùr raw hee ge ti jeŋ Sipre maga leege bay ni debaŋ wa mono, werga leege hay le de ur gi pel wùri.

⁵ Wùr raw cegaɗ ge go faale ɓaŋla, ɓiŋ Silisi wo de Pamfili mbaŋ, wùr raw day ge Mira ɓi sir Lisi.

⁶ Waŋ sooden raw daʼ daage ma Aleksaŋdri wo ge go Itali, á raw laa wùr ɓil ɓe.

⁷ Naw wo joŋ ge go rab daagen laa seege de wùr deparday ga, wùr raw day ge jag leege Sinid de gaali debaŋ, werga leege le de ur gi pel wùri, wùr raw cegaɗ ge go nen wer Kred ti jeŋ Salmone.

⁸ Wùr raw yaʼ ge pel de gaali debaŋ, wùr raw day ge jag gosoŋ po, à ɗen ga Jag Gusoŋ-Ma-De-Ele, á se Lase mbaŋe.

⁹ Wùr raw nà ge go ni de el rabe tuŋ gi daagen raw joŋge de gaali werga naw hẽẽge bii raw taw ge go lay, Pol raw ga :

¹⁰ Nday jar ɓi no, seele maga naa de seege ɓe nen bii de daagen mokay á joŋ ge gaali naa yaŋ debaŋ, bay ma taw fẽẽre ma ɓi daagen de daagen tawa wa, ama ma taw naa go ɓuy.

¹¹ Ma waŋ sooden raw yãã jag je tuŋ daagen wo de pan daagen daŋ wããre maga Pol wããn mono.

¹² Werga jag gosoŋ sen bay de el maga à lag ni ti few ceere wa, jar po wo debaŋ raw wo da ge ga wùr mo raw Fenisi, wùr mo lag diŋ ni. Fenisi diŋ ngel maga a lag daage wo go ni mono, ngel sen diŋ jag gosoŋ Krede, nen ɓaŋ ni wãybane, nen nen wur bolaw nen gloŋhwede ɓuy no, nen maga ti ceere mo daʼ wùr ni.

Leege daʼ ra nen maarog ni

¹³ Leege raw age le ɓaŋ ni wãybane, fid flel flel, á raw wo ɗig gi ga wùr day yaŋ go ti ngel maga wùr de wo ge ni mono, á raw wo maŋ boo maga à od daagen de ɓe le ɓil ɓe, raw wo raw ge wo pel ɓaara ti jeŋ Kred mbaŋ.

¹⁴ Ig blam sen debaŋ ga so, leege maga a le nen gloŋhwede wo de ma nen wur bolaw raw urgi le ti húulì ma Kred no.

¹⁵ Wersen daagen laa tuŋ gi wo nen leegen ga so, wùr raw men ge ɓe de se ɓe.

¹⁶ Wùr raw hee ge jag gosoŋ maga à ɗen ga Kawda de gaali debaŋ, wùr raw yãã daage ma kleen go ni.

¹⁷ Á raw wo maŋ daage ma kleen go ciŋ, raw wo saʼ daagen de saale. Werga a joŋ wo hẽẽne maga wùr mo wo go ngaʼ ge nen duguɗgi ma Libin wa, á raw wo bag õõbe ma kog daagen go gesiŋ, men wo daagen go seege de see ɓe.

¹⁸ Leege joŋ bon wùr debaŋ, day toŋ ɓe á raw wo laa fẽẽre ma ɓi daagen go nen maarog no.

¹⁹ Wur síilí ma de swaʼn, á raw wo lag fẽẽre ma tuŋ daagen wo go de doo ɓaara.

²⁰ Wùr raw joŋ naw blam sen debaŋ nen wùr laa ko wur wo de gér wo go ndar nen nen wùr kaʼ kaʼ ga, werga leegen joŋ bon wùr debaŋ hãã wùr kol ɗig gi ga wùr yãã go ga so hase.

²¹ Á joŋ wo naw debaŋ bay re mopo, Pol raw urgi ciŋ yoo ɓaara raw ga : Nday jar ɓi no, nday mo hay yãã jag ɓi we ti maga ndi hay riŋ we ga naa mo men Kred go wa we no, naa de hay daŋ joŋge bon wo de gayre se kayn we go.

²² Ama patala ndi wii nday, coɓ we nen ɓay, werga jobo kãã ma bas ge go yoo ɓay boŋ ga, say daagen tawa.

²³ Werga Baa maga ndi goŋ ne ɓoʼ je peele ɓe le suŋ la see ɓi,

²⁴ á raw ɗe mege ga : Pol, joŋ hẽẽne wa, ndo wo yaŋ go oo ge pel Sesar deŋ ɗa, ko nen ɓo, Baa hã jar ma ɓi daagen wo mo doo ɓuy.

²⁵ Wersen coɓ we nen ɓay, nday jar ɓi no, ndi de koge ga Baa joŋ ge doo ga a wãã mbe nono.

²⁶ Ama naa wo yaŋ ɗii gi go ti kaali po.

²⁷ Naw raw joŋge go hwal ti naa, wùr kal rawge kii ti nen maarog maga à ɗen ga Adriyatig, wo day ge gesiɗgi suŋ, jar daagen raw wo ɗig gi ga saara day yaŋ go ciŋ gusi.

²⁸ Á raw wo ngaɓ tuu bii no, á raw wo daʼ ge ɓe nen meeder doo swaʼ ti renam, á raw wo yaʼge wo pel meʼ pa, raw wo ngaɓ ge pa, wo wo daʼ kuɗum ɓe nen meeder doo ɓog ti nenmaʼa.

²⁹ Á raw wo joŋ hẽẽne ga leegen wo go hag daagen ti húulì yawla, á raw wo laa boore ma dig daagen gesiŋ nen bii ni naa, ɓil ɓaara ga ngel mo tee le go ɗa.

³⁰ Jar daagen raw wo ga saara yor le go ɓi daage no, á raw wo sir daage ma kleen nen bii no, raw wo joŋ ge doo ga saara lag boore ma dig daagen wo go pel daagen no.

³¹ Pol raw, wii waŋ sooden wo de sooden wo ɓuy ga : Hayga jarn lag wo we ɓi daagen ga no, ni nday kãã ma daŋ ge go gà.

³² Sooden raw caa saale daage ma kleen go, raw wo men ge ɓe go de se ɓe.

³³ De maga ngel le go mbaŋ ma teege mokay, Pol raw riŋ rage ɓuy ga : Hoo we fẽẽre rege doo ɓay, raw riŋ rage pa ga : Naw wara hwal ti dwee, nday bay de daʼ nen ma rege wa.

³⁴ Ndi de riŋ we ge ga re we mopo maga nday mo daʼ see ɓay, werga jobo yoo ɓay boŋ draʼ layblaʼ bas ge go ga, ko riŋ ti ɓay draʼ.

³⁵ Blam wããre sen á raw maŋ hoole doo ɓe, raw joŋ suseʼ ne Baa pel ɓaara ɓuy deŋ, raw ɓes ge ɓe go ne hara, raw rege lay.

³⁶ Á raw wo coɓ nen, raw wo rege ɓuy lay.

³⁷ Á wo ɓi daagen ɓuy kis kis ɓog ti ɓe hwal hwal renam ti hiiraʼa.

³⁸ Á wo wo go wùu gi mokay, á raw wo lag coore ma ɓil ɓen go nen bii maga daagen mo hay gefeŋ.

Pel daagen caa waŋ nen duguɗgi

³⁹ Ngel wo le go teege mokay, saara hay bay de daʼ sir wa ɗa, ama nen ɓaara raw ko duguɗgi po wo de naa ti wo jag gosoŋ kaʼa, saara raw ɗiggi ga saara mo srog daagen wo ni, hayga sen joŋ yaŋ no ni saara mo kog daagen wo kaŋ ge ni.

⁴⁰ Wersen á raw wo caa boo ma od daagen wo go, men wo daagen go nen maarogn ni, saale maga á lag wo fẽẽre ma tuŋ daagen ti ɓe, á raw wo bud gi ɓe go lay, raw wo saʼ õõben pel daagen ga leege mo kog ne, raw wo laa ge wo go jag gosoŋ no.

⁴¹ Á raw wo ɗii gi ti ngel po maga sen bay kuɗum debaŋ wa, á raw wo ooge, pel daagen raw caa waŋ nen duguɗgi no, laa ged ge ga has, ma nen blam raw mbug gi go doo kaŋngaw bii no.

⁴² Sooden raw wo ga saara mo id daŋgayn wo go, maga jobo mo daŋ yoo ɓaara wa.

⁴³ Ama waŋ soode maga da ga se yãã Pol go, raw dig rage ga saara mo ɓoɗ faare ti wããre sen ɗa, á raw wii jar ma de ko ẽẽ gen wo ga laa we ẽẽge, ɗii we wo go ciŋ taŋgu.

⁴⁴ Maga gwaʼ wo, jar po ẽẽ wo wo go de koo ma de labragn wo no, jar ma la ẽẽ wo wo go de hlagle daagen lay, á raw wo yãã ge go jag biin so, ɗii wo go ciŋ jam ɓuy.