JOŊRE 26 - Tupuri Bible

Pol de wãã ge go ti se ɓe pel Agrippa

¹ Agrippa raw riŋ Pol ga : Faage yaŋ mbe maga ndo wãã go ti see ɓo mbe. Pol raw maŋ doo ɓe ciŋ, raw wãã ge go ti se ɓe, á raw tĩĩ wer wããre ga :

² Agrippa waŋ ɓi no, ɓil ɓi joŋ go feh debaŋ ti maga ndi mo wãã go ti see ɓi wara pel ɓo, ti re maga jar Jwif kiɗ wo ndi de ɓe mo ɓuy no.

³ Werga ndo yaŋ mbo go de ko had ge jar Jwif wo de goŋ ge Baa ɓaara wo no, ndi kam mo kam ge, ga ndo mo coʼ sug wããre ɓin desãy de ele.

⁴ Seele ɓi le ti jõõ ɓi le ɓaa, le taŋgu yoo kawre ɓi wo Jerusalem, jar Jwif yaŋ wo go de ko ge ɓe ɓuy.

⁵ Á wo ɓuy yaŋ wo de ko ndi le taŋgu ɓaa, á kãã wo ma wãã ge go ti ɓi ga ndi hay hay we le seege wer hadge wùr wo ti ngel ɓe de deele daŋ kawre ɓin wo ɓuy, ndi diŋ Farisiyẽẽ lay.

⁶ Wara a de cag re ɓi pel ɓo mo deŋ diŋ ti re gor ge bar ge maga Baa baan de moore wùr wo mono.

⁷ Moore wùr wo hwal ti ɓoge, á hay wo le goŋ Baa de suŋ de cege, gor bar ge se no. Waŋ ɓi no, jar Jwif a wo car wããre me se mo deŋ diŋ ti se no.

⁸ Nday jar Jwif no, nday ɗig ga Baa bir jar ma de húulí wo le go ga gahãyla?

⁹ Ndi de see ɓi, ndi hay ɗig ga ndi de joŋge diŋ joŋre ma de el ti maga ndi hay joŋ bon jar ma de yãã wããre Yeso ma Nasared wo mono.

¹⁰ Ndi joŋ bon ɓaara Jerusalem doosen no lay, ndi bag jar mani Baa wo ti daŋgay debaŋ, ndi daʼ faage se ma joŋ ge doosen, doo waŋre ma siɗ jagn wo, ndi hay tay jag ɓi de jar ɓoɗ faare wããren wo wo ge id rage go.

¹¹ Ɓi tiŋ tosgen wo ɓuy, ndi joŋ bon ɓaara debaŋ ga á mo ɗar wo Yeso, ndi kiɗ ra debaŋ, hãã ndi wo go kiɗ rage ɓi sir jar dehãy ɓuy.

Pol de wãã ge go ti hãge se ɓe ne Kris

¹² Wersen ndi raw woge Damas de leeder maga waŋre ma siɗ jagn hãn wo me maga ndi mo wo mbi joŋ bon jar mo lay.

¹³ Wur wo day ge ɗeger de maga ndi wo ti faagen mo caw, ngel raw sag ge le ciŋ daŋ sag ge wuri, raw yiŋ ti wùr go de jar ma wer ɓin wo cwẽẽ ɓuy.

¹⁴ Wùr ɓuy, wùr raw leɗ ge gesiŋ, ndi raw laa gẽẽge le ciŋ ɗe mege de jag Hebre ga : Sol, Sol, ndo joŋ bon ɓi le la? Ndo de kiɗ kaŋ wããge ne see ɓo se doo ga bloodày maʼ jag jaw maga a de nii wer ɓe de ɓe, kaŋ wããge ne see ɓe sen no.

¹⁵ Ndi raw wiigi ɓe wo ga : Á diŋ ndo wo la Waŋkluu? Waŋkluu raw ga : Á diŋ ndi Yeso maga ndo joŋ bon ɓe mono.

¹⁶ Ur go ciŋ deele, ndi naa nen see ɓi go mo nen werga ndi maŋ mo go wejõõ ɓi, riŋ jar ga ndo ko me we wara, wo sii wããre maga ndi day wãã ge ɓe mo ne hara lay.

¹⁷ Ndi yãã mo ge yaŋ go doo jar Jwif wo, doo jar maga bay wo jar Jwif wa mo lay, jar se maga ndi ɓoʼ mo ge wo see ɓaara,

¹⁸ maga ndo mo wo caa nen ɓaara go, á wo nen suŋgu, hoo ra le go, a go de ɓaara nen ngel maga go de ler gem, yãã ra le go doo Manhúulí, a go de ɓaara ne Baa, maga Baa mo men ɗig re ɓlagge ɓaaran go ne hara ti, á mo laa wo yoo jar maga wo diŋ ma Baa mono.

Pol de wãã ge go ti joŋre ɓe

¹⁹ Waŋ ɓi Agrippa, diŋ wersen ndi laa faa jag re maga mbuɗ me nen mo hãʼ gà.

²⁰ Ndi raw sii wããre taŋgu ɓi leege Damas, blam sen ndi sii ne jar Jerusalem, go ɓi sir Jude wo ɓuy, hãã go ne jar maga bay wo jar Jwif wa mono, ndi siɗ ne hara ga á mo ɓoɗ wo jag go, mo fer wo ɓiŋ Baa, mo joŋ wo joŋre ma kaŋ nen jar go ga saara ɓoɗ jag we go.

²¹ Diŋ wersen jar Jwif raw wo yoo ge de ɓi ɓi tiŋ Baa, ga saara ii me go.

²² Ama Baa raw kay mege, hãã ndi yaŋ wara de oo le deŋ sii wããre go ne jar ɗa, ne weere kleere wo de jar kluurin wo lay, ndi bay wãã ge diŋ wããre ma tigriŋ sara wa, ama ndi wãã diŋ ti wããre maga jar ndar nen wããre Baa go wo de Moyis hay wããn wo go ga á joŋ yaŋ wo pel naa doosen no mono,

²³ á hay wãã wo ga á joŋ ge bon Mesi yaŋ, day Mesi joŋ ge yaŋ diŋ je tĩĩ wer bir gi le go yoo jar ma de húulí wo no, ma naa nen see ɓe go poɗag ga se diŋ je ma yãã jar Jwif wo go de jar maga bay wo jar Jwif wa go jag ɓlagge ɓaaran wo.

Agrippa leʼ hã ɓil ɓe go ne Kris wer wããre Pole

²⁴ Pol wo wãã ge go ti se ɓe doosen no wãã, Festus raw ngar jag de gẽẽge ɓe ciŋ kloŋ ga : Pol, ndo fĩɗ ti we go, had ge kefder ɓo maga ndo had ne debaŋ mo deŋ fĩɗ ti ɓo we go.

²⁵ Pol raw ga : Ndi bay go de fĩɗ ti wa Festus ma de ele, ndi wãã go diŋ wããre ma kidole, ti ngel ɓe de deele.

²⁶ Wersen ndi de wãã ge ɓe go ti cwãy ɓe bay hẽẽne, werga ndi de ko ge go cwãy ga ndo go de ko wer wããre se no, werga á bay de yoŋ wããre sen go ti ngel po meʼ wa lay mono.

²⁷ Waŋ ɓi Agrippa, ndo yaŋ de yãã wããre jar siɗ wããre ma jag Baa wo go ga? Ndi de koge ga ndo yaŋ de yãã wããre ɓaara.

²⁸ Agrippa raw riŋgi ɓe ga : Ndo ɗig ɓon ga ndo kol me yaŋ go je ma wer Kris doosen no gus kay tuu no?

²⁹ Pol raw ga : Ndo mo yãã bà gusi, ndo mo yãã bà gus ga, ma ɓi, ndi de tos Baa ti ɓay de jar maga wo de coʼ sug wããren mo ɓuy no, maga nday mo kol doo ndi no lay, nday mo hay de saɗ ge de receʼ doo ndi no wa an tawa.

³⁰ Waŋ ma kluun wo de go ɓe no, Berenis wo de jar maga wo de lagge see ɓaara mo ɓuy raw wo hoo ge ciŋ.

³¹ Á raw wo laa ge go, raw wo wii kããra ga : Bloo sen mo yeʼ bay de joŋ mopo maga a ʼwarn go ti ɓe wa, á bay de joŋ re po ma ɓoʼ ge ti daŋgay wa hase.

³² Agrippa raw riŋ Festus ga : Hayga bloo sen mo yeʼ mo wii we ga cag re sen wo go pel Sesar ga no, naa de ɓoʼ ne go.