JOŊRE 25 - Tupuri Bible

Pol ga wo cag re sen go diŋ pel Sesar

¹ Festus kol ti waŋ mokay, naw raw joŋge swaʼa, blam sen á raw urgi le Sesare, á kal rawge Jerusalem.

² Á wo a ge mokay, waŋre ma siɗ jagn wo, de waŋre ma yoo jar Jwifn wo, raw wo age de wããre se ɓe de war ti Pole, raw wo kam ge ɓe ga :

³ á mo ɓoʼn le ne saara Jerusalem, ni saara laa gǔu ne hẽne, saara mo iin go ti faage.

⁴ Festus raw riŋ rage ga : a le go de dig Pol ti daŋgay Sesare, se de see se, se ig gi meʼ koɗe se fer yaŋ wo go ni gusi.

⁵ Á raw riŋ rage ga : Jar kluuri ma yoo ɓayn mo wo wo wer ɓi, hayga bloo sen yaŋ de ɓlagge, ni nday wo go wãã ge ɓe ni.

⁶ Á raw nà ge wo yoo ɓaara ni nenmaʼ layblaʼ, hwal layblaʼ, á raw ferge le Sesare, toŋ ɓe á raw age hay ge ti paale ma cag re no, raw ga á mo a wo le de Pole.

⁷ Pol wo a ge see ɓaara mokay, jar Jwif maga a wo le Jerusalem raw wo yiŋ ti ɓe go cwẽẽ, raw wo car wããre ma kluuri ne hẽn se debaŋ, bay wo wãã ge ɓe ti cwãy wa.

⁸ Pol raw wãã ge go ti se ɓe lay ga : Ndi bay de joŋ ɓlagge ti wããre hadge jar Jwif wo meʼ wa, bay de joŋge ti tiŋ Baa wa lay, bay de joŋ Sesar wa lay.

⁹ Festus da ga se mo ko nen jar Jwif wo de ele, á raw hom wããre ne Pol ga : Ndo da yaŋ ga ndo ɗii Jerusalem maga ndi mo wo cag re ɓon wo go ni.

¹⁰ Pol raw fer wããre ga : Patala ndi wo go pel Sesar, ndi raw wo go de re ɓin ni, ndi bay de joŋ ɓlagge se jar Jwif wo wa, ndo de see ɓo ndo yaŋ mbo go de ko ge ɓe paha.

¹¹ Ndi mo joŋ bà diŋ ɓlagge maga ndi go nen ʼwar ge layblaʼ, ndi bay de riŋ gi ga ʼwar me wa wa, hayga wããre maga á car wo me se mo deŋ bay we ti cwãy wa no, jobo kãã ma hã mege go ne hara doo ga lay, ane ndi da ga wo de re ɓin diŋ pel Sesar.

¹² Festus raw wo ɓoɗ faare wããre sen ti yoo ɓaara ɓoɗ, á raw wii Pol ga : Ndo da ga ndo wo de re ɓon pel Sesar gla, wersen ndo wo yaŋ pel ɓe ɓegdeʼ lay.

Pol pel Agrippa wo de Berenis

¹³ Naw raw joŋge go rabe, blam sen Agrippa waŋ wo de Berenis raw wo age Sesare hee jag ne Festus.

¹⁴ Á raw wo joŋ naw ni smagga : Festus raw wii waŋ ti wããre Pol ga : Bloo po yaŋ la, Feligse hay men ti daŋgay.

¹⁵ Wur maga ndi hay le Jerusalem, waŋre ma siɗ jagn wo de jar kluuri ma yoo jar Jwif hay a wo ʼwad war ne hẽn ti ga ndi mo ɓoʼ ren ne hẽn ti ni ʼwarn go.

¹⁶ Ndi raw riŋ rage ga wer hadge naa jar Rom á hã jobo go bay laa jag jar ma ʼwaa war ne hẽn tin wo ga, werga je maga á ʼwad war ne hẽn ti la, kãã ma wãã ge go ti se ɓe pel je ʼwad war ne hẽn tin lay.

¹⁷ Á wo wo a ge mokay, ndi laa yõõ ti ga so, toŋ ɓe ndi raw age hay ge ti ngel ma cag wããren ga á mo a wo le de bloo sen pel ɓi.

¹⁸ Jar hee ɓen raw wo le hoo ge ciŋ, á raw wo age bay diŋ de wããre ɓlagge po doo ga ndi hay ɗig no wa.

¹⁹ Á faa wo kããra diŋ ti faage tosge ɓaara po wo de ɗúu jobo boŋ à ɗen ga Yeso, hay go de húulí, Pol day ga á yaŋ tenen pa.

²⁰ Ndi de see ɓi lay, faage wããre sen laa daʼ ge doo ɓi ga lay, ndi raw riŋ Pol ga á da yaŋ ga wo cag re sen wo go Jerusalem yawla.

²¹ Á raw wãã ge ga se wo de re sen pel Sesar, ndi raw ɓoʼ ge ɓe ti daŋgay hãã hãã ndi raw ɓoʼ ge ɓe wo ne Sesar.

²² Agrippa raw wii Festus ga : Ndi da laa wããre bloo sen lay. Á raw riŋgi ɓe ga : Ndo laa wããre ɓe yaŋ toŋ.

²³ Toŋ ɓen Agrippa wo de Berenis raw wo le a ge de jar ɓaaran wo, de soode ma kluurin wo, de jar ma ɓi leegen wo, de togoɗ rage deŋ, á raw wo laa ge ɓi tiŋ ma cag wããre no, Festus raw wãã ge ga á mo a wo le de Pol ɓi tiŋman ni.

²⁴ Festus raw ga : Ndo Agrippa waŋ no, de jar maga wo ɓiŋ naa lam ɓuy no, ko we nen ɓay, bloo mo deŋ diŋ bloo maga te jar Jwif a wo de war ne hẽn ti ɓiŋ ɓi le Jerusalem ngar wo jag ga ʼwarn go mo so no.

²⁵ Ndi bay de daʼ cwãy mopo maga à ʼwarn go ti re ɓe wa, a de se ɓe á raw wiigi ga se wo de re sen pel Sesar lay, wersen ndi raw ga ndi ɓoʼn wo ne hẽne.

²⁶ Werga ndi daʼ re maga ndi yer wo ne waŋ ɓin ti ɓe ga, wersen ndi a we de ɓe pel ɓay, daŋge ɓuy pel ɓo Agrippa, a wii jag ɓe we, ni ndi daʼ wããre ma yer ge yaŋ.

²⁷ Werga á ko nen ɓi doo ga ndi ɓoʼ je ma baage wo, ndi yer wããre jar maga ʼwad wo war ne hẽn ti we ga no, bay nen ɓi de el wa.