JOŊRE 24 - Tupuri Bible

Jar Jwif car wo re ne Pol se

¹ Naw wo nà ge dwee blam sen Ananiyas je kluu ma siɗ jagn raw wo age le de jar kluuri po wo wer ɓe, Tertulus je ma jag de cõõren lay, á raw wo car wããre ne Pol se pel Feligse waŋ no.

² Á raw wo ɗe ge ɓe, Tertulus raw tĩĩ wer wããren ga : Feligse ma de el no, wùr de lagge wara jam mo lag diŋ wer ɓo, fẽẽren go de bag ɓil sir wùr mo deŋ diŋ wer ko ge re ɓo.

³ Wùr daɗ maysela ɓuy mo deŋ diŋ wer ɓo Feligse.

⁴ Patala ndi bay de kããge ma yõõ ti ɓo de wããre wa, ndi kam mo kam ge, coʼ sug wããre wùr mbo de desãy ɓon coʼ ɗa la.

⁵ Werga bloo sen mo yeʼ á de ɓlagge debaŋ, á ur wããre ciŋ yoo jar Jwif wo debaŋ, ɓi sir genla genla ɓuy, á diŋ waŋ car ge ɓil jag Baa ma Nasaredn lay.

⁶ Á kiɗ ga se kaŋ ɗag ne tiŋ Baa se lay ɓuy, wùr hay baa ne [ga wùr cag re ɓen wer wããre hadge wùr no.

⁷ Ama Lisiyas soode ma kluun raw yãã ge ɓe go doo wùr de egre.

⁸ Á raw wii jar maga joŋ wo wããre ne hẽn ti ga á mo wo wo pel ɓo.] Hayga ndo wii bloo sen we de see ɓo, ni ndo kãã yaŋ ma ko cwãy wããre maga wùr ʼwaa war ne hẽn ti ti ɓe yaŋ.

⁹ Jar Jwif raw wo tay jag ɓaara wer ɓe ɓuy ga wããre sen cwãy doosen nono.

Pol fer wããre pel Feligse

¹⁰ Feligse waŋ raw laa nen ne Pol ga á mo wãã wããre, Pol raw ga : Ndi de koge ga ndo de ig gi cag re jarn mo taʼ la kiŋgi puri, diŋ wersen ɓil ɓi go feh ma fer wããre go ti see ɓi pel ɓo so.

¹¹ Ndo de see ɓo, ndo kãã yaŋ ma ko ge ɓe de see ɓo, naw maga ndi hay le Jerusalem goŋ Baa de baa jag wara hwal ti ɓoge.

¹² Á daʼ wo ndi sii wããre ne jobo ɓi tiŋ Baa ga, daʼ wo ndi ur wããre jar ciŋ ga, bay wo de daʼ ndi faa ge de jobo ɓi tiŋ tos ge wa lay, haybà ɓi leege draʼ layblaʼ bay wa.

¹³ Ama wããre war maga á a wo ʼwaa ge ɓe me ti pel ɓo mo lag, jobo maga de kããge yoo ɓaara boŋ maga wãã yaŋ go ti cwãy ɓlagge ɓi ga á mo taʼ so no bay yoo ɓaara boŋ wa.

¹⁴ Ndi wãã ɓin go ne ndo, Baa maga moore wùr hay wo le goŋ ge ɓe, ndi yaŋ mbi goŋ ge ɓe de faage jag Baa maga á ɗen wo ga car ge ɓil jag Baa mono. Ndi de yãã wããre Baan wo ɓuy lay, ndi de yãã wããre jar ndar nen wããre Baa gon wo ɓuy lay.

¹⁵ Ndi yaŋ de oo le gor Baa de egre ngiŋ ga á laa ge jar ma joŋ re de deelen wo de jar maga bay wo joŋ re de deele wa ɓuy yaŋ go wurpo ciŋ tenen, doo ga moore wùr wo de see ɓaara hay wo le de lagge de egre gor ge ɓe no lay no.

¹⁶ Diŋ wersen ndi de see ɓi tum ɓuy kiɗ gi ga daga ndi mo hay go ti ngel ɓe de deele keɗed pel Baa, pel jar téebeere wo lay.

¹⁷ Ndi hay raw wo go, ndi joŋ kiŋgi le go rabe, ndi raw ferge wo Jerusalem de solay ma kay jar ɓin wo, ndi wo hã fẽẽre ma siɗ jag wo lay.

¹⁸ Ndi wo sii jagn mokay, á raw wo daʼ ndi ɓi tiŋ Baa de maga ndi de por see ɓi mono. Jar po hay bay wo see ɓi ni wa, ur gi wããre ciŋ po hay bay tinoo nen ɓi wa lay.

¹⁹ Ama jar Jwif maga wo le Asi hay yaŋ wo see ɓi ni ane. Ɗawa á mo hay a wo we ʼwaa war me ti lam taʼ la diŋ saara, ga wããre yaŋ ti yoo wùr de kããra no, ɗawa layblaʼ.

²⁰ Day re ẽẽ se joŋ la. Á mo wãã wo go de see ɓaara ti ɓlagge ɓi maga á daʼ wo see ɓi, de maga ndi hay pel jar ɓoɗ faare wããren wo mono,

²¹ ama hayga yaŋ boŋ diŋ wããre ngar ge jag maga ndi ngar yoo ɓaara ti wããre bir gi jar ma de húulí wo no, ni ndi yaŋ de yãã sen wara pel ɓay la, ga sen yaŋ ane.

²² Feligse diŋ jobo maga go de ko joŋre jar jag Baa ma wer Krisn wo go de el paha, á raw riŋ rage ga : Patala dus mbay ɗa so, hayga Lisiyas wo we a ge, ni ndi cag re ɓayn yaŋ go ne nday kway.

²³ Á raw wii waŋre sooden wo ga á mo gor wo ti Pol, mo men wo go de bud gi, mo dig wo jar ɓe maga a wo kay ge ɓe mo wa lay.

Pol pel Feligse wo de Drusil

²⁴ Naw wo nà ge blam sen rab Feligse raw wo age de wãy ɓe Drusil may jar Jwif wo lay. Feligse raw ɓoʼ soole wo wer Pol ga se da ga se laa wããre hãge se ɓe ne Yeso Kris mo ɗa pa.

²⁵ Pol raw tĩĩ wer wããren le ti re joŋ ge de el se jare, ɗaw ge se desãy, de wããre maga Baa a ge cag ge ɓe wurpo mono, hẽẽne raw joŋ Feligse, á raw riŋgi ɓe ga : See mbo patala ɗa so, ndi ɗe mo ge yaŋ tigriŋ de maga ndi daʼ nen we no.

²⁶ Á hay ɗig ɓen ga Pol hã solay yaŋ ne se, diŋ wersen ga á ɗen le ndal ge tum mono.

²⁷ Kiŋgi wo go joŋ ge ɓog, blam sen Porsiyus Festus raw kol ge waŋ ti ngel Feligse. Feligse hay da ɓen ga jar Jwif mo kee wo se ga se de ele, á raw men Pol wo ti daŋgay ni.