JOŊRE 23 - Tupuri Bible

¹ Pol raw kaŋ nen ɓe ne jar ɓoɗ faare wããren wo ti ɗeŋres, raw riŋ rage ga : Nday hẽẽre ɓin wo, ndi le ɓaa goŋ Baa ti faage ɓe bay ɗag tum hãã go wara.

² Ananiyas je kluu ma siɗ jag raw wiigi ga á mo maʼn wo jage.

³ Pol raw riŋgi ɓe ga : Baa maʼ mo yaŋ jag lay, ndo glig se ma de kor ge depuy mo yeʼ no. Ndo de hayle cag re ɓi diŋ wer jag liŋgi, day ndo hoo sug ti wããre sen ga pa, werga ndo raw wãã ge ga maʼ me mono.

⁴ Jar maga wo de lagge ɓiŋ ɓe mbaŋ raw wo wãã ge ga : Ɓa, ndo ɗar je kluu ma siɗ jag ne Baa?

⁵ Pol raw ga : Oo, hẽẽre ɓin wo, ndi ko ga á diŋ je kluu ma siɗ jagn ndi ko ga, werga wããre Baa de yerge ga jobo mo wãã re ma de ɓlagge ti waŋre kawre ɓen wo wa.

⁶ Pol raw koge ga jar po yaŋ wo yoo ɓaara ni, wo diŋ Sadusiyẽẽ, jar la wo diŋ Farisiyẽẽ, Pol raw ngar jag pel jar ma ɓoɗ faare wããren wo ga : Hẽẽre ɓin wo, ndi diŋ Farisiyẽẽ, wel Farisiyẽẽ, ndi de gor bir gi jar ma de húulí wo, diŋ wersen á raw age cag re ɓi pel ɓay mo yeʼ no.

⁷ Pol wo wãã ge doosen, faare raw urgi ti holaŋ Sadusiyẽẽ wo de Farisiyẽẽ wo debaŋ, ngaɓan raw wo caa ɓil ɓoge.

⁸ (Sadusiyẽẽ had wo ga jar ma de húulí bir wo go ga so, jar peele Baa bay wo wa lay, manmbuyuuri bay wo wa lay. Ama ma Farisiyẽẽ wo de had ge ɓe swaʼ ɓuy.)

⁹ Ama ngar ge jag raw urgi ciŋ debaŋ daŋge so. Jar ma ndar wer wããre Baa ma wer Farisiyẽẽn raw wo hoo ge ciŋ de faare ga : Wùr bay de ko ɓlagge bloo mo yeʼ wa, manmbuyuuri layblaʼ, noga je peele Baa layblaʼ yaŋ de wãã wããre ne hẽne.

¹⁰ Wããren raw urgi ciŋ debaŋ mo deŋ, soode ma kluu raw joŋ hẽẽne ga jar mo car wo nen Pol go yoo ngaɓan ni wa, á raw riŋ sooden wo ga á mo wo wo baa Pol le go yoo jarn wo, á mo wo wo de ɓe ni sooden wo.

¹¹ Toŋ ɓe de suŋ, Waŋkluu raw naa nen se ɓe ne Pol nen de lwaʼ ge ga : Coɓ nen ɓo, ndo sii wããre ɓi le go ne jar Jerusalem wo la, wo go sii wããre ɓin Rom lay.

A kiɗ ga ʼwar Pol go

¹² Toŋ ɓe de jag toŋ, jar Jwif raw wo tay jag ɓaara ti Pol, haʼ wo go haʼ ge ga saara mo re mopo wa, saara mo jo bii wa lay, say saara mo ʼwar Pol go ɗa.

¹³ Jar maga haʼ wo go ngaɓa ɓaara doo naa.

¹⁴ Á raw wo age se waŋre ma siɗ jag wo, de jar kluurin wo, raw wo wii rage ga : Wùr haʼ go haʼ ge ga wùr mo re mopo wa, wùr mo jo bii wa lay, say wùr mo ii Pol go ɗa.

¹⁵ Wersen nday de jar ɓoɗ faare wããren wo no, wii we soode ma kluun ga á mo a ge de Pol pel ɓay doo ga nday cag re ɓen go ne hẽn de el daŋ ge son no, blam sen ni, wùr de se wùr, wùr wo laa gǔu ne hẽn ma ʼwar ge ɓe go taŋgu a ge ɓe see ɓay.

¹⁶ Paga wel ma maygeman Pol yaŋ ni, laa wããre se no, kal rawge ni sooden wo, raw kalge se Pol riŋ gi ɓe de wããre se no.

¹⁷ Pol raw ɗe soode ma baapo le boŋ, raw riŋgi ɓe ga : Kaŋ wel mo deŋ se soode ma kluu no, á de wããre jag ma sii gi ne hẽne.

¹⁸ Waŋ sooden raw baa weln doo ɓe, raw kaŋ ge ɓe wo ɓiŋ soode ma kluu no, kal riŋ gi ɓe ga : Pol ma ti daŋgay a ɗe mege, raw riŋ mege ga kaŋ wel mo deŋ ɓiŋ ɓo, wããre yaŋ jag ɓe ma sii gi mo.

¹⁹ Soode ma kluun raw baa wel de doo ɓe, raw wo go de ɓe boŋe, raw wiigi ɓe ga : Ndo wii me gahãyne?

²⁰ Á raw riŋgi ɓe ga : Jar Jwif tay wo jag ɓaara go ga saara mo wii mo ga ndo mo a de Pol toŋ pel jar ɓoɗ faare wããren wo, doo ga nday cag wããre ɓen go ne hẽn de el son no,

²¹ ama yãã jag ɓaara wa, werga jar de daŋ doo naa yoo ɓaara wo go de haʼ ge haʼge ga saara mo re mopo wa, saara mo jo mopo wa, say saara mo ʼwar Pol go ɗa, á yaŋ wo de laa gǔu ne hẽne, á wo go de grag see ɓaara ɓuy, á wo de gor ge diŋ ndo.

²² Blam sen soode ma kluun raw riŋgi ɓe ga : Wããre maga ndo sii me mokay, siin go ne jobo wa so hase.

A ɓoʼ Pol wo ne Feligse

²³ Soode ma kluun raw ɗe ge yoo waŋre sooden wo ɓog, raw riŋ rage ga : Hoo we soode kis kis ɓog deparday, hoo jar piiri doo renam, hoo jar jawre kis kis ɓog, grag we see ɓay go ma woge Sesare de wur ma kaʼ law la no.

²⁴ Grag we piiri go ma maŋ Pol lay, wo we de ɓe pel Feligse waŋ jam.

²⁵ Á raw yer leeder wo ne hẽne, wãã wo ɓil leedern ga :

²⁶ Ndi Klod Lisiyas, ndi hee jag wo ne Feligse waŋ ɓi ma de el no.

²⁷ Bloo mokay no, jar Jwif baa wo ne, leʼ wo ʼwar ge ɓe go, de maga ndi wo laa wããre sen ga á diŋ je Rom mokay, ndi raw woge yãã ge ɓe le go.

²⁸ Ndi raw kiɗ faage ga ndi laa wer wããre maga á baa wo ne ti ɓe mono, ndi raw age de ɓe pel jar ɓoɗ faare wããren wo.

²⁹ Ama ndi wo daʼ wer ɓe diŋ ga á ti wer wããre ma ti jag liŋgi ɓaara wo, wããre po ma tigriŋ ti ɓe ga á nen ʼwarge ɓe go yawla, noga á nen ɓoʼge ɓe ti daŋgay yawla, bay wa lay.

³⁰ Ndi wo laa ge ga á riŋ wo ga saara baa ne de egre mokay, ndi raw ɓoʼ ge ɓe wo mo deparday, ndi raw riŋ jar hee ɓen wo ga á mo wo wo cag re ɓen pel ɓo.

³¹ Sooden raw wo maŋ Pol doo ga á wii ra nono, raw wo age de ɓe de suŋ doo ni, raw wo de ɓe Antipatri.

³² Toŋ ɓe soode maga wo wo de ɓe men wo ne jar piirin wo, raw wo fer ge le ni ɓaara.

³³ Jar piirin wo wo day ge Sesare mokay, á raw wo age de Pol pel Feligse waŋ no, hã wo leedern ne hẽn lay.

³⁴ Á wo jaŋ leedern go mokay, á raw wii Pol ga : Ndo diŋ je may ne? Blam maga á wo laa ge ga á diŋ je Silisi,

³⁵ á raw riŋgi ɓe ga : Ndi laa ge wããre ɓon go poɗag diŋ de maga jar hee ɓon wo ge wo a ge ɗa. Á raw wãã ge ga á mo gor wo Pol ɓi tiŋ mani Herod no.