JOŊRE 22 - Tupuri Bible

¹ Nday hẽẽre ɓin wo, de nday pããre ɓin wo no, coʼ we sug ɓay ti wããre ɓi maga ndi de sii gi ɓe we ti see ɓi mono.

² Á wo wo laa wããren de jag Hebre mokay, á raw wo lagge de hẽẽne huyum lagge, Pol raw riŋ rage ga :

³ Ndi diŋ je Jwif, ndi biŋ Tarse, ɓi sir Silisi, ndi gẽẽ ɓi leege ma taʼ la no, had me diŋ Gamaliyel, á had me go de hadge mani moore naa wo paha, ndi hay de hã ɓil ɓi ne Baa de tuu debaŋ doo nday wara no lay no.

⁴ Ndi hay joŋ bon jar ti faage sen mokay wo debaŋ, hãã ndi id ra, ndi baŋ ra, lag werpiiri wo de naare ti daŋgay.

⁵ Je kluu ma siɗ jag de kããre ɓin wo, de jar kluurin wo ɓuy yaŋ wo de ko re maga ndi wããn mo deŋ no, leeder maga ndi yern wo ne kawre naa jar Jwif ma Damas wo ga ndi day wo wo ge ni mo caw, ndi daʼ jar ma de maŋ ge wer ɗúu Yeso sen we, ni ndi mo baŋ ra le, a de ɓaara Jerusalem lagge ti daŋgay, á hã wo leeder sen wo me doo diŋ saara pa.

Pol de wãã ge go ti hãge ɓil ɓe ne Kris

⁶ Ndi de seege ti faage wo ge wo Damas mo caw, ndi raw kos Damas mbaŋ de wur ma ɗeger mokay, ngel raw sag ge le ciŋ deparday yiŋ ti ɓi go cwẽẽ.

⁷ Ndi raw leʼ ge gesiŋ, sug ɓi raw laa gẽẽge po le ciŋ ɗe mege ga : Sol, Sol, ndo joŋ bon ɓi le la?

⁸ Ndi raw wiigi ɓe ga : Á diŋ ndo wo la, Waŋkluu? Á raw riŋ mege ga : Ndi diŋ Yeso ma Nasared maga ndo joŋ bon ɓi mono.

⁹ Jar ma wer ɓin ko mbaara sag ge no, ama laa wo gẽẽge je maga wãã re le me mo gà.

¹⁰ Ndi raw ɗe ge ɓe ga : Waŋkluu ndi mo joŋ joŋ ge la? Waŋkluu raw riŋ mege ga : Ur go ciŋ, see Damas, wo ni, á wii mo yaŋ ti joŋre maga ndo mo joŋ ne mono.

¹¹ Blam sen nen ɓi laa ko ge ga doo sag ge maga hoo nen ɓi go mono, jar ma wer ɓin raw wo baa doo ɓi wo Damas.

¹² Je Jwif po yaŋ wo ni, à ɗen ga Ananiyas, á de yãã jag wããre naa maga Baa bag ne Moyis de egre, ɗúu ɓe go de rage jag jar Jwif ma ɓi leegen wo ni ɓuy.

¹³ Á raw age see ɓi, oo pel ɓi, raw wii mege ga, Hẽn ɓi Sol, nen ɓo mo caa go. Nen ɓi raw caa ge go tuu, ndi raw koge ɓe.

¹⁴ Á raw wãã ge ga : Baa maga moore naa goŋ wo, maŋ mo go ga ndo mo ko joŋre maga ɓil se da ne mono, ndo mo ko Je ma de deele pel Baa no, ga ndo mo laa wããre ɓen lay.

¹⁵ Ga ndo mo hay diŋ je siɗ wããre se go pel jar ti wããre maga ndo ko ne, de wããre maga ndo laan mo lay no.

¹⁶ Ndo yõõ ti gor may patala pa la? Ur go ciŋ, ndi joŋ batem ɓo go, ma yog ɓlagge ɓon wo go de ɗe ge ɗúu ɓe.

Baa ɓoʼ Pol wo yoo jar maga bay wo jar Jwif wa

¹⁷ Blam sen ndi raw ferge le Jerusalem, ndi raw hayge tos ge ɓi tiŋ Baa, mopo raw mbuɗ nen ɓi.

¹⁸ Ndi raw ko Waŋkluu de wii mege ga : Ur ciŋ deparday, kal go, men Jerusalem go, werga á day wo yãã wããre ɓon gà.

¹⁹ Ndi raw riŋgi ɓe ga : Waŋkluu, diŋ werga á wo de koge ga ndi hay bag saara ɓoɗ ge ti daŋgay, jwag jar maga ɗe wo ɗúu ɓo mo ɓuy ɓi tiŋ tosge wo mono.

²⁰ Ti wur maga á ʼwar wo Etiyẽn je sid wããre ɓon go, ndi hay yaŋ ni de see ɓi, jag ɓi hay de tayge de ɓaara lay, ndi hay hay gor õõbe jar ma ʼwar ge ɓen wo lay.

²¹ Waŋkluu raw riŋ mege ga : See, ndi ɓoʼ mo ge wo hãã se jar maga bay wo jar Jwif wa mono.

Pol wo de soode ma kluu

²² Á raw wo coʼ sug wããre ɓen hãã hãã wo day ge ti wããre jar maga bay wo jar Jwif wa mono. Á raw wo hoo gẽẽge ɓaara ciŋ ɓuy ga : Baa we ne, ʼwarn we go, á bay nen men ge tenen wa.

²³ Ngar wo jage, lag wo õõbe ɓaaran ciŋ, lag wo puduf ciŋ.

²⁴ Soode ma kluun raw kalge de Pol see sooden wo ga á mo wiɗ wo jag ɓe de jwag ge, mo ko wo re maga jar ngar wo jag ti ɓe mo deŋ lay no.

²⁵ Á raw wo baŋ ge ɓe ma jwag ge, Pol raw riŋ waŋ soode maga de oo le ti ɓen ga : A hã faage we ma jwag je Rom bay wii jag ge?

²⁶ Waŋ sooden wo laa wããre sen mokay, á kal rawge see soode ma kluu wii gi ɓe de wããre sen ga : Bloon diŋ je Rom so lay, á joŋ joŋ ge la.

²⁷ Soode ma kluu raw woge see Pol, raw riŋgi ɓe ga : Sii me ɗa ɓa, ndo mbo diŋ je Rom cwãy ge? Pol raw ga : ãã.

²⁸ Soode ma kluun raw wiigi ɓe ga : Ma ɓi, ndi yee see ɓi ga ndi mo kol go je Rom solay pur debaŋ, day ma ɓon lay la? Pol raw riŋgi ɓe ga : Ma ɓin diŋ ti biŋgi ɓi le ɓaa.

²⁹ Jar maga hay wo de lagge wii wer ren raw wo men ge ɓe deparday, soode ma kluun wo laa ge ga Pol diŋ je Rom mo lay no, á raw joŋ hẽẽne lay, werga á hay baŋ wo ne.

Pol pel jar cag wããren wo

³⁰ Wo day ge toŋ ɓe, sooden raw ga se laa wããre maga jar Jwif ʼwaa wo war ne hẽn ti go poɗage, á raw wo pog ge ɓe go, ɗe waŋre jar siɗ jag wo de jar ɓoɗ faare wããren wo le ɓuy, ga á mo tay wo ti, á raw age de Pol kal hay ge ɓe pel ɓaara yeʼe.