JOŊRE 21 - Tupuri Bible

Pol wo Jerusalem

¹ Wùr wo blaw ge go de kããra mokay, wùr kal rawge wo de deele wo ge Kos, toŋ ɓe wùr kal rawge Rod wo de Patara.

² Wùr raw daʼ daage ma ɗii gi go ciŋ Fenisi ni, wùr raw ɗii gi ɓe, wùr kal rawge.

³ Wùr wo ko ti kaali Sipre le, wùr raw men ge ɓe go nen ti ɓaŋ gùr wùri, wùr kal rawge nen Siri, wùr raw ɗii gi go Tir, ga daagen mo laa fẽẽren go ni.

⁴ Wùr raw daʼ jar ma de yãã wããre Yeson wo, wùr raw lagge ni síilí renam. Nenterse ma bay ɗag kal riŋ rage ga á mo riŋ wo Pol ga á mo wo Jerusalem wa.

⁵ Blam síilí ma renam wùr kal rawge de kããra ɓuy de naare ɓaara wo de weere ɓaara wo, wùr raw laa ge wo go jag leege, wùr raw laa kõyõgre gesiŋ ti diŋdiŋ biin tos ge ni.

⁶ Wùr raw joŋ gwaɗ so ne kããra, wùr raw ɗii gi ɓi daage, jar lan raw wo fer ge liŋ lay.

⁷ Wùr raw hoo ge le Tir, wùr kal rawge Tolemayi, wùr kal rawge her jag ne hẽẽre wùrn wo. Wùr raw sii gi see ɓaara ni boŋ lay.

⁸ Toŋ ɓe, wùr raw hoo ge le ni, wùr kal rawge Sesare, wùr raw lagge ni Filip je raŋ ge go siɗ Wããre ma de Cõõre no. Je sen yoo jar ma renam maga á hoo ra le go Jerusalem mono, wùr raw lagge ni ɓe.

⁹ Bloo sen la, mayre tigliiri ɓe maga bay wo de wo ge se werpiiri wo wa ɗa yaŋ naa, wo diŋ jar ndar nen wããre Baa go.

¹⁰ Wùr raw joŋ naw ni ɓaara ni rabe, je siɗ wããre Baa po à ɗen ga Agabus, a le Jude, raw nduugi se wùri.

¹¹ Á raw hoo mblaaga ma saʼ yoo Pol no, raw saʼ ɓaale ɓe wo de doo ɓe de ɓe, raw wãã ge ga : Nenterse ma bay ɗag riŋ me ga jar Jwif wo wo yaŋ baŋ je mblaagan mokay Jerusalem doo kay no taw taw no, hãn ge wo go ne jar maga bay wo jar Jwif wa doo.

¹² De maga wùr wo laa wããre sen mokay, wùr de jar ma ɓi leege sen wo ni ɓuy, wùr raw ga Pol mo wo Jerusalem wa.

¹³ Pol raw fer wããre ma ɓen ga : Nday rag ɓayn car jiiri ɓi ga ndi mo joŋ hẽẽne ga le la? Ndi da ga saʼ me saʼ ge tawa wa, ama ndi de da ge ga ndi mo wo huu gi Jerusalem ti ɗúu Waŋkluu Yeso.

¹⁴ De maga wùr wo ko ge ga á laa yãã jag wùr ga mokay, wùr raw hem ge, wùr raw wãã ge ga : Men Waŋkluu joŋ fen maga ɓil ɓe da mono.

¹⁵ Blam naw sen wùr raw grag ge go ma woge Jerusalem.

¹⁶ Jar ma de yãã wããre Yeso po wo le Sesare, raw wo tayge wer wùr, á raw wo wo ge wer wùr ni jobo à ɗen ga Menasoŋ je Sipre, á go diŋ je ma wer Yeso go taŋgu ɓaa, wùr raw lagge ni ɓe.

Pol wo ko Jag

¹⁷ Wùr wo day ge Jerusalem mokay, hẽẽre wùr raw wo yãã wùr go ɓil feh debaŋ.

¹⁸ Toŋ ɓe, Pol kal rawge de wùr ni Jag, jar kluuri Tayge jar ma wer Krisn wo ɓuy raw wo age ni ɓe ni lay.

¹⁹ Á wo her jag go ne hara her, á raw fer wããre maga Baa joŋ ne yoo jar maga bay wo jar Jwif wa wo de joŋre ɓen ɓuy lay.

²⁰ Jarn laa wo wããre sen mokay, raw wo togoɗ Baa. Á raw wo riŋ gi ɓe ga : Ko nen ɓo, ndo hẽn wùr no, jar ndar pur yoo jar Jwif ma de hã ɓil ɓaara ne Krisn wo, á wo de hã ɓil ɓaara wer joŋre jag liŋgin de tuu debaŋ pa.

²¹ Á a riŋ rage ga ndo had jar Jwif ma yoo jar maga bay wo jar Jwif wa wo ga á mo see wo wer wããre maga Moyis bag jar de ɓe mo wa, ga ndo yaŋ riŋ rage ga á mo car wo ɓĩĩni weere ɓaaran wo wa, ga á mo see wo wer hadge jar Jwif wo wa lay.

²² Wùr joŋ joŋ ge la werga á wo de laa ge ga ndo a we.

²³ Wersen yãã jag wùri, doo ga jar po wo yoo wùr naa, sen wo go de haʼ ge haʼ ge.

²⁴ Wersen wo tayge de ɓaara, por we see ɓay go de kããra de ele, poɗ cẽẽge ti ɓaaran go lay, wer re maga á laa ne ti ɓo mokay, wùr de koge ga á bay cwãy wa, ama ndo de see ɓo, see de el yoo jar Jwif wo lay, hoo sug ti wããre maga Moyis bagn mo lay.

²⁵ Ma jar maga bay wo jar Jwif wa ga yãã wo wããre Kris mokay, wùr yer ɗiggi wùr wo ne hara ga á mo dig wo see ɓaara, mo re wo fẽẽre maga a siɗ jag de ɓaara ne sõõre wo wa, mo re wo cíi wa, mo re wo fen ma de creɗ kiŋ wa, mo lengãɗ wo de re sõõre wa lay.

²⁶ Pol raw hoo jar se ma naa wo, raw wo por see ɓaara go de kããra de ele, raw kalge ɓi tiŋ Baa caa naw ma por see ɓaaran go de naw maga saara wo ge siɗ jag go ti see ɓaara boŋ boŋ ɓuy mono.

À baa Pol ɓi tiŋ Baa

²⁷ Síilí ma renam wo go taw ge mokay, jar Jwif ma Asi raw wo ko Pol ɓi tiŋ Baa, á raw wo hoo ngaɓan le ciŋ, baa wo ne,

²⁸ raw wo ngar jag ga : Nday jar Israyel no, kay we wùri. Mokay diŋ bloo sen ga had jar de ɓlagge genla genla ɓuy mo so, á mbuɗ foo jar Israyel wo de jag liŋgi no, mbuɗ foo tiŋ Baan lay, á a de jar Greg wo laa ge ɓi tiŋ Baa no, á kaŋ ɗag we go ne tiŋ Baa se lay.

²⁹ Á wãã wo doosen werga á hay ko wo Pol wo we wer kããra de Trofim ma Efes ɓi leegen ni, á hay ɗig wo ɓaaran ga Pol hay a de ɓe ɓi tiŋ Baan pa.

³⁰ Ɓi leegen ɓuy raw wo hoo ge ciŋ de wããre debaŋ, jar raw ɓoʼ ɗee ne Pol ti, baa wo ne, kogn wo wo go faale tiŋ Baa no, raw wo tẽg jagjiŋ go deparday.

³¹ De maga á wo de kiɗ gi ga saara iin go mokay, wããre ɓe raw woge daʼ soode ma kluun ga wããre yaŋ de ur gi ciŋ Jerusalem debaŋ.

³² Á raw horge soode wo deparday de waŋre sooden wo wer ɓe, ɓoʼ wo ɗee ne hara ti deparday, de maga á wo wo ko soode ma kluu wo de soode ma lan wo mo deŋ, á raw wo men ii Pol eŋ.

³³ Soode ma kluun wo á ge see ɓaara mbaŋ mokay, á raw baa Pole, raw riŋ rage ga á mo saʼ ne wo de receʼ ɓoge, raw wiigi ɓe ga á diŋ wo la, raw wii re maga Pol joŋ mo lay.

³⁴ Ama jar po wo yoo ngaɓan ngar wo jag sara, maapo ngar wo ɓaaran sara, á wo ko ge ga se bay laa cwãy wããre sen go poɗag wa, doo maga ngaɓan de ngar jag debaŋ, á raw wiigi ga wo de ɓe ti ngel ma cag wããre no.

³⁵ Á wo day ge ti ɓog ɓog jag tiŋ, sooden raw wo maŋ ge ɓe go ciŋ doo maga ngaɓan go de tĩĩ gi mo deŋ no.

³⁶ Werga ngaɓa jar maga a wo le blam ngar wo jag ga : ʼWarn go, ʼwarn go.

Pol de sii wããre ne jare

³⁷ Á wo wo a ge de Pol ti ngel ma cag wããren mokay, Pol raw wii soode ma kluun ga : Ndo men faage yaŋ me meʼ ga ndi mo wãã wããre mo yawla? Soode ma kluu raw wii Pol ga : Ndo yaŋ wãã jag Greg ge?

³⁸ Ndo diŋ je Ejipte maga hay ur wããre le seɓaa ciŋ la debaŋ ga tay jar ma id húulí wo ndar naa wer ɓe ti puuli mono?

³⁹ Pol raw ga : Ndi diŋ je Jwif, ndi biŋ ɓi leege Tarse, ɓi leege ma kluu ma ɓi sir Silisi no, ama ndi kam mo men me sii wããre ne jar wo mo lag ɗa.

⁴⁰ Soode ma kluun raw men faage ne hẽne, Pol raw oo ge ti ɓog ɓog jag tiŋ no, raw maʼ doo ɓe ga jar mo laa wo wããre, jarn raw wo lagge seɗem, á raw wãã wããre ne hara de jag Hebre ga :