JOŊRE 20 - Tupuri Bible

Pol wo raŋ sir Masedwan wo de Gres

¹ Blam maga wããren wo ham ge gesiŋ mokay, Pol raw tay jar ma de yãã wããre Yeson wo coɓ nen ɓaara, joŋ gwaʼ so ne hara, kal rawge Masedwan.

² Á wo day ge ni mokay, á kal raw ge bag yaŋ ne jar mani Baa wo, ig wãã wããre ne hara debaŋ, blam sen á kal rawge Gres.

³ Á raw joŋ few le ni swaʼa. Jar Jwif raw wo tay jag ɓaara go ga á leʼ ɗii daage we le ma woge Siri, ni saara mo Baa ne, Pol raw laa re sen go, á raw ɗiggi ga se fer Masedwan.

⁴ Sopater wel Pirus ma Bere, Aristarke, Sekondus je Tesalonig, Gayus je Derbe, Timote, Ticig, Trofim je Asi, raw wo wer ɓe.

⁵ Á raw wo raw ge wo pel, gor wùr Trowas.

⁶ Blam few hoole ma bay defõõre no, wùr raw ɗii daage ɓi leege Filippi, wùr raw cegaɗ ge le go, naw dwee blam sen wùr raw daʼ rage Trowas, wùr raw joŋ naw ni renam.

Pol wo Trowas

⁷ Wur naw ma taŋgun, wùr hay de tayge ɓes hoole, Pol raw sii wããre ne hara, werga á de ɗig gi ga se raw toŋ ɓe, á raw sii wããre hãã hãã wo go gesiɗgi suŋ.

⁸ Gér wo go de doɗ ge ɓi tiŋ ma ciŋ maga á wo de tayge ni debaŋ.

⁹ Wejõõ po yaŋ ni, à ɗen ga Etikus, de hayle nen ndugla tiŋ no, á raw leʼ naa wolaŋ, Pol mbe de sii wããren wolaŋ, á raw leʼ ge le ciŋ ti tiŋ ma de swaʼ nen naa, á raw maŋ ge ɓe go de húulí.

¹⁰ Pol raw ɗii gi le gesiŋ deparday, raw baa doo ɓe, raw maŋ ge ɓe doo ɓe, raw riŋ jarn ga : Daŋ we jiiri go wa, werga á yaŋ de cee ɓe se ɗa.

¹¹ Á fer ɗii gi ciŋ tigriŋ pa, raw ɓes hoole, re lay, raw tĩĩ wer wããren pa hãã hãã go de jag toŋ, blam sen á kal rawge.

¹² Á raw kalge le go de wejõõn tenen kay, jar raw wo coɓ ge debaŋ lay.

Pol raŋ Trowas wo de Mile

¹³ Ma wùr, wùr raw ɗii daage, wùr kal rawge ɓi leege Asos, maga wùr mo wo maŋ Pol ɓi daage ni, werga á hay wii doosen no, ga se de se ɓe se see le diŋ de ɓaale se taŋgu.

¹⁴ Se wo yaŋ yiŋ gi de wùr Asos, wùr raw maŋ ge ɓe ɓi daage, wùr kal rawge Mitilene.

¹⁵ Le ni, wùr kal rawge toŋ ɓe Kiyo pel wur ɗeger, wur naw ma de ɓog mokay, wùr kal rawge ɓi leege Samos, toŋ ɓe pa, wùr raw day ge Mile.

¹⁶ Werga ɗiggi Pol go de kaŋ ge ga se day oo ge Efes ga, day la á yõõ ti se Asi, daga Paŋtekod mo daʼ se go ɓi leege Jerusalem, á mo daŋ se go wa.

Pol de sii wããre ne jar Efes wo

¹⁷ Le Mile ni, Pol raw ɓoʼ soole le wer jar kluuri Tayge jar ma wer Kris ma ɓi leege Efes wo ga á mo a wo le se se so.

¹⁸ Jarn wo wo a ge se ɓe mokay, á raw riŋ rage ga : Raŋge ɓi ẽẽ ẽẽ la tum yoo ɓay de maga ndi hay le Asi, ɓuy nday de see ɓay, nday kon we, de maga ndi hay le see ɓay mo lay.

¹⁹ Joŋre Waŋkluu maga ndi joŋ ne mo ɓuy, ndi raw fer see ɓi go depẽẽre, ndi de mberbe nen tum, ndi joŋ bon ti re maga jar Jwif carn wo me se mo ɓuy.

²⁰ Nday yaŋ de koge ga re ma joŋ we ge de el, ndi bay go de yoŋ ge ɓe doo ɓay wa, ndi bay de joŋ hẽẽne siɗ gi wããre ne nday wa, ndi had we go nen jar poɗag lay, ko liŋ ni ɓay wo.

²¹ Ndi siɗ ne jar Jwif wo, siɗ ne jar Greg wo ɓuy ga á mo ɓoɗ wo jag go pel Baa, mo hã wo see ɓaara ne Waŋkluu Yeso.

²² Patala ko we nen ɓay Nenterse ma bay ɗag de kog mege wo Jerusalem, ndi wo ni, ama ndi bay go de ko re maga daʼ mege wo ni mo wa tawa.

²³ Ama Nenterse ma bay ɗag de riŋ mege go ga ɓi leege ma honla honla ɓuy, á yaŋ go gor mege ma baŋ mege, ma joŋ bon ɓi wo ni ɓuy.

²⁴ Ama ndi bay de ɗig gi diŋ ti caw ɓi wa, hayga joŋre ɓi maga Waŋkluu Yeso ɓoʼ me joŋ ge ɓe ga Wããre se ma de cõõren ndi mo wo go sii gi ɓe ne jar, ndi mo kaŋ nen jar go ga Baa diŋ je da jar, ndi taw joŋre sen yaŋ go no.

²⁵ Patala ko we ɗa, nday jar maga ndi raŋ siɗ wããre joŋre Baa Waŋ we mono, ndi de koge ga jobo ko ge nen ɓi yoo ɓay ga so.

²⁶ Wersen ndi riŋ we go wara, doo ɓi go de yog ge, dugwaare jobo bay ti ɓi wa so.

²⁷ Werga ndi bay de yoŋ mopo go doo ɓay wa, ndi sii wããre dage maga Baa da jar de ɓe we go ne nday pah ɓuy.

²⁸ Koɗ we see ɓay de ele, koɗ we jar maga Nenterse ma bay ɗag lag we koɗ rage mono, Tayge jar ma ti jag Baa ga á coo ra de cíi Wel ɓen mono.

²⁹ Ndi de koge ga blam maga ndi raw we, way-baa ma de hãã laa wo yaŋ le yoo ɓay, á men ge wo jar jag Baan wo gà.

³⁰ Yoo ɓay de see ɓay jar po hoo wo yaŋ ciŋ de wããre ma de geteʼ jãɗ jar mani Baa wo yaŋ kog ge wer ɓaara.

³¹ Lag we go de pũygi, ɗig we ti ti re maga ndi joŋ kiŋgi swaʼ yoo ɓay, bag yaŋ ne nday de suŋ, de cege, tum ɓuy, liŋ ni ɓay wo, wosela wosela ɓuy yoo ɓay de mberbe nen mono.

³² Patala ndi kaŋ ɗiggi ɓay we ti Baa, ti wããre ɓe ma woo we gen lay, á diŋ je ma de kããge ma coɓ nen ɓay, hã fẽẽre yaŋ ne nday wurpo de jar maga wo diŋ ma ɓe mono.

³³ Ndi bay de kaŋ ɗiggi ɓi ti solay wo de boo biŋni noga õõbe jobo wa.

³⁴ Nday yaŋ de koge ga fẽẽre maga wùr de jar ma wer ɓin de sãy ɓaara ti, ndi daɗ ra diŋ de doo ɓi de see ɓi.

³⁵ Ti fẽẽren ɓuy, ndi kaŋ nen ɓay we go ga nday mo hay joŋ joŋre, ma kay jar ma de gayren wo, ɗig we ti ti wããre maga Waŋkluu Yeso de se ɓe wãã ne go ga : Je maga hã fẽẽre ne jar, de fruygi dedaŋ jar maga à hã fẽẽre ne hara hãge mono.

³⁶ Blam wããre sen á raw wo laa kõyõgre gesiŋ, tos ge de kããra ɓuy.

³⁷ Á wo ɓuy raw wo rag ge debaŋ, yor wo de soole Pol, seɗ wo se kããra de Pole.

³⁸ Á ra wo de ɓil ɓaara debaŋ ti maga á riŋ ra ga á ko ge wo nen se ga so mono, á raw wo kaŋ ge ɓe wo go ti faage, hãã wo wo go de ɓe kaŋ ge ɓi daage.