JOŊRE 2 - Tupuri Bible

Age Nenterse ma bay ɗag no

¹ De maga naw few Paŋtekod a mokay, jar ma wer Yeson wo ɓuy hay wo de tayge ti ngel po boŋ.

² Ngel raw sam ge le ciŋ de egre doo leegen no, raw baa ɓil tiŋ maga á wo de lagge ni go ɓuy.

³ Mopo wo doo trum wùu, raw wo age le ti ɓaara, raw dus gi go ne hara ti boŋ boŋ ɓuy.

⁴ Á wo ɓuy ɓil ɓaara raw bag ge go de Nenterse ma bay ɗag mbaŋ mbaŋ, raw wo tĩĩ wer wãɗ jag dehãy. Nenterse ma bay ɗag hã ne hara ga á mo wãɗ wo doosen no.

⁵ Jar Jwif maga wo de horge sug ti Baa, le ɓi sir ma honla honla ɓuy hay yaŋ wo de a ge Jerusalem ni.

⁶ De maga sam gen wo a ge mokay, ngaɓan raw tay ti se kẽẽ hir, á raw wo ngrisgi, werga wããre maga jar ma wer Yeso wo de wãɗge ɓe, wosela ɓuy yoo ɓaara de laa ge ɓe de jag ɓe de jag ɓe.

⁷ Á wo ɓuy wããre sen raw ngel rage, á raw wo wii kããra ga : Ko we nen ɓay ɗa ɓa, jar wãã ren wo mo deŋ bay wo diŋ jar Galile wa ge?

⁸ Day joŋ ge joŋ ge ga wosela ɓuy yoo naa la de laa wããren de jag sir ɓe maga se biŋ ni biŋ ni ne?

⁹ Jar po yaŋ wo yoo naa la ni, wo diŋ jar Parte, jar Med wo, jar Elam, jar Mesopotami wo le, jar Jude wo, jar Kapados, jar Poŋ wo, jar Asi,

¹⁰ jar Friji, jar Pamfili, jar Ejipte, jar Libi ma ɓiŋ Siren mbaŋ no,

¹¹ jar Jwif wo de jar maga kol wo see ɓaara go jar Jwif ga a wo le ɓi sir Rom, jar Kred wo, de jar Arab wo ɓuy, naa de laa wããre fen mbuɗgi maga Baa joŋ de jag naa wo mo kay ẽẽ ẽẽ la?

¹² Á wo ɓuy raw wo ngrisgi, ɗig gi raw yeɗ nen ɓaara go, á raw wo wii kããra ga : Ɓa wer wããre sen gahãy ɓa?

¹³ Jar po raw wo mbuɗ rage doo ga : A taa wo go de yii.

Wããre maga Piyer wãã ne go mono

¹⁴ Piyer raw urgi go ciŋ yoo jar peele Yeso ma hwal ti boŋ wo, raw maŋ gẽẽge ɓe ciŋ kloŋ ga : Nday jar Israyel, nday jar Jerusalem lam ɓuy no, coʼ we sug ɓay, laan we go de ele.

¹⁵ Yii bay de taa rage doo ga nday de ɗig gi ɓe no wa, wur patala de moɗay bii piiri.

¹⁶ Ama á diŋ fen maga Jowel, je ndar nen wããre Baa go hay wãã ga :

¹⁷ Baa ga wo day ge ti wur naw ma blam tawn Ndi kaa ge Nenterse ɓin go ne jar téebeere wo ti krub ɓuy, Weere ɓay ma twerpiiri de ma tenaare kol ge wo yaŋ siɗ wããre ɓin go, Fẽẽre mbuɗgi ndar ge nen nen weere jõõre ɓay wo, Lwaɗ ge lwaɗge jar ma de tããrebe ɓayn wo yaŋ.

¹⁸ Jar joŋre ɓi ma twerpiiri wo de ma tenaare, wur sen ndi kaa ge Nenterse ɓin ge go ne hara ti, maga á mo siɗ gi wo wããre ɓin go ne jare.

¹⁹ Ndi ndar ge nen fẽẽre ma joŋ hẽẽne wo yaŋ le ciŋ, Ndi joŋ fẽẽre mbuɗgi yaŋ gesiŋ ti tamsir la lay. Cíi, wùu wo de cug wùu ndar ge wo nen yaŋ.

²⁰ Ndi kol wur ge go diŋ suŋgu, Ndi kol few go cíi lay, Ndi joŋ sen wo go taŋgu maga Waŋkluu wo le fer ge mono, wur sen diŋ wur ma de el debaŋ, Waŋkluu grag wur sen de woore debaŋ.

²¹ Day wosela maga yaŋ ɗe ɗúu Waŋkluu jag, á yãã je sen go.

²² Nday jar Israyel no, laa we wããre sen mokay go de ele. Yeso ma Nasared, bloo sen ga Baa kaŋ nen ɓay go ti ɓe de egre, de fẽẽre mbuɗgi wo de fẽẽre ma joŋ hẽẽne maga á joŋ ra de ɓe mono, doo ga nday de see ɓay nday de ko ge ɓe no lay.

²³ Á hã wo je sen go doo maga ɓil Baa hay da go pel bol no mono, wer koge ɓe maga á kon go pel bol mo lay no, nday raw hãge ɓe go ne jar debaycõõre wo doo, á raw wo ʼwar ge ɓe de ɓal ge ɓe go ciŋ ti koo ma ɓal jar no.

²⁴ Ama Baa fer bir gi ɓe go, raw bud saale húulín go ne hẽn ti, werga á bay nen maga egre húulín mo caa waŋ ti ɓe wa.

²⁵ Wersen Dafid hay wãã go ti ɓe ga : Ndi yaŋ ko Waŋkluu ɓin pel ɓi tum tum, Werga á yaŋ ti ɓaŋ war ɓi maga ndi mo daɗ wa.

²⁶ Wersen ɓil ɓi raw fug gi go feh fehe, wããre maga ndi wãɗ le go, wãɗ go jag ɓi de cõõre lay, Haybà diŋ hõõgese ɓi draʼ layblaʼ ig yaŋ mbe desãy yeʼ so.

²⁷ Werga á men ge nenterse ɓi ti ngel jar ɓi tuu wo ga, Á men ge ndi je ɓen go buu gi ga lay.

²⁸ Á kaŋ nen ɓi we ti faage maga wo ge kol mege go wurpo tenen, A fug ɓil ɓi yaŋ go wurpo pel ɓe fehe.

²⁹ Nday hẽẽre ɓi ma twerpiiri no, men we ndi wãã re ne nday ti moo naa Dafidi, á huu we go, á teen we go, hãã wara, tipaale ɓe yaŋ yoo naa la.

³⁰ Á diŋ je ndar nen wããre Baa go, a de koge ga Baa hay hãʼ go ne se jag haʼ ge ga se hay ge jobo yaŋ boŋ yoo wer mani sen wo ti paale waŋ se no.

³¹ Dafid ko re maga joŋ ge wurpo go pel bole, á raw wãã ge go diŋ ti bir gi Mesi no, maga á hay wãã go ga : Se men ge yoo jar ɓi tuu wo ga, hõõgese ɓe buu ga lay.

³² Diŋ Yeso se ga Baa raw bir gi ɓe go mo so no. Naa ɓuy naa diŋ jar wãã ge go ti ɓe.

³³ Baa raw grag Yeso de woore, raw hayge ɓe nen ti ɓaŋ war ɓe, Baa Pããben raw hã Nenterse ɓen ne hẽn doo ga á hay wãã le go ɓaa no so no, á raw kaa ge ɓe go ne naa ti, doo ga nday de ko ge ɓe, nday de laa ge ɓe patala no lay.

³⁴ Werga Dafid bay de wo ge ciŋ ti boŋ wa, ama á raw wãã ge go ga : Baa Waŋkluu raw riŋ Waŋkluu ɓin ga : Hay ɓo go nen ti ɓaŋ war ɓi la,

³⁵ Hãã ndi wo go kaŋ ɓaale ɓo ti jar hee ɓon wo ɗa.

³⁶ Wersen daga nday jar ni Israyel nday mo ko go cwãy ga Baa hay ne go Waŋkluu, Mesi lay, diŋ Yeso sen ga nday ɓal ne go ti koo ma ɓal jarn mono.

³⁷ Á wo wo laa wããre sen mokay, jiili ɓaara raw caa ge go debaŋ, á raw wo wii Piyer de jar peele Yeso lan wo ga : Nday hẽẽre wur ma twerpiiri no, wùr mo joŋ joŋ ge la?

³⁸ Piyer raw riŋ rage ga : Ɓoɗ we jag go ti ɓlagge ɓayn wo, wosela ɓuy mo yãã ga á mo joŋ batem se go de ɗúu Yeso Kris, maga Baa mo fug ɓil go ne nday ti ɓlagge ɓayn wo day ni nday daʼge fen maga Nenterse ma bay ɗagn hãn ne nday yaŋe.

³⁹ Werga tayge jag sen mokay de tayge de ɓay de weere ɓay wo, ma jar maga wo wo go hãã hãã mo ɓuy lay, ma wosela ɓuy maga Waŋkluu, Baa naa de ɗe rage le mo ɓuy lay.

⁴⁰ Piyer raw riŋ rage de wããre ma tigriŋ wo sar sar debaŋ ma coɓ nen ɓaara pa ga : Blaw we go de wer jar se ma de ɓlaggen wo, maga nday mo daʼ we see ɓay ɗa la.

⁴¹ Jarn raw wo yãã wããre ɓe no, á raw joŋ batem ɓaara go. Ti wur sen ngaɓa jar ma de hã ɓil ne Yeson raw wo yaʼge ciŋ ni nen ndar swaʼa.

⁴² Á raw wo lagge coʼ sug hadge jar peele Yeson wo no, joŋ wo re ti ngel ɓe doo ga á laa wo no lay, tay wo jag ɓaara boŋ doo hẽẽrebe wo nono, ɓes wo hoole ti yoo kããra de ele, lag wo tos ge tum tumi.

Jar ma de yãã wããre Yeson tay wo jag boŋ

⁴³ Hẽẽne raw joŋ jar ɓuy, werga jar peele Yeson joŋ wo fẽẽre ma joŋ hẽẽne, wo de fẽẽre mbuɗgi debaŋ.

⁴⁴ Jar ma de yãã wããre Yeso Krisn tay wo jag ɓaara boŋ, á raw wo tay fẽẽre ɓaaran ti kẽẽ boŋ lay.

⁴⁵ Yeɗ wo payre ɓaara go, de fẽẽre ɓaara wo, ɓesn wo go ti yoo ɓaara ma yaɗ re ma see ɓaaran wo.

⁴⁶ Tay wo ɓi tiŋ Baa tum tum, tay wo ɓes hoole le liŋ lay, re wo hoole ɓil go ti kããra feh fehe, ɓil go de fug gi ti kããra feh feh lay.

⁴⁷ Lag wo togoɗ Baa tum tum, jar ɓuy da ra lay, ti naw tum tum Waŋkluu ɗe jar le, yãɗ ra go jag ɓlagge ɓaaran wo, tay ra ne hara yoo ni.