JOŊRE 19 - Tupuri Bible

Pol wo Efes

¹ De maga Apolos le Korente ɗa mokay, Pol kal rawge ciŋ ɓi sir Asi, raw age Efes, á raw daʼ jar ma wer Yeso po wo ni.

² Á raw wii rage ga : Ti wur maga nday hay yãã wããre Kris, Nenterse ma bay ɗag cwaa mbe we le ti ɓay? Á raw wo ga : Wùr bay de laa wããre Nenterse ma bay ɗag po ga yaŋ le cwaɗ ge ti jar po wa has ɓuy yaw.

³ Á raw wii rage ga : Day á hay joŋ batem ɓay nà de batem ma hon ne? Á raw wo ga : Diŋ de batem maga Jaŋ hay joŋge ɓe mono.

⁴ Pol raw riŋ rage ga : Jaŋ hay joŋ batem jar diŋ batem ma ɓoɗ jage, á wii jar ga á mo yãã wo wããre je maga a ge le blam se ga diŋ Yeso mono.

⁵ Á wo wo laa wããre sen mokay, Pol raw joŋ batem ɓaara go de ɗe ge ɗúu Waŋkluu Yeso.

⁶ Pol raw kaŋ doo ne hara ti, Nenterse ma bay ɗag raw cwaa ge le ti ɓaara, á raw wo wãɗ jag dehãy, raw wo ndar nen wããre Baa go lay.

⁷ Á wo ɓuy hwal ti ɓog layblaʼ.

⁸ Pol raw kalge ɓi tiŋ tosge mani jar Jwifn wo, raw sii wããre go tinoo poɗage. Á joŋ few ni swaʼa, se raw caa nen ɓaara go laɗ wer wããre ti twaywaŋ mani Baa no.

⁹ Ama jar po wo yoo ɓaara hig wo jiili ɓaara go, laa wo day ge yãã wããren ga, mbuɗ wo foo wããre Waŋkluu yoo jar lay, Pol raw blaw ge go de jar sen wo, raw hoo jar ma de yãã re Yeson wo go, had ra tum tum ti lakol mani Tiranus no.

¹⁰ Á raw joŋ kiŋgi had rage ɓoge, hãã jar ma ɓi sir Asi ɓuy, jar Jwif wo de jar Greg ɓuy raw wo laa wããre Waŋkluu lay.

Weere mani Sefa wo

¹¹ Baa kay Pol joŋ fẽẽre mbuɗgi

¹² hãã jar kol horge õõbe ma tag gibigri ɓe no, de õõbe ma se ɓen wo, duɗ wo jar cegèn wo de ɓe, cegèn raw men rage go lay, sõõre ndar wo go ne hara ti lay.

¹³ Ama jar po maapoɗ sõõre wo go ne jar ti yaŋ wo yoo jar Jwif ni, raw wo kiɗ faage de see ɓaara ga saara ɗe ɗúu Yeso ma niɗ sõõre wo go lay, á raw wo wãɗ ge ga : Ndi de riŋ nday de ɗúu Yeso maga Pol siɗ wããre ɓe mono.

¹⁴ (Jar sen wo renam, diŋ jar ni Sefa je kluu ma siɗ jag ma yoo jar Jwif wo.)

¹⁵ Sõõn raw riŋ rage ga : Ma Yeso ndi de ko ge ɓe, Pol ndi de ko ge ɓe lay, ama ma ɓay, nday diŋ wose wo lay la?

¹⁶ Je maga sõõn ti ɓe la raw ɓoʼ ɗee ne hara ti, bag ra ɓuy, raw raw egre ɓaara, raw joŋ bon ɓaara debaŋ hãã á kol wo daŋ ge go siigi glog koɗe, de wããge se debaŋ lay.

¹⁷ Wããre sen raw dus gi go ɓi leege Efes ɓuy, dus go yoo jar Jwif wo, de jar Greg wo ɓuy, hẽẽne raw caa rage debaŋ, ɗúu Waŋkluu Yeso raw rage go debaŋ lay.

¹⁸ Jar po wo debaŋ yoo jar ma de yãã wããren raw wo ɓoɗ jag go de see ɓaara, siɗ wo re maga á hay wo joŋ rage go lay.

¹⁹ Jar po debaŋ yoo jar joŋ sogway, raw wo tay kefder ɓaaran le, roɗ ne wo go pel jare, kee wo solay ɓe, solay ɓen nen ndar doo dwee.

²⁰ Wersen wããre Waŋkluu raw dus gi go debaŋ, jar ɓen raw wo daʼ egre debaŋ lay.

Re bon leʼ ɓi leege Efes

²¹ Blam re se kayn Pol raw ɗiggi jag jiili ɓe ga se wo Masedwan wo de Akayi, ma raw ge Jerusalem, á raw wãã ge ga : Hayga ndi wo we ni hay baa ẽẽ layblaʼ, ndi wo Rom.

²² Á raw laa jar maga hay wo kay ge ɓe, raw hoo ge yoo ɓaara ɓog raw laa rage wo Masedwan, diŋ Timote wo de Eraste, á raw gwaʼ ge le Asi ni naw mbag ɗa.

²³ Le de wur sen bon raw leʼ ge ti wããre Waŋkluu debaŋ.

²⁴ Jobo yaŋ ni à ɗen ga Demetriyus, diŋ je yor boo ma boo tiŋ Artemis no, á de hoo jar joŋ joŋre sen wer ɓe debaŋ, werga á daɗ horog de ɓe debaŋ.

²⁵ Á raw tay jar joŋre sen wo, raw wii rage ga : Nday jar ɓi no, nday yaŋ de koge ga joŋre sen mokay de daʼ horog ne naa debaŋ.

²⁶ Nday yaŋ de ko ge, nday yaŋ de laa re maga Pol bloo sen joŋ ne mono, á wãɗ ga fẽẽre maga jar téebeere joŋ ra wo de doo ɓaara ga diŋ baa bay wo diŋ baa wo wa. Á jãã jar wer ɓe de wããre sen debaŋ, bay Efes la tawa wa lay, go ɓi sir Asi ɓuy.

²⁷ Patala joŋre naan go de ɓoʼ foo, bay diŋ joŋre naan tawa wa lay, tiŋ Artemis, baa ma twãy kol foo go de koɗ koɗe, kluu ɓe maga jar Asi wo, de jar ma ti sirn wo ɓuy goŋ ge ɓe taw ge go lay.

²⁸ Jarn wo wo laa wããre sen mokay, ɓil ɓaara raw sõõ ge, á raw wo ngar jag ga : Artemis ma kluu ma Efes no.

²⁹ Ɓi leegen ɓuy raw hoo ge ciŋ de wããre debaŋ, á raw wo ɓoʼ ɗee ne tiŋ maga ngaɓan de tayge ni, raw wo kog Gayus wo de Aristarke, jar Masedwan maga a wo le wer Pol mono.

³⁰ Pol raw ga se kal se jarn wo, ama jar ma de yãã wããre Yeson raw wo dig gi ɓe.

³¹ Jar po wo yoo jar Asi, diŋ bar ɓen wo, raw wo laa ge le riŋ gi ɓe ga : á mo kal tiŋma yoo jarn wo wa.

³² Jar po ngar wo jag ma ɓaaran sara, jar ma la ngar wo ɓaara sara, werga ngaɓan wo de ngar jag debaŋ, daŋge ɓaaran bay wo de laa wer re maga á wo de see ɓaara de ngar jag ti ɓe mo wa.

³³ Á raw wo baa Aleksaŋder le yoo ngaɓan wo, raw wo fer blam wããre sen ne hẽne, jar Jwif raw wo oo ge ɓe pel ɓaara, Aleksaŋder raw maʼ doo ɓe ga se sii wããre ne jar wo.

³⁴ Á wo wo ko ge ga á diŋ je Jwif mokay, á raw wo ngar jag ɓuy ga : Artemis ma kluu ma Efes no, ig wo ngar jag sen go de el smagga.

³⁵ Ama sekreter ma ɓi leegen raw dig rage, raw wii rage ga : Nday jar Efes, je maga bay de koge ga ɓi leege Efes diŋ je koɗ tiŋ Artemis wo de fodo ɓe ma de maŋ ge ɓe maga leʼ le ciŋ wa diŋ wo la?

³⁶ Wersen Hayga re se kay bay de yoŋ ge wa no, ni naa lag we seɗem. Nday bay de kããge ma joŋ mopo deparday doosen no kay wa.

³⁷ Nday a de jar se lag wo, a bay wo de joŋ ɓlagge po wa, bay wo de joŋ freŋ wa, bay wo de ɗar Artemis naa wa lay.

³⁸ Hayga Demetriyus wo de jar joŋre ɓen yaŋ wo de wããre jag ma ʼwad war ne hara ti no, je kluu jarn yaŋ wo, ngel cag wããren yaŋ, men ra ɗe kããra cag wããre ɓaara no.

³⁹ Hayga á yaŋ wo kiɗ gi diŋ wããre ma tigriŋ no, ni á mo wo wo cag ge ɓe wo go ti ngel ma cag wããre no.

⁴⁰ Á ɗar naa yaŋ ti tayge maga naa tay wara ti ɓe mo kaʼ no, bay go nen naa sog ga á de deele no kay yawla wa pa mono.

⁴¹ Á wãã doosen no wãã, á raw mber ngaɓan wo go ɓuy.