JOŊRE 18 - Tupuri Bible

Pol wo Korente

¹ Blam sen Pol raw urgi le Aten, á kal rawge Korente.

² Á wo daʼ je Jwif po à ɗen ga Akilas biŋ ɓi sir Poŋ, ni tuuseŋ á raw wo age le Itali de wãy ɓe Prisil, werga Klod waŋ nii jar Jwif ma ɓi leege Rom wo go ga á mo horge wo go, mo lag wo Rom ni wa. Pol raw woge see ɓaara, raw hayge wo ɓiŋ ɓaara ni.

³ Blam sen de maga á wo ko ge ga joŋre saara diŋ sen boŋ mokay, Pol raw hayge liŋ ni ɓaara joŋ joŋre ɓiŋ ɓaara lay, wer joŋre ɓaaran diŋ joŋre ɓoɗ ge õõbe ma bag mburyugi.

⁴ Wur iggin ɓuy Pol wo siɗ wããre ɓi tiŋ tosge, á ɓag jar Jwif wo de jar Greg wo de wããre tum tum.

⁵ Ama Silas wo de Timote men wo Masedwan le go, raw wo nduugi se Pol, Pol raw oo ge go wãã ge diŋ wããre sagsage, ɓoɗ wer Yeso go ne jar Jwif wo ga á diŋ Mesi lay.

⁶ Á wo ko ge ga jar Jwif laa wo day ge yãã wããren ga mokay, á raw gas õõbe ɓen go, raw ga Dugwaare cíi ɓay fer leʼ ge we ti tigriŋ, ma ɓi, ndi go de yog ge, patala ndi raw se jar maga bay wo jar Jwif wa mono.

⁷ Á raw urgi le ni, kal rawge ni bloo po à ɗen ga Titiyus Justus, diŋ je goŋ Baa, tiŋ ɓen mbaŋ se tiŋ tosge no.

⁸ Krispus waŋ tiŋ tosgen raw wo yãã wããre Waŋkluu de jar ni ɓe wo ɓuy, jar Korente maga hay wo laa wããre Pol yãã wo wããren ɓuy lay, á raw joŋ batem ɓaara go.

⁹ Waŋkluu raw wii Pol nen lwaʼge de suŋ ga : joŋ hẽẽne wa, sii mbo wããren go, hem wa hase.

¹⁰ Werga ndi yaŋ de ɗaw mo ge doo ɓi, jobo kãã ma kaŋ doo mo se, joŋ mo ge de ɓlagge ga, werga jar ɓi yaŋ ɓi leege sen la ni.

¹¹ Á raw joŋ kiŋgi ti ngel ni boŋ de few hiiraʼ had rage de wããre Baa.

¹² Galiyoŋ je Rom wo kol ge waŋ Akayi mokay, jar Jwif raw wo tay jag ɓaara boŋ, raw wo baa Pol, raw wo raw ge de ɓe pel jar cag wããren wo,

¹³ á raw wo riŋ jar cag wããren wo ga : Bloo se kayn la jãɗ jar ga jar mo goŋ Baa de faage ma tigriŋ sara, jar mo goŋ diŋ ti jag liŋgin mo wa.

¹⁴ Pol de kiɗ gi ga se bul jag ɓe go wãã re mokay, Galiyoŋ raw wãã ge ga : Nday jar Jwif no, hay ga wããre sen mokay yaŋ diŋ re maga bay keɗed wa, noga á yaŋ diŋ joŋre ma de ɓlagge no, ndi laa diŋ cwãy ɓe,

¹⁵ ama hayga á yaŋ diŋ faare ti hadge, noga ti ɗúu, noga ti re tosge Baa ɓay no, ni sen diŋ wããre ɓay, ndi day cag re se kayn gà.

¹⁶ Á raw nii rage wo go ti ngel ma cag wããre no.

¹⁷ Á wo ɓuy raw wo baa Sosten waŋ tiŋ tosge no, mbar ne wo pel jar cag ren wo ni deŋ, de sen ɓuy, ti Galiyoŋ laa kaŋ ge ti wããre sen ni meʼ ga has.

Pol fer le Antiyos

¹⁸ Pol raw ig gi le Korente ni debaŋ tigriŋ pa, á raw joŋ gwaʼ we so ne hẽẽre ɓen wo, raw ɗii daage ma woge go ɓi sir Siri de gee Akilas wo de Prisil, blam maga á hay cẽẽ ti ɓe go ɓi leege Saŋkre, wer haʼ ge maga á hay hãʼ go mono.

¹⁹ Á raw wo age Efes, Pol raw men kããre ɓen wo le blam, raw kalge ɓi tiŋ tosge, á raw wo faa kããra de jar Jwif wo.

²⁰ Á raw wo kam ge ɓe ga á mo ig se saara ni meʼ ɗa, á laa day ge gà.

²¹ Á raw joŋ gwaʼ we so ne hara, raw wãã ge ga : Ndi fer yaŋ le wurpo see ɓay kway, hayga Baa da we no. Á raw ɗii daage le Efes.

²² De maga á wo wo day ge Sesare mokay, á kal rawge Jerusalem her jag ne Tayge jar ma wer Kris wo, kal rawge Antiyos.

²³ Á raw ig gi le ni smagga : blam sen á raw urgi, raw ɓi sir Galad de Friji wo ɓuy, ma coɓ nen jar ma wer Yeson wo ɓuy.

Apolos wo Efes, wo Korente lay

²⁴ Je Jwif po à ɗen ga Apolos, biŋ ɓi leege Aleksaŋder, á diŋ je ma jag de cõõre debaŋ, á raw age Efes, á de ko wer wããre Baa debaŋ lay.

²⁵ Á de had wããre mani Waŋkluu de ele, de hã ɓil ɓe ne Baa de egre cwãy lay, á de had wããre Yeso, sii wããre Yeso go ti ngel ɓe de ele, mbe de sen ɓuy á bay de ko batem ma tigriŋ wa, say diŋ batem maga Jaŋ hay joŋge ɓe mo boŋ tawa.

²⁶ Á raw sii wããre go de egre ɓi tiŋ tosge. Prisil wo de Akilas laa wo wããre ɓen mokay, blam sen, á raw wo baage ɓe wer ɓaara, fer wo kaŋ nen ɓe ti re mani Baa de el daŋge.

²⁷ Á raw ga se raw wo pel Akayi, hẽẽre ɓen raw wo jor wer ɓe wo ciŋ ni, á raw wo yer leeder wo blam ɓe ne jar ma wer Yeson wo ga hayga á day we wo see ɓaara no, ni á mo yãã wo ne de ele. De maga á wo day ge see ɓaara mokay, á raw kay jar ma de hã ɓil ɓaara ne Krisn wo de el debaŋ.

²⁸ Á raw baw jar Jwif wo de wããre yoo ngaɓan ni, werga á raw kaŋ rage nen ti wããre Baa ga Yeso diŋ Mesi mono.