JOŊRE 17 - Tupuri Bible

Pol wo Tesalonig

¹ Pol wo de Silas raw wo hee ge Amfipolis, de Apoloni, á raw wo age Tesalonig ti ngel maga tiŋ tosge ma jar Jwif wo ni mono.

² Pol raw kalge ɓi tiŋ tosgen doo maga á had go joŋ ge tum no mono, á joŋ naw faa ge de ɓaara ti wããre ma ɓil kefdern wo wur iggi ɓaale swaʼa.

³ Á raw ɓoɗ wer wããre ma ɓil kefdern go ne hara ti re maga wãã ti Mesi ga á joŋ ge bone, day fer bir gi le go mono. Pol raw riŋ rage ga : Diŋ Yeso sen ga ndi de sii wããre ɓe we mono, á diŋ Mesi.

⁴ Nen jar po wo yoo ɓaara raw wo caa ge, á raw wo tayge wer Pol wo de Silas, wersen ngaɓa jar Greg ma goŋ Baan wo de naare kluurin wo debaŋ raw wo yãã wããren lay.

⁵ Ama ma jar Jwif ɓil ɓaara raw sõõ ge, á raw wo hoo jar po ma debaycõõre wo wer ɓaara yoo lumo, tay wo jar debaŋ, raw wo ur wããre ɓi leegen ɓuy, á raw wo ɓoʼ ɗee ne tiŋ mani Jasoŋ ti, kiɗ Pol wo de Silas ga saara mo a de ɓaara pel jar wo.

⁶ De maga á laa wo daʼ rage ga mokay, á raw wo kog Jasoŋ wo de jar po yoo hẽẽre naan wo pel jar cag wããre ma ɓi leegen wo, raw wo ngar jag ga : Jar se maga hay ur wo wããre go ɓi sirn ɓuy á wo we la pa so,

⁷ day Jasoŋ raw yãã rage se ɓe, jar sen bay wo hoo sug ti wããre Sesarn wa lay, wãɗ wo ga waŋ ma tigriŋ yaŋ pa, ga waŋ sen diŋ Yeso.

⁸ De maga ngaɓan wo de jar cag wããren raw wo laa wããre sen mokay, ɓil ɓaara raw sõõ ge debaŋ,

⁹ laa wo men Jasoŋ wo de jar lan wo raw ge ga so, hãã saara wo go poɗ ge de solay ɗa.

Pol wo wo de Silas Bere

¹⁰ Hẽẽre ɓaaran raw wo laa Pol wo de Silas wo go Bere de suŋ ni tuu. De maga á wo wo day ge ni mokay, á raw wo laa ge ɓi tiŋ tosge jar Jwif wo.

¹¹ Ama jar Jwif sen wo desãy ɗawa daŋ jar Tesalonig wo ra, á raw wo yãã wããre Baa de jiili ɓaara ɓuy, fleg wo wer wããre ma ɓil kefdern ti naw ɓuy, ma ko ge ga wããre maga á sii ne saara mbe ti ngel ɓe cwãy yawla.

¹² Wersen jar debaŋ yoo ɓaara raw wo yãã wããre no, naare kluuri jar Greg wo, de werpiiri Gregn wo debaŋ yãã wo wããren lay.

¹³ Ama de maga jar Jwif ma Tesalonig raw wo laa ge ga Pol sii wo wããre Baa we ɓi leege Berem kay, á raw wo age ur wùu wããren ciŋ pa.

¹⁴ Hẽẽre Pol raw wo kaŋ Pol wo go ti jeŋ maarog ma kluu deparday, ama Silas wo de Timote raw wo gwaʼ ge le Bere ni.

¹⁵ Jar maga wo wo kaŋ Pol, kaŋn wo wo go hãã Aten, Pol raw wii rage ga : Wii we Silas wo de Timote ga á mo a wo le deparday. Blam sen, á raw wo fer ge Bere wii rage so.

Pol wo Aten

¹⁶ De maga Pol wo gor Silas wo de Timote Aten mokay, á wo ko jar ma ɓi leegen wo ɓuy goŋ ge diŋ sõõre wo mono, á raw caa jiiri go debaŋ.

¹⁷ Wersen Pol raw wo faa kããra de jar Jwif wo de jar dehãy ma goŋ Baa wo ɓi tiŋ tosge, ɓi lumo de maga se yiŋ we de ɓaara ni mo ɓuy no.

¹⁸ Jar had koge re mani Epikur wo de ma Stowig raw wo faa kããra de kẽẽ. Jar po wo yoo ɓaara raw wo wãã ge ga : Je da faare sen wãɗ mo deŋ nà gahãyla? Jar po wãã wo yoo ɓaara pa ga : Á ko doo je siɗ wããre Baa po ma tigriŋ won no. Á wãã wo doosen werga á hay sii ne jar ga Yeso bir go.

¹⁹ Á raw wo baage ɓe, ɗii wo de ɓe ti Areyopaje, raw wo wii gi ɓe ga : Wùr kãã yaŋ ma daʼ wer hadge se maga ndo de had ge ɓe mo kay yaŋ ge?

²⁰ Werga re ɓe maga á wãã mokay, á bay wo de laa ge ɓe ti boŋ wa, wersen á da wo ga saara laa wer hadge se no.

²¹ (Jar Aten wo ɓuy, de jar dehãy maga wo de lagge ɓi leege Aten ni mo ɓuy, laa wo joŋ joŋre ma tigriŋ ga so, lag wo wiɗ gi diŋ wer wããre, laɗ ge diŋ wer wããre ma defayn tawa.)

²² Pol raw urgi ciŋ ti Areyopaje no, raw wãã ge ga : Nday jar Aten no, ti joŋre ɓay ɓuy, ndi raw koge ga nday diŋ jar ma de baa wùu ti tosge ɓay wo debaŋ.

²³ Werga ndi raŋ ɓi leege ɓay no, ndi raw ko ngel ma siɗ jag ɓay po de baage kaʼa, wããre de yerge ti ɓe ga : Tiŋ ma siɗ jag ne Baa maga á bay de ko ge ɓe wa mono. Wersen je se ga nday goŋ mbay ane, day nday bay de ko ge ɓe wa mono, ndi a sii gi we diŋ wããre Baa sen so.

²⁴ Á diŋ Baa ma joŋ tamsirn de fẽẽre ma ɓil ɓen ɓuy no, Waŋkluu ma ciŋ no, Waŋkluu ma gesiŋ lan lay, á hay ɓi tiŋ maga a bor ra de doo wo mo gà.

²⁵ Á bay de kaŋ nen wer fen ma doo je tabay wa hase, haybà diŋ may se la ɓuy, á bay de wii ma doo je tabayn wa, á diŋ je ɗaw jar tenen no, je hã ɓoɗ ge egre ne jare, ne fẽẽren wo ɓuy lay.

²⁶ Á tes wer jar ma ti tamsirn wo ɓuy, ga á mo baa wo sirn go ɓuy diŋ de wer jobo boŋe, car ɓil sirn go ne hara, car ngel lagge go ne hara taʼ taʼ lay.

²⁷ Á joŋ doosen ga jar mo kiɗ wo se Baa, ni á kãã wo yaŋ ma daʼ se layblaʼ la, noga duʼ wo se yaŋ yawla. Ti cwãy ɓe mono, Baa bay go se jar hãã wa hase,

²⁸ werga jobo yaŋ de wãã ge ga : Naa jar téebeere tenen mo tiʼ fĩɗ se naa, seɗ ge mo sug sug diŋ nen doo ɓe. Doo ga jar siŋ ma yoo ɓay wãã wo ga : Naa diŋ weere ɓe no lay.

²⁹ Wersen naa jar téebeere naa diŋ weere ɓe, naa mo ɗig ga Baa, se ɓe doo boo biŋni, noga doo boo dobe, noga doo húulì ma de ceɗ ge wo ga jar téebeere joŋ ra wo de ɗiggi ɓaara wo de koge re ɓaara mo wa.

³⁰ Baa bay de kee rage de ɓlagge ti maga á hay bay wo le de ko ge ɓe wa ɗa mo wa. Patala á yaŋ wii wosela ɓuy ga á mo coo ɗiggi ɓe ma de ɓlaggen de deele tigriŋ.

³¹ Werga á de ngaɓ naw po go boŋ ga se cag ge re jar ma ti tamsirn wo wurpo ti faage ɓe de deele, cag ge re sen diŋ je maga á maŋ go mono. Á kaŋ nen jar go ti ɓe poɗag ɓuy, ti wur maga á raw bir gi ɓe go mono.

³² Á wo wo laa wããre bir gi ɓe le go mokay, jar po wo yoo ɓaara raw wo mbuɗ gi ɓe doo, jar lan raw wo wii gi ga : Wùr daga wùr laa wããre sen mokay ge ɗa pa.

³³ Pol raw kalge go, raw men rage go.

³⁴ Jar po wo yoo ɓaara raw wo tayge wer Pol, yãã wo wããre no, maapo yoo ɓaara boŋ diŋ je Areyopaje, à ɗen ga Denis wo de wãy po à ɗen ga Damaris, jar maapo wo ni pa.