JOŊRE 16 - Tupuri Bible

Timote wo de Silas de wo ge wer Pol

¹ Á raw wo age Derbe wo de Listre mokay, je ma wer Yeso po hay yaŋ ni, ɗúu ɓe ga Timote, wel may jar Jwif wo, diŋ je ma wer Yeso lay, pan ɓe diŋ je Grege.

² Ɗúu ɓe de rage go jag jar Listre wo de Ikoniyum wo debaŋ.

³ Pol raw ga se wo de ɓe wer raŋge, á raw caa ɓĩĩni ɓe wer wããre jar Jwif maga wo ɓi leege ni mono, werga á wo ɓuy de koge ga pan ɓe diŋ je Grege.

⁴ Ti ngel maga á raŋ wo ni mo ɓuy, á raw wo riŋ jar sen ga see we wer wããre maga jar peele Yeso wo de jar kluuri ma Jerusalem hay tay wo jag ɓaara ti ɓe mono.

⁵ Wersen Tayge jar ma wer Kris raw wo hã ɓil ɓaara ne Kris de egre debaŋ, ngaɓa ɓaara yaɗ pel ti naw tum.

Pol lwaʼ de je Masedwan

⁶ Nenterse ma bay ɗag raw dig rage ga á mo sii wo wããre ɓi sir Asi wa, á raw wo cegaɗ ge go Friji wo de Galad.

⁷ De maga á day wo mbaŋ se Misi mokay, á raw wo ga saara mo laa Bitini, ama Nenterse Yeso laa men rage joŋ ge no gà.

⁸ Á raw wo raw ge ti ɓaŋ Misi, raw wo ɗii gi Trowas.

⁹ De suŋ ɓe, Pol raw lwaʼ ge, ko je Masedwan de oole deŋe, je sen raw riŋgi ɓe ga : Hee Masedwan taw kay wùr ɗa ɓa.

¹⁰ Blam sen deparday tuu Pol raw kiɗ wùr ga wùr mo see Masedwan, wùr raw koge tuu ga Baa ɗe wùr ga wùr mo see sii Wããre ma de Cõõren ne hara.

Lidi yãã wããre Kris

¹¹ Wùr raw hoo ge le Trowas de daage, wùr kal rawge de deele ɗeger ɓi leege Samotras, toŋ ɓe, wùr kal rawge Neyapolis.

¹² Le ni wùr kal rawge Filippi, Filip diŋ ɓi leege ma kluu ma ɓi sir Masedwan, sir maga jar Rom wo de wãã re ɓe. Wùr kal rawge lagge ɓi leege sen ni naw rabe.

¹³ Wur iggin, wùr raw laa ge le go jag leege no, ga wùr mo wo go ti jeŋ maarog no, ɗiggi wùr ga wùr kiɗ ngel maga a tos ni mono, wùr raw lagge gesiŋ, wùr raw wii wããre ne naare po maga wùr daʼ ra de tayge.

¹⁴ Ma po yoo ɓaara à ɗen ga Lidi, á diŋ wãy ma joŋ terere õõbe ma desẽẽ burburi, wãy sen ɓi leege Tiyatir, wãy sen goŋ Baa, Waŋkluu raw bul jag jiili ɓe go ga á mo coʼ sug wããre maga Pol de wãã ge ɓe mono.

¹⁵ De maga Pol joŋ batem ɓaara go de jar ma liŋ ni ɓen wo ɓuy mono, blam sen wãy raw wii wùr ga : Hayga ndi yaŋ nen ɓay diŋ wãy ma de yãã wããre Baa no, a we le, lag we ni ɓi. Á tem ti wùr debaŋ.

A bag Pol wo de Silas Filip

¹⁶ De maga wùr de wo ge ti ngel ma tosgen, wùr raw yiŋgi de wãy gebee po de sõõ ti, re maga joŋ ge wo wurpo sõõn kol ne go ko re sen wo pel bole, á hay tay horog ne jar maga se diŋ gebee ɓaara debaŋ.

¹⁷ Á raw maŋ blam wùr de Pol ngar jag ga : Jar wo mo sug diŋ weere jõõre Baa ma ciŋ no, á sii wo wããre Je ma Yãã Jarn yaŋ ne nday.

¹⁸ Á wãɗ doosen naw pur debaŋ, ama see Pol raw por ge, á raw wii sõõn ga : Ndi wii mo de ɗúu Yeso, kal go ɓil wãy no. Sõõn raw kalge go de jag ɓe maga wãã mo degaʼ tuu.

¹⁹ De maga jar maga wãy diŋ gebee ɓaara wo wo ko ge ga saara daʼ ge mopo ga so mokay, á raw wo raw ge hoo Pol wo de Silas, kog ra wo le go ti ngel lumo,

²⁰ lag ra wo pel jar cag wããren wo, raw wo wãã ge ga : Jar se lagn, á wo diŋ jar Jwif wo, á ur wo re ma de ɓlagge ɓi leege wùri.

²¹ Á a wo had re maga hadge naa jar Rom go de dig naa ga naa mo yããn wa mono.

²² Ngaɓan ɓuy raw wo hoo ge de ɓaara, jar cag ren raw wo ngar õõbe ɓaaran go ne hara ti, raw wo wãã ge ga jwag ra de mbreŋ.

²³ Blam maga á jwag ra wo jwag mokay, á raw wo lag rage ti daŋgay ga gor ti ɓaara de ele.

²⁴ De maga je gor jarn wo laa wããren mokay, á raw laa rage wo wer taw, raw ɓal ɓaale ɓaara ti paglam.

²⁵ Wo day ge gesiɗgi suŋ, Pol wo de Silas raw wo tos Baa, togoɗ wo Baa, te jar lan wo ɓuy raw wo lagge coʼ sug lay.

²⁶ Sirn raw daɗ ge, fid wer tiŋ maga á wo ɓil ɓe go ɓuy, jag tiŋ raw bulgi go deparday tuu, receʼ ma de saɗ jar wo ɓuy raw wo bud gi go tuu.

²⁷ Je gor jarn raw pũy gi go, wo daʼ jag tiŋ go de bul gi, á raw naa moslam ɓen go ga se ɓeʼ se ɓe go de ɓe, ɓen bà ga jarn daŋ wo we.

²⁸ Ama Pol raw ngar jag de gẽẽge ɓe ciŋ kloŋ ga : Ɓlag see ɓo wa, wùr yaŋ mbe la ɓuy.

²⁹ Sooden raw ɗe ɗúu ga doʼ wùu le, á raw kalge tiŋma deparday de daɗ ge, raw laa kõyõgre gesiŋ pel Pol wo de Silase.

³⁰ Á raw laa rage go siigi, raw wii rage ga : Jar ɓi no, ndi mo joŋ joŋ ẽẽ ga ndi daʼ see ɓi yaŋ la?

³¹ Á raw wo riŋ gi ɓe ga : hã ɓil ɓo ne Yeso Waŋkluu no, á yãã mo yaŋ go, ndo de jar ma liŋ ni ɓo wo ɓuy.

³² Á raw wo sii wããre Waŋkluu ne hẽne, ne jar ma liŋ ni ɓen wo ɓuy lay.

³³ Á raw wo hoo rage de suŋ doo ni, yog wo nen wããge ɓaaran go ne hara, á raw joŋ batem ɓaara go doo ni tuu de jar ma liŋ ni ɓen wo go ɓuy.

³⁴ Á raw hoo rage wo liŋ ni ɓe, hã rege ne hara, joŋ wo fruygi de jar ni ɓe wo werga á wo ɓuy hã wo see ɓaara ne Baa.

³⁵ De maga ngel wo go teege mokay, jar cag wããren raw wo laa jar wo wii je gor jarn ga : Laa jar sen wo mbaara so.

³⁶ Je gor jarn raw sii wããre sen ne Pol wo ga : Jar cag wããren laa wo jar le la ga laa we go. Patala laa we go, see mbay jam so.

³⁷ Pol raw wii rage ga : Á jwag wo wùr go nen jar poɗag ɓuy, cag wo re wùri, wùr diŋ jar Rom lay, á lag wo wùr ti daŋgay, day patala saara ga saara laa wùr go de yoŋre? À joŋ doosen no gà, say á mo a wo pog wùr go diŋ saara de see ɓaara.

³⁸ Jar maga á hay laa ra le la raw wo sii wããre sen ne jar cag wããren wo, á raw wo joŋ hẽẽne debaŋ, werga a laa wo ga á wo diŋ jar Rom mono.

³⁹ Á raw wo age woo jiili ɓaara, laa ra wo go, kam ra wo ga á mo men wo ɓi leege saaran go.

⁴⁰ De maga Pol wo de Silas laa wo le go ɓi tiŋ mokay, á raw wo wo ge ni Lidi, raw wo ko hẽẽre naan wo le ko, coɓ wo nen ɓaara le coɓ lay, á raw wo mbaara raw ge so.