JOŊRE 15 - Tupuri Bible

Á tay ɓoʼ faare wããre Jerusalem

¹ Jar po a wo le Jude had hẽẽre naan wo ga : Hayga nday caa ɓĩĩni we doo had ge maga Moyis had jar de ɓe mo we ga no, ni nday kãã ma yãã ge go jag ɓlagge ɓayn wo gà.

² Pol wo de Barnabas joŋ wo wǔy de ɓaara de faare debaŋ, hẽẽre naan raw wo tay jag ɓaara ga Pol wo de Barnabas de jar po wo yoo ɓaara Antiyos mo wo wo Jerusalem se jar peele Yeso wo de jar kluurin wo ɓoʼ faare wããre se no.

³ Tayge jar ma wer Kris raw wo laa rage, á raw wo hee ge Fenisi wo de Samari, raw wo riŋ jar ga jar maga bay wo jar Jwif wa yãã wo wããre Kris we. Wããre sen raw fug ɓil go ne hẽẽre naan wo ɓuy feh debaŋ.

⁴ Á wo wo day ge Jerusalem mokay, Tayge jar ma wer Kris wo, jar peele Yeso wo, de jar kluurin raw wo yãã rage de el debaŋ, á raw wo wii rage ti joŋre maga Baa joŋ de ɓaara mono.

⁵ Ama yoo Farisiyẽẽ po wo, jar ma de yãã wããre Kris yaŋ wo ni, raw wo hoo ge ciŋ wii rage ga : joŋ bà joŋ ẽẽ ne, caa we ɓĩĩni ɓaara, á mo hoo wo sug ti wããre maga Moyis had jar de ɓe mono.

⁶ Jar peele Yeso wo de jar kluurin raw wo tay see ɓaara ɓoʼ faare wããre se no.

⁷ De maga á joŋ wo faare go ti holaŋ kããra joŋ, Piyer raw urgi ciŋ riŋ rage ga : Nday hẽẽre ɓi no, nday yaŋ de koge ga Baa maŋ me le go ɓaa sara, maga ndi mo sii Wããre ma de Cõõren go ne jar maga bay wo jar Jwif wa, á mo laa wo ne, mo yããn wo lay.

⁸ Baa ma ko jiili jarn kaŋ nen jar go ti ɓaara ga se yãã ra we, de maga á raw hã Nenterse ɓen ne hara doo ga á hay hã ne naa no lay mono.

⁹ Á bay de caa ɓil naa go sar sar de kããra wa so, á kol jiili ɓaara go bay ɗag wer hãge ɓil ɓaaran lay.

¹⁰ Patala nday fer lam Baa gahãyla, ga nday fer ɓoɗ re ma de põõre ne jar ma wer Yeson wo soole, haybà moore naa wo de see ɓaara de naa layblaʼ, naa kãã ma soɗ ge ɓe ga mo ɓa?

¹¹ Ama naa de ɗig gi ga Baa yãã naa go jag ɓlagge naa wo diŋ wer Waŋkluu Yeso, doo ga ɓil ɓe dan no, á raw yãã rage doosen no lay.

¹² Ngaɓan ɓuy raw lagge seɗem, yãã wo wããre Pol wo de Barnabas wer fẽẽre ma joŋ hẽẽnen wo de fẽẽre mbuɗgi maga Baa joŋ de ɓaara yoo jar maga bay wo jar Jwif wa mono.

¹³ De maga á sii wo wããren go mokay, Jag raw wii rage ga : Nday hẽẽre ɓi no, coʼ we sug ɓay.

¹⁴ Simoŋ wãã la ga Baa le ɓaa de kaŋ nen ɓe le ti jar maga bay wo jar Jwif wa ga se far jar po yoo ɓaara maga á mo hay wo ma se de ɗaw ɗúu se yoo ɓaara.

¹⁵ Á wãã doo ga jar ndar nen wããre Baa go hay wãã won no, doo ga á de yerge ɓe go ga :

¹⁶ Blam sen ndi fer ge yaŋ le, Ndi boo ge gilig mani Dafid maga hay mbug go yaŋ ciŋ tigriŋ. Ndi fer ge neɗ mbuggi ɓen pa, Ndi fer boo ge ɓe ciŋ tigriŋ lay,

¹⁷ Nen maga jar maga gwaʼ wo, mo kiɗ wo Waŋkluu no, Jar maga bay wo jar Jwif wa, ga ɗúu ɓi de ɗe ge yoo ɓaara mo kiɗ wo Waŋkluu lay.

¹⁸ Mokay diŋ wããre maga Waŋkluu wãã ne mono, je maga hay kaŋ nen jar le go ti re sen wo taŋgu ɓaa mono.

¹⁹ Wersen ɗiggi se ga jar maga bay wo jar Jwif wa, ga yãã wo wããre Baa, naa mo kaŋ re ma de gaali ne hara ti wa so.

²⁰ Ama naa mo yer wo ne hara ga á mo re wo này sii gi jag ne sõõre wo wa, mo dig wo see ɓaara, mo re wo này fen maga a creɗ kiŋ ɓe creɗ ge wa, mo re wo cíi wa lay.

²¹ Werga wããre maga Moyis bag jar de ɓe yaŋ go de sii gi ti ɓe ɓi sir genla genla ɓuy, nday yaŋ jaŋ ge ɓe ɓi tiŋ tosge wo wur iggi tum tum lay.

Wããre maga jar ɓoɗ faare wããren fer wo mono

²² Wããre sen raw coge jag jar peele Yeso wo de jar kluurin wo, de Tayge jar ma wer Kris wo ɓuy debaŋ, á raw wo hoo jar po yoo ɓaara, laa ra wo wo Antiyos wer Pol wo de Barnabas, á raw wo baa Jud maga à ɗen ga Barsabas, raw wo baa Silase, á wo ɓog ɓuy wo de cõõre jag jar kluuri wo.

²³ Á raw wo laa rage wo de leedern ne hara, leedern de yerge ga : Wùr hẽẽre ɓay jar peele Yeso wo de jar kluurin wo, wùr hee jag wo ne nday hẽẽre wùr wo, nday jar maga nday bay jar Jwif wa ma Antiyos wo de Siri, de Silisi no.

²⁴ Wùr laa ga jar po wo yoo wùr wo la, hoo wo wo hãy nen ɓay de wããre, jar sen wùr bay wo de laa rage diŋ wùr wa.

²⁵ Wersen wùr raw tay jage, wùr ga wùr mo hoo jar po wo yoo wùri, laa ra wo wer Barnabas wo de Pol hẽẽre wùr ma dagen wo no,

²⁶ á wo diŋ jar maga nday hã ɓil ɓaara go joŋ joŋre ti jag Waŋkluu Yeso Kris mono.

²⁷ Wersen wùr raw laa Jud wo de Silas wo see ɓay, á wo de see ɓaara á kãã wo yaŋ ma riŋ nday de wããre sen de jag ɓaara.

²⁸ Werga re sen de el nen Nenterse ma bay ɗag nen wùr lay, ga wùr mo kaŋ re ma de põõre ne nday ti de daŋ wããre ma kayn wa.

²⁹ Wùr ga : nday mo dig see ɓay ga nday mo re này sii gi jag ne sõõre wo wa, re cíi wa, re fen ma de creɗ kiŋ creɗ ge wa, lengãɗ we de re sõõre wa, koɗ we see ɓay ti re sen wo mokay ɓuy no, ni nday daʼ see ɓay yaŋ, lag we de woore.

³⁰ Á hã wo faage ne hara mokay, á raw wo raw ge Antiyos, á raw wo tay ti jar ma ti jag Baa wo ɓuy, á raw wo hã leedern ne hara.

³¹ Blam maga á jaŋ wo leedern go jaŋ, ɓil ɓaara raw joŋge go feh debaŋ, ti coɓ ge nen maga á coɓ wo nen saara mono.

³² Jud wo de Silas wo diŋ jar ndar nen wããre Baa go, coɓ wo nen hẽẽre naan wo de wããre debaŋ.

³³ Á raw wo joŋ naw le ni smagga : hẽẽre naan raw wo men rage le raw ge jam se jar maga hay laa ra wo le mono. [

³⁴ Silas nen ɓe raw baa ge, ga da ga se mo gwaʼ le ni.]

³⁵ Ama Pol wo de Barnabas raw wo lagge le Antiyos had jar ni ɗa, siɗ wo wããre mani Waŋkluu ne jar wo debaŋ.

Pol blaw wo go de Barnabas

³⁶ Naw kal rawge go meʼ Pol raw wii Barnabas ga : Naa fer raŋ ɓi leege maga naa hay siɗ wããre mani Waŋkluu le ni mo ɓuy no, ko hẽẽre naan wo, ga á yaŋ mbaara jam yawla.

³⁷ Barnabas raw ga se baa Jaŋ maga à ɗen ga Mark wer ɓaara,

³⁸ ama ɓil Pol laa da ge ga, werga á hay men ra le go Pamfili, laa tayge wer ɓaara ti joŋre ɓaaran ga mono.

³⁹ Faare raw urgi ti yoo ɓaara, á raw wo blaw ge go, Barnabas raw baa Mark wer ɓe, raw wo Sipre.

⁴⁰ Pol raw baa Silas wer ɓe, blam maga hẽẽre naan tos wo Waŋkluu go ne hara ti tos mokay, á raw wo raw ge.

⁴¹ Á raw wo raw ge Siri wo de Silisi coɓ wo nen Tayge jar ma wer Krisn wo debaŋ.