JOŊRE 14 - Tupuri Bible

Pol wo de Barnabas ɓi leege Ikoniyum

¹ Wo Ikoniyum ni mokay, Pol wo de Barnabas raw wo laage ɓi tiŋ tosge jar Jwif wo, á raw wo sii wããre ne hara, jar Jwif wo de jar Greg raw wo yãã wããre no.

² Ama yoo jar Jwif maga bay wo de yãã wããren wa, raw wo jãɗ nen jar maga bay wo jar Jwif wan wo ne hẽẽre naan wo ti.

³ Á raw wo lagge le Ikoniyum ni naw mbage. Siɗ wo wããre Waŋkluun go de egre, sii wo wããre dage Baa maga á da jar mo lay. Waŋkluu wo ko ge ga wããre ɓaara maga á siɗn wo go ti dage ɓen diŋ ti cwãy ɓe mokay, á raw hã egre ne hara maga á mo joŋ wo fẽẽre mbuɗgi.

⁴ Ngaɓa jar ma ɓi leegen raw wo caa ɓil ɓoge, jar la maŋ wo wer jar Jwif wo, jar lan maŋ wo wer jar peele Yeso wo lay.

⁵ Ama jar maga bay wo jar Jwif wa, de jar Jwif wo ɓuy raw wo hooge ciŋ de ɓaara ga saara mo joŋ bon ɓaara, saara mo ɓoɗ ra go de húulì.

⁶ Pol wo de Barnabas wo wo ko ge doosen, á raw wo daŋ ge wo go ɓi leege Listre, wo de Derbe ɓi sir Likawni, de sir maga go de yiŋ ti ɓe mo ɓuy no.

⁷ Á raw wo sii Wããre ma de Cõõren go ni.

Pol wo de Barnabas ɓi leege Listre

⁸ Ɓi leege Listre bloo po hay biŋ le go grúm ɓil man ɓe ɓaa, hay yaŋ de hayle ni yeʼe, a see ti boŋ ga hase.

⁹ Á wo laa wããre maga Pol de wãã ge ɓe mono, Pol raw kaŋ nen ne hẽn ti ɗeŋrese, Pol wo ko hãge ɓil ɓe ga á de kããge ma kol ge go de ele.

¹⁰ Pol raw wãã ge de gẽẽge ɓe ciŋ kloŋ ga : Ur go ciŋ ti deele de ɓaale ɓo. Á raw urgi ciŋ deparday, raw seege.

¹¹ De maga ngaɓan wo ko re maga Pol joŋ ne mokay, á raw wo hoo gẽẽge ɓaara ciŋ de jag Likawni ga : Baa po kol wo see ɓaara we le doo jar téebeere won no, ɗii wo we le gesiŋ se naa wara.

¹² Á raw wo ɗe Barnabas ga Sus, ɗe Pol ga Ermes, werga Pol hay diŋ je sii wããre no.

¹³ Je siɗ jag ne sõõ Sus maga tiŋ ɓen ti faage ma nen ɓi leegen raw age de bloore deere de saɗ nen de mblaaga jag tiŋ ga se sii jag de ɓaara, jar mo siɗ wo jag ɓuy lay.

¹⁴ Jar peele Yeso Barnabas wo de Pol wo wo laa wããre sen mokay, á raw wo ngar õõbe ɓaaran go hoo wo ɗeere wo yoo ɓaara de ngar jage, raw wo wãã ge ga :

¹⁵ Nday jar wùr no, nday fer joŋ sen diŋ may pa la? Wùr de se wùr, wùr diŋ jar téebeere doo nday no lay. Wùr a de Wããre ma de Cõõren ne nday ga nday mo men joŋre se kayn wo go, nday mo fer goŋ ge diŋ Baa ma tenen no, ma joŋ ngel ma ciŋ wo de tamsir no, je joŋ maarog, de fẽẽre ma ɓil ɓaaran ɓuy no.

¹⁶ Baa maga le nen kiŋgi ma ɓaa le ga men jar ɓuy seege ti faage ɓaaran doo ga ɓil ɓaara dan no mono.

¹⁷ De sen ɓuy á bay men sii wããre go ti re maga se joŋ ram wa, á joŋ de el se jare, cwaa bii le ciŋ ti ngel ma de sõʼ ge ma joŋ coore, wuɗ jar de rege debaŋ, joŋ ɓil go ne jar feh feh lay.

¹⁸ De maga á wããn mbaara doo sen ɓuy laybla Pol wo de Barnabas dig wo ra ti fẽẽre siigi jag sen ne hara de gaali debaŋ.

¹⁹ Jar Jwif maga a wo le Antiyos ma Pisidi wo de Ikoniyum, raw wo jãɗ nen jar wo, á raw wo ɓoɗ Pol de húulì, raw wo kog ge ɓe wo go faale tiŋ tiʼ ga Pol huu we go.

²⁰ Ama de maga jar ma de yãã wããre Yeson raw wo tayge le se ɓe mokay, á raw urgi go ciŋ, kal rawge ɓi leege, toŋ ɓe mokay, á raw wo raw ge Derbe ɓog ɓuy de Barnabas.

Á fer wo le Antiyos ma Siri no

²¹ Pol wo de Barnabas raw wo sii Wããre ma de Cõõren go ɓi leege Derbe, kol jar go debaŋ diŋ jar ma wer ɓe lay, raw wo ferge le ɓi leege Listre, Ikoniyum wo de Antiyos ma ɓi sir Pisidin lay.

²² Á raw wo teŋ nen jar ma de yãã wããre Yeson wo no, woo wo jiili ɓaara ga á mo lag wo de egre ti hãge ɓil ɓaara ne Kris no, riŋ ra wo ga : Naa laa ti twaywaŋ mani Baan say diŋ de joge bon debaŋ ɗa.

²³ De maga á far wo jar kluuri yoo Tayge jar ma wer Kris wo far, blam sen á raw wo hẽẽ bii, tos wo lay, raw wo hã rage ne Waŋkluu maga á yãã wo wããre ɓe mono.

²⁴ Á raw wo cegaɗ ge go Pisidi, raw wo Pamfili.

²⁵ Á raw wo sii wããre ɓi leege Perji, raw wo ɗiigi Atali.

²⁶ Le ni mokay, á raw wo ɗii daage, raw wo fer ge wo Antiyos, ɓi sir maga á hay tos wo Baa le ne hara ti ni ga Baa mokay ra ti joŋre ɓaara maga á joŋ wo ne go mo so no.

²⁷ De maga á wo wo day ge Antiyos mokay, á raw wo tay Tayge jar ma wer Kris wo ɓuy, raw wo riŋ rage de wããre fẽẽre ma kluuri maga Baa joŋ ra le de saara mono, ti maga á bul faage go ne jar maga bay wo jar Jwif wa ga á mo yãã wo wããre ɓen lay mono.

²⁸ Á raw wo nà ge le se jar ma wer Yeson wo le ni debaŋ.