JOŊRE 13 - Tupuri Bible

Baa hoo Barnabas wo de Sol go ma joŋ joŋre ɓe

¹ Tayge jar ma wer Kris ma Antiyos wo, jar po wo yoo ɓaara ni wo diŋ jar ndar nen wããre Baa go wo, jar la wo diŋ jar had jare. Jar sen wo diŋ Barnabas, Simoŋ maga à ɗen ga Je Tàabay, Lusiyus ma Siren, wo de gee Manahen (maga gẽẽ liŋ ni pan Herod Waŋ no), lan diŋ Sol.

² Á raw wo lagge goŋ Waŋkluu, hẽɗ wo bii hẽẽ lay, blam sen Nenterse ma bay ɗag raw wii rage ga : Hoo Barnabas wo de Sol go me sara joŋ joŋre maga ndi ɗe rage ti ɓe mono.

³ Wersen á raw wo hẽẽ bii go hẽẽ, tos wo lay, á raw wo kaŋ doo ne hara ti, men ra wo mbaara raw ge so.

Barnabas wo de Sol wo wo Sipre

⁴ Nenterse ma bay ɗag raw laa Barnabas wo de Sol sii wããre, á raw wo ɗii gi Selewsi, kal wo ɗii daage, raw wo ti kaali ma Sipre no.

⁵ Á wo wo day ge Salamin, á raw wo sii wããre Baa ɓi tiŋ tosge jar Jwif wo, Jaŋ Mark wer ɓaara kay rage ni lay.

⁶ Á raw wo cegaɗ kaalin go mokay, raw wo Pafos, á raw wo daʼ je sogway po ni, je tay nen wããre Baa de geteʼe, diŋ je Jwif, ɗúu ɓe ga Wel-Yeso.

⁷ Á hay de hayle ɓiŋ Serjiyus Polus waŋ no, bloo ma desãy no, waŋ raw ɗe Barnabas wo de Sol le, raw wii rage ga se da laa wããre Baa.

⁸ Ama je sogway (maga a ɗen de jag Greg ga Elemas) raw dig rage, raw joŋ taw gi ga se dig waŋ go ga á mo yãã wããren wa.

⁹ Ama Sol je maga à ɗen ga Pol raw baa ɓil go de Nenterse ma bay ɗag raw kaŋ nen ɓe ne hẽn ti ɗeŋres,

¹⁰ raw wiigi ɓe ga : Ndo bloo se ma de baa ɓil go de re taw gi ma de ɓlagge wo de wer ɓlagge ma honla ɓuy no, ndo je ni Manhúulí no, je hee re ma de deelen wo no, ndo kiɗ ɓon tum ga ndo mbuɗ foo wããre Waŋkluu go le la?

¹¹ Ko nen ɓo, Waŋkluu day maʼ mo ge, ndo ig yaŋ bay ko wùr smagga ɗa so. Ni tuuseŋ suŋgu raw ɓoʼ ge go ne Elemas ti, á kal rawge mbar ngel kiɗ jobo ma ɗaw doo ɓe.

¹² Serjiyus waŋ wo ko ge doosen no mkay, á raw yãã wããre no, raw joŋ hẽẽne doo hadge maga á hadn ti jag Waŋkluu mono.

Pol wo de Barnabas wo wo ɓi leege Antiyos ma ɓi sir Pisidi

¹³ Wersen Pol wo de jar ma wer ɓen cegaɗ wo Pafos le go de daage, á raw wo raw ge Perji ɓi sir Pamfili, Jaŋ Mark raw men rage go, fer Jerusalem.

¹⁴ Ama á raw wo men Perji le go, raw wo le go Antiyos ma ɓi sir Pisidi, á raw wo laa ge ɓi tiŋ tosge wur iggi, raw wo lagge gesiŋ.

¹⁵ Blam maga á taw wo jaŋ wããre Baa go, taw wo jaŋ wããre jar ndar nen wããre Baa go wo go, waŋ tiŋ tosgen raw ɓoʼ jobo wo see ɓaara, raw wii rage ga : Nday hẽẽre wùr no, hayga wããre yaŋ jag ɓay ma wãã ge ne jar wo no, wãã we mbay.

¹⁶ Pol raw urgi, maŋ doo ɓe ciŋ, raw wii rage ga : Nday jar Israyeln wo, de jar horge sug ti Baa wo no, coʼ we sug ɓay.

¹⁷ Baa maga jar Israyel goŋ wo ne, hoo moore naa wo le go, ra ɗúu ɓaara le de maga á hay hay wo le jar coo Ejipte mono, á raw laa rage le go de egre ɓe no.

¹⁸ Á koɗ ra le ti puuli nen kiŋgi doo naa.

¹⁹ Blam sen á raw bas wer jar po wo go renam ɓi sir Kanan, raw ɓes sir ɓaaran go ne hara doo ga a ɓes taabul go nono,

²⁰ ga á mo lag wo ni nen kiŋgi kis kis naa ti ɓe doo dwee. Blam sen, á raw hã jar cag wããre wo ne hara, hãã wo go se Samyel je ndar nen wããre Baa go no.

²¹ Blam sen á raw wo wii gi ga hã waŋ ne saara, Baa raw hã Sol wel mani Kis ne hara ti ɓĩĩni mani Benjamen no, nen kiŋgi ma doo naa no.

²² Blam maga Baa wo ɓoʼ ge ɓe go mono, á raw hay Dafid waŋ, je maga á hay wãã go ti ɓe ga : Ndi daʼ Dafid wel mani Isayi maga jiili ɓi dan we, je maga joŋ re yaŋ doo ga ndi da no mo ɓuy no.

²³ Ti ɓĩĩni mani bloo sen, Baa raw hã Yeso Je Yãã Jar gon le ne Israyel wo wer barge maga á baa de ɓaara mono.

²⁴ Taŋgu age ɓen Jaŋ hay go sii wããre batem maga jar Israyel wo ɓuy mo fer wo coo ɗiggi ɓaara de deele.

²⁵ De maga Jaŋ wo go taw joŋre ɓen, á raw wiigi ga : Ɓa, nday ɗig ti ɓi gahãy ɓa, ga ndi diŋ wo ɓa? A kal ga : Ndi bay diŋ je maga nday de gor ge ɓe mo wa. Ko we nen ɓay jobo a ge yaŋ le blam ɓi, ndi bay go de kããge nen kay ge ɓe naa way taarag ɓen go ne hẽn draʼ wa.

²⁶ Nday hẽẽre ɓi no, nday moore Abraham wo de jar horge sug ti Baa wo no, Baa ɓoʼ wããre Je Yãã Jarn mokay le, diŋ ne naa.

²⁷ Werga jar ma ɓi leege Jerusalem wo de jar ɓoɗ faare wããre ɓaaran ko wo ga Yeso diŋ Je Yãã saara go ga, á bay wo laa wer wããre jar ndar nen wããre Baa go maga á jaŋ wo tum wur iggin mo wa lay. Ama de sen ɓuy á ɓoʼ wo jag wããre sen go ga ren baa Yeso.

²⁸ Mbe de maga á laa wo daʼ re maga saara mo ii ne go ti ɓe ga hase mono, mbe de sen ɓuy á raw wo wii Pilad ga á mo ʼwarn go.

²⁹ Á wo wo ɓoɗ jag re maga hay go de yerge ti Yeso go ɓoɗ, á raw wo naage ɓe le gesiŋ jag koo ma ɓal jar no, raw wo ɓoʼge ɓe ɓi tuu.

³⁰ Ama Baa raw bir gi ɓe le go.

³¹ Á raw naa nen se ɓe ne jar maga hay wo le wer ɓe Galile hãã go Jerusalem mono, á wo patala diŋ jar siɗ wããre ɓe go ne jar Israyel wo.

³² Wùr a de Wããre ma de Cõõren ne nday, wããre maga Baa hay go de wãã ge ɓe ne moore naan wo mono.

³³ Re sen Baa joŋ go patala ne naa weere ɓaaran wo, de maga á bir Yeso le go, doo ga á hay de yerge ɓe ɓil Siŋ ma de ɓogn ga : Ndo diŋ Wel ɓi, Ndi biŋ mo wara.

³⁴ Wer maga á bir ne, ga á mo fer buu gi wa so mono, á hay wããn go ga : Ndi woo we yaŋ cwãy, Woore maga ndi hay riŋ Dafid ti ɓe mono.

³⁵ Wersen á raw wãã ge go ti ɓe ti ngel ma tigriŋ pa ga : Ndo men ge wejõõ ɓon go buu gi gà.

³⁶ Blam maga Dafid joŋ joŋre Baa go ti ngel ɓe doo ga ɓil Baa dan no, á raw huu gi, á raw ɓoʼ ge ɓe ɓi tuu yoo moore ɓen wo, á raw buu gi lay.

³⁷ Ama je maga Baa bir ne, á buu gà.

³⁸ Wersen ko we go cwãy, nday hẽẽre ɓi no, wer Yeso, á sii wããre maga Baa men ɗig re ɓlagge maga jar joŋ wo go ne hara ti, á sii we ne nday.

³⁹ Baa kee we ga nday de deele wer wããre maga Moyis bag we mo gà. Á kee we ga nday de deele diŋ wer hãge see ɓay ne Yeso.

⁴⁰ Joŋ we see ɓay de el, maga wããre jar ndar nen wããre Baa go mo leɗ wo ne nday ti wa,

⁴¹ Ko we nen ɓay, nday jar mbuɗ foo jar lan wo no. Lag we de hẽẽne, bas we go. Ndi joŋ joŋre po yaŋ ge nen ɓay la, joŋre maga á siin we ne nday, nday day ge yãã ge ɓe gà.

⁴² De maga Pol wo de Barnabas wo wo laa ge go siigi mokay, jar raw wo wii rage ga wããre sen mokay á mo siin ge wo ne saara wur iggi ma peln wo la pa.

⁴³ De maga ngaɓan raw dus gi go mokay, jar Jwif wo, de jar maga wo de hã ɓil ɓaara goŋ Baa wer jar Jwif wo ɓuy raw wo tayge wer Pol wo de Barnabas, á raw wo sii Wããre ma de Cõõren ne hara, woo wo jiili ɓaara ga á mo see wo diŋ wer de el wããre Baa.

⁴⁴ Wur iggi ma de ɓog ɓen jar ma ɓi leegen ɓuy raw wo tayge laa wããre Waŋkluu.

⁴⁵ De maga jar Jwif wo wo ko ngaɓan ɓil ɓaara raw sõõ ge debaŋ, joŋ wo faare ti wããre maga Pol wããn gom, ɗar ra wo, mbuɗ wo foo ɓaara lay.

⁴⁶ Pol wo de Barnabas raw wo riŋ rage go poɗag ga : Ti cwãy ɓe wããre Baa, á hay siin go diŋ ne nday taŋgu ɗa, ama nday raw tob ge ɓe go, nday raw cag re sen de see ɓay ga nday bay nen kol ge go tenen tum wa, ama patala wùr fer go diŋ se jar maga bay wo jar Jwif wa mono.

⁴⁷ Doo wããre maga Waŋkluu hay wãã go ga : Ndi hay de ɗe moge diŋ je ler ngel go ti jar maga bay wo jar Jwif wa, maga ndo mo wo go de wããre Je Yãã Jar gon go ti jag sir taw ge.

⁴⁸ De maga jar maga bay wo jar Jwif wa wo wo laa wããre sen, ɓil ɓaara raw go fug gi feh debaŋ, á raw wo togoɗ Waŋkluu ti wããre ɓe no, jar maga hay wo de ngaɓ ge go ma kol ge tenen tum tiʼ raw wo yãã wããre Baa.

⁴⁹ Wããre Waŋkluu raw dus gi go ɓi sir ɓuy.

⁵⁰ Ama jar Jwif raw wo jãɗ nen naare jar kluurin wo, naare sen wo de yãã wããre jar Jwif wo, jãɗ wo nen jar kluurin wo lay. Á raw wo hoo ge joŋ bon Pol wo de Barnabas, nii ra wo go ti jag sir ɓaara no.

⁵¹ Barnabas wo de Pol raw wo poʼ puduf ma ɓaale ɓaaran go, á raw wo raw ge Ikoniyum.

⁵² Ama jar ma wer Yeso ma Antiyos joŋ wo ɓil go feh debaŋ. Ɓil ɓaara raw baage go de Nenterse ma bay ɗag no.