JOŊRE 12 - Tupuri Bible

A ii Jag go, ɓoʼ Piyer ti daŋgay lay

¹ Le ti wur sen, Herod raw tĩĩ wer joŋ bon jar po wo yoo Tayge jar ma wer Kris wo.

² Á raw ʼwar Jag hẽn Jaŋ go de moslam.

³ Á raw koge ga se joŋ re sen mokay nen jar Jwif wo de el, á raw baa Piyer (wur few hoole ma bay defõõre no).

⁴ Blam maga à baa ne baa mono, á raw hãge ɓe ne ngaɓa soode po wo hwal ti hiiraʼ, a car ra go taʼ taʼ naa naa naa ga á mo koɗn wo ne, ni Herod mo baan ge le go pel jar blam few Pag kway.

⁵ Wersen á raw ɓoʼ Piyer ti daŋgay, ama Tayge jar ma wer Kris lag wo tum tos ge ti ɓe.

Baa bud Piyer le go ti daŋgay

⁶ De suŋ wur maga Herod de da ge ga se baan ge wo go pel jar, de suŋ sen Piyer de suuli yoo jar ma gor ge ɓen wo ɓoge, de saʼ ge de receʼ ɓoge, jar gor ge ɓen wo de lagge jag tiŋ koɗ jarn wo lay.

⁷ Se ko nen ɓe, je peele Waŋkluu po de oo le deŋ. Ngel raw ler ge wo ɓi tiŋ daŋgay kẽg kẽg, á raw maʼ Piyer yoo brud, raw maŋge ɓe ciŋ, raw wiigi ɓe ga : Ur go ciŋ deparday, receʼn raw bud gi go ne hẽn doo tuu tuu.

⁸ Je peele Baa raw wiigi ɓe ga : Saʼ mblaaga ɓon sag ɓo, hee taarag ɓon ɓaale, Piyer raw joŋge no, á raw wiigi pa ga : Laa õõbe ɓon ti, see le go wer ɓi lam.

⁹ Piyer raw kalge le go, re maga je peele Baa de joŋ rage mo caw se de koge ga á cwãy yawla bay de ko ge wa, ɓen ga se lwaʼa.

¹⁰ Ti ngel maga : á raw se je gor jag tiŋ ma taŋgun le go mokay, raw se ma de ɓog le go, raw nduugi jag tiŋ boo maga kal wo go ɓi leege mono, á raw bulgi go ne hara pel de se ɓe tuu, á raw wo laa ge le go, raw wo yaʼge ti faage po, je peele Baa raw men Piyer go deparday tuu.

¹¹ De maga nen Piyer wo caa ge go mono, á raw wãã ge ga : Ndi ko we cwãy ga Baa ɓoʼ je peele ɓen le yãã mege go doo Herod, go jag re maga jar Jwif wo de gor mege de ɓe mo lay.

¹² Ti ngel maga á wo daʼ wer wããre sen go doosen no mokay, á kal rawge wo liŋ ni Mari man Jaŋ, maga togoɗge ɓe ga Mark, wo daʼ jar de tayge tos ge ni debaŋ deŋ.

¹³ Piyer raw maʼ jag tiŋ wo nen siigi la geʼgeʼe, may po maga à ɗen ga Rod raw yaʼ ge coʼ sug ɓe jag tiŋ no.

¹⁴ Á raw laa gẽẽge Piyer, se laa bul jag tiŋ go ga doo ga ɓil ɓe fug go mono, á raw ferge tiŋma wii rage ga Piyer yaŋ le de oo le siigi.

¹⁵ Á raw wo riŋ gi ɓe ga : Ɓa ndo de loɗge? Á raw riŋ rage ga á diŋ Piyer mbe cwãy. Á raw wo riŋ gi ɓe ga : Ni á joŋ diŋ je peele ma koɗ ge ɓen layblaʼ.

¹⁶ Piyer mbe de maʼ jag tiŋ ceɓe, á raw wo bul jag tiŋ go, á wo wo ko Piyer mokay, á raw wo ngrisgi.

¹⁷ Á raw joŋ doo ɓe ga á mo lag wo gesiŋ, mo lag wo seɗem, á raw riŋ rage de wããre maga se le ti daŋgay tiʼ, Waŋkluu kal se le go no kay mono. Á raw riŋ rage ga : Sii we re sen ne Jag wo de hẽẽre naa wo lay. Á raw kalge go, kal rawge ti ngel tigriŋ.

¹⁸ De maga ngel raw teege go mokay, sooden kii wo ti yoo kããra glum glum, kiɗ Piyere.

¹⁹ De maga Herod kiɗn kiɗ daʼ ga mono, á raw wii jag sooden wo, kal ga : id ra go. Blam sen Herod kal rawge wo go Jude, hãã wo go Sesare, ga se ig wo go ni meʼ ɗa.

Húulí Herode

²⁰ Ɓil Herod raw sõõ ge ne jar Tir wo de jar Sidoŋ ti, ama á raw wo tay jag ɓaara, raw wo age se ɓe ga saara mo tay jag go, á raw wo tay jag de Blaste je kluu ma pel waŋ taŋgu, á raw wo wii gi ɓe ga jag saara mo hay de tayge boŋ, werga jar saara daɗ wo fẽẽre rege le diŋ ɓi sir mani ɓen yaw mono.

²¹ Naw maga Herod hay ngaɓ ne wo go baa jag mokay, Herod raw laa õõbe waŋ ɓen ti, raw hayge ti paale ɓe ma cag wããre no, raw wãã wããre ne hara jag ciŋ kloŋ.

²² Jar raw wo ngar jag ɓuy ga : Wãã re mokay diŋ Baa, bay diŋ je tabay wa.

²³ Ni tuuseŋ je peele Waŋkluu raw maʼ ge ɓe, werga á togoɗ diŋ Baa ga, cogcõõre raw laa ge ɓe, á raw huu gi go.

²⁴ Wããre Baa raw yaʼ wer dus gi go debaŋ lay.

²⁵ De maga Barnabas wo de Sol taw wo joŋre peele ɓaaran le go Jerusalem taw, á raw wo baa Jaŋ maga togoɗge ɓe ga Mark wer ɓaara.