JOŊRE 11 - Tupuri Bible

Piyer de fer blam wããre ɓen ne jare

¹ Jar peele Yeson wo de hẽẽre naa maga wo Jude, raw wo laage ga jar maga bay wo diŋ jar Jwif wa yãã wo wããre Baa we lay.

² De maga Piyer wo nduugi Jerusalem mokay, jar ma de caa ɓĩĩnin raw wo bagge ɓe doo ruugi kwẽ.

³ Á raw wo ga : Ɓa ndo kal yoo jar ma bay caa ɓĩĩnin wo, nday re hoole de kããra lay?

⁴ Ama Piyer raw tĩĩ wer wãã ren le ti gùr ɓe ɓaa ga :

⁵ Ndi hay le ɓi leege Jope, ndi hay tos ge, mopo raw mbuɗ nen ɓi kluu doo gudoŋ no, cwaa le gesiŋ, cõõ ɓe de saɗ ge naa ɓuy, á raw age see ɓi.

⁶ Ndi raw kaŋ nen ɓi ne hẽn ti ɗeŋres ko ge ɓe, ndi raw ko wer fẽẽre ma gesiŋ la maga ɓaale ɓaara naa naa, de ma kirnig gi wo de dweere wo ɓuy, wer ɓaara ni ɓuy.

⁷ Ndi raw laa gẽẽge ɗe mege le ciŋ ga : Piyer, ur go ciŋ, ngaɗ rage, ni ndo re ra.

⁸ Ama ndi raw riŋgi ɓe ga : Bay no wa, Waŋkluu, ndi re fen ma de ɗag de yeɗe doo kay wo no ti boŋ gà.

⁹ Ama gẽẽge ma de ɓogn raw age le ga : Fen maga Baa wii go ti ɓe ga á bay ɗag, ndo mo kon de yeɗe wa.

¹⁰ Ma de swaʼ ɓen wo a ge le, fen sen raw ferge ciŋ tigriŋ pa.

¹¹ Ni tuuseŋ ndi ko la jar maga á laa ra le ɓi leege Sesare, jar sen wo swaʼa, de lagge jag tiŋ maga ndi de hayle ni lagge.

¹² Nenterse ma bay ɗag raw wii mege ga : See wer ɓaara bay faare, hẽẽre naa ma hiiraʼ wo mo lag wo wo wer ɓi lay, wùr raw laa ge liŋ ni Korney.

¹³ Á raw wii wùr ga se ko je peele Baa a liŋ ni se, kal wii se ge ga : Se mo laa jar wo Jope ɗe Simoŋ maga togoɗge ɓe ga Piyer le see se.

¹⁴ Á sii wããre maga se daʼ see se de ɓe yaŋ ne se, se de jar ni se wo ɓuy.

¹⁵ De maga ndi wo tĩĩ wer sii wããren no kay, Nenterse ma bay ɗag raw cwaa ge le ti ɓaara doo ga á hay joŋ ti naa no lay.

¹⁶ Ti ɓi raw ɗig wããre maga Waŋkluu hay wãã ne go ga : Jaŋ hay joŋ batem jar diŋ de bii, ama ma ɓay à joŋ ge batem ɓay yaŋ diŋ de Nenterse ma bay ɗag no.

¹⁷ Wersen hayga Baa hã Nenterse ɓen we ne hara doo ga á hay hã ne naa, ti wur maga naa yãã wããre Waŋkluu Yeso Kris le no lay mono, ndi diŋ wose ga ndi kãã ma dig Baa ne?

¹⁸ De maga á laa wo wããre sen, jiili ɓaara raw woo ge, á raw wo togoɗ Baa, kal wo ga : Kidolgi Baa hã faage ɓoɗ ge jag we ne jar maga bay wo jar Jwif wa ga á mo fer wo go tenen wurpo lay.

Tayge jar ma wer Kris ma Antiyos wo

¹⁹ Jar maga dus wo go doo re bon maga leʼ ti re Etiyẽn, raw wo wo ge go Fenisi, ti kaali ma Sipre, wo wo go Antiyos, ama á laa wo day ge sii wããre Kris ne jar Greg wo ga, sii wo diŋ ne jar Jwif wo taw taw.

²⁰ Jar po wo yoo ɓaara ni, wo diŋ jar Sipre wo de jar Siren, á wo wo a ge Antiyos mokay, á raw wo sii Wããre ma de Cõõre maga wãã ti Waŋkluu Yeso ne jar Greg wo.

²¹ Nenterse Waŋkluu raw kay rage ti joŋre se no. Jar debaŋ raw wo hã ɓil ɓaara ne Waŋkluu, kol wo go wer ɓe.

²² Wããre ɓaara raw woge go daʼ Tayge jar ma wer Kris ma Jerusalem wo, á raw wo ɓoʼ Barnabas wo Antiyos.

²³ Á wo day ge ni mokay, á raw koge ga Baa de woo rage, ɓil ɓe raw joŋge go fehe debaŋ, á raw coɓ nen ɓaara ga á mo ɗaw wo see ɓaara wer Waŋkluu de egre.

²⁴ Barnabas hay diŋ je ma de ele, de baa ɓil go de Nenterse ma bay ɗage, de hã ɓil ɓe go ne Kris lay, jar ngaɓa debaŋ raw wo hã ɓil ɓaara go ne Waŋkluu.

²⁵ Barnabas kal rawge Tarse kiɗ Sol.

²⁶ Á wo daʼ ge ɓe, raw baa ge ɓe le, a de ɓe Antiyos. Wersen á raw wo lagge yoo Tayge jar ma wer Kris wo ni kiŋgi hala, had wo jar debaŋ. Le diŋ de wur sen le Antiyos, ga á raw tĩĩ wer kaŋ ɗúu jar ma ti jag Baa wo ga Kretiyẽ, jar Kris wo mono.

²⁷ Le ti wur sen ni, jar ndar nen wããre Baa go po wo le Jerusalem raw wo age Antiyos.

²⁸ Ma po boŋ yoo ɓaara ɗúu ɓe ga Agabus, Nenterse ma bay ɗag raw kal re ɓen ne hẽn jage, á raw ga koŋne leʼ yaŋ go ti sir krub ɓuy. (Koŋne sen raw leʼ ge nen kiŋgi maga Klod wur sen waŋ mono.)

²⁹ Jar ma wer Yeson wo ɓuy raw wo tay jag ɓaara ga wosela ɓuy yoo saara mo hã mopo wo kay hẽẽre saara ma Juden wo, doo ga egre je sen kãã nin no.

³⁰ Á joŋ wo doosen, raw wo hã fẽẽren wo ne jar kluurin wo de Barnabas wo de Sol doo.