JOŊRE 10 - Tupuri Bible

Piyer wo ni Korney

¹ Jobo yaŋ Sesare, à ɗen ga Korney. Á diŋ je kluu maga soode jar Itali wo wer ɓe kis boŋ.

² Je sen see goŋ Baa ti faage ɓe bay ɗag de jar ni ɓe wo ɓuy, hoo sug ti Baa lay, kay jar Jwif ma de coocoo wo debaŋ lay, tos Baa tum tum lay.

³ Wo day ge de wur maga fǐiri ma de law wo go de kos a ge liŋ mokay, á raw lwaʼ ge, ko je peele Baa go pah deŋ, je peele Baa raw kalge le liŋ ni ɓe, raw ɗe ge ɓe ga : Korney.

⁴ Á raw ngrisgi ko je peele Baa no, hẽẽne raw joŋge ɓe debaŋ, á raw riŋ je peelen ga : Ndi mo joŋ maysela Waŋkluu? Je peelen raw riŋgi ɓe ga : Baa yãã tosge ɓon we, de kay ge maga ndo de kay jar coo wo, á raw ɗig ti ti ɓo.

⁵ Patala laa jar wo Jope, á mo ɗe wo bloo maga à ɗen ga Simoŋ, togoɗge ɓe ga Piyer le.

⁶ Á yaŋ de hayle ni je joŋ joŋre hõõge, à ɗen ga Simoŋ lay, tiŋ ɓe yaŋ jag maarog mbaŋ.

⁷ De maga je peele ma wãã wããre ne hẽn wo raw ge mokay, Korney raw ɗe ge le yoo jar joŋre ɓe wo ɓoge, raw ɗe soode maga de joŋ joŋre ɓen ne hẽn de el le boŋ lay, soode sen diŋ je ma goŋ Baa ti faage ɓe bay ɗag lay.

⁸ Á raw siɗ wããre se maga joŋ mokay ne hara ɓuy, blam sen á raw laa rage wo Jope.

⁹ Toŋ ɓe de maga á wo wo de seege ti faage ma woge Jopen ɗa, Piyer raw ɗii gi go ciŋ ti tiŋ tos Baa, de wur ɗegere.

¹⁰ Koŋne raw cee ge ɓe, sãy rege raw baage ɓe, de maga a de joŋ rege ne hẽn ɗa mokay, mopo raw mbuɗ nen ɓe,

¹¹ á raw ko ngel ma ciŋ bul le go, mopo raw sir gi le gesiŋ doo gudoŋ no, de saʼ cõõ naa ɓuy.

¹² Wer nàyre ma ɓi sir wo la ɓuy, de fẽẽre maga ɓaale ɓaara naa naa, de fẽẽre maga kir wo nigi kirgi, dweere wo ɓuy ɓil fen se no.

¹³ Gẽẽge po raw age le ciŋ wii gi ɓe ga : Ur go ciŋ Piyer, ngaɗ ra, re ra.

¹⁴ Ama Piyer raw wãã ge ga : joŋ noga Waŋkluu, werga ndi bay de re fen ma de ɗag de yeɗe doo kay wa ɗa.

¹⁵ Gẽẽge sen raw age le pa ga : Fen maga Baa wãã go ti ɓe ga á bay ɗag, kon de yeɗe wa so.

¹⁶ Ma de swaʼ ɓen wo le wãã ge mono, fen sen raw ferge ciŋ deparday tuu.

¹⁷ De maga Piyer go de ngel ge ti lwaʼge maga lwaʼ ne mokay, ko la werpiiri maga Korney laa ra le, wo de wiɗ tiŋ mani Simoŋ jag tiŋ la lag.

¹⁸ Á raw wo ɗe ɗúu kloŋ, raw wo wii gi ga : Mbe lam lag la diŋ tiŋ maga Simoŋ togoɗge ɓe ga Piyer mbe la ni mono?

¹⁹ Ti ngel maga Piyer de ɗig gi ti lwaʼge maga lwaʼ ne mokay, Nenterse ma bay ɗag raw wiigi ɓe ga : Werpiiri po wo swaʼ yaŋ wo kiɗ mo ge.

²⁰ Ur go ciŋ, see wer ɓaara bay faare, werga laa ra le diŋ ndi.

²¹ Piyer raw ɗii gi le go see ɓaara raw wii rage ga : Á diŋ ndi la, ndi diŋ je maga nday kiɗ ne mono. Re may a de ɓay la?

²² Á raw wo fer ge ne hẽn ga : Korney je ma de soode wer ɓe kis no, bloo ma de deele no, ga hoo sug ti Baa mono, maga ɗúu ɓe go de rage jag jar Jwif wo ɓuy no, je peele Baa riŋ ga á mo ɗe mo le liŋ ni ɓe, á mo laa wããre ma jag ɓo.

²³ Piyer raw laa rage tiŋma hã fẽẽre suuli ne hara. Toŋ ɓe, Piyer kal rawge wer ɓaara, hẽẽre ɓe jar Jope po, wo wo kaŋ ge ɓe lay.

²⁴ Pelnew ɓe, á raw wo day ge Sesare, wo wo daʼ Korney gor rage de kawre ɓe wo de bar ɓe maga se ɗe ra le mono.

²⁵ De maga Piyer wo de kal ge wo liŋ mokay, Korney raw caa pel ɓe le, kal laa kõyõgre gesiŋ, leʼ monɗra hẽn pel togoɗ ge ɓe.

²⁶ Piyer raw riŋgi ɓe ga : Ur go ciŋ, werga ndi de see ɓi ndi diŋ je tabay lay.

²⁷ Á wãã wããre go ne hẽn wãã, á raw kalge le tiŋma, wo daʼ jar de tayge ngaɓa debaŋ.

²⁸ Piyer raw wii rage ga : Nday yaŋ de koge ga faage bay de hãge ne je Jwif tayge de wer ma tigriŋ wo wa, noga kal liŋ ni ɓe se ɓe ga lay. Ama Baa wii me ga ndi mo ko jobo de ɗag noga de yeɗe wa hase.

²⁹ Wersen ndi a see ɓay, ndi ẽg ɗúu ɓay le ga, wersen ndi wii nday ga nday ɗe me le re mayla?

³⁰ Korney raw riŋgi ɓe ga : Naw joŋ go wara swaʼ doo wur ma patala no maʼa, ndi hay tos Baa tiŋ mani ɓi, de wur maga go ciŋ pur doo ga patalan no, ndi ko nen ɓi bloo po de õõbe ma depuy kaɗaŋ kaɗaŋ ti deŋ pel ɓi,

³¹ á raw ɗe mege ga : Korney, kal wii mege ga : Baa laa tosge ɓon we, Baa ɗig ti we ti hãge fẽẽre ɓo maga ndo hã ra ne jar mono.

³² Ɓoʼ jobo wo Jope ɗe Simoŋ maga à ɗen ga Piyer le ni ɓo, á yaŋ de hayle liŋ ni Simoŋ ma rãɗ hõõge no, tiŋ ɓe ti jeŋ maaroge.

³³ Wersen, ndo joŋ de el we lay, ndo a we lay, wersen wùr tay pel Baa lam kaʼ la ti se no, ga wùr mo laa wããre maga Waŋkluu hãn mo mo ɓuy no.

Piyer de sii wããre liŋ ni Korney

³⁴ Piyer raw bul jag go, raw wãã ge ga : Ndi ko we cwãy ga Baa bay car ɓil jar go sar sar wa.

³⁵ Ama wer jar ma honla honla ɓuy, maga yaŋ wo hoo sug ti ɓe, yaŋ wo ti ngel ɓe de deele mono, á yãã ra.

³⁶ Nday yaŋ de ko wããre ɓe maga á hay ɓoʼ wo ne jar Israyel wo, Wããre ma de Cõõre ma lag jar jam de Baa wer Yeso Kris maga diŋ Waŋkluu jar ɓuy mono.

³⁷ Nday yaŋ de ko re maga joŋ go ɓi sir ni jar Jwif wo mo ɓuy lay, tĩĩ wer le Galile, hãã go blam batem maga Jaŋ hay sii wããre ɓe go mono.

³⁸ Nday yaŋ de koge ga Baa hã Nenterse ɓe ma bay ɗagn go ne Yeso ma Nasared. Nday yaŋ de ko ge lay ga á hay raŋ sir we joŋ jar de el de ele, pẽɗ jar maga Manhúulí de saɗ rage go, werga Baa de ɗaw ge ɓe doo.

³⁹ Wùr diŋ jar siɗ wããre se maga á joŋ ra go ɓi sir jar Jwif wo de Jerusalem mo ɓuy no, á diŋ je maga á ii wo go de hag ge ciŋ ti koo ma ɓal jar mono.

⁴⁰ Baa fer bir gi ɓe go ciŋ wur síilí ma de swaʼa, raw hã faage ne hẽn ga á mo ndar nen se ɓe go ne jar ga á mo ko wo ne.

⁴¹ Bay diŋ ne jar ɓuy wa, ama diŋ ne jar maga Baa far ra go taŋgu pel bol ma sii wããre ɓen go mono, ne wùr jar maga wùr re de kããra, wùr jo de kããra blam kal ge ɓe go ciŋ tenen no.

⁴² Yeso raw wii wùr ga wùr mo sii Wããre ma de Cõõren go ne jare, wùr mo wãã go ti se ga se diŋ je maga Baa hay se ma cag re jar ma tenen de jar ma de húulín wo lay.

⁴³ Jar ndar nen wããre Baa go wo ɓuy hay wãã wo we ga wosela maga hã ɓil ɓe we ne hẽn mo ɓuy Baa men ɗig re ɓlagge ɓen go ne hẽn ti wer Yeso.

Jar dehãy daʼ wo Nenterse ma bay ɗag lay

⁴⁴ De maga Piyer de wãã wããre ne hara ɗa, Nenterse ma bay ɗag raw cwaa ge le ti jar maga wo de coʼ sug wããren mo ɓuy no.

⁴⁵ Jar ma wer Kris ma de caa ɓĩĩni maga a wo le wer Piyer raw wo ngel ge go ti Nenterse maga Baa hãn go ne jar maga bay wo jar Jwif wa mono.

⁴⁶ Werga á wãɗ wo jag maga Nenterse ma bay ɗag hã hara, ga jobo laan ti boŋ ga mono, togoɗ wo Baa lay. Piyer raw wãã ge ga :

⁴⁷ Jobo kãã yaŋ mbe ma dig batem go ne jar se maga daʼ wo Nenterse ma bay ɗag doo ga naa hay daʼ no lay mo yawla?

⁴⁸ Á raw riŋgi ga á mo joŋ batem ɓaara go de ɗege ɗúu Yeso Kris. Á raw wo kam ge ɓe ga á mo ig se saara naw rab ɗa.