JONAS 3 - Tupuri Bible

Jonas wo Ninife, jar Ninif ko wo ɓlagge ɓaara

¹ Manwur raw wãã wããre ne Jonas ma de ɓog pa ga :

² Ur go ciŋ, see ɓi leege Ninife, ɓi leege ma kluu no ni ndo fer wããre maga ndi siin ne ndo go ɓil ɓe ni.

³ Doosen Jonas raw urgi go ciŋ, raw rawge ɓi leege Ninif doo maga Manwur hay wiin nono, paga Ninif hay pel Baa mono diŋ ɓi leege ma kluu, nen caa ɓil go naw swaʼ jag seele.

⁴ Jonas raw tĩĩ wer seege ɓi leegen nen síilí boŋ. A hay go wããge jag ciŋ kloŋ ga : Naw gwaʼ doo naa, à ɓlag ge Ninif go!

⁵ Jar Ninif raw wo kaŋ ɗiggi ɓaara ti Baa, raw wo ʼwaa ɓay hẽẽge bii, raw wo lag tãy õõbe wo ti ɓaara, tĩĩ wer le ti jar kluuri wo hãã leʼ go ti weere kleere wo.

⁶ Wããre sen raw woge daʼ waŋ ma Ninif no. Se raw urgi, men pale waŋ ɓen go, kal naa õõbe ɓe ma kluun go, raw laa tãy õõbe ti ɓe, kal hayge go nen sããge.

⁷ Se raw ɓoʼ jobo ʼwaa ɓay ɓi leege ma Ninif ga : Mokay diŋ wããre maga kal wo go jag waŋ wo de jar kluuri ma ti ɓen wo no : Jar tabay wo de nàyre wo, deere wo de fǐiri mo gus wo mopo meʼ wa hase. A mo re wo hõõ wa lay, mo jo wo bii wa lay.

⁸ Jar tabay wo de nàyre mo lag wo tãy õõbe ti, mo wii wo Baa go jag ciŋ kloŋ de egre. Wosela ɓuy mo fer le, mo men seele ɓe ma de ɓlaggen wo go de hun maga se joŋn de doo ɓe wo go.

⁹ Wose ko we la, tiga jiili Baa woo yaŋ day se men sõõge ɓil ɓe ma kluu yaŋ go nen maga naa mo huu go wa gà la.

¹⁰ Baa raw koge ga á wo de joŋge doosen nono day saara go de men seele ɓaara ma de ɓlagge no. Doosen jiili Baa raw wooge ti ɓlagge maga se hay riŋ ga se joŋ ra de ɓe mono, se joŋ ra de ɓe gà so.