JERMI 51 - Tupuri Bible

Re maga caa ge Babilon mono

¹ Manwur wãã ga : Ko we ga ndi kaŋ ge leege ma ɓlag jar yaŋ ne Babilon ti, ne jar Leb-Kamay wo ti.

² Ndi kaŋ ge jar faʼge wo yaŋ ne Babilon ti day saara faʼn yaŋ wo go, men ge wo sirn yaŋ go ɓil koɗe werga á lwaʼ ge wo ne hẽn ti le go ti ngel ɓuy ti wur maga reen caan ge mono.

³ Daga à mo hoo ɓil toŋwaa go see je maga maŋ toŋwaa doo mono, see je maga kee see ɓe wer ngoŋ ɓen mono! Ko we decoo weere jõõre ɓen wo wa hase! Caa we wer soode ɓen wo go ɓuy.

⁴ Daga á mo sraʼ wo go gesiŋ de wããge see go nen húulí wo ti sir jar Kalden wo, wo go de kyuɓgi tiʼ tiʼ ti faage ma ɓi leege Babilon wo no!

⁵ Werga Israyel wo de Juda bay wo holge Baa ɓaaran wa, bay wo holge Manwuri Pantwayn, bà de maga sir ɓaaran mbe de re ti pel je ma bay ɗag ma Israyeln mo ɓuy no.

⁶ Ɗee we go, men we Babilon go day wosela ɓuy mo yãã see ɓe go. Daga à mo taw nday wo go bay jag wer debaycõõre ɓen ni wa! Werga á diŋ wur saʼge hee mani Manwur no, a de poɗge ɓe ti fen ɓe no!

⁷ Babilon hay ɓi coo doo Manwur doo mo ma ɓil kob boo biŋni maga hay taɗ jar ma ti tamsir wo go ɓuy nono, wer jar wo ɓuy hay jo wo yii ɓe no. Diŋ wersen so ga wer jar ɓuy mbar wo nen ti go mono.

⁸ Doo no kay tuu Babilon leʼ go gesiŋ, mbug go! Hrag we war ti ɓe, kiɗ we guur-koo le ma rug wããge ɓe no, tiga á pẽẽ yaŋ go layblaʼ no.

⁹ Wùr hay da ga wùr pẽẽ Babilon go, ama se pẽẽ go gà. Naa tobn go, wosela ɓuy yoo naa mo raw ɓil sir ɓe, werga re ma see ɓen raw wo go ciŋ hãã, á raw wo ciŋ hãã nen swaare wo.

¹⁰ Manwur go de naa nen keɗed naa no. A we le, naa wo wãɗge go ti joŋre mani Manwuri, Baa naan go ti Siyoŋ.

¹¹ Ndar we jag waan wo, bag we huln wo go de ɓaara! Manwur le de jãɗ nen waŋ ma ti sir Medi no, werga á go de ɗiggi ga se ɓlag Babilon go. Werga sen diŋ saʼge hee maga Manwur saʼ hee tiŋ ɓen mono.

¹² Maŋ we drapo ciŋ see kor ma ti Babilon wo! Hoo we soode wo le see kẽẽ ni! Lag we jar gor ngel wo! Laa we gǔu ne hẽne! Werga Manwur yaŋ de ɗig mopo ma joŋge, á go de bag jag fen maga á hay wããn go ga se joŋ Babilon de ɓe mono.

¹³ Ndo maga ndo de hayle ti jeŋ bii ma kluuri day de tay horog ciŋ debaŋ mono, ndo ndoʼ ti go so, wer koŋne ma ɓil ɓo no!

¹⁴ Manwur Pantway hay hãʼ go de see ɓe tuu ga : Cwãy, ndi baa ge ɓil ɓo yaŋ go de jar doo ga á wo diŋ tenten wo nono day saara ʼwad war yaŋ de fruygi ma fegge ti ɓo.

¹⁵ Manwur hay joŋ ngel ma gesiŋ de egre ɓe no, á hay ɓoʼ wer tamsir diŋ de koge ɓe no. Á hay joŋ ngel ma ciŋ diŋ de ti ngel ɓe no.

¹⁶ De maga á caa põõ mono, bii raw wo tayge go nen ngel ma ciŋ. Á tay swaare wo le ti jag sir tawge day ngel raw sagge ma ra baa. A ur leege le ti ngel maga a le de tay ti ni mono.

¹⁷ Je táabay ma honla ɓuy kol go je bay ti wer koge mani Manwur no, fodo ma de yorgen joŋ sõõre go ne je yorge ɓe no. Werga fẽẽre ɓe maga á yor ra bay wo diŋ Baa cwãy wa, ɓodge egre po bay le ɓil ɓaara meʼ wa hase.

¹⁸ Á wo diŋ ngel de koɗe, wo diŋ joŋre ma kaŋ sõõre ne ne jar ti. A yee ge wo nen go de maga à ur gi we le ti re ɓaara mono.

¹⁹ Baa maga diŋ nen mo mani Jakobn bay doo saara no wa, werga ʼwũy fẽẽre wo mo ɓuy nà diŋ se day Israyel wo diŋ ɓĩĩni jar ma ti nen ɓen wo. Ɗúu ɓe ga Manwur Pantway.

²⁰ Ndo hay doo ɓi doo big nono, doo fẽẽre durgi wo nono. Ndi hay ɓum wer jar wo de ɓo, ndi hay ɓlag sir waŋre wo go de ɓo.

²¹ Ndi hay ɓum piirin wo de je yaʼge ɓen wo de ɓo, ndi hay ɓum pus durgin wo de je ma de ɗiigi ti ɓen wo de ɓo.

²² Ndi hay ɓum je twarn wo de wãyn de ɓo, ndi hay ɓum je tããben wo de wekleen de ɓo. Ndi hay ɓum wel ma jõõn wo de maytiglin de ɓo.

²³ Ndi hay ɓum je koɗgen wo de horog ɓen wo de ɓo. Ndi hay ɓum je jeegen wo de bloore deere ɓen wo de ɓo. Ndi hay ɓum jar wãã wããre progn wo de jar car kiidan wo de ɓo.

²⁴ Ndi poɗ ge Babilon wo de jar ma ti sir Kalden wo ɓuy yaŋ go ti ɓlagge maga á hay joŋn wo see Siyoŋ yaŋ go nen ɓay poɗage. Kay diŋ jag Manwuri.

²⁵ Ndi ur we ti re ɓo so, ndo húulì ma taw jar no, ndo maga ndo hay ɓlag tamsir go ɓuy mono! Kay diŋ jag Manwuri. Ndi maŋ ge doo ɓi yaŋ ciŋ see ɓo, ndi srog ge ndo yaŋ le go ciŋ ti húulì wo day ndi kol ge ndo yaŋ go diŋ húulì ma yãã wùu kaʼa.

²⁶ À maŋ ge húulì ma ti cõõ tiŋ noga húulì ma ɓoʼ wer tiŋ po le go ni ɓo gà werga ndo joŋ ge go tum diŋ ngel ma nen coocoo. Kay diŋ jag Manwuri.

²⁷ Coʼ we drapo go ɓil sir no! ʼWad we cõõ wo yoo wer jar wo! Tay we wer jar wo le go sag sag ma durgi ɓe! Ɗe we sir waŋre ma Ararad, ma Mini wo de Askenas wo le ne hẽn ti! Kaŋ we jar horge soode wo ne hẽn ti! Yaʼ we piiri wo ne hẽn ti doo tenten maga horge wo ngoŋ ngoŋ go nono.

²⁸ Tay we wer jar wo le ne hẽn ti, diŋ waŋre ma ti sir Medin wo, jar wãã re progre ɓen wo, jar car kiida ɓen wo de jar sir maga á wãã wo re ɓaara mo ɓuy go sag sag ne hẽn ti ma durgi ɓe.

²⁹ Tamsir hay fĩɗi, hay daɗ de maga Manwur bag jag fen maga se hay ɗign see Babilon go mono. Á kol sir Babilon go diŋ ngel ma nen coocoo, bay jar ɓili.

³⁰ Doo soode ma Babilon woo wo go see durgi no, á lag wo mbaara ɓil kor ɓaaran ma de egren kiŋkiŋn lage. A yõõ wo ti go ti twar ɓaara no, kol wo go doo naare wo nono. À hee wùu go ne ngel lagge ma Babilonn wo, à hrag jag tiŋ ɓen wo go.

³¹ Je ɗee fer wo go caa pel je ɗee no, je soole fer wo go ne je soolen nen ma woge riŋ waŋ Babilon ga à yãã ɓi leege ɓen we go ɓuy,

³² ga à yãã ngel cegaɗgen wo we go, ga gloŋren wo go de yãã wùu day jar durgin wo go de baŋge doo hẽẽne ɓuy.

³³ Manwur Pantway, Baa ma Israyeln wãã ga : May ma Babilon doo yaage ma ti wur ɓumgi fẽẽre nono, gwaʼ meʼ koɗe, wur ma weege ɓe a go.

³⁴ Nebukadnesar waŋ Babilon lor ndi go, geɗeb nen ɓi go. Á hay kol me go diŋ cããge ma ɓil koɗe. A maŋ bii go me ti doo barkag nono. Á hay baa ɓil go de fen ɓi maga hay de woore mono, raw yee nen ɓi go.

³⁵ Daga hun maga Babilon joŋn see ɓi, see maysee ɓi mo fer ne hẽn ti! Wããn diŋ may ma de tiŋ Siyoŋ no. Daga cíi ɓi mo fer ne jar sir Kalde wo ti! Wããn diŋ Jerusalem.

³⁶ Diŋ wersen so Manwur wãã ga : Ko ga ndi maŋ ge re ɓon yaŋ doo, ndi saʼ ge hee ɓo yaŋ go! Ndi õg ge maarog ma Babilon yaŋ go, ndi hig gi kããge ɓe yaŋ le go.

³⁷ Babilon kol ge yaŋ go diŋ húulì ma de cor ɗugul ne kẽẽ ti, diŋ ngel rege wé wo, diŋ fen ngil jare, diŋ fen feg ti. Jar joŋ ge wo de tiŋ ɓil ɓe gà hase.

³⁸ Á rage wo yaŋ jag taʼ boŋ ɓuy doo weere mingir wo nono, car ge wo põõ yaŋ doo mingir ma jõõre wo nono.

³⁹ De maga see ɓaara baa ge wùu we so no, ndi ʼwũy gi rege ɓaaran wo yaŋ go day ndi taa ge ra yaŋ go maga ɓil ɓaara mo joŋ go fehe, mo laa wo naa go ma tum day mo pũy wo go wa so hase. Kay diŋ jag Manwuri.

⁴⁰ Ndi srog ge wer ɓaara yaŋ doo weere sããre wo, doo gamlaare wo de togloŋre wo ti ngel ngaɗ này nono.

⁴¹ Re may pa la! À yãã Sesag we go! À naa togoɗge we go ne jar ma ti tamsir wo ɓuy jage! Re may pa la! Babilon kol we go diŋ ngel ma nen coocoo yoo sir wo!

⁴² Maarog maŋ we go ne Babilon ti, kaŋngaw ɓe ma debaŋ debaŋn maŋ wo bii go ne hẽn ti.

⁴³ Ɓi leege ɓen kol wo go diŋ ngel ma poɗag poɗage. Á kol go diŋ sir kay, diŋ laale, diŋ sir maga jobo hay de tiŋ ni gà lay, je táabay po hee ni gà lay.

⁴⁴ Ndi ur gi yaŋ le ti re Bel wo de Babilone, ndi prud gi fen maga á hay kuɓ jag go ti ɓe yaŋ le go ne hẽn jage, day wer jar men ge wo woge ni ɓe yaŋ go. Kor ma ti Babilon draʼ leʼ go lay no!

⁴⁵ Nday jar ɓi no, laa we go, men we ne go. Wosela ɓuy mo daŋ go jag ɓe, wo go hãã doo bagge põõ ma de hãã mani Manwur no.

⁴⁶ Day la jiili ɓay caa go day hẽẽne ngarge jag re maga à laan ge ɓil sir ni joŋ ge nday. Werga, tagla mono, à laa ge ngarge jag yaŋ, deebo mono sen joŋ ge diŋ ngarge jag jar ma tigriŋ pa. Hãyhãy joŋ ge yaŋ go ɓil sir no, je wãã re jar po ur gi yaŋ dur je wãã re jar ma tigriŋ.

⁴⁷ Diŋ wersen so, wur yaŋ le age, ndi joŋ ge fodo ma de yorge ma Babilon wo yaŋ go de gùri. Sirn ɓuy joŋ ge yaŋ go nen sõõre, jar ɓen ɓuy laa ge wo yaŋ go gesiŋ de húulí ɓil ɓe ni.

⁴⁸ Ngel ma ciŋ wo de tamsir wo de fẽẽre ma ɓil ɓaaran wo ɓuy ʼwad ge wo war yaŋ ti Babilone, werga jar ɓlagge ɓen go a ge wo le ne hẽn ti nà le nen ɓaŋ gloŋhwede. Kay diŋ jag Manwuri.

⁴⁹ Jar Israyel ma de húulí no, Babilon go nen leʼge gesiŋ lay, werga Babilon hay taw jar go debaŋ ti tamsiri!

⁵⁰ Nday maga nday yãã go jag moslam mono, raw we, lag we wa so! Wo go hãã genla ɓuy ɗig we ti ti Manwur day daga ti ɓay mo hay de kaŋge ti Jerusalem!

⁵¹ Naa hay go nen sõõre de maga sug naa hay laɗ ɗargen mono naa hay yoŋ nen naa go doo sõõre de maga waare hay a wo le, laa wo ɓil ngel ma bay ɗag ma ɓil tiŋ mani Manwurn mono.

⁵² Diŋ wersen so, ko we ga wur yaŋ wo le a ge day ndi joŋ ge fodo ɓe ma de yorgen wo yaŋ go de gùri, day jar maga hay wo go de sealge daʼ ge wo see ɓaara yaŋ.

⁵³ De maga Babilon mo mbeɗ bà see ɓe wo go ciŋ daʼ swaare wo, noga mo gẽẽ bà kor ɓe ma de egre kiŋkiŋn wo go ciŋ bay maga jobo ɗii ra wa yaw, jar ɓlagge ɓen go a ge wo yaŋ durgi ɓe ti jag ɓi. Kay diŋ jag Manwuri.

⁵⁴ À le de ngar jag le Babilone, diŋ ngarge jag ma kluu ti sir mani jar Kalden wo.

⁵⁵ Werga Manwur go de ɓlag Babilone, a go de ham jag gẽẽge ma kloŋ go gesiŋ. Kaŋngaw ɓen sam wo doo bii ma kluuri maga sam wo le gig gig nono.

⁵⁶ Kidolgi je ɓlag jarn le de age durgi ɓe, le de age dur Babilone. À hoo blumri ɓen wo we go, à hrag toŋwaa ɓaaran wo go werga Manwur diŋ Baa maga de ko poɗ jare, á fer nen mo ma wosela ɓuy ne hẽne.

⁵⁷ Ndi taa ge minisdir ɓen wo yaŋ go de jar ko re ɓen wo, Ndi taa ge jar wãã re progren wo de jar car kiida ɓen wo de blumri ɓen wo yaŋ go. A laa ge wo naa yaŋ go ma tum day saara pũy gi go gà so hase. Kay diŋ jag waŋ maga à ɗen gà Manwur Pantway mono.

⁵⁸ Manwur Pantway wãã ga : À mbug gi kor ma de diy ma ti Babilon wo yaŋ go ɓuy, fuɗgi ɓaara gwaʼ gà. À roɗ ge jag tiŋ ɓe ma de gẽẽren wo yaŋ go de wùu. Doo kay nono joŋre maga wer jar joŋn ge wo kol ge yaŋ diŋ ngel de koɗe, wer jar gay ge wo see ɓaara de koɗ koɗ ne wùu jage.

⁵⁹ La diŋ jag maga Jermi je ndar nen wããre Baa fern ne Seraya je ni Neriya, je ni Mahseya de maga á de rawge Babilon wer Sedesiyas waŋ Juda, nen kiŋgi ma de naa maga Sedesiyas de ma joŋ waŋ mono. Seraya hay nà diŋ waŋ jar ko ngar waŋn wo.

⁶⁰ Jermi raw yer re maga hay nen caa Babilon go ɓil kefder ɓuy, diŋ wããre se maga wo de yerge ti Babilon mo ɓuy no.

⁶¹ Jermi riŋ Seraya ga : De maga ndo wo ge we go Babilon no, ni ndo joŋ ge nen kee wããre sen wo mo ɓuy go.

⁶² Ndo wãã ge ga : Manwuri, ndo de see ɓo tuu ndo hay wãã go ti ngel se taʼn la ga daga à mo yee nen ɓe go day je táabay noga này mo hay ɓil ɓe wa, á mo kol go diŋ ngel ma nen coocoo wo sagsage.

⁶³ Day de maga ndo ɓoʼ jag kee kefder sen la we go no, ni ndo saʼ húulì wer ɓe day ni ndo ɓoʼn go nen maarog Efrade.

⁶⁴ Blam ɓe ni ndo wãã ge ga : Bii maŋ ge yaŋ go ne Babilon ti doo kay no so no, á yãã ge go jag re maga ndi a ge de ɓe ne hẽn ti gà á gay ge ra go. Mono diŋ tawge ti wããre mani Jermin wo so.