JERMI 50 - Tupuri Bible

Wããre ti Babilone

¹ Wããre maga Manwur wããn ti Babilone, ti sir mani jar Kalden wo nen doo Jermi je ndar nen wããre Baan mono.

² Siin we wo yoo wer jar wo, wãɗn sug jare, maŋ drapon ciŋ! Wãɗn we sug jare, yoŋ we jag ti ɓe wa! Wãɗ we ga : À yãã Babilon we go! Bel go de wùu ti de sõõre, Merodag go de daŋ jiili! Fodo sõõre ɓen wo go de wuɗ ti de sõõre! Sõõre ɓen wo go de daŋ jiili!

³ Werga wer jar po yaŋ wo le de hooge nen ɓaŋ gloŋhwede ma age durgi ɓe. Á kol ge wo sir ɓen go nen coocoo, jar joŋ ge wo de tiŋ ni gà so hase, jar téebeere de nàyre wel ge wo go.

⁴ Ti naw sen wo ni mono, jar Israyel wo de jar Juda fer ge wo yaŋ le jag kããra ɓuy, see ge wo yaŋ le de roo jage day kiɗ gi wo Manwuri, Baa ɓaaran yaŋ. Kay diŋ jag Manwuri.

⁵ A wii gi wo wer Siyoŋ yaŋ day kaŋ ge wo ti ɓaara yaŋ wo ti faage maga leʼ wo ni mono. A wãã ge wo yaŋ ne kããra ga : A we le, naa saʼ we see naa see Manwur de tayge jag ma tum maga yõõ ge ti jar go gà so mono!

⁶ Jar mani ɓin hay wo diŋ sããre ma de yeɗge wo, jar koɗ ragen hay yeɗ wo ra go, hay wo yeɗ nen ɓaara wo go yoo húulì wo. Á hay wo woge ti húulì ma la, ti húulì ma la, yõõ wo ti go ti kaw ɓaara no.

⁷ Jar maga hay wo yiŋ gi de ɓaara re wo mbaara ra go koɗe. Jar hee ɓaaran hay wo wãɗge ga : Re ɓaara bay ti wùr wa werga a joŋ wo ɓlagge see Manwuri, je maga hay kay ti ɓaara mono, see Manwur maga pããre ɓaara hay wo gorge diŋ doo ɓe mono.

⁸ Laa we go de ɗeere, men we Babilon go, men we sir jar Kalden wo go! Kol we pel kããra doo togloŋre wo pel fǐiri wo nono!

⁹ Werga ndi de see ɓi tuu ndi maŋ ge põõ ma kluu yaŋ le nen ɓaŋ gloŋhwede ne Babilon ti. Wer jar sen kaŋ ge wo yaŋ ne hẽn ti day yããn ge wo yaŋ go. Waa ma doo ɓaaran wo doo ma doo je maga go de hadge de durgi ga fer le de koɗ gà nono.

¹⁰ À hã ge sir Kalde go ma frumgi, jar maga frumn gi wo go wuɗ gi wo yaŋ go. Kay diŋ jag Manwuri.

¹¹ Joŋ mbay fruygi, ɓil ɓay mo hay mbe go feh fehe, nday maga nday ɓoʼ coo tway ɓin go mono! Yoor mbay ciŋ doo day tigli ma de baa pãã nono, bũy mbay hãy doo piiri ma de egre wo nono!

¹² Man ɓay go nen sõõre ma kluu, wãy maga hay biŋ nday go de wùu ti de sõõre. Ko we so ga sir ɓayn kol ge go diŋ blam kããra, go diŋ puuli, go diŋ sir kay, diŋ laale.

¹³ Wer maga ɓil Manwur sõõ mono, jobo hay ge de tiŋ ni gà so, á joŋ ge go tiʼ ɓuy tuu diŋ sir ma nen coocoo. Wosela ɓuy maga hee ge ti jeŋ Babilon mono, ngil gi yaŋ day ʼwad ge flew yaŋ ti re maga caan wo mo ɓuy no.

¹⁴ Cir we go ma dur Babilone, yiŋ we ti ɓe go cwẽẽ ɓuy nday jar ma de waa bay no! Jwagn we de waa, lab we waa ɓay wo go see toŋ ɓen wa werga á joŋ ɓlagge see Manwuri.

¹⁵ ʼWad we war jaw ne hẽn ti go ti ngel ɓuy! Á hoo doo we go ciŋ, tiŋ ɓen leɗ wo we go gesiŋ, kor ma ti ɓen mbug wo we go werga a diŋ wur saʼge hee mani Manwur no. Saʼ we hee see ɓay go de ɓe! Joŋn we doo maga á hay joŋ jar no lay!

¹⁶ Yee we nen je ma joʼgen wo go de je maga maŋ saŋ doo ti wur weege wo go ɓi leege Babilone. Daga wosela ɓuy mo fer se kawre ɓe wo, wosela ɓuy mo daŋ de ɗee ɓil sir ɓe doo moslam mani je joŋ bon jar no!

¹⁷ Israyel diŋ mansam maga yee go day mingir yee wo nen ɓe go. Hay lorn go taŋgu nà diŋ waŋ Asiri day je ma blam taw maga hay sor hm ɓe go nà diŋ Nebukadnesar waŋ Babilone.

¹⁸ Diŋ wersen so Manwur Pantway, Baa ma Israyeln wãã doo kay nono ga : Ko we ga ndi joŋ ge waŋ Babilon wo de sir ɓen yaŋ doo ga ndi hay joŋ waŋ Asiri no lay no.

¹⁹ Ndi fer ge Israyel yaŋ wo le ɓi glaŋ ɓaara no. A daʼ ge wo ngel koɗge ɓaaran wo yaŋ wo ti húulì Karmel wo de sir Basan, day saara wuɗ gi yaŋ go ti húulì ma Efrayim wo de sir Galaad ɓuy.

²⁰ Ti wur sen wo mono, à kiɗ gi debaycõõre Israyeln yaŋ, se joŋ ge gà so hase. À kiɗ gi ɓlagge Juda yaŋ, à daʼn ge gà hase, werga ndi fug gi ɓil ge go ne jar maga gwaʼ wo ga ndi men ge ra ti. Kay diŋ jag Manwuri.

²¹ Uri, wo dur sir Meratayim wo de jar Pokod wo. Id ra go, caa wer ɓaara go! Joŋ fen maga ndi wããn ne ndo mo ɓuy. Kay diŋ jag Manwuri.

²² War jaw go de leʼge ɓil sir no, re ma kluu de caage ɓe.

²³ Re may pa! A mbugn we go, á hragn we go so, big se maga hay mbar jar ma ti tamsir wo ɓuy ti mono! Re may pa! Babilon kol we go diŋ ngel ma nen coocoo yoo wer jar wo ra!

²⁴ Ndi hay ɓoʼ rew ne ndo Babilone, day ndo raw bagge go ti ɓe bay daʼ wer ne hẽne. De maga á daʼ mo ni no kay tuu à raw baa ndo tuu wer maga ndo hay dur nà diŋ de Manwuri.

²⁵ Manwur raw ko nen ɓil ngel ɓen wo, raw hoo fẽẽre durgi sõõge ɓil ɓen wo. Sen nà diŋ joŋre Waŋkluu, Manwur Pantway wo ɓil sir jar Kalden wo.

²⁶ Lwaʼ we le ne hẽn ti le ti jag sir tawge hãã. Buŋ we jag boole ɓen wo go. Cor we ɗugul ɓe go ti kẽẽ doo coore ma de tayge nono day ni nday caa wer ɓe go nen maga jobo mo gwaʼ ni boŋ wa so hase.

²⁷ Id we bloore deere ɓen wo go, wo we go de ɓaara ti ngel ngaɗ này! Á taw wo we go jag ɓaara werga wur ɓaara go de age, diŋ wur ma hã pũũri ne hara no.

²⁸ Jar maga ɗee wo le go, yor wo le go Babilon wo de ʼwad ware, wo de sii wããre ne jar ti saʼge hee mani Manwuri, Baa naan wo ciŋ ti húulì Siyoŋ, ti saʼge hee maga á saʼ ge hee tiŋ ɓen mono!

²⁹ Hoo we jar jwag waa wo le ne Babilon ti de jar maga ko wo ɗaw toŋwaa mo ɓuy no! Cir we ti ɓe go nen maga jobo mo daŋ go wa hase. Poɗn we go ti joŋre ɓen wo day joŋn we doo maga á hay joŋ jar no taw taw no! Werga á hay far ti see ɓe ciŋ pel Manwuri, pel je ma bay ɗag ma Israyel no.

³⁰ Diŋ wersen so weere jõõre ɓen sraɗ ge wo yaŋ go gesiŋ de húulí ti ngel tay tin wo, à ham ge jag jar durgi ɓen wo yaŋ go ɓuy ti wur seno. Kay diŋ jag Manwuri.

³¹ Ko ga ndi taw mo go, ndo wãy ma far ti see ɓo ciŋ no! Kay diŋ jag Waŋkluu, Manwur Pantway no. Werga naw ɓo go de age, diŋ wur ma hã pũũri ne ndo no.

³² Wãy ma far ti see ɓe ciŋn ɓaʼ ge yaŋ, leʼ ge go gesiŋ day je maŋge ɓe go ciŋ joŋ ge boŋ gà hase. Ndi hee ge wùu yaŋ go ne ɓi leege ɓen wo, day se roɗ ge sir ma ti ɓen wo yaŋ go ɓuy.

³³ Manwur Pantway wãã ga : À de ma joŋ bon jar Israyel wo de jar Juda wo ɓuy. Jar maga hay hoo wo ra wo go ti daŋgay caa wo waŋ ti ɓaara, bay wo men doo go see ɓaara.

³⁴ Ama je yãã ragen de kããge, á diŋ je maga a ɗen ga Manwur Pantway mono. Á oo ge yaŋ ti ɓaara ma hã jam ne sir no, ma hã lawge ne jar Babilon wo.

³⁵ Moslam de kaŋge ne jar Kalde wo ti, ne jar Babilon wo ti, ne minsdir ɓen wo de jar ko re ɓen wo ti! Kay diŋ jag Manwuri.

³⁶ Moslam de kaŋge ne jar geteʼ ma jaʼgen wo ti! Daga á mo loɗ wo go! Moslam de kaŋge ne blumrin wo ti! Daga á mo caa wo hẽẽne go!

³⁷ Moslam de kaŋge ne piiri wo de pus durgi ɓen wo ti, ne blam kããra jar maga wo ɓil Babilon ti! Daga á mo kol wo naare go! Moslam go de kaŋge ne horog ɓe ma de tayge ciŋn wo ti! Daga à mo frum ra go!

³⁸ Kay go de kaŋge ne biin ɓen wo ti! Daga á mo õg wo go! Werga á diŋ sir fodo sõõre wo day fẽẽre ma de ceɗge maga à goŋ ra ɓlag wo ti ɓe go.

³⁹ Diŋ wersen jar ma ti puuli wo de nàyre ma yoofii koln ge wo yaŋ go diŋ tiŋ ɓaara. Gii ʼwũy gi wo tiŋ ɓaara wo yaŋ go ni, day jobo laa ge tiŋ ni gà so. De kiŋgi de kiŋgi jobo joŋ ge tiŋ ni gà so hase.

⁴⁰ Doo Sodome, Gomor wo de ɓi leege ma ti ɓaaran wo ɓuy maga Manwur frum ra go nono, jobo laa ge tiŋ ni gà so hase, je táabay po hay ge de tiŋ ni gà lay.

⁴¹ Ko we, jar po wo le de age nen ɓaŋ gloŋhwede, diŋ wer jar po ma ngaɓa wo de waŋre ma de egre wo. A pũy wo kããra le hãã ti jag sir tawge.

⁴² Á ndar wo waa wo de manjaw ti jare. Á wo de huni, bay wo ko decoo jobo wa. Gẽẽge ɓaara sam doo maarog nono. Á wo de ɗidgi ti piiri wo, wo go de cirgi doo soode wo nono ma dur ndo, ndo may ma Babilon no!

⁴³ Waŋ Babilon laa wããre sen mokay doo ɓe hrag wo ne go, hẽẽne baŋ see ɓe go. Ɓil ɓe leʼn cege doo wãy maga de biŋgi nono.

⁴⁴ Ko we, je ɓlag Babilon le mo caw doo mingir maga cegaɗ Jurdẽẽ ma jag glumglumn le go ma woge kalge ɓi kaw horog ma de maʼ laɓ tin wo nono. Ndi naa ge ra doo, ndi kaŋ ge wer ɓaara ɗeege day ndi kaŋ ge je ma ti nen ɓin ge ne hẽn ti wãã re ɓe. Wose yaŋ doo ndi no la? Wose kaŋ ge nen ɓi yaŋ ti ɓin la? Je koɗge ma hon oo ge yaŋ deŋ pel ɓi la?

⁴⁵ Diŋ wersen so laa we fen maga Manwur bag jag ɓe le go see Babilon mono, laa we fen maga á ɗign le go ma joŋ sir jar Kalden wo de ɓe mono! Cwãy à kog ge ra yaŋ wer doo weere fǐiri wo nono, à kol ge kaw ɓaaran yaŋ go diŋ ngel ma poɗag poɗage.

⁴⁶ De maga à laa so ga à yãã Babilon go mono, tamsir fĩɗ go ɓuy, à duʼ ngarge jag wo go ti wer jar wo ɓuy.