JERMI 49 - Tupuri Bible

Wããre ti jar Amoŋ wo

¹ Ti jar Amoŋ wo. Manwur wãã ga : Israyel bay de biŋgi wa yawla? Je ma hoo tabul ɓe hay bay wa yawla? Wer mayse ga waŋ jar Amoŋ yãã sir Gad go day jar sir ɓen kol wo go de tiŋ ɓi leege ɓen wo la?

² Diŋ wersen so, naw yaŋ wo le age ndi maŋ ge põõ yaŋ le ne Rabad meene sir mani jar Amoŋ wo ti. Á kol ge yaŋ go diŋ ngel ma nen coocoo day à roɗ ge sir maga wo nen doo ɓe wo yaŋ go de wùu. Kay diŋ jag Manwuri. Mo so no Israyel kol yaŋ ge go wãã wããre jar maga hay ɓoʼ wo coo ɓe go mono. Wããn diŋ Manwuri.

³ Hesbon, hrag ware, werga à ɓlag Ay we go! ʼWad we ware, nday mayre ma Raba no. Mblaaga ɓay maga nday saɗ ra sag mo hay wo diŋ bugu. Ra we húulí, wo we de ɗeere ti faale kor ɓaŋla ɓaŋla! Sen nà werga waŋ ɓaaran de rawge ti daŋgay de jar siɗ jag ɓen wo minisdir ɓen wo ɓuy mono.

⁴ Wer mayse ga ndo keɗ see ɓo wer log ɓon wo la? Por ɓon go de tosge so, ndo may ma ti graŋ maga hay de kaŋ ɗiggi ɓo ti horog ɓo maga ndo de tay rage, ndo maga ndo hay wãɗge ga wose ur gi baa yaŋ le dur moge la mono!

⁵ Ko ga ndi day kaŋ daɗge see ne ndo ti. Kay diŋ jag Waŋkluu, Manwur Pantway no. A a ge le go ti ngel ɓuy mo ti. Nday yeɗ ge nen go, wosela ɓuy go jag see boŋ day je ma tay ti jar maga wel wo go joŋ ge gà hase.

⁶ Blam sen mono, ndi fer ge jar Amoŋ maga wo wo go de hooge ti daŋgay wo yaŋ le. Kay diŋ jag Manwuri.

Wããre ti sir Edom

⁷ Ti Edom, Manwur Pantwayn wãã ga : Koge re bay wo ɓi leege Teman wa so yawla? Bagge yaŋ yee nen jar sir ɓen wo go yawla? Koge re ɓaaran glub go yawla?

⁸ Daŋ we de ɗeere, mbuɗ we faale, yoŋ we wo go ti hlug húulì wo day lag we wo go de tiŋ ni, nday jar Dedan no! Werga ndi day age de re ne sir Esaw ti, diŋ wur ma joŋ ge ɓe go de gùr no.

⁹ Hayga jar wer fẽẽre a wo we ni ɓo no, á men ge wo fen ma fleg blam ni gà. Hayga jar freŋ a wo we ni ɓo de suŋ no, á hoo ge wo fẽẽre doo maga ɓil ɓaara da nono.

¹⁰ Werga ndi, ndi men ge Esaw ge go glog koɗe, ndi daʼ ge wer yaŋ go ne ngel yoŋre ɓen wo ɓuy day se yoŋ ge see ɓe gà so hase. Jar ni ɓe wo, hẽẽre ɓe wo de jar leege ɓen wo ɓuy, à ɓlag ge ra go ɓuy day Esaw joŋ ge gà so hase.

¹¹ Tob weere holge ɓon wo go, ni ndi gẽẽ ge ra yaŋ go Daga naare dewur ɓon mo kaŋ wo ɗiggi go diŋ ti ɓi!

¹² Werga Manwur wãã ga : Koɗa, jar maga kiida hay bay de baa rage maga á mo jo wo ɓil kobn wa, kol wo go ma joge ɓe day ndo ɓon à caa mo go faale so ge! Ndo gwaʼ ge go faale gà ndo jon ge ɓegdeʼe.

¹³ Werga, ndi hãʼ go de see ɓi tuu, Bosra kol ge yaŋ go diŋ ngel ma poɗag poɗage, diŋ fen mbuɗ fuy, diŋ tabuli, diŋ fen faɗge day ɓi leege ma ti ɓen kol ge wo go diŋ tabul wo sagsage. Kay diŋ jag Manwuri.

¹⁴ Ndi hay laa wããre po le jag Manwuri day à hay ɓoʼ jobo wo riŋ wer jar wo ga : Tay we le, a we le durgi ɓe! Hoo we go ciŋ ma woge durgi!

¹⁵ Ko so ga ndi kol ge ndo go klee yoo wer jar wo, diŋ wer ma de ɓoʼ foo yoo wer jar téebeere wo.

¹⁶ Keɗge see ɓo no, farge ti see ɓo ciŋn hoɓ wo ndo go, ndo maga ngel hayle ɓon wo go ti rum húulì wo day ndo go de yãã tipẽẽge ti ngel ma de farge ciŋ wo mono. Ndo mo kaŋ bà tiŋ ɓon le go ciŋ hãã doo gebeg no yaw, ndi srog ge mbi ndo ge le go gesiŋ. Kay diŋ jag Manwuri.

¹⁷ Sir Esaw kol ge yaŋ go nen coocoo. Jar maga her ge wo ti jeŋ ɓe mo ɓuy ngil gi wo yaŋ day ʼwad ge wo flew yaŋ ti re maga daʼn ge wo mo ɓuy no.

¹⁸ Doo Sodom, Gomor wo de ɓi leege ma ti jeŋ ɓaara maga à hay ɓlag ra go ɓuy nono, jobo laa ge tiŋ ti sir Edom gà lay, je táabay po a ge hayge ni gà lay. Wããn diŋ Manwuri.

¹⁹ Ko we, je ɓlag Edom le de a ge doo mingir nono, á cegaɗ Jurdẽẽ maga jag ɓe glumglum le go ma woge kalge ɓil kaw horog ma de maʼ laɓ go ti no. Ndi naa ge Edom doo, ndi kaŋ ge wer ɓe ɗeege day ndi kaŋ ge je ma ti nen ɓin ne hẽn ti wãã re ɓe. Wose yaŋ doo ndi no la? Wose kaŋ nen ɓi yaŋ ti ɓin la? Je koɗge ma hon oo ge yaŋ deŋ pel ɓi la?

²⁰ Diŋ wersen laa we fen maga Manwur bag jag ɓe le go see Edom mono, laa we fen maga á ɗign le go ma joŋ jar Teman wo de ɓe mo so! Cwãy, à kog ge ra yaŋ wer doo weere fǐiri wo nono, à kol ge kaw ɓaaran yaŋ go diŋ ngel ma poɗag poɗage.

²¹ Laage ɓaara maga á laa wo go gesiŋ daɗ tamsir go ɓuy, á diŋ ngarge jag maga à laan wo go hãã jag maarog ma de sẽẽ no.

²² Je hee Esawn le de urgi, á pud le doo gebeg nono, blar graŋ ɓe go ne Bosra ti. Jiili blumri ma ti sir Edom joŋ ge wo go wur sen doo jiili wãy maga ɓil ɓe de leʼge ɓe ma biŋgi nono.

Wããre ti Damase

²³ Ti Damase. Hamad wo de Arpad wo go nen sõõre werga á hay laa wo wããre ma bay ngare, see ɓaara raw go daŋ rage. Á diŋ degurleege maga naa nen maarog day bay ham jag gesiŋ wa.

²⁴ Damas gay we go, á go de mbuɗ faale de ɗee. Daɗge see go de bagge ɓe doo, hẽẽne go de caage ɓe, ɓil ɓe de leʼge ɓe doo wãy maga de biŋgi nono.

²⁵ Mayse pala, à tobn we go, ɓi leege se maga à keen mono, ɓi leege ma joŋ ɓil ɓi go feh no!

²⁶ Kidolgi weere jõõre ɓen laa ge wo yaŋ go sululul gesiŋ ti ngel tayge tin wo. Werpiiri ɓe ma durgin wo ɓuy ham ge wo jag go gesiŋ ti wur seno. Kay diŋ jag Manwur Pantway no.

²⁷ Ndi hee ge wùu go ne kor ma ti Damas no day se roɗ ge tiŋ ma de woore mani Ben-Hadadn wo yaŋ go.

Wããre ti Kedare

²⁸ Ti Kedar wo de sir waŋre ma Hatsor maga Nebukadnesar waŋ Babilon ɓum ra mono. Manwur wãã ga : Hoo we go ciŋ, wo we dur Kedare, day wo we hã pũũri ne jar ma nen wur botoŋ wo!

²⁹ Daga à mo horge tiŋ ɓaaran wo go de horogre ɓaaran wo, à mo frum tiŋ ɓaaran wo go de fẽẽre ɓaaran wo de yoŋyoŋ ɓaaran wo day à mo ʼwad war ne hara ti ga : Hẽẽnen go ti ngel ɓuy!

³⁰ Daŋ we, ɗee we deparday, ter we tuu ma yoŋge wo, nday jar Hatsor no! Kay diŋ jag Manwuri. Werga Nebukadnesar, waŋ Babilon le go de bag jag wããre ti ɓay, a le go de ɗig fen maga se a ge joŋ nday de ɓe mono.

³¹ Hoo we go ciŋ, wo we dur wer jar ma de yõõ tin wo, jar maga wo go de lagge flãy mono. Jag tiŋ noga manyãã bay jag ɓaara wa, a mbaara go taŋraŋ taʼ tuu.

³² À frum gi yoŋyoŋ ɓaaran wo ge go, horogre ɓaara ma ngaɓan joŋ ge wo go diŋ fen ɓesge blam jaw. Ndi faʼ ge ra yaŋ wo go wer leege ma honla ɓuy, jar se maga har wo jeŋ piŋ ɓaara go mono, day ndi cir gi ti ɓaara yaŋ go de re ma caa ragen ɓuy lay. Kay diŋ jag Manwuri.

³³ Hatsor kol ge yaŋ go diŋ ngel rege wé wo, go diŋ ngel coocoo ma tum. Jobo laa ge tiŋ ni gà lay, je táabay po a ge hayge ni gà lay.

Wããre ti Elam

³⁴ Mokay diŋ wããre maga Manwur wããn ne Jermi je ndar nen wããre Baa gon ti Elam ti tĩĩgi wer waŋ mani Sedesiyas waŋ Judan mono :

³⁵ Manwur Pantway wãã ga : Ko we ga ndi haw toŋwaa mani Elam we go, fen kaŋ wer ɓe se jaʼge no.

³⁶ Ndi kaŋ ge leege yaŋ wo ne Elam ti naa, diŋ leege maga a wo le ti cõõ sirn wo naa ɓuy. Ndi faʼ ge ra yaŋ wo go wer leege sen wo day wer jar po joŋ ge wo taʼ ga jar Elam dus wo wo go ni gà joŋ gà.

³⁷ Ndi daɗ ge jar Elam wo yaŋ pel jar hee ɓaaran wo, pel jar maga bay wo de sãy ɓaara ti wa mono. Ndi a ge yaŋ de re ne hara ti, diŋ bagge põõ ɓi ma de hãã no. Kay diŋ jag Manwuri. Ndi ɓoʼ ge moslam yaŋ wo ne hara ti hãã ndi wo go taw rage.

³⁸ Ndi kaŋ ge paale waŋ ɓin yaŋ go ɓil Elam, day ndi taw ge waŋ ɓen wo de minisdir ɓen wo yaŋ go. Kay diŋ jag Manwuri.

³⁹ Ane, ti tawge wurn wo mono, ndi fer ge yaŋ le de jar Elam maga wo wo ti daŋgay mono. Kay diŋ jag Manwuri.