JERMI 48 - Tupuri Bible

Wããre ti sir Mohabe

¹ Manwur Pantway, Baa ma Israyeln wãã ti Mohab ga : Re de caa húulì Nebo werga à go de ɓlagge ɓe! Kiryatayim go nen sõõre, à go de yããge ɓe! Misgab go nen sõõre, hẽẽne go de caa ge ɓe!

² Togoɗge Mohab bay wa so hase. À ɗig le Hesbon nà diŋ re maga à kaŋ ne hẽn ti mono gana : Naa see, naa caa we wer ɓe go yoo wer jar wo! Ndo Madmene, à ham ge jag ɓo yaŋ go gesiŋ lay, moslam wo de maŋ blam ɓo.

³ À le de laa war le Horonayim ga : À go de ɓlag fẽẽre no, à mbug ra we go ɓuy!

⁴ À mbug Mohab we go! Weere ɓen wo ti roo deŋ!

⁵ À ɗii wo ti ngel ma de maŋge ciŋ ma Luhidn nà de roo jage. À ʼwad ware, day à hrag see go ti ngel maga cwaa wo Horonayim nà doo jar hee ma kaŋ re ne jar tin wo.

⁶ Ɗee we go, yaʼ we see ɓay go, hay we doo Arower ma ɓil puulin mono!

⁷ Wer maga ndo hay kaŋ ɗiggi ɓo diŋ ti joŋre ma doo ɓon wo de horog ɓo maga ndo de lag rage ciŋ mono, ndo de see ɓo, à baa ge ndo lay. Sõõ Kemos raw wo yaŋ wo go ti daŋgay de jar siɗ jag ɓen wo de minisdir ɓen wo ɓuy.

⁸ Je ɓlag jarn kal ge go ɓi leege ma honla ɓuy, ɓi leege po yãã ge go doo ɓe gà. Jar ma ɓil logn taw ge wo go, à ɓlag ge fuln go lay, mono diŋ fen maga Manwur wããn mono.

⁹ Hã we graŋ ne jar Mohab nen maga á mo pud wo ma maŋ wer go ɗala! Ɓi leege ɓen kol ge wo go diŋ ngel ma poɗag poɗage, jobo joŋ ge ɓil ɓaara gà so hase.

¹⁰ Faɗge ti je maga joŋ joŋre mani Manwurn de hragge mono! Faɗge ti je maga hee jag moslam ɓen nen cíi gà mono!

¹¹ Sir Mohab hay mbe go jam hãã le ti tĩĩgi wer ɓe. Á hay mbe de suuli lemdeʼ ti koɗ doo yii maga sig go ciŋ ti defõõre nono. Jobo hay koln go ɓi daŋ ma tigriŋ ti boŋ gà wer ɓe ga à hoo jar Mohab wo wo go ti boŋ ti sir po ti daŋgay gà. Diŋ wersen gà á hay mbe tum de cõõre day fõõre no ɓe coo gà lay mono.

¹² Doo kay no so no, ko we ga naw yaŋ wo le age, ndi laa ge jar wo yaŋ le ma kol rage go ɓil daŋre ma tigriŋ wo. Á men ge wo daŋre ɓen wo yaŋ go ɓil koɗe day ngar ge wo ndar bii ɓaaran wo yaŋ go. Kay diŋ jag Manwuri.

¹³ Kemos kaŋ ge sõõre yaŋ ne Mohab ti doo ga Betel kaŋ sõõre go ne Israyel maga hay de kaŋ ɗiggi ti ɓe ti no lay no.

¹⁴ Joŋge joŋge ga nday wãɗ ga nday diŋ werpiiri ma de egre, nday diŋ soode ma durgi wo la?

¹⁵ À ɓlag sir Mohab we go, cug ndar go ɓi leege ɓen wo. Dog weere jõõre ɓen wo de woge jag mbege. Kay diŋ jag waŋ maga à ɗen ga Manwur Pantway mono.

¹⁶ Re ma caa Mohabn go mbaŋ ma age, re ma daʼ ge ɓen le de seege deparday debaŋ.

¹⁷ Law we ne, nday ɓuy jar leege ɓe no, nday ɓuy jar maga nday de ko ɗúu ɓe mono! Wãɗ we ga : Sen diŋ re mayse no la! Joŋge joŋge ga à haw graw boo ma de egren go, à haw graw ma de togoɗgen go la?

¹⁸ Men togoɗge ɓon go, yaʼ go hayge gesiŋ jwaale so, ndo may ma de tiŋ Dibon no! Werga, je ɓlag sir Mohabn le go de ur gi mo ti, á ɓlag ge kor ɓo ma de egre kiŋkiŋn wo go.

¹⁹ Ndo go ti faage deŋ begge, ndo wãy ma de tiŋ Arower no! Wii jag je ɗee no, je maga yoo go mono, wiin ga : Re mayse joŋ la?

²⁰ Mohab go nen sõõre werga á de daɗge. Hrag we ware, ʼwad we ware! Wo we siigi ɓe wo jag pyew Arnoŋ ga à ɓlag Mohab we go!

²¹ Re go de age ne sir ma ɓil fuln ti, ne Holon ti, ne Yahsa ti, ne Mefaad ti,

²² ne Dibon ti, ne Nebo ti, ne Bet-Diblatayim ti,

²³ ne Kiryatayim ti, ne Bet-Gamul ti, ne Bet-Mewon ti,

²⁴ ne Kiriyod ti, ne Bosra ti, go ne ɓi leege ma ti sir Mohabn wo ti ɓuy, maga wo wo go hãã hãã noga mbaŋ wo ɓuy ti.

²⁵ Egre Mohab hoo go, doo ɓe hrag go. Kay diŋ jag Manwuri.

²⁶ Taa we Mohab go de yii werga á maŋ ti see ɓe ciŋ pel Manwur! Daga Mohab mo tegaɓ see ɓe go de duggi ɓe no, mo kol go diŋ fen feg ti lay.

²⁷ Israyel hay kol go diŋ fen ɓo ma fegge ti gà yawla? Ndo hay daʼn yoo jar freŋ wo maga ndo wãã wããre ti ɓe, ndo feg go ti ɓe doosen no so yawla?

²⁸ Tob we ɓi leegen wo go, raw we wo go lagge ti húulì wo, nday jar ma ti sir Mohab no! Joŋ we doo kurkudu maga kaŋ tiŋ ɓen ti jeŋ rum húulì no mono.

²⁹ Wùr hay laa wããre ti farge ti ciŋ mani Mohab no, á diŋ farge ti ciŋ ma de raw wùu no, diŋ keege see ɓe no, diŋ farge ti ɓe ciŋ no, diŋ mbarge jag jiili ɓe no.

³⁰ Ndi yaŋ mbi de ko hun ɓe no, sen diŋ ngel de koɗe. Ndi de ko ɗiggi ga riŋ ga se ɓen wo de joŋre ɓe ma de koɗ koɗn wo. Kay diŋ jag Manwuri.

³¹ Diŋ wersen so ga ndi law ti Mohab mono, ndi ra go ti sir Mohab ɓuy tuu. À de ngrum jag ti jar ma Kir-Heresn wo.

³² Pay tlalum ma Sibma no, ndi ra ti ɓo debaŋ de daŋ roo maga Yeaser ra mono, jag doo tlalum ɓon hay raw wo see maarogn wo go, hay day wo wo go jag maarog ma Yaeser no. Je ɓlag jarn cwaa go ne mo ɓo ma weegen wo de mo ɓo ma hããgen ti.

³³ Fruygi wo de feg caa wo wer go yoo koore ma de peɗgen wo de sir Mohabe. Ndi hay õg yii ma ɓi cããgen wo go, à bay hãã yii de war fruygi jag wa so. À laa diŋ war maga bay wo diŋ war fruygi wa mono.

³⁴ War maga à ʼwad le Hesbon mono, à laan wo go Eleale hãã, à laan wo go hãã Yahase, go Sowar hãã wo go Horonayim, hãã wo go Eglad-Selisiya werga bii ma Nimrim õg ge wo go lay.

³⁵ Ndi maŋ jag wããre go de Mohab so, go de je maga ɗii ti ngel cor sõõre ma de maŋge ciŋn day roɗ fen fõõre ne sõõre ɓen wo mono. Kay diŋ jag Manwuri.

³⁶ Ɓil ɓi ra ti Mohab doo síilí wo nono, ɓil ɓi ra ti jar Kir-Heres wo doo síilí wo nono wer maga daʼge maga á hay bag wo jag ɓe ciŋ yee we go.

³⁷ Werga, à cẽẽ tin wo go ɓuy, à poʼ piŋn wo go ɓuy lay. Á a go de ngaɗ ɓi coo doo ɓuy day à go de saɗ bugu sag ɓuy lay.

³⁸ Ciŋ ti tiŋ ma Mohabn wo, ti ngel tayge ti ɓen wo mo ɓuy, À ra nà diŋ húulí tawa tuu wer maga ndi mbug Mohab go doo cããge maga à bay de sãy ɓe ti wa so nono. Kay diŋ jag Manwuri.

³⁹ A san go doo hẽẽne mo ɗala! Hrag we ware! Ko we Mohab mbuɗ faale go de sõõre mo ɗa so la! Mohab kol go diŋ fen feg ti, fen caa hẽẽne jar maga wo ti ɓe mo ɓuy no.

⁴⁰ Werga Manwur wãã ga : Ko we, á pud le doo gebeg nono, cir graŋ ɓe go ne Mohab ti.

⁴¹ À yãã Kiriyod we go, à mbug kor ma de egre kiŋkiŋn wo we go. Jiili blumri ma Mohabn wo ti wur sen doo wãy maga ɓil ɓe de leʼge ɓe ma biŋgi nono.

⁴² À ɓlag jar Mohab wo go, á joŋ ge wo go diŋ wer jar po taʼ gà so has werga á far wo ti see ɓaara ciŋ pel Manwuri.

⁴³ Daɗge see, tuu wo de bay wo go de cir ti ɓo, ndo je ma ti sir Mohab no! Kay diŋ jag Manwuri.

⁴⁴ Je maga daŋ doo daɗge seen mono leʼ go ɓi tuu, je maga ɗii le go ɓi tuu baa go ti bay werga ndi le de kol kal bon ne hẽn ti, ne sir Mohab ti. Kay diŋ jag Manwuri.

⁴⁵ Jar maga daŋ wo mono, sen wo lagge go de hoo egre nen cee Hesbon. Ama wùu caa le go Hesbon jiliw jiliw, le de yããge ɓi feele waŋ ma Sihon, day á go de roɗ plaŋa Mohabe, go de roɗ tipẽẽge ti jar ngar jagn wo.

⁴⁶ Re ti ɓo, sir Mohabe! Jar mani Kemos taw wo we go! À raw we de weere ɓon wo ti daŋgay, à hoo mayre ɓon wo we go gebeere.

⁴⁷ Ama ti tawge nawn wo mono, ndi fer ge yaŋ le de jar Mohab ma de hooge ti daŋgayn wo. Mono diŋ re maga à cagn go ti Mohab mono. Kay diŋ jag Manwuri.