JERMI 46 - Tupuri Bible

WÃÃRE TI JAR DEHÃY WO Wããre ti Ejipte

¹ Lam no diŋ wããre maga Manwur wãã ra ne Jermi je ndar nen wããre Baa gon ti jar dehãy wo,

² ti Ejipte, ti soode mani Farawoŋ Neko waŋ Ejipte maga hay wo wo Karkemis jag Efrad maarog ma de pããge no, day Nebukadnesar waŋ Babilon ɓum ra nen kiŋgi ma de naa maga Yehoyakim je ni Josiyas waŋ Judan de ma joŋ waŋ mono. Se ga :

³ Sraɗ we gidigli ma kleeren wo de ma kluurin wo go, yaʼ we le jag durgi no!

⁴ Jag we pus durgi wo ne piirin wo weere, ɗid we ra nday jar yaɗ piiri no! A we de gobogray ɓayn wo ti, pig we saŋ manjawre ɓayn wo go, her we ngoŋ ɓayn wo see ɓay!

⁵ Wer mayse ga ndi ko ra daɗge deŋ deŋ pala? A dag wo go de gloge, blumri ɓaara taw wo go. A daŋ wo, daŋ wo de ɗeere, laa wo ferge le gà so, hẽẽne go de caa rage go ti ngel ɓuy. Kay diŋ jag Manwuri.

⁶ Je ma deparday daŋ kããran kãã ma daŋge go gà! Blumn yoo go gà! Wo nen ɓaŋ gloŋhwede wo jag Efrad maarog ma de pããgen mono, á ɓaʼ wo, laa wo go gesiŋ.

⁷ Sen diŋ wo se sen ga maŋ le doo bii Nil nono day bii ɓen dug wo go doo maarog ma de pããge wo no mo la?

⁸ Á diŋ Ejipte maga ur le doo Niln nono day bii ɓe dug wo go doo maarog ma de pããge wo no mono. A wãã gana : Ndi ur gi, ndi yãã ge sirn yaŋ go ɓuy, ndi see ge wo go ne ɓi leegen ti de jar ma ɓil ɓen wo.

⁹ Hoo we so, piiri no! See mbay hãy, nday pus durgin wo! Daga blumrin mo laa wo le go, diŋ ma Etiyopin wo de ma ti sir Pud maga ko wo ɗaw gidigli mono, diŋ ma Lud maga ko wo ɗaw toŋwaa lay, jwag wo waa mono!

¹⁰ Wur sen diŋ ma Waŋkluu, Manwur Pantway no, á diŋ wur saʼge hee maga á saʼ hee see ɓe go de jar hee ɓen wo. Moslam de lor jare, á go de wuugi werga á de jo cíi ɓaara. Werga á diŋ wur siigi jag mani Waŋkluu, Manwur Pantway wo ɓil sir ma ɓaŋ gloŋhweden wo jag Efrad maarog ma de pããge no.

¹¹ See, wo ti sir Galaad yãã fen ma grud gi nen wããge ɓo no, ndo maytigli ma Ejipte no! Ndo tay mbo saŋgun wo le twore tay de koɗ koɗe, ma pẽẽ ndo joŋ ge ni boŋ gà.

¹² Wer jar daʼ wo wer yaŋ go ne ngel sõõre ɓo no. ʼWadge war ɓon yãã sir wo go ɓuy werga jar durgin joŋ wo farge ne kããra ti giɓliŋ giɓliŋ, laa wo go jag taʼ boŋ ɓuy tuu.

¹³ Wããre maga Manwur wããn ne Jermi ti age Nebukadnesar waŋ Babilon maga hay á kaŋ re ne sir Ejipte ti mono ga :

¹⁴ Sii we re sen wo ti sir Ejipte, wo we wãɗge ɓe wo Migdole, wo we wãɗge ɓe wo Nof wo de Tahpanhese. Wãɗ we ga : Naa nen see ɓo go, day ʼwũy see ɓo go werga moslam go de lor jar go ti ɓo kara ɓuy!

¹⁵ Bloodày ɓon daŋ we de ɗee, á laa deŋ ɓaale ɓe gà so werga Manwur legad gor ɓe go gesiŋ.

¹⁶ Jar maga ɓaʼ wo day leɗ wo ne kããra ti wo ngaɓa. A wiɗ wo kããra ga : Naa hoo go ciŋ, naa fer see jar naan wo, ti sir naa no, doo moslam ma joŋ bon naa no.

¹⁷ Wo ni à hay ngar jag ga : Farawoŋ waŋ Ejipte diŋ jag kaʼ tawa, á hay men wurn go rawge!

¹⁸ Ndi yaŋ tenene! Kay diŋ jag Waŋ maga à ɗen ga Manwur Pantway mono. A a ge yaŋ le, ti go ciŋ taʼ doo húulì Tabor yoo húulì wo nono, doo húulì Karmel go ti maarog wo nono.

¹⁹ Bag jag fẽẽre ɓon go ma rawge ti daŋgay no, ndo may ma de tiŋ Ejipte no! Werga Nof kol ge yaŋ go diŋ ngel ma poɗag poɗage, à roɗn ge go, jobo joŋ ge ɓil ɓe gà so hase.

²⁰ Ejipte diŋ day tigli ma de woore, wũy ma lorge ɓen a le nen ɓaŋ gloŋhwede, a le de age.

²¹ Soode maga á hoo ra le ti solay wo ɓil ɓe doo weere deere ma de goɓre wo nono. Saara de see ɓaara mbuɗ gi wo nen de ɗeere ɓuy lay, kãã ge wo ma lagge gà. Werga, naw maga re caa ra go de age ne hara ti. Á diŋ wur maga à joŋ ge ra go de gùr mono.

²² Á swaa doo cwe maga ti seege nono, werga á see wo le ne Ejipte ti de soode wo were. A see wo le ne hẽn ti de klaɓre wo doo doo jar maga car wo koore wo go gesiŋ nono.

²³ A poʼ ge wo yooway ɓen go, bà mbe de maga á go de hee doo see kẽẽ krig mo ɓuy no. Kay diŋ jag Manwuri. Werga á wo ngaɓa debaŋ de daŋ magalga wo, á bay wo ma keege wa.

²⁴ Sõõre go de baa may ma Ejipte no, á kol go ɓi coo doo jar ma nen gloŋhweden wo.

²⁵ Manwur Pantway, Baa ma Israyeln wãã ga : Ko we ga ndi joŋ sõõ Amoŋ ma ɓi leege No yaŋ go de gùri, ndi joŋ ge Farawoŋ wo de Ejipte de baa ɓen wo de waŋre ɓen wo yaŋ go de gùri. Ndi joŋ ge Farawoŋ wo de jar maga wo de kaŋ ɗiggi ti ɓe wo yaŋ go de gùri lay.

²⁶ Ndi hã ge ra yaŋ go ne jar maga bay wo de sãy ɓaara ti wa wo ɓi coo doo, go ne Nebukadnesar waŋ Babilon wo de weere jõõre ɓen wo doo. Day ge blam sen ge so mono, Ejipte fer ge yaŋ de jar ɓil doo ma ti wurpon nono. Kay diŋ jag Manwuri.

²⁷ Ndo ma ɓo Jakob wejõõ ɓin mono, joŋ hẽẽne wa! Israyele, daɗ wa! Ko ga ndi yãã ndo yaŋ ge le go ti sir ma hãã no, ndi yãã ge wer mani ɓon wo yaŋ le go ti sir maga á wo wo go ti daŋgay ni mono. Jakob fer ge wo yaŋ le day lag ge wo yaŋ de fruygi, bay re see, go jam je ma hãy rage joŋ ge gà hase.

²⁸ Ndo Jakob wejõõ ɓi no, joŋ hẽẽne wa werga ndi yaŋ de ɓo. Kay diŋ jag Manwuri. Ndi taw ge jar dehãy maga ndi hay yee nen ɓo wo go yoo ɓaara wo yaŋ go, ama ma ɓo ndi taw ge ndo go gà. Ndi liŋ gi ndo ti faage ɓe, ndi kãã ma men re ɓon go bay jag tuu gà.