JERMI 44 - Tupuri Bible

Re ti jar Jwif maga raw wo Ejipte mono

¹ Wããre maga à wããn ne Jermi ti jar Jwif maga lag wo wo go de tiŋ Ejipte, Migdol, Tahpanhes, Nof wo de sir Patros mo ɓuy doo kay nono ga :

² Manwur Pantway, Baa ma Israyel wãã ga : Nday yaŋ de ko re maga ndi hay kaŋ ne Jerusalem wo de ɓi leege ma Judan wo ɓuy ti mono, day nday ko we ga á wo go wara nà diŋ tabuli. Jobo bay de tiŋ ni wa so,

³ wer ɓlagge maga á joŋn wo ma car jiili ɓi go ti maga á raw wo roɗ fen fõõre ne baa ma tiŋriŋ ma hayba saara, hayba nday, hayba pããre ɓay wo, nday hay bay de ko rage wa day saara raw goŋ rage.

⁴ Ndi hay laa weere jõõre ɓi jar ndar nen wããre ɓin wo wo see ɓay le de jag toŋ ɓaa ma riŋ nday gana : Joŋ we fen yeɗe maga ndi de caa hee de ɓe doo kay no wa.

⁵ Ama saara laa laage ɓe gà laa wo coʼ sug ɓe gà. Á hay men wo joŋ ɓlagge ɓaaran gà lay, men wo roɗ fen fõõre ne baa ma tigriŋn wo gà lay.

⁶ Mo so no, bagge põõ ɓin wo de sõõge ɓil ɓin raw wo doʼ wùu go ne hara ti, roɗ wo ɓi leege ma ti sir Judan wo go de blam faage ma Jerusalem wo, saara go wara diŋ tabuli, wo go poɗag poɗag doo ga nday kon wara nono.

⁷ Patala Manwuri, Baa Pantway, Baa ma Israyeln wãã ga : Wer mayse ga nday de see ɓay tuu nday joŋ ɓlagge see see ɓay ti maga nday hoo werpiiri, naare de weere kleere de weere ma ti pãã ma ti sir Judan wo le go, men jar po wo ni gà has mo la?

⁸ Sen nà ma car jiili ɓi go de joŋre ma doo ɓayn wo, ma roɗ fen fõõre ne baa ma tigriŋ ma ɓil sir Ejipte maga nday raw le go lagge de tiŋ la ni mono, ma naa see ɓay le go ma kolge go diŋ fen feg ti, fen mbuɗ fuy yoo wer jar ma ti tamsir wo ɓuy.

⁹ Ti ɓay yõõ go ti hãyhãy mani pããre ɓayn wo, hãyhãy mani waŋre ma Judan wo, ti hãyhãy ɓayn wo de hãyhãy mani naare ɓayn wo, hãyhãy se ga à hay joŋ rage ɓil sir Juda noga ti blam faage ma Jerusalem wo mo yawla?

¹⁰ Re ɓlaggen ɗig ra meʼ gà ɓuy, hãã wara hẽẽne po bay joŋ rage meʼ wa hase. Á hay see wo ti jag liŋgi ɓin wo de faage wããre ɓi ma de yerge maga ndi hay laa ra ne nday de pããre ɓay wo pel gà lay.

¹¹ Diŋ wersen so Manwur Pantway, Baa ma Israyeln wãã ga : Ko we, ndi mbuɗ nen de ɓay ma joŋ nday de ɓlagge ma caa wer jar Juda wo go ɓuy.

¹² Ndi hoo ge jar Juda maga gwaʼ wo day raw wo ɗiggi ga saara mo wo go lagge de tiŋ Ejipte wo yaŋ, saara yee ge nen yaŋ wo go ɓuy ɓil sir Ejipte ni. Moslam wo de koŋne laa ge wo ra yaŋ go gesiŋ, á yee ge wo nen yaŋ go, tĩĩ le ti ma kleen hãã leʼ go ti ma kluu no. Moslam wo de koŋne taw ge wo ra yaŋ go day saara joŋ ge yaŋ diŋ fen faɗge, fen lawge, fen feg ti, fen mbuɗ fuy.

¹³ Ndi ur gi yaŋ de jar maga wo go de tiŋ Ejipte la doo ga ndi hay ur de Jerusalem, ndi kaŋ moslam, koŋne wo de bulfũŋ wo go ne hẽn ti nono.

¹⁴ Jobo daŋ ge go noga gwaʼ ge tenen yoo jar Juda maga gwaʼ wo day á wo go laa tiŋ Ejipte lam gà hase, jar se maga ɗig wo ga saara fer yaŋ ti sir Juda day ɗiggi ɓaara ti ɓe taʼ ga saara fer yaŋ lagge ni mono. Á fer ge wo wo ni gà say diŋ jar po maga daŋ ge wo go ne yemeg koɗ no.

¹⁵ Werpiiri maga hay wo go de koge ga naare saara roɗ wo fen fõõre ne baa ma tigriŋ wo mo ɓuy, naare maga hay wo age ti tayge ti ma kluun mo ɓuy, jar ma ɓuy maga hay laa wo tiŋ go ɓil sir Ejipte, go Patros mo ɓuy kal wo ferge ne Jermi ga :

¹⁶ Wããre maga ndo hay wããn ne wùr ti jag Manwur mono, wùr day laage ɓe gà.

¹⁷ Ama wùr da joŋge doo maga á hay kal le go jag wùr nono, diŋ ga wùr roɗ fen fõõre ne wãywaŋ ma nen ngel ma ciŋ no, wùr mee yii ma sii jag wo ne hẽn doo maga wùr de pããre wùr wo, waŋre wùrn wo de minisdir wùrn wo, wùr hay joŋn le ɓi leege ma Judan wo, ti blam faage ma Jerusalemn wo nono. Bà mo yaw no, wùr hay le daʼ hoole go ti koŋne wùri, wùr hay de fruygi lay day wùr hay bay ko re po wa lay.

¹⁸ Ama hãã le ti wur maga wùr men roɗ fen fõõre go ne wãywaŋ ma ciŋ no day wùr bay mee yii ma siɗ jag ne hẽn wa so mono, fẽẽre gwaʼ wo go see wùr ɓuy day moslam wo de koŋne taw wo wùr go ɓuy.

¹⁹ Bà mo ɓuy yaw pa no, de maga wùr roɗ fen fõõre ne wãywaŋ ma ciŋ no day wùr mee yii ma sii jag ne hẽn mono, jag werpiiri wùr yaŋ mbaara ni de maga wùr joŋ gato ma de kadge de maŋ sõõ no, day wùr meɗ yii ma siɗ jag ne hẽn mono.

²⁰ Jermi day riŋ jar ma ɓuyn wo, werpiiri wo, naaren wo de ngaɓa ma ɓuyn maga hay wo fer wããre sen ne hẽn doo kay nono gana :

²¹ Fen fõõre maga nday hay roɗn le ɓi leege ma ti sir Judan wo, ti blam faage ma Jerusalem wo, nday de pããre ɓay wo, waŋre ɓayn wo de minisdir ɓayn wo de jar sirn wo ɓuy mono, Manwur hay ɗig ti ti ɓe day se hay coo jag ɓe gà yawla?

²² Á hay coo wo jag ɓe ni wolaŋ gà nà diŋ wer hãyhãy ma nen joŋre ɓayn wo, wer fẽẽre yeɗe maga nday hay joŋ ra day sir ɓayn kol go wara diŋ tabul, diŋ ngel ma poɗag poɗage, diŋ fen feg ti, bay jar ɓil doo maga á wara no tiʼ mono.

²³ A nà wer maga nday roɗ fen fõõre no, nday joŋ ɓlagge see Manwuri, wer maga nday hay laa jag Manwur gà day nday see ti jag liŋgi ɓen gà ti wããre ɓe ma de yergen wo de wããre sedewa ɓen wo gà mono. Diŋ wersen so ga reen de caa nday doo ga á wara no mono.

²⁴ Jermi kal riŋ jar ma ɓuyn wo de naaren wo pa ga : Coʼ we sug wããre Manwuri, nday jar Juda maga nday go ti sir Ejipte lam ɓuy no!

²⁵ Manwur Pantway, Baa ma Israyeln wãã ga : Nday de naare ɓay nday hay wãã go de jag ɓay day nday raw joŋ fen maga nday hay wããn go, go de doo ɓay. Nday ga : Wùr da laa jag fen maga wùr hay hã jag ti ɓe gà diŋ ga wùr roɗ fen fõõre ne wãywaŋ ma ciŋ no day wùr mee yii ma sii jag ne hẽne. Patala nday nà de lagge ti jag ɓay maga nday hay hãn mo ɓuy no, day nday go de bag jag ɓe.

²⁶ Diŋ wersen laa we wããre Manwur so, nday jar Juda maga nday go de tiŋ Ejipte lam ɓuy no! Ko we, ndi hãʼ go de ɗúu ɓi ma kluu no, wããn diŋ ndi Manwur ga jobo yoo jar Juda ɗe ge ɗúu ɓi de jag ɓe gà hase go ɓil sir Ejipte ɓuy jobo wãã ge ga Waŋkluu, Manwur yaŋ tenen gà hase.

²⁷ Ndi, ndi oo ge yaŋ ti ɓaara maga re mo caa ra, bay ma kaŋ rage ti doŋ wa. Moslam wo de koŋne yee ge wo nen jar Juda maga wo go ti sir Ejipte lam ɓuy wo yaŋ go hãã saara taw go.

²⁸ Jar po wo yemeg ga pẽẽ wo jag húulí ne gug boŋ men ge wo sir Ejipte yaŋ go day fer ge wo yaŋ ɓil sir Juda. Ama te jar Juda maga hay gwaʼ wo ga day a wo go laa tiŋ ɓil sir Ejipte lam ɓuy ko ge wo wããre maga sen ɓoʼ ge jag yaŋ go, mani ɓin layblaʼ ɓaaran layblaʼ no.

²⁹ Kay diŋ jag Manwuri : Mokay diŋ fen maga kaŋ ge nen ɓay yaŋ ga ndi joŋ ge nday yaŋ de gùr ti ngeln mo taʼ la maga nday mo ko ga wããre ɓin la bag ge wo jag yaŋ go ti ɓay day re caa ge nday yaŋ mono.

³⁰ Manwur wãã so ga : Ko we, ndi hã ge Farawoŋ Hofra, waŋ Ejipte yaŋ go ne jar hee ɓe wo ɓi coo doo, go ne jar maga bay wo de sãy ɓe ti wa ɓi coo doo doo ga ndi hay hã Sedesiyas waŋ Juda go ne Nebukadnesar waŋ Babilon je hee ɓe maga hay bay de sãy ɓe ti wa ɓi coo doo no lay no.