JERMI 41 - Tupuri Bible

Ismayel ʼwar Gedaliya go

¹ Nen few ma de renamn mono, Ismayel je ni Netaniya je ni Elisama ti wer mani waŋn raw age de jar kluuri mani waŋn wo de jar ni hwal Mispa see Gedaliya je ni Ahikam no. Saara raw rege de kããra Mispa ni.

² Mo so no Ismayel je ni Netaniyan raw wo hooge de jar ma hwal maga hay wo wer ɓe mono, kal wo car Gedaliya je ni Ahikamn je ni Safann go de moslam. Doo kay no so no ga se ʼwar je maga waŋ Babilon hay kaŋn ti sirn go mono.

³ Ismayel raw id jar Jwif maga hay wo Mispa see Gedaliya ni wo go ɓuy de soode jar Kalde maga hay wo ni mo lay no.

⁴ Ti naw ma de ɓog blam maga à ʼwar Gedaliya go day jobo bay de laage ɓe wa ɗa mono,

⁵ jar po wo doo nenmaʼ á wo le Sikem, le Silo wo de Samari wo go de cẽɗ piŋ ɓaara, wo go de ngrag õõbe see day wo de ngaɗ see ɓaara. Á hay wo de fẽẽre hãge wo de fen fõõre doo ma woge de ɓaara ɓil tiŋ mani Manwur no.

⁶ Ismayel je ni Netaniya raw kalge le go Mispa caa pel ɓaara de seege caw ti roo. De maga á a go dayge see ɓaara mono, se kal riŋ rage ga : See we le ni Gedaliya je ni Ahikam no.

⁷ Ama de maga á day wo go ti gesiɗgi ɓi leegen mono, Ismayel je ni Netaniyan raw ngaɗ rage go day laa rage go ɓi gutugi, jar maga hay wo see ɓe kay wo ne ni.

⁸ Ama jar po hay wo we yoo ɓaara ni hwal raw wo wii Ismayel ga : Id wùr go wa werga wùr yaŋ de yoŋ fẽẽre rege wo ɓil pay wo la de coore ble, de orje, de noo wo noo yõõre. Doo kay nono se raw men rage id ra go doo hẽẽre ɓaaran wo gà.

⁹ Gutug maga Ismayel laa húulí jar maga se id ra go wer Gedaliya ni lay diŋ gutug maga waŋ Asa hay teen doo hẽẽne Baesa waŋ Israyel mono. Se nà diŋ gutug se ga Ismayel je ni Netaniyan baan go de húulí jar mo so no.

¹⁰ Ismayel raw hoo jar maga hay gwaʼ wo Mispa ni mo ɓuy daŋgay. Mayre mani waŋn wo de jar maga hay gwaʼ wo Mispa ga Nebusaradan waŋ sooden hay hã ra ne Gedaliya je ni Ahikamn doo mono, Ismayel je ni Netaniyan hoo ra daŋgay day raw de ɓaara ma woge ni jar Amoŋ wo.

¹¹ Yohanan je ni Koreyan wo de jar kluuri soode maga hay wo see ɓe mo ɓuy raw wo laa re ɓlagge maga Ismayel je ni Netaniyan joŋn mo ɓuy no.

¹² Saara raw hoo werpiirin wo ɓuy, raw wo dur Ismayel je ni Netaniya no. Saara wo dage ɓe jag bii ma kluuri ma Gabawoŋn wo no.

¹³ De maga jar maga hay wo wer Ismayel mo ɓuy ko wo Yohanan je ni Kareya wo de jar kluuri sooden wo wer ɓe mono, ɓil ɓaara raw joŋge go fehe.

¹⁴ Jar maga Ismayel hay hoo ra le Mispa daŋgay mo ɓuy raw wo mbuɗ nen le, fer wo le go wer Yohanan je ni Kareya no.

¹⁵ Ama Ismayel je ni Netaniyan raw yoʼge go ne Yohanan nen de jar wer nenmaʼa day daŋ wo go ni jar Amoŋ wo.

¹⁶ Yohanan je ni Kareyan wo de jar kluuri soode maga hay wo wer ɓe raw wo hoo jar maga Ismayel hay hoo ra le Mispa blam húulí Gedaliya je ni Ahikam wo ɓuy : Jar durgi wo, naaren wo, weeren wo de jar kluuri wo de jar ma de ndar ɓayn wo saara hoo ra le Gabawoŋ fer wo le de ɓaara.

¹⁷ Saara maŋ faage day lag wo iggi ti tiŋ waare ma Kimham ti jeŋ Betlehem no ma daŋge wo go blam ɓe ɓil sir Ejipte

¹⁸ doo jar Kalde wo. Werga, á hay wo de hẽẽne doo ɓaara ga á joŋ wo bon saara, ti maga Ismayel je ni Netaniyan ʼwar Gedaliya je ni Ahikam maga waŋ Babilon hay kaŋn wãã re sirn go mono.