JERMI 40 - Tupuri Bible

Jermi go ti see ɓe

¹ Wããre maga Manwur wããn ne Jermi blam maga Nebusaradan waŋ sooden men faage go ne hẽn ma rawge wo Rama mono. De maga Nebusaradan hay baan mono, Jermi hay de laa receʼ doo yoo jar maga à hoo ra le Jerusalem wo de sir Juda ma woge de ɓaara ti daŋgay Babilon mono.

² Waŋ sooden raw baa Jermi day riŋn ga : Manwuri, Baa ɓon hay wãã go ti re maga de caa ngeln mo taʼ la no.

³ Manwur raw age de ɓe day bag jag fen maga se hay wããn go wer maga nday hay joŋ ɓlagge see Manwuri, nday day laa jag ɓe gà. Fen maga á hay wããn go raw age ne nday ti so.

⁴ Patala ndi pog receʼ go ne ndo doo. Hayga ndo ko we nen ɓo de el ga ndo raw mbo wer ɓi Babilon no, ni ndo wo mbo ndi kaŋ ge nen ɓi yaŋ ti ɓo. Day hayga á coo we jag ɓo gà ndo wo wer ɓi Babilon gà lay no, ni ndo wo mbo wa lay Ko nen ɓo, sirn wo mo tiʼ ɓuy pel ɓo no, wo ti ngel maga ndo kon de ele day coo jag ɓo ga ndo wo ni mono.

⁵ De maga Jermi bay fer wããre wa ɗa mono, Nebusaradan kal ga : Fer see Gedaliya je ni Ahikam je ni Safan maga waŋ Babilon hayn wãã re ɓi leege ma Judan wo mono. Hay wo see ɓe yoo jarn wo ni, wo ti ngel maga ɓil ɓo da woge ni mo ɓuy no. Waŋ sooden raw hã fẽẽren rege wo ne hẽn de kayge wo, kal mege ɓe rawge.

⁶ Jermi raw woge Mispa see Gedaliya je ni Ahikam no, se raw hayge yoo jar maga hay wo de gwaʼge ɓil sirn ni mono.

Gedaliya de wãã re sir Juda

⁷ Jar kluuri soode maga hay wo wo go yoofíi mo ɓuy raw wo laage de jar ma wer ɓaaran wo ga waŋ Babilon hay Gedaliya je ni Ahikamn we ti sir no, hã werpiiri, naare, weere kleere de jar coo ma ɓil sirn ga à hay hoo ra wo go Babilon gà ne hẽn doo.

⁸ Saara raw woge Mispa see Gedaliya, á hay wo diŋ Ismayel je ni Netaniya no, diŋ Yohanan wo de Jonataŋ jar ni Kareya wo, diŋ Seraya je ni Tanhumed no, diŋ jar ni Efay ma Netofa wo de Yesaniyahu je ni je Maaka no, jar sen wo de jar ɓaaran wo wer ɓaara.

⁹ Gedaliya je ni Ahikam je ni Safan raw haʼ ge go ne hara de jar ɓaaran wo ga : Joŋ we hẽẽne ma joŋ peele ne jar Kalde wo wa, lag we ɓil sirn la, joŋ we peele ne waŋ Babilone day ni nday daʼ see ɓay yaŋ de ele.

¹⁰ Ndi, ndi de hayle Mispa la de oole pel ɓay ma yiŋgi de jar Kalde wo de maga á a ge wo we ɓil sirn la mono, ma ɓayn mono, hãã we tlalum ma hãã yii, hãã we leʼge koo ma ti ceeren wo de ma yuɗ noon wo. Lag we ra ti fẽẽre ma lag ragen wo day lag we ɓi leege ɓay maga nday bag sen wo ma lagge mono.

¹¹ Jar Jwif maga hay wo le go ti sir Mohabe, ni jar Amoŋ wo, ti sir Edom noga ti sir wo ɓuy raw wo laage lay ga waŋ Babilon yaŋ de men jar ɓil sir Juda ni day se hay Gedaliya je ni Ahikam je ni Safan wãã wããre prog no.

¹² Jar Jwif wo ɓuy kal wo men ngel maga saara hay dus wo go ni wo le go ɓuy, fer wo le Mispa see Gedaliya ti sir Juda. Saara raw daʼ yii de leʼge tlalumn debaŋ lay, hãã wo leʼge koore ma ti ceere wo debaŋ lay.

¹³ Yohanan je ni Kareyan wo de waŋre soode maga hay wo le go yoofíi mo ɓuy raw wo age Mispa see Gedaliya,

¹⁴ day riŋn wo ga : Ndo yaŋ mbo de koge ga Baalis waŋ jar Amoŋn le de ɓoʼ Ismayel je ni Netaniyan le ma ʼwar ndo go yawla? Ama Gedaliya je ni Ahikam laa hã ɓil ti wããre ɓaaran gà.

¹⁵ Yohanan je ni Kareya raw riŋ Gedaliya go freŋ Mispa ga : Hã faage me maga ndi wo go taw Ismayel je ni Netaniya no. Joŋge joŋge ga jar Juda maga hay tay wo le see ɓo fer wo go dusgi ɓuy noga jar Juda maga gwaʼ wo, yeɗ wo go pa la?

¹⁶ Gedaliya je ni Ahikamn kal ferge ne Yehonan je ni Kareyan ga : Joŋ sen wa werga fen maga ndo de wããge ɓe ti Ismayel diŋ geteʼe.