JERMI 2 - Tupuri Bible

WÃÃRE TI SIR JUDA WO DE JERUSALEM Jar Israyel ndar wo goge

¹ Manwur raw wãã wããre ne ndi doo kay nono ga :

² See wo ngar jag ne jar Jerusalem wo sug ga : Manwur wãã ga : Ti ɓi yaŋ mbe ti dage maga hay ɓil ɓo de maga ndo hay tigli mono, ti ɗiggi maga ndo hay de kaŋge ti ɓi de maga ndi hay de yãã moge de maga ndo hay seege wer ɓi ɓil puuli ti sir ma bay biin mono.

³ Israyel hay go sagsag ma Manwuri, á hay diŋ jag fẽẽre ɓen wo. Jar maga hay wo go rege ɓe mo ɓuy hay wo de re ti, re hay car rage. Kay diŋ jag Manwuri.

⁴ Coʼ we sug wããre Manwuri, nday jar ma liŋ ni Jakob no, nday ɓuy feele ma ti wer mani Israyel no!

⁵ Manwur wãã ga : Pããre ɓay hay daʼ wo cerge mayse see ɓi nen maga saara maŋ ɓil wo go see ɓi day raw wo saʼ see ɓaara de ngel de koɗn ma kol see ɓaara go diŋ ngel de koɗn mo la?

⁶ Á wãã bà wo ga Manwur maga hay laa saara le go ɓil sir Ejipte, ga hay koɗ saara ɓil puuli, ɓil sir ma bay koore wo de ma de tuu wo, ɓil sir ma bay bii ga húulí go ni mbaŋ tuu, ɓil sir maga jobo bay heege ni wa hase day je táabay po bay de tiŋ ni wa mono, Manwur sen nà genla gà so.

⁷ Ndi hay hoo nday le, ndi a go de ɓay ɓil sir maga koore wo de peɗge ni nen maga nday mo re leʼge koore ma de cõõre wo. Ama, nday a mono, nday kal kol sir ɓin go diŋ sir ma de ɗage, nday kol tway ɓin go diŋ fen horge see.

⁸ Jar siɗ jagn bay wo wããge ga Manwur nà genla wa. Jar ma de jag liŋgi doon ko wo ndi gà jar koɗ kããra bay wo see ɓi de deele wa so. Jar ndar nen wããren ndarn wo diŋ ti jag sõõ Baale, raw wo tayge diŋ de jar maga kãã wo ma kay rage meʼ gà ɓuy mono.

⁹ Diŋ wersen ndi yaʼ caa kiida ɓay. Kay diŋ jag Manwuri. Ndi yaʼ caa kiida jar ni weere ɓayn wo.

¹⁰ Cegaɗ we go ti kaali ma Sitim wo ni nday ko we nen ɓay ɗala! Laa we jar wo Kedar ni nday kaŋ we nen ɓay taʼ taʼa, ko we nene hayga mo ma de maŋ se kayn yaŋ mbe le joŋge ni no!

¹¹ Wer jar po yaŋ mbaara ga cor wo baa ɓaaran wo bà mbe de maga á bay wo mbaara diŋ Baa wa mo draʼ wa mo yawla? Jar mani ɓin coo wo togoɗge ɓaaran go de fen maga kãã ma kay rage meʼ draʼ gà mono!

¹² Ngel ma ciŋ wo, hay we go nen lawge ti re seno, Daɗ wedày bii mo hay leʼ nen ɓay wa so. Kay diŋ jag Manwuri.

¹³ Werga jar mani ɓin joŋ wo ɓlagge ɓaale ɓoge. A tob wo ndi gedel bii ma tenenn go day raw wo ter gutugri, diŋ gutugri ma bay bii ɓil wo, gutugri maga bay wo law bii wa mono.

¹⁴ Israyel nà diŋ gebee maga à yeen le yaw noga diŋ jobo maga biŋ liŋ yawla? Wer mayse ga á hã see ɓe go ma frumgi la?

¹⁵ Weere mingir wo de bũɗgi ti ɓe, á ra wo day á wo go de kaŋ lawge ɓil sir ɓe no, ɓi leege ɓen wo go de roɗge day jobo bay ɓil ɓaara wa hase.

¹⁶ Ko weere Nof wo de Taphanhes wo draʼ wo go de re ti pẽẽge ti ɓo lay.

¹⁷ Re sen á mo ti nà bay wer maga ndo hay tob Manwuri, Baa ɓon go de maga se hay koɗ moge ti faage ma de eln mo ɗa wa yawla?

¹⁸ Patala maga ndo maŋ faage Ejipte ma woge jo bii Nil sen maŋ bà mayse ne ndo la? Maga ndo maŋ faage Asiri ma woge jo bii maarog ma de pããgen sen maŋ bà mayse ne ndo la?

¹⁹ Werga a de bon mo ti diŋ ɓlagge ɓo no, joŋ bon ɓo diŋ ndarge gog ɓon wo. Daʼ wer go ne sen lay day kon lay ga tobge Manwuri, Baa ɓon go, de bay joŋge hẽẽne doo ɓi meʼ draʼ gà diŋ fen ma de bay woore lay diŋ fen maga a de lawge ne jobo ti lay. Kay diŋ jag Waŋkluu, Manwur Pantway no.

²⁰ Le ɓaa le tuu ndi hay maŋ jug ɓon go mo soole, ndi hay pog geyam ɓon wo go day ndo hay wãã ga : Ndi cegaɗ jag ɓo go gà so hase. Ama ndo kal rawge laa kõyõgre ciŋ ti ngel ma de maŋge ciŋ ma honla ɓuy, wer koo ma de sug ti ma honla ɓuy, ndo wãy figliw no.

²¹ Ndi hay peɗ ndo doo koo tlalum ma de daŋ kããra nono, doo koo maga jag caa feg go wer ɓe nono. Day joŋge joŋge ga ndo kol go me doo diŋ koo tlalum ma yooway la?

²² Ndo mo gõg bà see ɓo de cuu heege noga de saabul layblaʼ no, debaycõõre ɓon gwaʼ ge ɓe tum taʼ de kaŋge pel ɓi. Kay diŋ jag Waŋkluu Manwuri.

²³ Joŋge joŋge ga ndo kãã ma wããge ga : Ndi bay de demge wa, ndi bay de tayge de Baaln wo wa la? Ko nen ɓo ɗa ɓaale ɓo raw wo ɓil logn mo caw no, ko mbo fen maga ndo hay joŋ mono, ndo manyoŋyoŋ maga go de fliwgi ga caw no!

²⁴ Ndo mangerhẽẽ maga go de hadge de puulin mono! Koŋne ma ɓe ma debaŋ kaŋ wer ɓe caa fõõre no werpiiri wo, wose caa ge wer koŋne sen go ne hẽn ɓil mo la? Jar maga kiɗn wo mo ɓuyn bay wo kiɗgi ɓe de gayre wa so, a wo mbaara daʼge ɓe go de ʼwũygi tum.

²⁵ Ndi wii ndo ga ko see ɓo maga ndo mo raw ɓaale koɗ wa, hig kiŋ ɓo go de jwaale wa. Ama ndo day ga : Gay coo kããra wa, ndi da ɓin diŋ jar dehãyn wo, ndi da tayge nà diŋ de ɓaara!

²⁶ Doo maga sõõre joŋ je freŋ de maga à daʼn we go ni nono, sõõre joŋ ge jar ma liŋ ni Israyeln wo go doosen no lay, saara de waŋre ɓaaran wo, de minisdir ɓaaran wo, de jar siɗ jag ɓaaran wo de jar ndar nen wããre ne haran wo ɓuy.

²⁷ A riŋ wo koon gana : Ndo diŋ pan ɓi! Wii wo húulìn ga : Hay biŋ ndi nà diŋ ndo! Werga á hay mbuɗ wo ne ndi diŋ faale ɓaara, hã wo nen ɓaara ne ndi gà. Day de maga re caa ra we no, saara kal ga : Ur go ciŋ, yãã wùr go!

²⁸ Baa ɓo maga ndo hay ceɗ ra wo gen yawla? A mo hoo wo go ciŋ so hayga á yaŋ wo de kããge ma yãã ndo go ti wur reen no! O! Juda, baa ɓon wo ngaɓa doo ɓi leege ɓon wo no lay no.

²⁹ Wer mayse ga nday fer kaŋ reen ne ndi ti pa la? Diŋ nday, nday joŋ ti graŋ go see ɓi, kay diŋ jag Manwuri.

³⁰ Ndi hay jwag weere ɓayn wo de koɗkoɗe, á laa wo dayge laa hadge ɓin gà. Nday kaf nen jar ndar nen wããre Baa go ne ndayn wo go de moslam ɓayn wo doo mingir ma taw jar go nono.

³¹ Haya nday jar ma debalan lam no, hẽẽ we wããre Manwur no! Ndi hay see Israyel wo doo puuli noga doo sir ma de uŋgu no yawla? Wer mayse ga jar mani ɓin riŋ wo ga : Wùr go ti see wùri, wùr day ferge wo see ɓo gà so la?

³² May ma tigli yõõ ti yaŋ mbe go ti fẽẽre jõõ ɓen wo noga may maga go de yããge yõõ ti mbe go ti mblaaga ɓen yawla? Ma jar mani ɓin sen yõõ wo ti mbaara go ti ɓi ane, hãã le ti wur maga ngar ngaɓge ɓe bay wa so mono.

³³ Ndo had go ti faage ɓo se ma kiɗ werpiirin ɗala! Pa mono, ndo kol faage ɓo se de ɓlaggen go diŋ nen joŋre ɓon tuu.

³⁴ Re húulí jar coo ma bay re tin wo nà ti jag rob ɓo ma nen gesiŋ no, á wo diŋ jar maga ndo daʼ ra joŋ mopo ma de ɓlagge gà mono.

³⁵ Ama ti sen ɓuy ndo raw ferge gana : Re bay ti ɓi wa! Daga bagge põõ ɓen mo leʼ ne ndi ti wa! Ko ga ndi, ndi kog mo yaŋ wo jag kiida werga ndo riŋ ga ɓlagge bay see ɓo wa mono.

³⁶ Wer mayse ga ndo see seele ma se de pããgen no deŋ ma coo faage ɓon la? Ejipte kaŋ ge sõõre yaŋ ne ndo ti doo ga Asiri hay wùu ti go ne ndo de sõõre no pa no.

³⁷ Ndo kal ge yaŋ le go ni de grag doo ti werga Manwur go de tob jar maga ndo de kaŋ ɗiggi ti ɓaara mono Day ndo sii gi ti le see ɓaara ni gà.