KEFDER MAGA JAG YER NE MONO 4 - Tupuri Bible

Kaŋ ge ɗiggi da fẽẽre ma ti tamsiri

¹ Nday dur kããra leɗ kããra mo deŋ le? Kaŋ we wer leɗ kããra dur gi mo deŋ diŋ ɗiggi ɓay maga wo de preɗ hõõgese ɓay tum mono.

² Nday joŋ de sãy fẽẽre po wo ti, nday kal daʼ ge ɓe ga, wersen nday raw grag ge go ma woge id kããra tuu tuu. Nday kiɗ fẽẽre ga nday mo daɗ ra, nday daɗ ra ga, blam sen nday raw dur kããra leɗ kããra. Nday bay daɗ fẽẽre maga sãy ɓaara ti ɓay mo wa werga nday bay wii Baa wo ti ɓaara wa.

³ Hayga nday yaŋ wiɗ gi, day nday bay daɗ ge wa no, ni se diŋ doo ga ɗiggi ɓayn de ɓlagge, fen maga nday wiin, nday kal da ge ga nday joŋ de ɓe diŋ fen ma fruy ɓil ɓay de see ɓay.

⁴ Nday jar ndar gog see ɓay sen mo lag no, hayga nday yaŋ de baa wùu da ge diŋ fẽẽre se ma ti tamsir wo la no, ni nday diŋ jar hee Baa. Je maga maŋ ɓen diŋ blam fẽẽre ma gesiŋ lan wo mono, je sen kol go diŋ je hee Baa.

⁵ Nday mo ɗig de ele, wããre maga á go de yerge ɓe ɓi kefder mokay ga : Ɓil Baa de sõõ ge ne jar ti ga wosela mo hã ɓil ɓe diŋ ne se boŋ, wer egre maga á ɓoʼ ne hẽn ɓil mono, á mo kon wo diŋ fen foo wa hase.

⁶ Ama Baa woo naa we debaŋ, werga á de yerge ɓe go ga : Baa de giŋ jar maga keɗ wo see ɓaara ga jar mo riŋ ga saara diŋ saara, jar maga ko wo see ɓaara go depẽẽre, jar ma sen á raw woo rage.

⁷ Wersen hoo we sug ti Baa, giŋ we Manhúulí no, ni á daŋ yaŋ go de ɗee doo ɓay.

⁸ Yaɗ we see Baa, ni Baa yaʼ yaŋ see ɓay lay. Nday jar ma joŋ ɓlagge no, yog we doo ɓay go so. Nday jar her wããre kar kar no, fãɗ we jiili ɓay go so.

⁹ Law we see ɓay ti ɓlagge maga nday joŋ ne mono, ʼwad we war húulí, rag we, lag we fegge wa so, rag we rag ge, fruy we wa so, lag we law ge diŋ see ɓay.

¹⁰ Nday mo ko see ɓay depẽẽre pel Waŋkluu, ni Baa ra ɗúu ɓay yaŋ go ciŋ yoo jare.

Car wer kããra wa

¹¹ Hẽẽre ɓi no, car we wer kããra wa. Je ma car wer kããra ɓe wo mo caw ʼwad war ne hara ti no, ni á de ɗar ge mo caw diŋ jag liŋgi no. Ama je maga yaŋ ɗar wããre sen no, ni je sen bay hoo sug ti ɓe wa, ni á ɓen mo caw ɗar ge ɓe ɗar ge tawa koɗe.

¹² Wããre maga á bag ne wosela ɓuy mo deŋ a wo le diŋ jag Baa boŋ, je cag wããre wosela ɓuy diŋ se pa, werga á de egre diŋ se boŋ pa, á de egre ma yãã jar go, á de egre ma bas jar go lay. Day je ma sen yaŋ ɗig ti see ɓe nà ga se diŋ wose sen ga se car wer jar lan wo mo caw ne?

Jobo mo ko see ɓe ga riŋ ga se wa

¹³ Coʼ we sug ɓay, ndi wãã wããre ne nday, nday jar wãɗ ge ga : Wara noga toŋ wùr raw ɓi sir po ma kay wo la, wùr lag wo ni nen kiŋgi po boŋ joŋ terere, wùr daɗ solay no.

¹⁴ Nday bay de ko fen maga nduu gi toŋ mo wa, ndi ngaɓ we jar wãɗ wããre sen doo lagar maga hee patala krig, ig meʼ se bay wa son no.

¹⁵ Nday mo wãã diŋ ga : Hayga Baa da we, men wùr we tenen tiʼ ni wùr joŋ yaŋ no kay no kay no.

¹⁶ Day nday bay wãɗ ge diŋ doosen no wa yaw, nday kal raw ge keɗ ge diŋ see ɓay ga daga jar mo riŋ ga nday diŋ nday yaw, sen mokay bay de el wa.

¹⁷ Wersen, je maga yaŋ de ko re ma de el nen maga se joŋ ne, ama day we joŋ ge ɓe ga mono, joŋ ɓlagge.