KEFDER MAGA JAG YER NE MONO 3 - Tupuri Bible

Trum

¹ Hẽẽre ɓi no, ndi de riŋ we ge ga nday mo hay diŋ jar had jar ɓuy wa. Werga nday yaŋ mbay go de koge ga wùr jar had jar mo tiʼ i, Baa cag ge wããre ma wùr de hãã debaŋ daŋ jar lan wo.

² Werga jag naa yaŋ raw ge de re ma de ɓlagge tum tum. Hayga jobo yaŋ ga jag ɓe bay raw ge de re ma de ɓlagge wa has no, ni sen diŋ je ma ti ngel ɓe keɗed de kããge ma dig see ɓen so.

³ Naa mo ɗig ti joŋre maga á joŋ piiri wo mono. Naa her receʼ ne hara jag ma bal rage, blam sen á raw wo seege doo ga ɓil naa dan ɓuy, wo bà gene.

⁴ Nday mo ɗig ti joŋre daage lay. Á diŋ mopo ma kluu debaŋ, leege mo hay bo le fid gi de egre srog ge ɓe yaw, je tuŋ daagen la tuŋ ne raw de ɓe ti ngel maga ɓil ɓe da, tuŋ ne diŋ de wel koo po meʼ koɗe.

⁵ Trum je tabay doosen no lay. Á de tõõ ge ɓil jag ni meʼ kaʼ koɗe, ama wãɗ diŋ wããre ma kluuri de raw ti see ɓe debaŋ. Nday mo ɗig ti jaŋre wùu, a maŋ jaŋre wùu meʼ fẽdẽw koɗe, se raw roɗ ɓaw go gib tiʼ i.

⁶ Trum jobo doo wùu no lay. Á de wer ɓlagge ma honla ɓuy ɓili, á de tõõge yoo hõõgese naa wo ni, ama á raw yaʼ ɓlagge go ne hõõgese naa lan wo ɓuy. Á diŋ wùu se maga huu gà ga le de roɗ naa le wur biŋgi naa le kaʼ hãã go wur húulí naa mono.

⁷ Je tabay bal nàyre ma koore wo, dweere wo, fẽẽre ma lagad ge lagad gen wo de cẽẽre ma nen bii wo ɓuy, je tabay de kããge ma bal rage.

⁸ Ama jobo boŋ bay de bal trum ɓe ti boŋ wa hase. Á diŋ fen ma de ɓlagge maga jobo kãã ma bal ge ɓe ga, á go de baage de nee waa ma id húulí.

⁹ Naa joŋ suseʼ de ɓe ne Waŋkluu wo de Pããbe no, ama naa faɗ jar maga Baa joŋ ra de maŋ see ɓe de ɓe pa.

¹⁰ Joŋ ge bosaʼ wo de faɗ ge laa wo le go ɓil jag se boŋ no. Ama hẽẽre ɓi no, á hay bay nen joŋ ge doosen no wa.

¹¹ Bii ma de cõõre wo de bii ma glag yuu wo le go ɓi kããge bii po boŋ ga hase.

¹² Nday hẽẽre ɓi no, gum leʼ leʼge olif ga, tlalum leʼ doo gum no ga, kããge bii ma lug lug law bii ma de cõõre ga doosen no lay.

Koge re maga a le ciŋ

¹³ Jobo yaŋ yoo ɓay de ko re, ga laɗ wer wããre lay? Hayga yaŋ, á mo naa nen koge re ɓe sen wo go de seele ma de ele, mo joŋ joŋre ma de ele, mo hay ko see ɓe depẽẽre, mo hay de ko re.

¹⁴ Ama hayga hun ma de hãã wo de ɗiggi maga nday mo daŋ kããra yaŋ ɓil ɓay no, ni nday de rage diŋ ɗúu see ɓay ga riŋ ga nday, car ge diŋ geteʼ ma kaŋ kiŋ go ti cwãyn no.

¹⁵ Werga koge re maga je sen wãã re ti cwãy ɓe ga, mokay bay de a ge le jag Baa wa, had jar de ɓe diŋ kããra ɓaara jar téebeere wo, diŋ ɗiggi maga jar téebeere ɗign wo, re sen a wo le diŋ jag Manhúulí.

¹⁶ Ti ngel ma honla ɓuy ga jar yaŋ de hun wo de ɗiggi ma daŋ kããra no, á joŋ wo wer ɓlagge ma honla ɓuy, joŋ wo go hãy hãy lay.

¹⁷ Ama ma koge re maga a le ciŋ, sen bay ɗage, sen hã jam ne jare, kol jar de sãy see kããra, barge de kããra, kaŋ wer jar ko decoo kããra, kaŋ wer jar joŋ joŋre ma de woore tum tum, lag wo cogob ne kããra ti ga, her wo wããre go kar kar gà.

¹⁸ Jar maga lag wo ti yoo kããra tum jam, wo de kap ge nen jam no, day mbèere ɓaara maga á wo ge we ge ɓe, diŋ seele ma de deele.