KEFDER MAGA JAG YER NE MONO 1 - Tupuri Bible

¹ Wããre sen mokay, yern diŋ ndi jage, ndi diŋ wejõõ Baa wo de Yeso Kris Waŋkluu no. Jar mani Baa maga dus wo wo go ɓi sir mo sar sar deŋ, ndi her jag wo ne nday ɓuy.

Hãge see ne Kris wo de koge re

² Nday hẽẽre ɓi no, re ma de gaali daɗ we mbe we wer sar sar layblaʼ no, ni ɓil ɓay mo joŋ mbay go feh fehe.

³ Werga nday yaŋ de koge ga re ma de gaali daɗ we we lam hãge ɓil ɓay go ne Kris no, á raw yaʼ wer ɓay lagge ngiŋ yaw.

⁴ Hay we go de pũygi nen maga lagge ngiŋ ɓayn mo hay go ti ngel ɓe keɗede, mopo mo hay go de gwaʼ ge see ɓay wa hase.

⁵ Ama je maga koge re ɓe yaŋ depẽẽre yoo ɓay no, ni á mo wii Baa, ni Baa hã yaŋ ne je se no, werga á diŋ je hã fẽẽre ne jar ɓuy, hã go ɓil fehe.

⁶ Ama á mo hay go de hã ɓil ɓe ne Baa ga Baa hã yaŋ ne se, ni á mo wii Baa so, á mo hay mbraw ge wa hase, werga je maga mbraw mo caw á doo kaŋngaw bii maarog maga leege fern ɓaŋla ɓaŋla nono.

⁷ Ndi wãã go ga je ma doo kay mo ɗig ga se daʼ mopo yaŋ doo Waŋkluu wa,

⁸ werga á bay go de oo le sog wa, á de mbraw ge ɓoge.

Je ma de coocoo wo de je ma de horog debaŋ

⁹ Je maga yaŋ diŋ je ma wer Kris, á mo hay bà de coocoo layblaʼ, ni ɓil ɓe mo hay mbe go fehe, werga Baa wo hã horog ne hẽn ciŋ.

¹⁰ Je maga yaŋ diŋ je ma wer Kris ga horog ɓe yaŋ debaŋ, day Baa raw fer ti ɓe we go gesiŋ no, ni ɓil ɓe mo hay mbe go feh ti sen lay, werga je sen taw ge go doo fuɗgi fẽẽre ma yoo koo nono.

¹¹ Nday yaŋ de koge ga cege caa wùu we debaŋ, á raw lwaɗ fẽẽren wo go deparday tuu, fuɗgi ɓaara ray wo go tuu tuu lay, woore ɓaara joŋ ga so lay. Taʼ so no, je horog debaŋ taw ge go nen joŋre ɓen doosen no lay.

Lamge wo de jãɗge

¹² Je maga yaŋ ɗaw see ɓe ngiŋ soɗ bon maga daɗ ne ma lam ge ɓe mono se woo we. Werga bon sen wo go taw ge mokay á hã graŋ ma tenenn ne hẽne, diŋ gawraŋ maga Waŋkluu hay wãã go ga se hãn ne jar ma da wo se mo ɓuy no.

¹³ Re po jãɗ jobo we go joŋ ɓlagge no, á mo yaʼ wãã ge ga : Jãɗ se go joŋ re ɓlagge diŋ Baa nà ẽn la wa, werga re po jãɗ Baa joŋ re ɓlagge ga, Baa de see ɓe jãɗ jobo go joŋ re ɓlagge ga has lay.

¹⁴ Fen po ma de ɓlagge, jobo joŋ we de sãy ɓe ti no, fen sen raw kog ge ɓe, kaŋ wer ɓe go joŋ re ɓlagge.

¹⁵ Ɗiggi fẽẽre se ma de ɓlaggen wo ga sãy ɓaara ti ɓe mo deŋ yaʼ wer we hẽn ɓil pur so no, á raw ɓoʼ ɗee joŋ re ma de ɓlagge so, ɓlaggen wo we rug gi so no, á raw ʼwar ge ɓe go so.

¹⁶ Nday hẽẽre ɓi no, hãy we see ɓay wa.

¹⁷ Fẽẽre ma de eln wo mo deŋ ɓuy, a wo le diŋ ciŋ, hã ra le diŋ Baa, Baa je joŋ fẽẽre ma ciŋ wo ler ngel go no, á bay cor ge wa, á bay kiɗ gi ɓaŋla ɓaŋla caw kaŋ suŋgu ne jar nen wa.

¹⁸ Á raw sii wããre ɓe ma cwãy ne naa ma kol naa tenene, á joŋ naa no kay diŋ werga á co jag ɓe doosen no, maga naa mo hay de lagge pel fẽẽre maga á joŋ ra mo ɓuy no.

Coʼ sugi, joŋ joŋre

¹⁹ Nday hẽẽre ɓi no, coʼ we sug ɓay laa wããre se kay no, wosela mo hay coʼ sug wããre maga a wãɗ go deparday tuu tuu, ama jobo leʼ we fer wããre ne kẽẽ no, á mo fer wããre deparday wa, á mo sõõ ɓil deparday wa lay.

²⁰ Werga je maga ɓil ɓe sõɗ mo caw joŋ mopo ma ti ngel ɓe nen Baa gà.

²¹ Wersen re maga kaŋ ɗag we see wo de re ma de ɓlagge ma ɓil ɓayn wo mo deŋ ɓuy, men ra we go ɓuy. Yãɗ we jag wããre maga Baa de peɗ ge ɓe we ɓil mokay de ele, werga wããre sen yãɗ we ge go jag húulí.

²² Joŋ we doo ga Baa de riŋ we gen no. Je maga coʼ diŋ sug wããren tawa, ama hoo sug ti ɓe blam ga so mo caw dehãy ge diŋ see ɓe.

²³ Je maga coʼ diŋ sug wããren tawa, day joŋ ge doo ga wããren wãã no ga mo caw, á doo je maga ko see ɓe ɓil fen ko nene, ko see ɓe ga se no kay no.

²⁴ Wo kaŋ ti go mokay, raw yõõ ti see ɓe go tuun no.

²⁵ Ama je maga yaŋ fleg wer wããre Baa ma pog naa go ti see naa de el, yaŋ yãã jag ɓe bay ndar gog wa tum doo ga á wããn no, yaŋ coʼ sug ɓe de el yõõ ti ɓe go ga no, je ma sen mo caw, Baa raw woo ge ɓe wer joŋre ɓe se no. Werga wããre sen ti ngel ɓe keɗed debaŋ.

²⁶ Hayga jobo ɗig we ga se diŋ je ma goŋ Baa ti ngel ɓe, ama ko dig trum ɓe we see wããre ga no, goŋge Baa ɓen mo caw go de koɗ koɗe, á de hãy ge diŋ see ɓe.

²⁷ Goŋge Baa ma bay ɗag cwãyn yaŋ, sen co jag Baa Pããbe no, goŋge Baa ma sen diŋ ga wosela mo ko decoo weere holge wo de naare dwur maga wo de joŋ bon mono. Wosela mo joŋ see ɓe de ele, nen maga fẽẽre ma de ɓlagge se ma gesiŋ wo mo deŋ la mo kaŋ wo ɗag ne se see wa.