Kalge ɓil kefder seno
Filemoŋ diŋ jobo ma de ɗúu day se kal yãã wããre mani Kris no. Á diŋ je Kolos yoo Tayge jar jag Baa ma Kolos wo no. Á diŋ bar Pole (ma klee 1). Gebee ɓe po yaŋ à ɗen ga Onesim, day gebee ɓe sen la hay ɗee. Á bay de ko faage maga Onesim yiŋ wo de Pol nà yiŋ gi la wa, de wur maga Pol ti daŋgay mono. Fen maga joŋ ni diŋ ga Onesim raw yãã wããre Kris lay. Pol raw riŋgi ga se fern wo ne Filemoŋ waŋ ɓe no, á raw yer kefder wo ne hẽn ga á mo ɗaw ne doo gebee no wa so (de maga gebee ɗee we á maŋ ti ɓe diŋ bon maga á joŋn ge de ɓe mono), ama á mo ɗaw ne doo hẽn ɓe ma de hã ɓil ɓe ne Baa nono.
Blam maga Pol hee jag go ne Filemoŋ de jar ma see ɓen wo ni hee mono, (1-3) á raw joŋ suse ne Baa ti hãge se maga Filemoŋ hã ɓil ɓe ne hẽn joŋ joŋre ɓen de egre debaŋ mono (4-7). Blam sen á raw yer wããre ma jag ɓe ne hẽn ma wiigi ɓe ti Onesim ti maga wo de ferge see ɓe mono (8-22).
Ti ɓoʼ ge jag kefdern go mono yoo jar maga se her jag wo ne hara, á daʼ ɗúu jar po wo ni, maga wo diŋ jar maga ɗúu ɓaara ɓil kefder maga se ɓoʼ ne jar Kolose wo mo lay (4.10-12,14). Lan ɓil kefder maga Pol ɓoʼ ne jar Kolose wo maga wãã ti Arsippi (4.17). Joŋ de woge de kefder maga Pol ɓoʼ ne Filemoŋ wo de maga á ɓoʼ ne jar Kolose wo mo ɓog ɓuy ɓi sir Kolose diŋ Onesim.
Naa de ko ɗiggi ma de gaali maga Pol yer leedern wo ne bar ɓe Filemoŋ de ɓe mono : Á wiin ti mopo ni ga á mo joŋ ne ti jag se gà wii doole po ne hẽn gà lay, wãã ne hẽn ni ga Onesim bay diŋ gebee wa so wãã sen gà lay. Ama diŋ ga á wii jar maga jaŋ wo leeder sen mokay ɓuy ga naa tay we go de dage mani Yeson no, sen caa nen naa go ko ngel ma defay, day holaŋ jar téebeere kol wo see kããra sar ti ngel sen lay.
