Kalge ɓil kefder seno
Kefder mani Ester bag blam wããre ne naa ti faage wããre maga à hay go nen taw jar Jwif wo, day saara yãã le go jag gaali se maga hay põõ rage yããge la mono. Wããre sen joŋ diŋ ti wur maga jar Perse hay wo go de mbeɗ doo waŋ ɓaaran ti sir ma nen ɓaŋ wer wo wo no kay ɓuy mono, tĩĩ wer Eŋde kaʼ hãã nduu go kaŋge Ejipte. Ngaɓa jar Jwif po wo go de el taʼ maga jar ni ɓaara hay bay wo de ferge liŋ wa ɗa, de wur maga jar Babilon hay hoo wo ra le go, blam maga Babilon leʼ go gesiŋ nen kiŋgi ma 539 taŋgu Biŋgi Yeso Kris mono. Jar Jwif sen wo mokay hay wo tum daɗ gaali ti holaŋ jar maga saara yoo ɓaara mono, werga á hay wo seege diŋ wer jag liŋgi ɓaara wo, de tosge ɓaara wo de see ɓaara wora. Jag liŋgi sen wo de tosge ɓaara sen hay wo sar de ma jar lan wo no. De maga naa ko bagge blam wããre sen we ti fen maga joŋ ti holaŋ Haman Minisdir ma taŋgu mani waŋ Asuyerusn wo de Mardoke je Jwif maga hay ti joŋre ni lay mono, naa daʼ mono kefder sen la bag blam wããre ne naa ti fẽẽre ma girgir po maga joŋ wo ni. Faage maga Ester kol wãywaŋ ma Persen mono, de ɗeŋ maga Mardoke kaŋ nen ɓe ni, day de faage sen doo kay nono se joŋ nen yãã jar ɓen wo go jag gaali maga hay põõge ti ɓaara mono. Wããre sen mo taʼ diŋ ma ɗig ti naa ga ɗiggi maga à hay ɗiggi ti jar Jwif wo tum ga taw ra go mono, wããre sen hay tum tawge ti faage. Ti ngel ma taʼ la naw maga à hay go de ngaɓge ɓe ga diŋ naw ma taw jar Jwif wo go mono, kol diŋ naw maga taw go de koɗe day kol diŋ naw maga jar Jwif ndreɗ wo jar hee ɓaara wo go. Naw ma wursen kol diŋ naw few jar Jwif po wo, maga à ɗen ga few Purim, maga á joŋn wo go taŋgu few Page. Wããre maga de bag blam ɓil kefder mani Estern mono, sii ne naa diŋ faage maga few sen tĩĩ wer le ɓaa nà tĩĩgi la mono.
