ESTER 9 - Tupuri Bible

¹ Nen few ma de hwal ti ɓog maga diŋ few Adar mono, wur naw ma de hwal ti swaʼ ɓil few sen mono, ti wur maga wããre maga waŋ wããn go de jag liŋgi ɓuy maga á hãn go de tĩĩ wer joŋ joŋre so mokay no, ti wur maga jar hee jar Jwifn hay wo go wããge de ɓil ɓaara ga saara kol yaŋ de lag waŋre ti ɓaara la so mono, diŋ de faage po mbe la nokay ga ngeln ngiɗ mbe la kecegaɗ kay tuu. Jar Jwif kol wo de lag waŋre ti jar hee ɓaaran wo no.

² Ɓi leege ma ti cõõ sir mani waŋ Asuyerusn wo ɓuy, jar Jwif kal wo tay ti see ɓaara ma yiŋ jar hee ɓaara maga hay wo kiɗgi ga saara joŋ ra de ɓlagge mono. Jobo hay bay de kããge ma ooge pel ɓaara wa has ɓuy, werga hẽẽne jar Jwif hay joŋ wo ra go debaŋ.

³ Waŋre ma ti cõõ sirn wo ɓuy, Satrap wo no, goferner wo no, de jar egre ma ti waŋn wo ɓuy kal wo kay jar Jwif wo, werga hẽẽne Mardoke hay joŋ ra debaŋ.

⁴ Doo ga Mardoke hay kol diŋ je kluu ma liŋ ni waŋ ni so mono. Ɗúu ɓe kol wo go de rage ti cõõ sirn wo ɓuy, day à kol wo go wããge ti ɓe geɗgeɗ ɓuy.

⁵ Doo kay nono, jar Jwif kal wo id jar hee ɓaaran wo go de moslam, á id wo ra go, taw wo ra debaŋ, joŋ wo jar hee ɓaaran wo doo maga ɓil ɓaara da nono.

⁶ Ti meene sirn Sus taʼ tawa tuu saara id jar ni kiskis dwee.

⁷ Day, Parsandata, Dalfon, Aspata,

⁸ Potara, Adaliya, Aridata,

⁹ Parmasta, Arisay, Ariday wo de Farisata,

¹⁰ Weere ma hwal mani Haman je ni Hamedata wo no, je hee jar Jwif wo no, à ii ra go ɓuy. Á joŋ mbe doosen no ane, à frum fẽẽre gà.

¹¹ Wursen tuu, ngaɓa jar maga à ii ra ɓi leege Sus ti meene sirn joŋ nen woge daʼ waŋ.

¹² Waŋ kal wii wãywaŋ Ester ga : Sus ti meene sirn lam no, jar Jwif joŋ wo nen ii jar kiskis dwee, day ii wo weere ma hwal mani Haman wo go. Day wo ti cõõ sir mani waŋ ma lan wo wo mo hãʼ no, á bà wo wo de joŋge ti sen wo ni mo hãʼ joŋge pala!... Day fen maga ndo wiin nà diŋ mayla? À hãn mbe yaŋ ne ndo, fen maga ndo de sãy ɓe ti mono á diŋ mayla, à yiŋ jag ɓe yaŋ mbe ne ndo.

¹³ Ester kal fer wããre ne waŋ ga : Hayga á coo yaŋ jag waŋ no, daga hã faage ne jar Jwif ma Susn wo lay, maga á mo joŋ ti koore ma de cõõ wora.

¹⁴ Waŋ kal wããge ga joŋn doosen nono : À kal hã jag liŋgi sen go ɓi leege Susi, day à kal ɓal jar ni Haman ma hwaln wo go ciŋ jag koore ma de cõõ wo.

¹⁵ Jar Jwif ma Susn joŋ wo nen tay see ɓaara wur naw ma de hwal ti naan nen few ma Adar no, kal wo ii jar kiskis swaʼa, frum wo fẽẽre gà.

¹⁶ Jar Jwif ma ti cõõ sir waŋ ma lan wo wo mono, kal wo tay see ɓaara ma durgi go ti tenen ɓaara, maga jar hee saaran mo duʼ wo saara wa. Á ii wo jar hee ɓaaran wo ndar doo renam ti dwee, ama day wo frum fẽẽre gà. Sen diŋ wur naw ma de hwal ti swaʼ ɓil few ma Adare.

¹⁷ De wur naw ma hwal ti naan mono, saara lag iggi wurseno, kal wo joŋ few, joŋ wo fruygi wursen debaŋ.

¹⁸ Ma jar Jwif ma Sus wo mokay sen kal wo tay see ɓaara wur naw ma hwal ti swaʼ wo de wur naw ma de hwal ti naa no. De wur naw ma hwal ti dween mono, saara lag iggi wurseno, kal wo joŋ few, joŋ wo fruygi wursen debaŋ.

¹⁹ Diŋ wursen so ga jar Jwif ma ti prog wo, maga wo wo go de lagge ɓi leege ma mbásga wo mono, joŋ wo few, joŋ wo fruygi debaŋ wur naw ma de hwal ti naa ɓil few ma Adar mono, day ɓod wo mandekoɗ ne kããra lay mono.

²⁰ Mardoke kal yer fẽẽre sen wo mo deŋ ɓuy ɓil leeder maga se ɓod ra wo ne jar Jwif maga wo go ti cõõ sir mani waŋ Asuyerusn wo mo ɓuy no, maga wo ni maŋ de maga sen wo go hãã mo ɓuy no.

²¹ Sen diŋ maga á mo hoo wo sug ti naw ma de hwal ti naa maga go de maŋge mo hãʼ ɓil few ma Adar no, de naw ma de hwal ti dwee no.

²² Sen diŋ naw maga de ngaɓge doo naw maga ti wursen mo kay jar Jwif joŋ wo nen durgi go ti see ɓaara, diŋ nen few sen ga jiili ɓaara maga hay go de caage mono kol go diŋ fruygi, day roo húulí ɓaaran kol diŋ few. Ti ngel sen saara kal kol naw sen wo diŋ naw ma joŋ few, ma joŋ fruygi, ti ngel maga jar hã wo mandekoɗ ne kããra, hã wo ne jar coo wo lay.

²³ Jar Jwif kal wo seege wer wããre maga Mardoke wãã ne hara mono, kal wo ɗaw wããre maga few sen mokay mo hay diŋ few ma joŋge tum ti holaŋ jar Jwif wora.

²⁴ Mardoke hay ɗig ti ɓaara ti wããre maga : Haman je ni Hamedata no, ti wer mani Agag no, je hee jar Jwif wo ɓuy no, hay go de ɗiggi ga se taw jar Jwif wo go. Á hay joŋ nen ɓoʼ Pur we go, kaŋ nen ga à naa wãywáale we go ti ɓaara, ma kii ti ɓaara, ma taw rage go.

²⁵ Ama, de maga Ester joŋ nen woge pel waŋ mono, waŋ kal wããge go de yerge ga : Ɓlagge maga Haman hay wãã ga se joŋn see jar Jwif wo mono, mo fer leʼge diŋ ne hẽn ti doo ga, day ɓal jar ni ɓe ma hwaln wo go ciŋ jag koo ma de cõõ de ɓe ɓuy.

²⁶ Diŋ wersen ga à raw ɗe naw sen wo wursen ga Purim, ga nduu le diŋ see ɗúu maga à ɗe ga Pur mono. Ti ngel sen, diŋ wer fẽẽre se maga joŋ wo mo deŋ ɓuy no, maga hay wo de bag blam ɓil leedern mono, fẽẽre se maga á hay ko wo ra, maga hay daɗ wo ra mo deŋ no.

²⁷ Jar Jwif kal wo kaŋ tosge sen ti yoo ɓaara maga ɓlag ge go ti wer mani ɓaaran wo gà so de jar maga tay ge wo de ɓaara mo ɓuy no. Á hay wo joŋ few sen ti naw ma ɓog wo no, doo maga faage ɓe hay go de ɓoʼge nono, day doo maga wur ɓen hay go de ngaɓge nono, kiŋgi de kiŋgi.

²⁸ À hay de ɗaw naw sen ma ɗiggi ti kay, day à day joŋ few naw sen wo ti wer jar jwif maga ndar wo mono, ti feele ma honla ɓuy, ti cõõ sir ma honla ɓuy, ɓi leege ma honla ɓuy. Naw Purim wo diŋ naw maga dwas ge go wo go ni jar Jwif wo gà à yõõ ge ti ɓaara go yoo jar Jwif wo gà ti wer mani ɓaara yõõ ge wo go ti ɓaara gà hase.

²⁹ Wãywaŋ Ester, may mani Abikayiln wo de je Jwif Mardoke kal wo yer leeder go de kaŋ egre ɓaara ɓuy nen maga yiŋ jag go ne saara ti wããre leeder ma de ɓog ti glog few Purimn de ele.

³⁰ Ne jar Jwif maga wo ti cõõ sir ma kis ti ɓe doo ɓog ti renam mani waŋ Asuyerusn mono, à kal yer leeder maga wããre jam ɓil ɓe wo de wããre de bay ndarge gogge.

³¹ Naw Purim sen kal wo tĩĩ wer ti wur maga go de ngaɓge mono, ti wur maga jar Jwif hay wo hẽẽ bii, hay wo lawge mono, day je Jwif Mardoke wo de wãywaŋ Ester hay kaŋ wo naw sen diŋ wer ɓaara de see ɓaara, de wer mani ɓaaran wo no.

³² Wããre maga Ester wããn go mono, diŋ wããre maga tĩĩ wer few Purim mono, day à kal yer rage go ɓil kefdere.