ESTER 8 - Tupuri Bible

¹ Wursen dera tuu, waŋ Asuyerus kal hã tiŋ mani Haman go ne wãywaŋ Estere, je hee jar Jwif wo no. Mardoke kal nduugi pel waŋ, werga Ester hay naa nen fen maga de tay rage de kããra ne hẽne.

² Doo kay nono, waŋ kal maŋ boo waŋ ma ti wedoo maga á hay fer yããge ɓe doo Haman mono, kal hãge ɓe go ne Mardoke. Ti ngel sen Ester kal kaŋ Mardoke wãã wããre tiŋ mani Haman no.

Waŋ hã jag liŋgi go ma kay jar jwif wo

³ Ester taw ti ngel ma sen ni tawa gà á fer maŋ wããre pel waŋ, leʼ gesiŋ ɓaale ɓe. Á kal rage, raw kam waŋ, nen maga waŋ mo ɓlag fen maga Haman bloo se ma ti wer mani Agagn hay kneʼn go ma joŋ jar Jwif wo de ɓlagge mono, á mo ɓlagn go.

⁴ Waŋ kal coŋ graw boo biŋni ɓen ne Estere, se kal urgi go ciŋ deele pel waŋ.

⁵ Ga hayga á ko we nen waŋ de el no, day hayga wããre sen coo we jag waŋ no, hayga sen mokay leʼ we ne waŋ ɓil no, hayga ndi yaŋ de cõõre jag waŋ no, daga yer leeder ma dwas wããre maga Haman je ni Hamedata no, ma ti wer mani Agagn hay yern go ma taw jar Jwif wo go ti cõõ sir mani waŋ wo wo go ɓuy mono, dwas leeder sen go.

⁶ Koɗa, ndi hay ge mbi yeʼ de ngelge ko bon maga de nduugi daʼ jar ɓin wo mo hãʼ hayge la? Á nà doosen nono, ndi hay ge mbi yeʼ de ngelge koge ga wer mani ɓin wo mbaara go de yee nen mokay hayge ne?

⁷ Waŋ Asuyerus kal wii wãywaŋ Ester wo je Jwif Mardoke ga : Koɗa ndi hã tiŋ mani Haman go ne Estere, werga Haman mono, à ɓaln go ciŋ ti koo ma de cõõ, ti maga á hay maŋ doo ciŋ see jar Jwif wo mono.

⁸ Patala joŋ we nen yer leeder ti ɗúu waŋ so, joŋ we fen maga joŋ yaŋ nen jar Jwif wo de el mono, day ni nday kaŋ we kase mani waŋn ti ɓe. Werga wããre maga à yern we go ti ɗúu waŋ, day à kaŋ kase mani waŋn we go ti ɓe no, à fer go ɓlag wããre sen gà so.

⁹ À kal tay jar yerge mani waŋn wo le wursen dera tuu, naw hay wursen doo ɓog ti swaʼ ɓil few ma de swaʼ no, ga diŋ few Sifan mono. Day doo maga Mardoke joŋ nen ngaɓge ne hara nono, à kal yer leeder ne jar Jwif wo, ne Satrapn wo, ne gofernern wo, ne waŋre ma ti cõõ sirn wo ɓuy, le Eŋde kaʼ hãã wo go kaŋge Etiyopi, cõõ sir tiɗtiɗ kis ti ɓe doo ɓog ti renam. Á yern ne cõõ sir ma honla ɓuy de faage maga á yer jag ɓen de ɓe mono, ne jar ma hon wo la ɓuy de jag ɓaara.

¹⁰ À yer leedern wo ti ɗúu waŋ Asuyerusi, à kal kaŋ kase mani waŋn ti ɓaara, à kal laa jar soole wo de ɓaara. Á wo ti piiri wo, de piiri-gerhẽẽ maga manpiiri biŋ wora.

¹¹ Waŋ hã faage ne jar jwif wo ɓuy maga á mo tay wo ti go, ma durgi go ti see ɓaara, maga á mo taw wo jare, mo id wo jare, jar maga tayge wo ti wo go ti cõõ ngel wo mo ɓuy ma dur rage mono, á mo id wo mbaara ra hãy, ko weere kleere wo de naare wo, day mo frum wo mbaara fẽẽre ɓaaran hãy lay.

¹² Sen diŋ nen naw boŋ, wo go ti cõõ sir mani waŋ Asuyerusn wo ɓuy, nen naw ma hwal ti swaʼ ɓil few ma de hwal ti ɓog no, maga diŋ few Adar mono.

¹³ Go ti cõõ sirn wo ɓuy, wããre ma ɓil leedern mokay hay diŋ jag liŋgi po maga jar ɓuy de ko ne, day jar Jwif mo lag wo go de gragge ma saʼ hee ti jar hee ɓaaran wo wur naw maga go de ngaɓge mono.

¹⁴ Jar soolen ɗii wo ti piiri wo de gerhẽẽ-wayla wo, kal wo rawge deparday tuu, de maga waŋ hã faage go ne hara no kay mono. Jag liŋgi sen mokay la, à kal dusgi ɓe go ti meene sir Sus ɓuy lay.

¹⁵ Mardoke kal mbe yaʼ see ɓe go pel waŋ so, de õõbe waŋ ma de sẽẽ burbur ti, de ma depuy, de jugu boo biŋni ti, de õõbe ma kluu ma de joŋge de bisus wo de ma de sẽẽ. Ɓi leege Sus hay nen fruygi, nen fruygi ma kluu debaŋ.

¹⁶ Ɓil jar Jwif hay baa wo go de fruygi, de naage blum ɓaara no.

¹⁷ Go ti cõõ sirn wo ɓuy, go ɓi leegen wo ɓuy, go ti ngel wo ɓuy maga jag liŋgin day go ni mono, fruygi ma ti holaŋ jar Jwif won hay kluu debaŋ, sen hay see ɓaara diŋ few ma kluu debaŋ. Jar ma ɓi sir wo ni debaŋ kol wo see ɓaara go diŋ jar Jwifi, werga hẽẽne jar Jwif maga hay joŋ wora debaŋ.