ESTER 7 - Tupuri Bible

À naa Haman go, lan diŋ húulí ɓe tuu lay

¹ Waŋ kal wo woge de Haman ma joŋ few see wãywaŋ Estere.

² Ti wur naw se ma de ɓogn mokay no, de maga á wo de jo yii mo lag no, waŋ kal wii Ester ga : Ndo wii nà diŋ mayla wãywaŋ Estere? À hãn yaŋ mbe ne ndo. Fen maga sãy ɓe ti ɓo diŋ mayla? Hayba diŋ nus waŋn yaw, à yiŋ mbe jag ɓe yaŋ ne ndo.

³ Ester kal fer wããre ne waŋ ga : Hayga ndi ko we nen waŋ de el no, O waŋ, hayga á coo yaŋ jag waŋ no, koɗa, wiigi ɓin mokay no. Diŋ ga daga ndi mo hay tenen caw, fen maga ndi de sãy ɓe mono : Daga jar ɓin mo hay wo sugi.

⁴ Werga ndi de jar ɓin wo mono, à go de yee wùri, maga caa wer wùr go, id wùr go, ndreɗ wùr go! Pa mo hãʼ no, hayga à mo de hay yee wùr we go diŋ ma joŋ gebeere tawa no, ndi de hay joŋ mbi yaŋ baʼa, werga sen hay bay maga ndi gay coo waŋ ti sen mo taʼ wa.

⁵ Waŋ Asuyerus kal maŋ wããre day wii wãywaŋ Ester ga : Á diŋ wola, day á genla, je se maga ɓil ɓe go de bagge de ɗiggi ma doo kay no mo ɓa?

⁶ Ester kal fer wããre ne hẽn ga : Je hee no, je debaycõõre sen diŋ Hamane, bloo se ma de ɓlagge no. Haman kal ngruɓgi pel waŋ wo de wãywaŋ ni yeʼe.

⁷ Waŋ kal tĩĩgi go de waŋ, kal men ngel fewn go deparday, raw ɓil pay sugnee ma ti jeŋ tiŋ waŋ no. Haman kal gwaʼge mbe ti jeŋ wãywaŋ Ester ni so, jag joŋ kamkam ne hẽn maga á mo men mbe se tenen caw ɗala, werga á hay ko ɗiggi waŋ mokay no, ma ɓen á go de leʼ jag jag ɓe.

⁸ Waŋ hay mbe raŋge caw ɓil pay sugnee ma see tiŋ waŋ no, de tiŋ maga à hay wo joŋ few ni mono, de wur maga Haman wo go de legadge ti koo hayle maga Ester de gisgi ni mono. Waŋ kal ngar jag ga : Sen bà la, à nduu joŋ wãywaŋ de girgir ma sen mokay diŋ de mbèere nen ɓi tiŋma la tuu pa yaw! De maga wããre ma doo kay nono kal le go jag waŋ tawa, à raw kuu nen Haman go.

⁹ Harbona, jobo ma yoo jar ma de ndar ɓay wo, kal wããge pel waŋ ni ga : Á nà doosen nono, koo ma de cõõ maga Haman hay le de kneʼge ɓe liŋ ni ɓe see Mardoke, je maga hay wãã wer waŋ mono koo sen yaŋe. Koo se ma de cõõn ga gẽẽre ɓe ngaɓ meeder doo ɓog ti dwee mono. Waŋ day ga, daga ɓal Haman go ciŋ ti ɓe.

¹⁰ À kal ɓal Haman go ciŋ ti koo ma de cõõ maga á hay kneʼn see Mardoke mono. Doo kay nono, ɓil waŋ maga hay sõõ mono kal mbe go tawge so.