ESTER 6 - Tupuri Bible

Doole de daʼ Haman patala ma goŋ Mardoke

¹ De suŋ sen wursen mokay no, nen waŋ laa bà naa gà. Se kal wããge ga hoo kefder ma ɓaaɓaa maga wããre maga hay joŋ wo le ti waŋn ɓaa de yerge ɓil ɓe mono hoo ra le ne se.

² À kal daʼ wããre maga hay joŋ ti holaŋ Mardoke wo de Bigtan, de Teres jar ma de ndar ɓay ma ɓog mani waŋ wo no, maga hay wo gor jag tiŋn mono, jar maga hay wãã wo ga saara maŋ doo ciŋ see waŋ Asuyerus mono.

³ Waŋ day ga : Day fen maga à joŋ see Mardoke ma hã togoɗge ne hẽn lay so mono diŋ mayla? Jar maga hay wo ti joŋre ne waŋ mono, kal wo fer wããre ga : À bay de ma joŋ mopo ne hẽn meʼ wa ɓuy tuu yaw.

⁴ Waŋ day ga : Day, wose wo siigi mo ne? À wo daʼge mokay hay siigi ti feele tiŋ waŋ ma nen faalen ni diŋ Hamane, de nduugi wii waŋ ga ɓal Mardoke go ti koo ma de cõõ maga se hay kneʼn go see ɓe mono.

⁵ Jar ni waŋn kal wo ga : Siigi la ni diŋ Hamane. Waŋ day ga : Á mo kal le!

⁶ Haman raw kalge le, day waŋn wiin ga : Je maga waŋ de sãy hã togoɗge ne hẽn mono, à joŋ je sen joŋge la? Le nen ɓil ɓe hãã so mokay no, Haman kal ɗiggi ga : Je ma sen ge ga waŋ joŋ ge de sãy hã togoɗge ne hẽn go kar de ɓi mo hãʼ diŋ wo ne?

⁷ Haman kal wii waŋ ga : Jobo maga waŋ de sãy hã togoɗge ne hẽn ti?

⁸ Daga hoo õõbe waŋ ma kluu maga hay laan go ti ɓe, baa piir maga waŋ hay ɗii go ti ɓe, ga diŋ piir maga à hay kaŋ klaŋ waŋ go ne hẽn ti lay mono.

⁹ Baa jobo yoo jar kluuri joŋre ɓon wo boŋ maga á mo laa õõbe ne je sen ti, day mo kaŋn ciŋ ti piir ɓo no, day mo raw wo go de ɓe ti ngel tayge ma ɓi leegen no kay no, mo hay ti ngar jag pel ɓe caw ga : Mokay diŋ faage maga waŋ joŋ see jobo maga à de sãy hã togoɗge ne hẽn mono.

¹⁰ Waŋ kal wii Haman ga : De ele, see hoo õõbe le deparday de piiri, day ni ndo joŋ see Mardoke doo maga ndo ngaɓn ne ndi no tawtaw so no, bloo je Jwif maga de hayle jag tiŋn mono. See, bir doo maga ndo ngaɓ no tawtaw so no, caa mopo go see ɓe meʼ wa hase.

¹¹ Haman kal hoo õõben wo de piir no, kal laa õõben ne Mardoke ti, kal rawge raŋge de ɓe ti piir ti ngel tayge ma ɓi leege no, day kal ngar jag pel ɓe ga : Mokay diŋ fen maga à joŋ see je maga waŋ de sãy hã togoɗge ne hẽn mono!

¹² Blam ɓe Mardoke kal mbe ferge jag faage tiŋ mani waŋn so, day Haman kal rawge liŋ ni ɓe deparday, go de jel ti gesiŋ de sõõre.

¹³ Á raw bag blam fen maga joŋ mono ne wãy ɓe Seres wo de bar ɓe ma debaŋ wo no. Jar bag yaŋ ne hẽn wo de wãy ɓe Seres kal wo wiigi ɓe ga : Mardoke se maga ndo tĩĩ wer jel ti go gesiŋ pel ɓe mo caw diŋ je Jwifi, ti ngel sen mo hãʼ ndo daʼ ge faage ma kolge go pel ɓe gà so, ndo joŋ ge mbo tum diŋ je mbuɗ sõõre ne hẽn pele.

¹⁴ Á wo ti wããre lag ɗa, jar ma de ndar ɓay maga waŋ laa ra le kal wo nduugi tuu, day saara kal rawge de Haman deparday ma woge de ɓe ti few maga Ester hay de kneʼge ɓe mono.